ﻳﻮﭘﯘﺭﻏﺎ ﻳﯧﺰﯨﺴﯩﻐﺎ ﭼﺎﭘﻼﻧﻐﺎﻥ ﯞﺍﺭﺍﻗﭽﻪ

• ﻣﯘﺧﺒﯩﺮﯨﻤﯩﺰ ﮔﯜﻟﭽﯧﻬﺮﻩﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﻳﯧﻘﯩﻨﺪﺍ ﻗﻪﺷﻘﻪﺭﺩﯨﻦ ﺋﯩﺴﻤﯩﻨﻰ ﺋﺎﺷﻜﺎﺭﯨﻼﺷﻨﻰ ﺧﺎﻟﯩﻤﯩﻐﺎﻥ ﺑﯩﺮ ﺩﯦﻬﻘﺎﻥ، ﻳﻮﭘﯘﺭﻏﺎ ﻧﺎﻫﯩﻴﯩﺴﯩﺪﻩ ﺋﯜﭺ ﻳﯩﻠﺪﯨﻦ ﺑﯧﺮﻯ ﻳﯜﺯ ﺑﯧﺮﯨﯟﺍﺗﻘﺎﻥ ﻧﺎﻫﻪﻗﭽﯩﻠﯩﻜﻠﻪﺭﮔﻪ ﭼﯩﺪﺍﭖ ﺗﯘﺭﺍﻟﻤﺎﻱ، ﺑﯩﺰﮔﻪ ﺗﯧﻠﯧﻔﻮﻥ ﻗﯩﻠﯩﭗ ﺧﻪﻟﻘﻨﯩﯔ ﻫﺎﻟﯩﻨﻰ ﻳﻪﺗﻜﯜﺯﻣﻪﻛﭽﻰ ﺋﯩﻜﻪﻧﻠﯩﻜﯩﻨﻰ ﺋﯧﻴﺘﺘﻰ.

ﮔﯘﻧﺎﻫﺴﯩﺰﻻﺭﻧﯩﯔ ﺗﯚﻟﯩﮕﻪﻥ ﺟﻪﺭﯨﻤﺎﻧﯩﻠﯩﺮﻯ ﻗﺎﻳﺘﯘﺭﯗﭖ ﺑﯧﺮﯨﻠﻤﯩﮕﻪﻥ

ﺑﯩﺰ ﺑﯘ ﻛﯩﺸﯩﻨﯩﯔ ﺋﯧﻴﺘﻘﺎﻧﻠﯩﺮﯨﻐﺎ ﺋﺎﺳﺎﺳﻪﻥ، ﻣﻪﺯﻛﯘﺭ ﻣﻪﺳﯩﻠﻪ ﻫﻪﻗﻘﯩﺪﻩ ﻳﻪﻧﯩﻤﯘ ﺗﻪﭘﺴﯩﻠﯩﻲ ﻣﻪﻟﯘﻣﺎﺕ ﺋﯧﻠﯩﺶ ﻣﻪﻗﺴﯩﺘﯩﺪﻩ ﻳﻮﭘﯘﺭﻏﺎ ﻧﺎﻫﯩﻴﯩﺴﯩﺪﯨﻜﻰ ﻳﯧﺰﯨﻼﺭﻏﺎ ﻗﺎﺭﯨﺘﯩﭗ ﺗﯧﻠﯧﻔﻮﻥ ﻗﯩﻠﺪﯗﻕ. ﺑﯩﺮ ﻗﺎﻧﭽﻪ ﺩﯦﻬﻘﺎﻧﻨﯩﯔ ﺋﯩﻨﻜﺎﺳﻠﯩﺮﯨﻐﺎ ﺋﺎﺳﺎﺳﻼﻧﻐﺎﻧﺪﺍ، 2003 - ﻳﯩﻠﻰ -6 ﺋﺎﻳﻨﯩﯔ -19 ﻛﯜﻧﻰ ﺗﯧﺮﻩﻡ ﻳﯧﺰﯨﻠﯩﻖ ﻫﯚﻛﯜﻣﻪﺗﻨﯩﯔ ﺗﻪﺷﯟﯨﻘﺎﺕ ﺗﺎﺧﺘﯩﺴﯩﻐﺎ ﺧﻪﺕ ﭼﺎﭘﻼﺵ ﯞﻩﻗﻪﺳﯩﻨﻰ ﻳﻪﺭﻟﯩﻚ ﺳﺎﻗﭽﯩﻼﺭ ﺗﯧﺮﻩﻡ ﻳﯧﺰﯨﺪﯨﻜﻰ ﺑﯚﻟﮕﯜﻧﭽﯩﻠﯩﻚ ﺩﯦﻠﻮﺳﻰ ﺩﻩﭖ ﺑﯧﻜﯩﺘﯩﭗ، ﺷﯘ ﻛﯜﻧﯩﺪﯨﻦ ﺑﺎﺷﻼﭖ ﺧﯘﺷﺨﻪﺕ ﻳﺎﺯﺍﻻﻳﺪﯨﻐﺎﻥ، ﺩﯨﻨﯩﻲ ﺋﯧﺘﯩﻘﺎﺩﻯ ﻛﯜﭼﻠﯜﻙ ﮔﯘﻣﺎﻧﻠﯩﻖ ﺩﻩﭖ ﻗﺎﺭﺍﻟﻐﺎﻥ ﺩﯦﻬﻘﺎﻧﻼﺭﻧﻰ ﺟﯩﻨﺎﻳﻪﺕ ﮔﯘﻣﺎﻧﺪﺍﺭﻟﯩﺮﻯ ﻗﺎﺗﺎﺭﯨﺪﺍ ﺗﯘﺗﯘﭖ، ﺑﯘ ﺟﻪﺭﻳﺎﻧﺪﺍ ﺑﯩﺮﻩﺭ ﻣﯩﯖﻐﺎ ﻳﯧﻘﯩﻦ ﻛﯩﺸﯩﻨﻰ ﺗﯘﺗﯘﭖ ﺳﻮﻟﯩﻐﺎﻧﺪﯨﻦ ﺑﺎﺷﻘﺎ ﻛﯜﻧﻠﯜﻛﯩﮕﻪ 35 ﻳﯜﺋﻪﻧﺪﯨﻦ ﺟﻪﺭﯨﻤﺎﻧﻪ ﺋﺎﻟﻐﺎﻥ، ﺑﯘ ﺋﺎﺭﯨﺪﺍ ﻫﯧﻴﺘﺎﺧﯘﻥ ﻫﻮﺷﯘﺭ ﺋﯩﺴﯩﻤﻠﯩﻚ ﺑﯩﺮ ﻳﺎﺷﻤﯘ، ﺧﻪﺕ ﭘﻮﭼﯩﺮﻛﯩﺴﻰ ﯞﺍﺭﻩﻗﭽﯩﺪﯨﻜﻰ ﺧﻪﺗﻜﻪ ﺋﻮﺧﺸﯩﻐﺎﻧﻠﯩﻘﻰ ﺋﯜﭼﯜﻥ ﺗﯘﺗﯘﭖ ﺳﻮﺭﺍﻕ ﻗﯩﻠﯩﻨﻐﺎﻥ. 130 ﻛﯜﻧﺪﯨﻦ ﻛﯧﻴﯩﻦ ﺑﯘ ﻳﺎﺷﻨﯩﯔ ﻣﻪﺯﻛﯘﺭ ﺩﯦﻠﻮ ﺑﯩﻠﻪﻥ ﺋﺎﻻﻗﯩﺴﻰ ﻳﻮﻗﻠﯩﻘﻰ ﺋﯧﻨﯩﻘﻠﯩﻨﯩﭗ ﻗﻮﻳﯘﭖ ﺑﯧﺮﯨﻠﮕﻪﻥ ﺑﻮﻟﺴﯩﻤﯘ، ﺋﯘ ﺗﯚﻟﯩﮕﻪﻥ ﺑﯩﺮ ﻧﻪﭼﭽﻪ ﻣﯩﯔ ﻳﯜﺋﻪﻥ ﺟﻪﺭﯨﻤﺎﻧﯩﻨﻰ ﻗﺎﻳﺘﯘﺭﯗﭖ ﺑﻪﺭﻣﯩﮕﻪﻥ.

ﻳﯧﻘﯩﻨﺪﺍ ﻣﻪﺯﻛﯘﺭ ﺩﯦﻠﻮﻧﯩﯔ ﺗﯧﺮﻩﻡ ﻳﯧﺰﯨﻠﯩﻖ ﺗﻮﻟﯘﻗﺴﯩﺰ ﺋﻮﺗﺘﯘﺭﺍ ﻣﻪﻛﺘﻪﭘﻨﯩﯔ ﺋﻮﻗﯘﺗﻘﯘﭼﻰ ﻫﻪﻡ ﺋﻮﻗﯘﻏﯘﭼﯩﻠﯩﺮﻯ ﺑﯩﻠﻪﻥ ﻣﯘﻧﺎﺳﯩﯟﻩﺗﻠﯩﻚ ﺋﯩﻜﻪﻧﻠﯩﻜﻰ ﺑﯧﻜﯩﺘﯩﻠﮕﻪﻥ. ﺋﻪﻣﻤﺎ ﺑﯘ ﻣﯘﻧﺎﺳﯩﯟﻩﺕ ﺑﯩﻠﻪﻥ ﺋﯩﻠﮕﯩﺮﻯ ﺳﻮﻻﻧﻐﺎﻥ ﺩﯦﻬﻘﺎﻧﻼﺭﻧﯩﯔ ﺗﺎﺭﺗﻘﺎﻥ ﺯﯨﻴﺎﻧﻠﯩﺮﯨﻨﯩﯔ ﺳﻮﺭﯨﻘﻰ ﺑﻮﻟﻤﯩﻐﺎﻥ، ﺭﻭﻫﯩﻲ، ﺟﯩﺴﻤﺎﻧﯩﻲ ﻫﻪﻡ ﺋﯩﻘﺘﯩﺴﺎﺩﻯ ﺟﻪﻫﻪﺗﻠﻪﺭﺩﯨﻦ ﻧﺎﻫﻪﻕ ﺯﯨﻴﺎﻧﻐﺎ ﺋﯘﭼﺮﯨﻐﯘﭼﻰ ﺩﯦﻬﻘﺎﻧﻼﺭ ﻣﯘﻧﺎﺳﯩﯟﻩﺗﻠﯩﻚ ﺩﺍﺋﯩﺮﯨﻠﻪﺭﮔﻪ ﺋﻪﺭﺯ ﻗﯩﻠﯩﭗ ﻛﯚﺭﮔﻪﻥ ﺑﻮﻟﺴﯩﻤﯘ، ﺋﻪﺭﺯﻧﻰ ﻫﯧﭽﻜﯩﻤﮕﻪ ﺋﺎﯕﻠﯩﺘﺎﻟﻤﯩﻐﺎﻥ.

ﺩﯦﻬﻘﺎﻧﻼﺭﻧﻰ ﺋﺎﺳﺎﺳﺴﯩﺰ ﻗﺎﺧﺸﺎﺗﻘﺎﻥ ﺳﺎﻗﭽﻰ ﺋﯚﺳﺘﯜﺭﯛﻟﮕﻪﻥ

ﺋﻪﻛﺴﯩﭽﻪ، ﺋﻪﺳﻠﻰ ﺗﯧﺮﻩﻡ ﻳﯧﺰﯨﻠﯩﻖ ﺳﺎﻗﭽﻰ ﭘﻮﻧﻜﯩﺘﯩﻨﯩﯔ ﺟﯩﻨﺎﻳﻰ ﺋﯩﺸﻼﺭ ﺳﺎﻗﭽﯩﺴﻰ، ﻣﻪﺯﻛﯘﺭ ﺑﯚﻟﮕﯜﻧﭽﯩﻠﯩﻚ ﺩﯦﻠﻮﺳﯩﻐﺎ ﻣﻪﺳﺌﯘﻝ ﺑﻮﻟﻐﺎﻥ، ﻗﺎﻻﻳﻤﯩﻘﺎﻥ ﺟﻪﺭﯨﻤﺎﻧﻪ ﻳﯩﻐﯩﭗ ﺩﯦﻬﻘﺎﻧﻼﺭﻧﻰ ﺗﯘﺗﻘﯘﻥ ﻗﯩﻠﯩﭗ ﺟﺎﻕ ﻗﺎﻗﺸﺎﺗﻘﺎﻥ ﺗﯘﺭﻏﯘﻥ ﺧﯘﺩﺍﺑﻪﺭﺩﯨﻨﯩﯔ ﻳﯧﻘﯩﻨﺪﺍ ﺧﯩﺰﻣﻪﺕ ﻛﯚﺭﺳﻪﺗﺘﻰ ﺩﻩﭖ ﻳﻮﭘﯘﺭﻏﺎ ﻧﺎﻫﯩﻴﯩﻠﯩﻚ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻚ ﺋﯩﺪﺍﺭﯨﺴﯩﮕﻪ ﺳﯩﻴﺎﺳﯩﻲ ﻛﻮﻣﯩﺴﺴﺎﺭ ﻗﯩﻠﯩﭗ ﺋﯚﺳﺘﯜﺭﯛﻟﮕﻪﻧﻠﯩﻜﻰ ﺩﯦﻬﻘﺎﻧﻼﺭﻧﯩﯔ ﻏﯘﺭﯗﺭﯨﻐﺎ ﺗﯧﺨﯩﻤﯘ ﻗﺎﺗﺘﯩﻖ ﺗﻪﮔﻜﻪﻥ ﺑﻮﻟﯘﭖ، ﺋﯘﻻﺭ ﺑﯩﮕﯘﻧﺎﻫ ﺳﻮﻻﻧﻐﺎﻧﺪﯨﻨﻤﯘ ﺑﻪﻛﺮﻩﻙ ﺧﻮﺭﻟﯘﻕ ﻫﻪﻡ ﻧﺎﻫﻪﻗﭽﯩﻠﯩﻚ ﻫﯧﺲ ﻗﯩﻠﻐﺎﻥ.

ﺑﯩﺮ ﺩﯦﻬﻘﺎﻧﻨﯩﯔ ﺋﯧﻴﺘﯩﺸﯩﭽﻪ، ﺗﯘﺭﻏﯘﻥ ﺧﯘﺩﺍﺑﻪﺭﺩﻯ، ﺋﯜﭺ ﻳﯩﻞ ﺟﻪﺭﻳﺎﻧﯩﺪﺍ ﻳﻮﭘﯘﺭﻏﺎ ﻧﺎﻫﯩﻴﯩﺴﯩﺪﯨﻜﻰ ﺗﯧﺮﻩﻡ ﻳﯧﺰﯨﺴﻰ، ﺋﺎﭼﭽﯩﻖ ﻳﯧﺰﺍ، ﻳﻮﭘﯘﺭﻏﺎ ﻳﯧﺰﯨﻠﯩﺮﯨﺪﯨﻜﻰ ﻣﯩﯖﻼﺭﭼﻪ ﺩﯦﻬﻘﺎﻧﺪﯨﻦ ﺑﯩﺮ ﻧﻪﭼﭽﻪ ﻳﯜﺯ ﻣﯩﯔ ﻳﯜﺋﻪﻥ ﭘﯘﻝ ﻳﯩﻐﯩﯟﺍﻟﻐﺎﻥ.

ﺑﯩﺰ ﻳﻮﭘﯘﺭﻏﯩﺪﺍ ﻳﯜﺯ ﺑﻪﺭﮔﻪﻥ ﺷﯘﻧﺪﺍﻗﻼ ﺗﯧﺨﻰ ﻫﻪﻝ ﺑﻮﻟﻤﯩﻐﺎﻥ ﻣﻪﺯﻛﯘﺭ ﯞﻩﻗﻪ ﻫﻪﻗﻘﯩﺪﻩ ﺗﯧﺮﻩﻡ ﻳﯧﺰﯨﻠﯩﻖ ﺳﺎﻗﭽﻰ ﭘﻮﻧﻜﯩﺘﯩﻐﺎ ﺗﯧﻠﯧﻔﻮﻥ ﻗﯩﻠﯩﭗ ﻣﻪﺯﻛﯘﺭ ﺩﯦﻠﻮﻏﺎ ﻣﻪﺳﺌﯘﻝ ﺗﯘﺭﻏﯘﻥ ﺧﯘﺩﺍﺑﻪﺭﺩﯨﻨﻰ ﺳﯜﺭﯛﺷﺘﻪ ﻗﯩﻠﺪﯗﻕ.

ﺑﯩﺰ ﻳﻪﻧﻪ، ﻳﻮﭘﯘﺭﻏﺎ ﻧﺎﻫﯩﻴﯩﻠﯩﻚ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻚ ﺋﯩﺪﺍﺭﯨﺴﯩﮕﻪ ﺗﯧﻠﯧﻔﻮﻥ ﻗﯩﻠﯩﭗ ﻣﻪﺯﻛﯘﺭ ﺩﯦﻠﻮﻧﯩﯔ ﺗﻪﺭﻩﻗﻘﯩﻴﺎﺗﯩﻨﻰ ﺳﻮﺭﯨﺪﯗﻕ، ﺗﯧﻠﯧﻔﻮﻧﻨﻰ ﺋﺎﻟﻐﺎﻥ ﺑﯩﺮ ﺧﯩﺘﺎﻱ ﺳﺎﻗﭽﻰ ﺗﯧﺮﻩﻣﺪﻩ ﻳﯜﺯ ﺑﻪﺭﮔﻪﻥ ﯞﻩﻗﻪﻧﻰ "ﺑﯚﻟﮕﯜﻧﭽﯩﻠﯩﻚ ﺩﯦﻠﻮﺳﻰ ﺩﻩﭖ ﺋﯧﺘﺮﺍﭖ ﻗﯩﻠﻐﺎﻥ ﺑﻮﻟﺴﯩﻤﯘ ﺋﺎﺧﯩﺮﯨﺪﺍ ﺑﯩﺰﻧﯩﯔ ﺋﺎﻣﯧﺮﯨﻜﯩﺪﯨﻦ ﺗﯧﻠﯧﻔﻮﻥ ﻗﯩﻠﯩﯟﺍﺗﻘﺎﻧﻠﯩﻘﯩﻤﯩﺰﻧﻰ ﺑﯩﻠﮕﻪﻧﺪﯨﻦ ﻛﯧﻴﯩﻦ ﻳﻪﻧﻪ ﺋﯚﺯﯨﻨﯩﯔ ﺋﯧﻴﺘﻘﺎﻧﻠﯩﺮﯨﻨﻰ ﺋﯩﻨﻜﺎﺭ ﻗﯩﻠﯩﭗ ﺑﯘﻧﺪﺍﻕ ﺋﯩﺶ ﻳﯜﺯ ﺑﻪﺭﻣﯩﺪﻯ، ﺑﯘﻧﻰ ﺳﯩﻠﻪﺭ ﻧﻪﺩﯨﻦ ﺑﯩﻠﺪﯨﯖﻼﺭ؟ ﺑﯘ ﻫﻪﻗﺘﻪ ﺳﺎﯕﺎ ﻫﯧﭽﻘﺎﻧﺪﺍﻕ ﺟﺎﯞﺍﺏ ﻳﻮﻕ" ﺩﯦﺪﻯ.

ﻣﻪﺧﭙﻰ ﺗﯘﺗﯘﭖ ﻛﯧﻠﯩﻨﮕﻪﻥ ﯞﻩﻗﻪ

ﺩﯦﻬﻘﺎﻧﻼﺭﻧﯩﯔ ﺋﯧﻴﺘﯩﺸﯩﭽﻪ، ﻣﻪﺯﻛﯘﺭ ﻣﻪﺳﯩﻠﯩﻨﻰ ﻳﻪﺭﻟﯩﻚ ﻫﯚﻛﯜﻣﻪﺕ ﻫﻪﻣﺪﻩ ﺳﺎﻗﭽﻰ ﺩﺍﺋﯩﺮﯨﻠﯩﺮﻯ ﺳﯩﺮﺗﺘﯩﻦ ﺋﯩﻨﺘﺎﻳﯩﻦ ﻣﻪﺧﭙﯩﻲ ﺗﯘﺗﯘﭖ ﺟﯩﺪﺩﯨﻲ ﺗﻪﻛﺸﯜﺭﯛﭖ ﻛﯧﻠﯩﯟﺍﺗﻘﺎﻥ ﺑﻮﻟﯘﭖ ﻧﯘﺭﻏﯘﻥ ﺑﯩﮕﯘﻧﺎﻫﻼﺭﻧﯩﯔ ﻣﯘﺷﯘ ﺑﺎﻫﺎﻧﯩﺪﺍ ﺗﯘﺗﯘﻟﯘﭖ ﺳﻮﻻﻧﻐﺎﻥ ﻫﻪﺗﺘﺎ ﺧﯩﺘﺎﻱ ﺋﯚﻟﻜﯩﻠﯩﺮﯨﺪﻩ ﺋﯧﭽﯩﻠﻐﺎﻥ ﺗﻮﻟﯘﻕ ﺋﻮﺗﺘﯘﺭﺍ ﻣﻪﻛﺘﻪﭘﻠﯩﺮﯨﺪﻩ ﺋﻮﻗﯘﯞﺍﺗﻘﺎﻥ ﺋﻮﻗﯘﻏﯘﭼﯩﻼﺭﻣﯘ ﺑﯘﻧﯩﯖﺪﯨﻦ ﻗﯘﺗﯘﻻﻟﻤﯩﻐﺎﻥ. ﺑﯩﺰ ﺗﯧﺮﻩﻡ ﻳﯧﺰﯨﻠﯩﻖ ﺋﻮﺗﺘﯘﺭﺍ ﻣﻪﻛﺘﻪﭘﺘﯩﻦ ﻣﻪﺯﻛﯘﺭ ﯞﻩﻗﻪﮔﻪ ﭼﯧﺘﯩﺸﻠﯩﻖ ﺩﻩﭖ ﺗﯘﺗﯘﻟﻐﺎﻥ ﺋﻮﻗﯘﺗﻘﯘﭼﻰ ﻫﻪﻡ ﺋﻮﻗﯘﻏﯘﭼﯩﻼﺭﻧﯩﯔ ﺋﻪﻫﯟﺍﻟﯩﻨﻰ ﺳﻮﺭﯨﺪﯗﻕ.

ﺑﯩﺰ ﺧﻪﻟﻘﻨﯩﯔ ﻛﯜﭼﻠﯜﻙ ﺋﯩﻨﻜﺎﺳﻠﯩﺮﯨﻐﺎ ﺋﺎﺳﺎﺳﻪﻥ ﯞﻩﻗﻪ ﺋﺎﺳﺎﺳﻠﯩﻖ ﻳﯜﺯ ﺑﻪﺭﮔﻪﻥ ﺗﯧﺮﻩﻡ ﻳﯧﺰﯨﻠﯩﻖ ﻫﯚﻛﯜﻣﻪﺗﻜﻪ ﺗﯧﻠﯧﻔﻮﻥ ﻗﯩﻠﺪﯗﻕ، ﺗﯧﻠﯧﻔﻮﻧﻨﻰ ﺋﺎﻟﻐﺎﻥ ﻣﯘﺋﺎﯞﯨﻦ ﻳﯧﺰﺍ ﺑﺎﺷﻠﯩﻘﻰ ﺋﯚﺯﯨﻨﯩﯔ ﻣﻪﺯﻛﯘﺭ ﻣﻪﺳﯩﻠﯩﺪﯨﻦ ﺧﻪﯞﻩﺭﺳﯩﺰ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﯛﭖ ﺟﺎﯞﺍﺏ ﺑﯧﺮﯨﺸﺘﯩﻦ ﺋﯚﺯﯨﻨﻰ ﺗﺎﺭﺗﺘﻰ.

ﺯﯨﻴﺎﺭﯨﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﻐﺎﻥ ﺩﯦﻬﻘﺎﻧﻼﺭﻧﯩﯔ ﺋﯩﭙﺎﺩﯨﺴﯩﺪﯨﻦ ﻣﻪﻟﯘﻣﻜﻰ، ﺩﯦﻬﻘﺎﻧﻼﺭﻧﯩﯔ ﻣﻪﺯﻛﯘﺭ ﻣﻪﺳﯩﻠﯩﮕﻪ ﻧﯩﺴﺒﻪﺗﻪﻥ ﻫﯚﻛﯜﻣﻪﺕ ﺋﻮﺭﯗﻧﻠﯩﺮﻯ ﺳﯩﺮﺗﻘﺎ ﺋﺎﺷﻜﺎﺭﯨﻠﯩﻤﺎﺳﻠﯩﻖ ﺋﯩﭽﯩﺪﻩ ﻗﺎﺗﺘﯩﻖ ﺑﯧﺴﯩﻢ ﻗﯩﻠﯩﺶ ﺋﯘﺳﯘﻟﯩﻨﻰ ﻗﻮﻟﻠﯩﻨﯩﭗ ﺋﯧﻨﯩﻘﻼﯞﺍﺗﻘﺎﻥ ﺑﻮﻟﯘﭖ، ﻣﻪﺳﯩﻠﻪ ﺗﯧﺨﻰ ﺭﻩﺳﻤﯩﻲ ﺋﯧﻨﯩﻘﻼﻧﻤﯩﻐﺎﻥ ﻫﻪﻡ ﺑﯩﺮ ﺗﻪﺭﻩﭖ ﻗﯩﻠﯩﻨﻤﯩﻐﺎﻥ. ﺑﯩﺮﺍﻕ ﺑﯘ ﯞﻩﻗﻪﻧﯩﯔ ﻳﻪﻧﯩﻤﯘ ﺋﯧﻐﯩﺮ ﻧﺎﻫﻪﻗﭽﯩﻠﯩﻚ ﻣﻪﺳﯩﻠﯩﮕﻪ ﺋﺎﻳﻠﯩﻨﯩﺸﯩﺪﺍ ﺑﺎﺵ ﺭﻭﻝ ﺋﻮﻳﻨﯩﻐﺎﻥ، ﺩﯦﻬﻘﺎﻧﻼﺭﻧﯩﯔ ﻧﺎﺭﺍﺯﯨﻠﯩﻘﯩﻨﻰ ﻗﻮﺯﻏﯩﻐﺎﻥ ﻛﯩﺸﻰ- ﺳﺎﻗﭽﻰ ﺗﯘﺭﻏﯘﻥ ﺧﯘﺩﺍﺑﻪﺭﺩﻯ ﺗﯧﺨﯩﻤﯘ ﻳﯘﻗﯩﺮﻯ ﺋﻮﺭﯗﻧﻐﺎ ﻳﻪﻧﻰ ﻧﺎﻫﯩﻴﯩﻠﯩﻚ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻚ ﺋﯩﺪﺍﺭﯨﺴﯩﻨﯩﯔ ﻣﻪﺧﺴﯘﺱ ﺋﯜﭺ ﺧﯩﻞ ﻛﯜﭼﻠﻪﺭﮔﻪ ﺯﻩﺭﺑﻪ ﺑﯧﺮﯨﺸﻜﻪ ﻣﻪﺳﺌﯘﻝ ﺳﯩﻴﺎﺳﯩﻲ ﻛﻮﻣﯩﺴﺴﺎﺭﻟﯩﻘﯩﻐﺎ ﺋﯚﺳﺘﯜﺭﯛﻟﺪﻯ، ﺩﯦﻬﻘﺎﻧﻼﺭﺩﯨﻦ ﻳﯩﻐﯩﻠﻐﺎﻥ ﺟﻪﺭﯨﻤﺎﻧﯩﻠﻪﺭﻧﯩﯔ ﺋﯩﺰﻯ ﻳﻮﻕ، ﺑﯩﮕﯘﻧﺎﻫ ﺳﻮﻻﻧﻐﺎﻧﻠﯩﻘﯩﻨﯩﯔ ﺟﺎﯞﺍﺑﻰ ﻳﻮﻕ، ﺋﻪﯓ ﻣﯘﻫﯩﻤﻰ ﺋﻪﺭﺯ ﻗﯩﻠﯩﺶ ﻧﯩﻴﯩﺘﯩﮕﻪ ﻛﻪﻟﮕﻪﻥ ﺩﯦﻬﻘﺎﻧﻼﺭﻧﯩﯖﻤﯘ ﺑﯘﻧﯩﯔ ﺑﯩﻠﻪﻥ ﺋﻪﺭﺯﻧﻰ ﺋﺎﻗﺘﯘﺭﯗﺷﻘﺎ ﺗﯧﺨﯩﻤﯘ ﺋﯜﻣﯩﺪﻯ ﻳﻮﻕ. (ﮔﯜﻟﭽﯧﻬﺮﻩ)