ﻏﻪﻣﮕﻪ ﭘﺎﺗﻘﺎﻥ ﻳﻪﺭ ﺗﻪﯞﺭﻩﺵ ﺑﻪﻟﯟﯦﻐﻰ

• ﻣﯘﺧﺒﯩﺮﯨﻤﯩﺰ ﮔﯜﻟﭽﯧﻬﺮﻩﻧﯩﯔ ﺑﯘ ﻫﻪﻗﺘﯩﻜﻰ ﻣﻪﻟﯘﻣﺎﺗﻰ
• Download story audio

2003-ﻳﯩﻞ ﻓﯧﯟﺭﺍﻟﺪﺍ ﭼﻮﯕﻘﯘﺭﭼﺎﻗﺘﺎ ﻳﯜﺯ ﺑﻪﺭﮔﻪﻥ ﻳﻪﺭ ﺗﻪﯞﺭﻩﺷﺘﯩﻦ ﻛﯧﻴﯩﻨﻜﻰ ﺋﯩﻜﻜﯩﻨﭽﻰ ﻛﯧﭽﯩﻨﻰ ﺳﯩﺮﺗﺘﺎ ﺋﯚﺗﻜﯜﺯﮔﻪﻥ ﺑﯘ ﻛﯩﺸﻰ ﺋﻮﺕ ﺋﯩﺴﺴﯩﻨﻤﺎﻗﺘﺎ. AFP

ﻳﻪﺭ ﺗﻪﯞﺭﻩﺵ ﺑﻪﻟﯟﯦﻐﯩﻐﺎ ﺟﺎﻳﻼﺷﻘﺎﻥ ﻗﻪﺷﻘﻪﺭ، ﺋﺎﺗﯘﺵ، ﺋﺎﻗﺴﯘ، ﺧﻮﺗﻪﻧﻨﯩﯔ ﺑﻪﺯﻯ ﺟﺎﻳﻠﯩﺮﻯ ﺋﯘﻳﻐﯘﺭ ﺋﯧﻠﯩﺪﯨﻜﻰ ﺋﻪﯓ ﻛﯚﭖ ﻳﻪﺭ ﺗﻪﯞﺭﻩﺵ ﺭﺍﻳﻮﻧﻠﯩﺮﻯ ﻫﯧﺴﺎﺑﻠﯩﻨﯩﺪﯗ. ﺋﯘﻳﻐﯘﺭ ﺋﺎﭘﺘﻮﻧﯘﻡ ﺭﺍﻳﻮﻧﻰ ﺩﺍﺋﯩﺮﯨﻠﯩﺮﯨﻨﯩﯔ ﺋﯧﻼﻥ ﻗﯩﻠﻐﺎﻥ ﺳﺘﺎﺗﯩﺴﺘﯩﻜﯩﻠﯩﻖ ﻣﻪﻟﯘﻣﺎﺗﻠﯩﺮﯨﻐﺎ ﺋﺎﺳﺎﺳﻼﻧﻐﺎﻧﺪﺍ، 1900 - ﻳﯩﻠﯩﺪﯨﻦ ﺋﯧﺘﯩﺒﺎﺭﻩﻥ ﺑﯘ ﺭﺍﻳﻮﻧﻼﺭﺩﺍ ﻳﯜﺯ ﺑﻪﺭ ﺑﻪﺭﮔﻪﻥ ﯞﻩﻳﺮﺍﻥ ﻗﯩﻠﯩﺶ ﺧﺎﺭﺍﻛﺘﯧﺮﯨﺪﯨﻜﻰ ﺋﯧﻐﯩﺮ ﻳﻪﺭ ﺗﻪﯞﺭﻩﺵ ﺋﺎﭘﻪﺗﻠﯩﺮﯨﺪﻩ ﺟﻪﻣﺌﯩﻲ 2196 ﺋﺎﺩﻩﻡ ﺟﯧﻨﯩﺪﯨﻦ ﺋﺎﻳﺮﯨﻠﻐﺎﻥ ﯞﻩ ﺗﻮﻗﻘﯘﺯ ﻣﯩﯖﻐﺎ ﻳﯧﻘﯩﻦ ﺋﺎﺩﻩﻡ ﺋﯧﻐﯩﺮ ﻳﺎﺭﯨﻼﻧﻐﺎﻥ.

ﺋﺎﭘﻪﺗﺘﯩﻦ ﺳﺎﯞﺍﻕ

2003 - ﻳﯩﻠﻰ 24 - ﻓﯧﯟﺭﺍﻝ ﭘﻪﻳﺰﯨﯟﺍﺕ ﯞﻩ ﻣﺎﺭﺍﻟﺒﯧﺸﻰ ﻧﺎﻫﯩﻴﯩﻠﯩﺮﯨﻨﻰ ﺋﺎﺳﺎﺱ ﻗﯩﻠﯩﭗ ﻳﯜﺯ ﺑﻪﺭﮔﻪﻥ 6.8 ﺑﺎﻝ ﺩﻩﺭﯨﺠﯩﺪﯨﻜﻰ ﻳﻪﺭﺗﻪﯞﺭﻩﺵ، ﺋﯘﻳﻐﯘﺭ ﺋﯧﻠﻰ ﺗﺎﺭﯨﺨﯩﺪﺍ ﻳﯜﺯ ﺑﻪﺭﮔﻪﻥ ﺋﻪﯓ ﺋﯧﻐﯩﺮ ﻳﻪﺭ ﺗﻪﯞﺭﻩﺵ ﺋﺎﭘﯩﺘﻰ ﺑﻮﻟﯘﭖ 50 ﻣﯩﯖﺪﯨﻦ ﺋﺎﺭﺗﯘﻕ ﺧﻪﻟﻖ ﺋﺎﭘﻪﺗﻜﻪ ﺋﯘﭼﺮﯨﺪﻯ. ﺧﯩﺘﺎﻱ ﺩﺍﺋﯩﺮﯨﻠﯩﺮﯨﻨﯩﯔ ﺋﯧﻼﻥ ﻗﯩﻠﻐﺎﻥ ﺧﻪﯞﻩﺭﻟﯩﺮﯨﺪﻩ، ﻣﻪﺯﻛﯘﺭ ﻳﻪﺭ ﺗﻪﯞﺭﻩﺷﺘﻪ ﺋﯚﻟﮕﻪﻧﻠﻪﺭ ﺳﺎﻧﻰ 268، ﻳﺎﺭﯨﻼﻧﻐﺎﻧﻼﺭ 4000 ﺩﯨﻦ ﺋﺎﺷﺘﻰ، 8800 ﺋﯚﻱ ﺋﯚﺭﯛﻟﺪﻯ، ﻳﻪﻧﻪ 900 ﺩﯨﻦ ﺋﺎﺭﺗﯘﻕ ﺳﯩﻨﯩﭙﻼﺭ ﺋﯚﺭﯛﻟﺪﻯ، ﺋﻪﻣﻤﺎ ﭼﻪﺗﺌﻪﻝ ﻣﻪﺗﺒﯘﺋﺎﺗﻠﯩﺮﻯ ﻫﻪﻣﺪﻩ ﻳﻪﺭﻟﯩﻚ ﺋﺎﻣﻤﺎ، ﺋﺎﭘﻪﺗﻜﻪ ﺋﯘﭼﺮﺍﺵ ﺋﻪﻣﻪﻟﯩﻲ ﺋﻪﻫهﯞﺍﻟﯩﻨﯩﯔ ﺋﯘﻧﯩﯖﺪﯨﻨﻤﯘ ﺋﯧﻐﯩﺮ ﺑﻮﻟﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﺋﯩﺪﻯ.

ﮔﻪﺭﭼﻪ ﺑﯘ ﻳﻪﺭ ﺗﻪﯞﺭﻩﺵ ﻧﺎﻫﺎﻳﯩﺘﻰ ﺋﯧﻐﯩﺮ ﺋﺎﭘﻪﺕ ﻛﻪﻟﺘﯜﺭﮔﻪﻥ ﺑﻮﻟﺴﯩﻤﯘ، ﺑﯘ ﻳﻪﻧﻪ ﺋﯚﺯ ﻧﯚﯞﯨﺘﯩﺪﻩ، ﭼﻪﺗﺌﻪﻝ ﺋﺎﺧﺒﺎﺭﺍﺕ ﯞﺍﺳﺘﯩﻠﯩﺮﯨﻨﯩﯔ ﺑﯧﺴﯩﻤﻰ ﺷﯘﻧﺪﺍﻗﻼ ﭼﻪﺗﺌﻪﻟﻠﻪﺭﻧﯩﯔ ﻳﻪﺭ ﺗﻪﯞﺭﻩﺵ ﺋﺎﭘﯩﺘﯩﮕﻪ ﺋﯘﭼﺮﯨﻐﺎﻥ ﺭﺍﻳﻮﻧﻼﺭﻏﺎ ﺑﻪﺭﮔﻪﻥ ﻧﻪﭼﭽﻪ ﻣﯩﻠﻴﻮﻥ ﺩﻭﻟﻼﺭ ﺋﯩﺌﺎﻧﻪ ﺳﻮﻣﻤﯩﺴﻰ ﺧﯩﺘﺎﻱ ﻫﯜﻛﯜﻣﯩﺘﯩﻨﯩﯔ ﻳﻪﺭ ﺗﻪﯞﺭﻩﺵ ﺑﻪﻟﯟﯦﻐﯩﺪﺍ ﺋﻮﻟﺘﯘﺭﯗﺷﻠﯘﻕ ﺋﯘﻳﻐﯘﺭ ﺩﯦﻬﻘﺎﻧﻠﯩﺮﯨﻨﯩﯔ ﺗﯘﺭﺍﻟﻐﯘ ﻣﻪﺳﯩﻠﯩﺴﯩﮕﻪ ﻛﯚﯕﯜﻝ ﺑﯚﻟﯜﺷﯩﮕﻪ ﺳﻪﯞﻩﺏ ﺑﻮﻟﺪﻯ.

ﻣﻪﺯﻛﯘﺭ ﺋﯧﻐﯩﺮ ﺋﺎﭘﻪﺗﺘﯩﻦ ﻛﯧﻴﯩﻦ ﺧﯩﺘﺎﻱ ﻫﯚﻛﯜﻣﯩﺘﻰ، 2004 - ﻳﯩﻠﻰ 2 - ﺋﺎﻳﺪﯨﻦ ﺑﺎﺷﻼﭖ ﺑﻪﺵ ﻳﯩﻞ ﺋﯩﭽﯩﺪﻩ، ﺋﯘﻳﻐﯘﺭ ﺋﯧﻠﯩﻨﯩﯔ ﻳﻪﺭ ﺗﻪﯞﺭﻩﺵ ﺑﻪﻟﯟﯦﻐﯩﻐﺎ ﺟﺎﻳﻼﺷﻘﺎﻥ ﻧﺎﻣﺮﺍﺕ ﺩﯦﻬﻘﺎﻧﻼﺭﻧﻰ ﻳﻪﺭ ﺗﻪﯞﺭﻩﺷﻜﻪ ﭼﯩﺪﺍﻣﻠﯩﻖ ﺋﯚﻳﻠﻪﺭﮔﻪ ﻛﯚﭼﯜﺭﯛﺵ ﺋﯜﭼﯜﻥ ﺟﻪﻣﺌﯩﻲ ﺑﯩﺮ ﻣﯩﻠﻴﺎﺭﺩ ﻳﯜﻩﻥ ﻣﻪﺑﻠﻪﻍ ﺳﯧﻠﯩﭗ ﺑﯘﻧﻰ ﺋﯜﭺ ﻳﯩﻠﻐﺎ ﺑﯚﻟﯜﭖ ﺋﻪﻣﻪﻟﯩﻴﻠﻪﺷﺘﯘﺭﯨﺪﯨﻐﺎﻧﻠﯩﻘﯩﻨﻰ ﺋﯧﻼﻥ ﻗﯩﻠﺪﻯ.

ﭼﯩﺪﺍﻣﻠﯩﻖ ﺋﯚﻱ ﻣﻪﺑﻠﯩﻐﻰ ﭘﻪﻗﻪﺕ ﺑﯩﺮ ﺗﺎﻣﻐﺎ ﻳﻪﺗﺘﻰ

ﻣﺎﻧﺎ ﻫﺎﺯﯨﺮ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﻳﻪﺭ ﺗﻪﯞﺭﻩﺷﻜﻪ ﭼﯩﺪﺍﻣﻠﯩﻖ ﺋﯚﻳﻠﻪﺭﻧﻰ ﺳﯧﻠﯩﺶ ﻗﯘﺭﯗﻟﯘﺷﯩﻨﯩﯔ ﺋﺎﺧﯩﺮﻗﻰ ﻣﻪﺯﮔﯩﻠﻰ ﻫﯧﺴﺎﺑﻠﯩﻨﯩﺪﯗ. ﻳﻪﻧﻰ ﺩﺍﺋﯩﺮﯨﻠﻪﺭ ﺑﯘ ﻗﯘﺭﯗﻟﯘﺷﻨﻰ 2008 - ﻳﯩﻠﯩﻨﯩﯔ ﺋﺎﺧﯩﺮﯨﻐﯩﭽﻪ ﭘﯜﺗﯜﻧﻠﻪﻱ ﺗﺎﻣﺎﻣﻼﭖ ﺋﯘﻳﻐﯘﺭ ﺋﯧﻠﻰ ﺑﻮﻳﯩﭽﻪ ﺟﻪﻣﺌﯩﻲ ﺋﯩﻜﻜﻰ ﻣﯩﻠﻴﻮﻥ 10 ﻣﯩﯔ ﻧﺎﻣﺮﺍﺕ ﺩﯦﻬﻘﺎﻧﻨﻰ ﭘﯩﺸﺸﯩﻖ ﺧﯩﺸﻼﺭﺩﺍ ﺳﯧﻠﯩﻨﻐﺎﻥ ﭼﯩﺪﺍﻣﻠﯩﻖ ﻳﯧﯖﻰ ﺋﯚﻳﻠﻪﺭﮔﻪ ﻛﯚﭼﯜﺭﯛﭖ ﻛﯩﺮﻣﻪﻛﭽﻰ.

ﻧﯚﯞﻩﺗﺘﻪ، ﻳﻪﺭ ﺗﻪﯞﺭﻩﺵ ﺑﻪﻟﯟﯦﻐﯩﺪﯨﻜﻰ ﺑﻪﺯﻯ ﻧﺎﻫﯩﻴﻪ -ﻳﯧﺰﯨﻼﺭﺩﺍ ﺑﯩﺮ ﻗﯩﺴﯩﻢ ﺋﯚﻳﻠﻪﺭ ﭘﯜﺗﯜﭖ، ﻳﻪﺭ ﺗﻪﯞﺭﻩﺷﺘﻪ ﺋﯚﻳﺴﯩﺰ ﻗﺎﻟﻐﺎﻥ ﺑﻪﺯﻯ ﺩﯤهﻗﺎﻧﻼﺭ ﻳﯧﯖﻰ ﺋﯚﻳﻠﻪﺭﮔﻪ ﻛﯚﭼﯜﭖ ﻛﯩﺮﯨﺸﻜﻪ ﺑﺎﺷﻠﯩﻐﺎﻥ ﺑﻮﻟﺴﯩﻤﯘ، ﻳﻪﻧﻪ ﺑﻪﺯﻯ ﻳﯧﺰﯨﻼﺭﺩﺍ ﻳﻪﺭ ﺗﻪﯞﺭﻩﺷﻜﻪ ﭼﯩﺪﺍﻣﻠﯩﻖ ﺋﯚﻳﻠﻪﺭ ﻗﯘﺭﯗﻟﯘﺷﻰ ﺩﺍﯞﺍﻣﻠﯩﻖ ﺋﯧﻠﯩﭗ ﺑﯧﺮﯨﻠﻤﺎﻗﺘﺎ.

ﮔﻪﺭﭼﻪ ﻫﯚﻛﯜﻣﻪﺕ ﭼﯩﺪﺍﻣﻠﯩﻖ ﺋﯚﻳﻠﻪﺭ ﻗﯘﺭﯗﻟﯘﺷﯩﻐﺎ ﻣﻪﺧﺴﯘﺱ ﻣﻪﺑﻠﻪﻍ ﺋﺎﺟﺮﺍﺗﻘﺎﻥ ﺑﻮﻟﺴﯩﻤﯘ، ﺋﯘﻳﻐﯘﺭ ﺋﯧﻠﯩﻨﯩﯔ ﺧﻪﯞﻩﺭﻟﯩﺮﯨﺪﯨﻦ ﺷﯘﻧﺪﺍﻗﻼ ﺧﻪﻟﻘﻨﯩﯔ ﺋﯩﻨﻜﺎﺳﯩﺪﯨﻦ ﻣﻪﻟﯘﻣﻜﻰ ﻳﯧﯖﻰ ﺋﯚﻱ ﻗﯘﺭﯗﻟﯘﺷﻰ ﺩﺍﯞﺍﻣﯩﺪﺍ ﻣﻪﺳﺌﯘﻝ ﺋﻮﺭﯗﻧﻼﺭ ﻫﻪﻡ ﻛﺎﺩﯨﺮﻻﺭﻧﯩﯔ ﺧﯩﻴﺎﻧﻪﺗﭽﯩﻠﯩﻚ ﻗﯩﻠﯩﺶ، ﺷﻪﻛﯩﻠﯟﺍﺯﻟﯩﻖ، ﭘﺎﺭﯨﺨﻮﺭﻟﯘﻕ ﻗﯩﻠﯩﺸﯩﻐﺎ ﺋﻮﺧﺸﺎﺵ ﻣﻪﺳﯩﻠﯩﻠﻪﺭ ﻛﯧﻠﯩﭗ ﭼﯩﻘﻤﺎﻗﺘﺎ ﺋﯩﻜﻪﻥ.

ﺋﯩﻠﮕﯩﺮﻯ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻠﯘﻕ ﻫﯚﻛﯜﻣﻪﺗﻨﯩﯔ ﺑﯘ ﺧﯩﺰﻣﻪﺗﻜﻪ ﻣﻪﺳﺌﯘﻝ ﺋﻮﺭﯗﻧﻠﯩﺮﻯ ﺗﻪﻛﺸﯜﺭﯛﺵ ﺋﯧﻠﯩﭗ ﺑﯧﺮﯨﭗ، ﻫﻪﺭ ﻗﺎﻳﺴﻰ ﻧﺎﻣﺮﺍﺕ ﻳﯧﺰﯨﻼﺭﺩﺍ ﺳﯧﻠﯩﻨﯩﯟﺍﺗﻘﺎﻥ ﺑﯘ ﭼﯩﺪﺍﻣﻠﯩﻖ ﺋﯚﻳﻠﻪﺭﻧﯩﯔ 201 ﺋﯩﻨﯩﯔ ﺋﯚﻟﭽﻪﻣﺴﯩﺰ ﺑﻮﻟﯘﭖ ﭼﯩﻘﻘﺎﻧﻠﯩﻘﻰ، ﺑﯘ ﺋﯚﻳﻠﻪﺭﻧﻰ ﭘﯜﺗﯜﻧﻠﻪﻱ ﺑﯘﺯﯗﭖ ﺑﺎﺷﻘﯩﺪﯨﻦ ﻳﺎﺳﺎﺷﻘﺎ 3 ﻣﯩﻠﻴﺎﺭﺩ ﻳﯜﻩﻥ ﻛﯧﺘﯩﺪﯨﻐﺎﻧﻠﯩﻘﯩﻨﻰ ﺋﯧﻼﻥ ﻗﯩﻠﻐﺎﻥ ﺋﯩﺪﻯ، ﻧﯚﯞﻩﺗﺘﻪ ﻳﻪﺭ ﺗﻪﯞﺭﻩﺵ ﺑﻪﻟﯟﯦﻐﯩﻐﺎ ﺟﺎﻳﻼﺷﻘﺎﻥ ﺋﯘﻳﻐﯘﺭ ﻳﯧﺰﯨﻠﯩﺮﯨﺪﺍ ﻳﻪﺭ ﺗﻪﯞﺭﻩﺷﻜﻪ ﭼﯩﺪﺍﻣﻠﯩﻖ ﺋﯚﻱ ﻗﯘﺭﯗﻟﯘﺷﻰ ﺋﯧﻠﯩﭗ ﺑﯧﺮﯨﺶ ﺳﯩﻴﺎﺳﯩﺘﯩﻨﯩﯔ ﺋﻪﻣﻪﻟﯩﻴﻠﯩﺸﯩﺸﯩﺪﯨﻤﯘ ﺋﻮﺧﺸﺎﺷﻼ ﺋﯧﻐﯩﺮ ﻣﻪﺳﯩﻠﯩﻠﻪﺭ ﻣﻪﯞﺟﯘﺕ. ﺑﯘ ﻫﻪﻗﺘﻪ ﻳﯧﻘﯩﻨﺪﺍ ﻗﻪﺷﻘﻪﺭﻧﯩﯔ ﻛﻮﻧﺎ ﺷﻪﻫﻪﺭ ﻧﺎﻫﯩﻴﯩﺴﯩﻨﯩﯔ ﻣﻪﻟﯘﻡ ﻳﯧﺰﯨﺴﯩﺪﯨﻜﻰ ﺑﯩﺮ ﺩﯦﻬﻘﺎﻥ ﻣﻪﺯﻛﯘﺭ ﻧﺎﻫﯩﻴﯩﻨﯩﯔ ﻳﯧﺰﯨﻠﯩﺮﯨﺪﺍ ﺋﯧﻠﯩﭗ ﺑﯧﺮﯨﻠﯩﯟﺍﺗﻘﺎﻥ ﺑﯩﺨﻪﺗﻪﺭ ﺋﯚﻳﻠﻪﺭ ﻗﯘﺭﯗﻟﯘﺷﯩﺪﯨﻜﻰ ﺋﯧﻐﯩﺮ ﻣﻪﺳﯩﻠﯩﻠﻪﺭﻧﻰ ﺋﺎﺷﻜﺎﺭﯨﻠﯩﺪﻯ.

ﻧﺎﻫﯩﻴﻪ ﻛﺎﺩﯨﺮﻯ: "ﺑﯘﻧﻰ ﺳﻮﺭﺍﻳﺪﯨﻐﺎﻧﻐﺎ ﻧﯧﻤﻪ ﻫﻪﻗﻘﯩﯖﻼﺭ؟"

ﺑﯩﺰ ﺑﯘ ﺩﯦﻬﻘﺎﻧﻨﯩﯔ ﺋﯩﻨﻜﺎﺳﯩﻐﺎ ﺋﺎﺳﺎﺳﻪﻥ ﻛﻮﻧﺎ ﺷﻪﻫﻪﺭ ﻧﺎﻫﯩﻴﯩﻠﯩﻚ ﺧﻪﻟﻖ ﻫﯚﻛﯜﻣﯩﺘﯩﻨﯩﯔ ﻳﻪﺭ ﺗﻪﯞﺭﻩﺷﻜﻪ ﻗﺎﺭﺷﻰ ﭼﯩﺪﺍﻣﻠﯩﻖ ﺋﯚﻳﻠﻪﺭ ﻗﯘﺭﯗﻟﯘﺷﯩﻐﺎ ﻣﻪﺳﺌﯘﻝ ﺋﻮﺭﻧﯩﻐﺎ ﺗﯧﻠﯧﻔﻮﻥ ﻗﯩﻠﺪﯗﻕ:

- ﻫﯚﻛﯜﻣﻪﺕ ﺋﯩﺸﺨﺎﻧﯩﺴﯩﻤﯘ؟ ‏- ﻫﻪ ﻛﯩﻤﻨﻰ ﺋﯩﺰﺩﻩﻳﺴﯩﺰ؟ - ﻣﻪﻥ ﺋﻪﺭﻛﯩﻦ ﺋﺎﺳﯩﻴﺎ ﺭﺍﺩﯨﺌﻮﺳﯩﻨﯩﯔ ﻣﯘﺧﺒﯩﺮﻯ، ﺑﯩﺮ ﻣﻪﺳﯩﻠﯩﻨﻰ ﺳﻮﺭﯨﻤﺎﻗﭽﯩﺪﯨﻢ. ‏- ﻫﻪ، ﺳﯚﺯﻟﻪﯓ ‏-ﺋﺎﯕﻠﯩﺴﺎﻡ ﺳﯩﻠﻪﺭﻧﯩﯔ ﻧﺎﻫﯩﻴﯩﻨﯩﯔ ﻳﯧﺰﯨﻠﯩﺮﯨﺪﺍ ﺑﻮﻟﯘﭘﻤﯘ 6 - ﻫﻪﻣﺪﻩ 7 - ﻛﻪﻧﺘﻠﯩﺮﯨﺪﻩ ﭼﯩﺪﺍﻣﻠﯩﻖ ﺋﯚﻳﻠﻪﺭ ﻗﯘﺭﯗﻟﯘﺷﻰ ﺋﯧﻠﯩﭗ ﺑﯧﺮﯨﻠﯩﯟﯦﺘﯩﭙﺘﯩﻜﻪﻥ، ﺩﯦﻬﻘﺎﻧﻼﺭﻧﯩﯔ ﺋﯚﻳﯩﻨﯩﯔ ﭘﻪﻗﻪﺕ ﻛﻮﭼﯩﻐﺎ ﻗﺎﺭﺍﭖ ﺗﯘﺭﯨﺪﯨﻐﺎﻧﻼ ﺗﻪﺭﯨﭙﯩﻨﻰ ﭘﯩﺸﺸﯩﻖ ﻛﯧﺴﻪﻛﺘﻪ ﻗﯩﻠﯩﺸﺘﻪﻙ ﺷﻪﻛﯩﻠﯟﺍﺯﻟﯩﻖ ﻣﻪﺳﯩﻠﯩﻠﯩﺮﻯ ﻳﯜﺯ ﺑﯧﺮﯨﯟﯦﺘﯩﭙﺘﯘ، ﺑﯘ ﻫﻪﻗﺘﻪ ﺳﯩﻠﻪﺭﻧﯩﯔ ﺧﻪﯞﯨﺮﯨﯖﻼﺭ ﺑﺎﺭﻣﯘ؟ ‏- ﺑﯘﻧﺪﺍﻕ ﺋﯩﺶ ﺑﻮﻟﯘﺷﻰ ﻣﯘﻣﻜﯩﻨﻤﯘ؟ ﺳﯩﻠﻪﺭ ﺑﯘﻧﻰ ﻗﻪﻳﻪﺭﺩﯨﻦ ﺑﯩﻠﺪﯨﯖﻼﺭ؟ ‏- ﺑﯩﺰ ﺧﻪﻟﻖ ﺋﺎﻣﻤﯩﺴﯩﺪﯨﻦ ﺋﯩﮕﯩﻠﯩﮕﻪﻥ. ‏- ﺧﻪﻟﻖ ﺳﯩﻠﻪﺭﮔﻪ ﺋﯩﻨﻜﺎﺱ ﻗﯩﻼﻣﺪﯗ ﺗﯧﺨﻰ، ﺑﯩﺰﻣﯘ ﺑﯘﻧﺪﺍﻕ ﮔﻪﭘﻨﻰ ﺋﺎﯕﻼﭖ ﺑﺎﻗﻤﯩﺴﺎﻕ. ﻫﯚﻛﯜﻣﻪﺗﻨﯩﯔ ﺑﯘ ﻗﯘﺭﯗﻟﯘﺷﯩﻨﯩﯔ ﺋﻪﻣﻪﻟﯩﻴﻠﯩﺸﯩﺸﻰ ﺋﯩﻨﺘﺎﻳﯩﻦ ﻳﺎﺧﺸﻰ ﻛﯧﺘﯩﭗ ﺑﺎﺭﯨﺪﯗ. ‏- ﻳﯧﺰﯨﻼﺭﺩﺍ ﺑﯘﻧﯩﯔ ﺋﻪﻣﻪﻟﯩﻴﻠﯩﺸﯩﺸﯩﺪﻩ ﻣﻪﺳﯩﻠﻪ ﻛﯚﺭﯛﻟﮕﻪﻥ ﺑﻮﻟﯘﺷﻰ ﻣﯘﻣﻜﯩﻦ ﺑﯘ ﻫﻪﻗﺘﻪ ﺋﯩﻨﻜﺎﺱ ﻛﻪﻟﻤﯩﺪﯨﻤﯘ؟ ‏- ﺋﻪﻟﯟﻩﺗﺘﻪ ﻫﻪﻣﻤﻪ ﻳﻪﺭﻟﻪﺭ ﻫﻪﺭ ﺧﯩﻞ ﻣﻪﺳﯩﻠﯩﻠﻪﺭﺩﯨﻦ ﺧﺎﻟﻰ ﺑﻮﻻﻟﻤﺎﻳﺪﯗ. - ﺑﯩﻠﯩﺸﯩﻤﯩﺰﭼﻪ، ﻫﯚﻛﯜﻣﻪﺕ ﺑﯘ ﻗﯘﺭﯗﻟﯘﺷﻘﺎ ﻣﻪﺧﺴﯘﺱ ﻣﻪﺑﻠﻪﻍ ﺋﺎﺟﺮﺍﺗﻘﺎﻥ ﺋﯩﻜﻪﻥ. ‏- ﺗﻮﻏﺮﺍ، ﻫﻪﺭ ﺑﯩﺮ ﺋﺎﺋﯩﻠﯩﻨﯩﯔ ﻳﯧﯖﻰ ﺋﯚﻱ ﻗﯘﺭﯗﻟﯘﺷﯩﻐﺎ ﺋﺎﻳﺮﯨﻢ ﻣﻪﺑﻠﻪﻍ ﺑﺎﺭ، ﺋﺎﺋﯩﻠﻪ ﺋﯩﻘﺘﯩﺴﺎﺩﻯ ﺋﻪﻫﯟﺍﻟﯩﻐﺎ ﻗﺎﺭﺍﭖ ﺗﻪﻗﺴﯩﻢ ﻗﯩﻠﯩﻨﯩﺪﯗ. ‏- ﺳﯩﻠﻪﺭ ﻣﻪﺑﻠﻪﻏﻨﻰ ﺋﺎﺳﺎﺳﯩﻲ ﻗﺎﺗﻼﻣﻐﺎ ﭼﯜﺷﯜﺭﮔﻪﻧﺪﯨﻦ ﻛﯧﻴﯩﻦ ﺋﯘﻧﯩﯔ ﺋﻪﻣﻪﻟﯩﻴﻠﯩﺸﯩﺶ ﺋﻪﻫﯟﺍﻟﯩﻨﻰ ﺗﻪﻛﺸﯜﺭﯛﭖ ﺑﺎﻗﺘﯩﯖﻼﺭﻣﯘ؟ ‏- ﺋﺎ.....، ﺑﯘﻧﯩﯖﺪﺍ ﻫﯧﭽﻘﺎﻧﺪﺍﻕ ﻣﻪﺳﯩﻠﻪ ﻳﻮﻕ، ﺳﯩﻠﻪﺭ ﺑﯘ ﻧﻪﺭﺳﯩﻠﻪﺭﻧﻰ ﺳﻮﺭﺍﭖ ﻧﯧﻤﻪ ﻗﯩﻠﻤﺎﻗﭽﻰ ؟ ‏- ﭼﯜﻧﻜﻰ ﺑﯩﺰﮔﻪ ﺧﻪﻟﻘﺘﯩﻦ ﺋﯩﻨﻜﺎﺱ ﻛﻪﻟﮕﻪﻧﻠﯩﻜﻰ ﺋﯜﭼﯜﻥ ﺑﯩﺰ ﭘﻪﻗﻪﺕ ﻫﻪﻗﯩﻘﯩﻲ ﺋﻪﻫﯟﺍﻟﻨﻰ ﺋﯩﮕﯩﻠﻪﭖ ﻛﯚﺭﻣﻪﻛﭽﻰ.ﺋﻪﻣﻪﻟﯩﻲ ﺋﻪﻫﯟﺍﻟﻨﯩﻤﯘ ﺳﻮﺭﺍﺷﻘﺎ ﺑﻮﻟﻤﺎﻣﺪﯗ؟ ‏‏- ﺳﻪﻥ..... ﻧﯧﻤﻪ ﺋﯘ ﺋﺎﺳﯩﻴﺎ ﺋﻪﺭﻛﯩﻦ ﺭﺍﺩﯨﺌﻮﺳﻰ، ﺑﯘ ﻳﻪﺭﺩﻩ ﺳﯩﻠﻪﺭﻧﯩﯔ ﺑﯩﺰﻧﻰ ﺯﯨﻴﺎﺭﻩﺕ ﻗﯩﻠﯩﺪﯨﻐﺎﻥ ﻧﯧﻤﻪ ﻫﻪﻗﻘﯩﯖﻼﺭ ﺑﺎﺭ؟ ﺑﯘ ﺋﻪﻟﯟﻩﺗﺘﻪ ﻳﺎﻟﻐﺎﻥ ﮔﻪﭖ، ﺳﯩﻠﻪﺭ ﺑﻪﺯﻯ ﺋﯚﺳﻪﻛﭽﯩﻠﻪﺭﻧﯩﯔ ﻳﺎﻟﻐﺎﻥ ﮔﻪﭘﻠﯩﺮﯨﮕﻪ ﺋﺎﻟﺪﯨﻨﯩﭗ ﻗﺎﭘﺴﯩﻠﻪﺭ، ﻣﻪﻥ ﺑﯘ ﺋﯩﺸﻘﺎ ﻣﻪﺳﺌﯘﻝ ﺋﺎﺩﻩﻡ ﺋﻪﻣﻪﺱ، ﺋﯩﮕﯩﺴﯩﻨﻰ ﺗﯧﭙﯩﭗ ﺯﯨﻴﺎﺭﻩﺕ ﻗﯩﻠﯩﯖﻼﺭ. ‏- ﺋﯘﻧﺪﺍﻗﺘﺎ ﺑﯘ ﺋﻪﻫﯟﺍﻟﻼﺭﺩﯨﻦ ﺧﻪﯞﯨﺮﯨﯖﯩﺰ ﻳﻮﻕ ﺗﯘﺭﯗﭖ، ﻧﯧﻤﯩﮕﻪ ﺋﺎﺳﺎﺳﻪﻥ ﺑﯘﻧﺪﺍﻕ ﺋﻪﻫﯟﺍﻝ ﻳﻮﻕ ﺩﻩﭖ ﺟﺎﯞﺍﺏ ﺑﯧﺮﯨﺴﯩﺰ. ‏- ﻣﻪﻥ ﻣﯘﺷﯘ ﻳﻪﺭﺩﻩ ﺋﯩﺸﻠﻪﻳﺪﯨﻐﺎﻥ ﺗﯘﺭﺳﺎﻡ ﺋﻪﻟﯟﻩﺗﺘﻪ ﺑﯩﻠﯩﻤﻪﻥ ‏- ﺩﻩ. ﻧﻪﺩﯨﻦ ﺗﯧﻠﯧﻔﻮﻥ ﻗﯩﻠﯩﯟﺍﺗﯩﺴﯩﺰ؟ ‏- ﺋﺎﻣﯧﺮﯨﻜﺎ ﯞﺍﺷﯩﻨﮕﯩﺘﻮﻧﺪﯨﻦ

ﺋﯘ ﺗﯧﻠﯧﻔﻮﻥ ﺗﯘﺭﯗﭘﻜﯩﺴﯩﻨﻰ ﺗﺎﺷﻠﯩﯟﻩﺗﺘﻰ.

2006 - ﻳﯩﻠﯩﺪﺍ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻠﯘﻕ ﻫﯚﻛﯜﻣﻪﺕ، ﻗﻪﺷﻘﻪﺭ، ﺋﺎﻗﺴﯘ ﻗﺎﺗﺎﺭﻟﯩﻖ ﺟﺎﻳﻼﺭﺩﯨﻜﻰ ﻳﻪﺭ ﺗﻪﯞﺭﻩﺷﻜﻪ ﭼﯩﺪﺍﻣﻠﯩﻖ ﺋﯚﻳﻠﻪﺭ ﻗﯘﺭﯗﻟﯘﺷﯩﻐﺎ ﻣﻪﺳﺌﯘﻝ 12 ﺋﻮﺭﮔﺎﻧﻨﻰ ﻫﯚﻛﯜﻣﻪﺗﻨﯩﯔ ﻳﯧﯖﻰ ﺋﯚﻱ ﻗﯘﺭﯗﺵ ﯞﻩﺯﯨﭙﯩﺴﯩﻨﻰ ﯞﺍﻗﺘﯩﺪﺍ ﻳﺎﺧﺸﻰ ﺗﺎﻣﺎﻣﻠﯩﻐﺎﻥ ﺋﯩﻠﻐﺎﺭ ﺋﻮﺭﯗﻧﻼﺭ ﻗﺎﺗﺎﺭﯨﺪﺍ ﻣﯘﻛﺎﭘﺎﺗﻠﯩﻐﺎﻥ ﺋﯩﺪﻯ. (ﮔﯜﻟﭽﯧﻬﺮﻩ)