ﺋﺎﻣﯧﺮﯨﻜﺎ ﻛﯧﯖﻪﺵ ﭘﺎﻻﺗﺎ ﺋﻪﺯﺍﺳﻰ ﺧﯩﺘﺎﻳﻨﻰ ﺋﻪﻳﯩﺒﻠﯩﺪﻯ

• ﻣﯘﺧﺒﯩﺮﯨﻤﯩﺰ ﺟﯜﻣﻪﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

14- ﺋﺎﯞﻏﯘﺳﺖ ﺳﻪﻳﺸﻪﻧﺒﻪ ﻛﯜﻧﻰ ﺋﺎﻣﯧﺮﯨﻜﯩﺪﯨﻜﻰ ﺋﻪﯓ ﭼﻮﯓ ﺋﻮﻳﯘﻧﭽﯘﻕ ﺷﯩﺮﻛﯩﺘﻰ ﻣﺎﺗﺘﯧﻞ ﺋﯚﺯﻯ ﺑﺎﺯﺍﺭﻏﺎ ﺳﺎﻟﻐﺎﻥ ﺋﻮﻳﯘﻧﭽﯘﻗﻼﺭﺩﺍ ﺑﯩﺨﻪﺗﻪﺭﻟﯩﻚ ﻣﻪﺳﯩﻠﯩﺴﻰ ﺳﺎﺩﯨﺮ ﺑﻮﻟﻐﺎﻧﻠﯩﻘﻰ ﺳﻪﯞﻩﺑﻠﯩﻚ، ﭘﯜﺗﯜﻥ ﺩﯗﻧﻴﺎ ﻣﯩﻘﻴﺎﺳﯩﺪﺍ 18 ﻣﯩﻠﻴﻮﻥ ﺩﺍﻧﯩﺪﯨﻦ ﺋﺎﺭﺗﯘﻕ ﺑﺎﻟﯩﻼﺭ ﺋﻮﻳﯘﻧﭽﯘﻗﯩﻨﻰ ﻳﯩﻐﯩﯟﯦﻠﯩﺶ ﺋﯘﻗﺘﯘﺭﯗﺷﻰ ﭼﯩﻘﺎﺭﺩﻯ.

ﻣﻪﺯﻛﯘﺭ ﺷﯩﺮﻛﻪﺕ، ﻣﯘﺷﯘ ﺋﺎﻳﻨﯩﯔ ﺑﯧﺸﯩﺪﺍ ﺧﯩﺘﺎﻳﺪﺍ ﺋﯩﺸﻠﯩﺘﯩﭗ ﺋﯚﺯﻯ ﺑﺎﺯﺍﺭﻏﺎ ﺳﺎﻟﻐﺎﻥ 1.5 ﻣﯩﻠﻴﻮﻥ ﺩﺍﻧﻪ ﺑﺎﻟﯩﻼﺭ ﺋﻮﻳﯘﻧﭽﯘﻗﻠﯩﺮﯨﻨﻰ ﺋﻮﺧﺸﺎﺵ ﺳﻪﯞﻩﺑﻠﻪﺭ ﺗﯜﭘﻪﻳﻠﻰ ﻳﯩﻐﯩﯟﺍﻟﻐﺎﻥ ﺑﻮﻟﯘﭖ، ﻣﻪﻟﯘﻡ ﺑﻮﻟﯘﺷﯩﭽﻪ ﻣﻪﺯﻛﯘﺭ ﺋﻮﻳﯘﻧﭽﯘﻗﻼﺭﺩﺍ ﺑﺎﻟﯩﻼﺭﻧﯩﯔ ﺳﺎﻻﻣﻪﺗﻠﯩﻜﯩﮕﻪ ﺯﻩﺧﻤﻪﺕ ﺋﯧﻠﯩﭗ ﻛﯧﻠﯩﺪﯨﻐﺎﻥ ﺯﻩﻫﻪﺭﻟﯩﻚ ﻣﺎﺩﺩﺍ، ﻗﻮﻏﯘﺷﯘﻥ ﺑﺎﻳﻘﺎﻟﻐﺎﻥ.

ﺋﺎﺯ ﻣﯩﻘﺪﺍﺭﺩﯨﻜﻰ ﻣﺎﮔﻨﯩﺘﻤﯘ ﺋﯩﻨﺘﺎﻳﯩﻦ ﺧﻪﺗﻪﺭﻟﯩﻚ

ﺋﺎﻣﯧﺮﯨﻜﺎ ﺋﯩﺴﺘﯧﻤﺎﻟﭽﯩﻼﺭ ﺑﯩﺨﻪﺗﻪﺭﻟﯩﻜﻰ ﻛﻮﻣﯩﺘﯧﺘﯩﻨﯩﯔ ﺭﻩﺋﯩﺴﻰ ﻧﻪﻧﺴﯩﻲ ﻧﻮﺭﺩ ﺑﯘ ﻧﯚﯞﻩﺕ ﻳﯩﻐﯩﯟﯦﻠﯩﺶ ﺋﯘﻗﺘﯘﺭﯗﺷﻰ ﭼﯩﻘﯩﺮﯨﺸﺘﺎ، ﺑﻪﺯﻯ ﺋﻮﻳﯘﻧﭽﯘﻗﻼﺭﺩﺍ ﻗﻮﻏﯘﺷﯘﻥ ﺋﺎﺭﯨﻼﺷﻘﺎﻥ ﺳﯩﺮ، ﺑﻪﺯﯨﻠﯩﺮﯨﺪﻩ ﺋﺎﺟﺮﺍﭖ ﭼﯩﻘﯩﭗ ﻛﯧﺘﯩﺪﯨﻐﺎﻥ ﻣﺎﮔﻨﯩﺖ ﺋﯘﯞﺍﻗﻠﯩﺮﻯ ﺑﺎﻳﻘﺎﻟﻐﺎﻧﻠﯩﻘﯩﺪﯨﻦ ﺋﯩﺒﺎﺭﻩﺕ ﺋﯩﻜﻜﻰ ﺧﯩﻞ ﺳﻪﯞﻩﺏ ﺑﺎﺭﻟﯩﻘﯩﻨﻰ ﯞﻩ ﺋﺎﺯ ﻣﯩﻘﺪﺍﺭﺩﯨﻜﻰ ﻣﺎﮔﻨﯩﺘﻨﯩﯖﻤﯘ ﺋﯩﻨﺘﺎﻳﯩﻦ ﺧﻪﺗﻪﺭﻟﯩﻚ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ ﯞﻩ: " ﻛﻮﻣﯩﺘﯧﺘﯩﻤﯩﺰ ﻣﺎﮔﻨﯩﺖ ﺋﯘﯞﺍﻗﻠﯩﺮﯨﻨﯩﯔ ﺧﻪﺗﯩﺮﻯ ﻫﻪﻗﻘﯩﺪﻩ ﺋﺎﮔﺎﻫﻼﻧﺪﯗﺭﯗﺵ ﺑﯧﺮﯨﭗ ﻛﯧﻠﯩﯟﺍﺗﻘﯩﻨﯩﻐﺎ ﺑﯩﺮ ﻳﯩﻠﺪﯨﻦ ﺋﺎﺷﺘﻰ. ﺋﻪﮔﻪﺭ ﺑﯩﺮ- ﺋﯩﻜﻜﻰ ﺗﺎﻝ ﻣﺎﮔﻨﯩﺖ ﻳﯘﺗﯘﯞﯦﻠﯩﻨﺴﺎ، ﺋﯜﭼﻪﻱ ﻳﻮﻟﯩﺪﺍ ﻳﺎﻟﻠﯘﻍ ﭘﻪﻳﺪﺍ ﻗﯩﻠﯩﺪﯗ، ﺋﯜﭼﻪﻳﻨﻰ ﺗﯧﺸﯩﯟﯦﺘﯩﺪﯗ ﻳﺎﻛﻰ ﻫﻪﺯﯨﻢ ﻳﻮﻟﻠﯩﺮﯨﻨﯩﯔ ﺗﻮﺳﯘﻟﯘﭖ ﻗﯧﻠﯩﺸﯩﻨﻰ ﻛﻪﻟﺘﯜﺭﯛﭖ ﭼﯩﻘﯩﺮﯨﺪﯗ" ﺩﯦﺪﻯ.

ﺩﯨﻚ ﺩﯗﺭﺑﯩﻦ ":ﺋﻪﻣﺪﻯ ﺋﻪﻣﻪﻟﯩﻲ ﻫﻪﺭﯨﻜﻪﺕ ﻗﻮﻟﻠﯩﻨﯩﺪﯨﻐﺎﻥ ﭘﻪﻳﺖ ﻛﻪﻟﺪﻯ"

ﻣﯘﺷﯘ ﻣﯘﻧﺎﺳﯩﯟﻩﺕ ﺑﯩﻠﻪﻥ ﺋﺎﻣﯧﺮﯨﻜﺎ ﻛﯧﯖﻪﺵ ﭘﺎﻻﺗﺎ ﺋﻪﺯﺍﺳﻰ، ﺩﯦﻤﻮﻛﺮﺍﺕ ﺩﯨﻚ ﺩﯗﺭﺑﯩﻦ ﺑﺎﻳﺎﻧﺎﺕ ﺋﯧﻼﻥ ﻗﯩﻠﯩﭗ، ﺧﯩﺘﺎﻳﻨﻰ ﺗﺎﯞﺍﺭﻻﺭﻧﯩﯔ ﺑﯩﺨﻪﺗﻪﺭﻟﯩﻜﻰ ﻣﻪﺳﯩﻠﯩﺴﯩﺪﻩ ﺋﻪﻳﯩﺒﻠﻪﭖ، ﺋﻮﻳﯘﻧﭽﯘﻕ ﺯﺍﯞﯗﺗﻠﯩﺮﻯ ﺑﺎﺷﻘﯩﻼﺭﻧﯩﯔ ﺗﻪﻛﺸﯜﺭﯛﺷﻨﻰ ﭼﻮﻗﯘﻡ ﺋﺎﻛﺘﯩﭗ ﻫﺎﻟﺪﺍ ﻗﻮﺑﯘﻝ ﻗﯩﻠﯩﺸﻰ ﻛﯧﺮﻩﻙ ﺋﯩﻜﻪﻧﻠﯩﻜﯩﻨﻰ ﺗﻪﻛﯩﺘﻠﯩﺪﻯ.

ﺩﯨﻚ ﺩﯗﺭﺑﯩﻦ ﺑﺎﻳﺎﻧﺎﺗﯩﺪﺍ، ﻫﻪﺭ ﻫﻪﭘﺘﯩﺪﻩ ﺩﯦﮕﯜﺩﻩﻙ ﺑﯩﺮ ﻗﯧﺘﯩﻢ ﺧﯩﺘﺎﻱ ﺋﯩﺸﻠﯩﮕﻪﻥ ﺋﻮﻳﯘﻧﭽﯘﻗﻼﺭﻧﻰ ﻳﯩﻐﯩﯟﯦﻠﯩﺶ ﺋﯘﻗﺘﯘﺭﯗﺷﻰ ﭼﯩﻘﯩﯟﺍﺗﻘﺎﻧﻠﯩﻘﯩﻨﻰ ﻛﯚﺭﺳﯩﺘﯩﭗ: " ﺑﯩﺰ ﺧﯩﺘﺎﻳﻨﯩﯔ ﺑﻮﺷﺎﯓ ﺑﯩﺨﻪﺗﻪﺭﻟﯩﻚ ﺋﯚﻟﭽﻪﻣﻠﯩﺮﯨﮕﻪ ﻗﺎﺭﯨﺘﺎ ﺯﻩﺭﺑﻪ ﺑﯧﺮﯨﺸﯩﻨﻰ ﺋﻪﻣﺪﻯ ﻛﯜﺗﯜﭖ ﺗﯘﺭﺍﻟﻤﺎﻳﻤﯩﺰ. ﺑﯘﻧﺪﺍﻕ ﻫﺎﻟﻪﺕ، ﻳﻪﻧﻪ ﻛﯚﭘﻠﯩﮕﻪﻥ ﺑﺎﻟﯩﻼﺭ ﯞﻩ ﺋﺎﺋﯩﻠﯩﻠﻪﺭ ﺧﻪﺗﻪﺭﮔﻪ ﻳﻮﻟﯘﻗﯘﺷﯩﺪﯨﻦ ﺋﯩﻠﮕﯩﺮﻯ ﭼﻮﻗﯘﻡ ﺗﻮﺧﺘﯩﺸﻰ ﻛﯧﺮﻩﻙ." ﺩﯦﺪﻯ.

ﺋﯘ ﻳﻪﻧﻪ، " ﺑﯘ ﺑﯩﺮ ﺟﯩﺪﺩﯨﻲ ﻣﻪﺳﯩﻠﻪ. ﻣﻪﻥ ﺧﯩﺘﺎﻳﺪﯨﻦ ﻛﯧﻠﯩﺪﯨﻐﺎﻥ ﺑﺎﺭﻟﯩﻖ ﺳﯩﺮﻻﻧﻐﺎﻥ ﺑﺎﻟﯩﻼﺭ ﻣﻪﻫﺴﯘﻻﺗﻠﯩﺮﻯ ﭼﻮﻗﯘﻡ ﯞﺍﻗﯩﺘﻠﯩﻖ ﺗﯘﺗﯘﭖ ﻗﯧﻠﯩﻨﯩﭗ ﺗﻪﻛﺸﯜﺭﯛﻟﯜﺷﻰ ﻛﯧﺮﻩﻙ ﺩﻩﭖ ﺋﻮﻳﻼﻳﻤﻪﻥ" ﺩﻩﭖ ﺋﻮﺗﺘﯘﺭﯨﻐﺎ ﻗﻮﻳﺪﻯ.

ﻛﯧﯖﻪﺵ ﭘﺎﻻﺗﺎ ﺋﻪﺯﺍﺳﻰ ﺩﯨﻚ ﺩﯗﺭﺑﯩﻦ ﺗﯜﻧﯜﮔﯜﻥ ﺋﯧﻼﻥ ﻗﯩﻠﻐﺎﻥ ﺑﺎﻳﺎﻧﺎﺗﯩﺪﺍ، ﺑﯘ ﻗﯧﺘﯩﻤﻠﯩﻖ ﻳﯩﻐﯩﯟﯦﻠﯩﺶ ﺋﯘﻗﺘﯘﺭﯗﺷﯩﻨﯩﯔ ﺋﯩﻤﭙﻮﺭﺕ ﻗﯩﻠﯩﺸﺘﺎ ﻣﻪﯞﺟﯘﺩ ﺑﻮﻟﯘﭖ ﺗﯘﺭﯗﯞﺍﺗﻘﺎﻥ ﻣﻪﺳﯩﻠﯩﻠﻪﺭﻧﻰ ﺭﻭﺷﻪﻧﻠﻪﺷﺘﯜﺭﮔﻪﻧﻠﯩﻜﯩﻨﻰ، ﺑﯩﺨﻪﺗﻪﺭﻟﯩﻚ ﺋﯚﻟﭽﯩﻤﻰ ﺗﯚﯞﻩﻥ ﺩﯙﻟﻪﺗﻠﻪﺭﺩﯨﻦ ﻣﺎﻝ ﺋﯩﻤﭙﻮﺭﺕ ﻗﯩﻠﻐﺎﻧﺪﺍ ﺑﺎﻟﯩﻼﺭ ﯞﻩ ﺋﺎﺋﯩﻠﯩﻠﻪﺭﻧﯩﯔ ﺑﯩﺨﻪﺗﻪﺭﻟﯩﻜﯩﻨﻰ ﻗﻮﻏﺪﺍﺵ ﺋﯜﭼﯜﻥ ﻫﻮﺷﻴﺎﺭﻟﯩﻘﻨﻰ ﺗﯧﺨﯩﻤﯘ ﺋﯚﺳﺘﯜﺭﯛﺷﻨﯩﯔ ﺋﯩﻨﺘﺎﻳﯩﻦ ﺯﯙﺭﯛﺭ ﺋﯩﻜﻪﻧﻠﯩﻜﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ ﯞﻩ: "ﺑﯩﺰ ﺋﯩﻤﭙﻮﺭﺕ ﻗﯩﻠﯩﻨﯩﺪﯨﻐﺎﻥ ﻣﺎﻟﻼﺭﻏﺎ ﻧﯩﺴﺒﻪﺗﻪﻥ ﺋﯩﺠﺎﺑﯩﻲ ﺑﯩﺨﻪﺗﻪﺭﻟﯩﻚ ﺋﯚﻟﭽﻪﻣﻠﯩﺮﯨﮕﻪ ﻣﻮﻫﺘﺎﺝ. ﺋﯩﺴﺘﯧﻤﺎﻟﭽﯩﻼﺭ ﺑﯩﺨﻪﺗﻪﺭﻟﯩﻜﻨﻰ ﻗﻮﻏﺪﺍﺵ ﻛﻮﻣﯩﺘﯧﺘﻰ ﺋﯚﺯ ﺧﯩﺰﻣﯩﺘﯩﻨﯩﯔ ﻫﯚﺩﺩﯨﺴﯩﺪﯨﻦ ﭼﯩﻘﯩﺸﻰ ﻛﯧﺮﻩﻙ. ﺋﻪﻣﺪﻯ ﺳﯚﺯﻟﯩﺸﯩﺪﯨﻐﺎﻥ ﭘﻪﻳﺖ ﻛﻪﺗﺘﻰ. ﺋﻪﻣﻪﻟﯩﻲ ﻫﻪﺭﯨﻜﻪﺕ ﻗﻮﻟﻠﯩﻨﯩﺪﯨﻐﺎﻥ ﭘﻪﻳﺖ ﻛﻪﻟﺪﻯ" ﺩﯦﺪﻯ.

ﺩﻭﺏ ﺋﯧﻜﯧﺮﺕ ": ﻛﻪﺳﻜﯩﻦ ﻫﻪﺭﯨﻜﻪﺕ ﻗﻮﻟﻠﯩﻨﯩﻤﯩﺰ"

ﻣﺎﺗﺘﯧﻞ ﺷﯩﺮﻛﯩﺘﯩﻨﯩﯔ ﺑﺎﺷﻠﯩﻘﻰ ﺩﻭﺏ ﺋﯧﻜﯧﺮﺕ، ﺑﯘ ﻫﺎﺩﯨﺴﯩﺪﯨﻦ ﭼﻮﯕﻘﯘﺭ ﺋﻪﭘﺴﯘﺳﻠﯩﻨﯩﺪﯨﻐﺎﻧﻠﯩﻘﯩﻨﻰ، ﺋﯜﻣﯩﺪﺳﯩﺰﻟﻪﻧﮕﻪﻧﻠﯩﻜﯩﻨﻰ ﯞﻩ ﻣﯘﺷﯘ ﻣﯘﻧﺎﺳﯩﯟﻩﺕ ﺑﯩﻠﻪﻥ ﺋﺎﺗﺎ- ﺋﺎﻧﯩﻼﺭﺩﯨﻦ ﺋﻪﭘﯘ ﺳﻮﺭﺍﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ ﻫﻪﻣﺪﻩ: "ﺑﯩﺰ ﺑﯩﻠﻪﻥ ﺗﻮﺧﺘﺎﻣﻼﺷﻘﯘﭼﯩﻼﺭ، ﻗﺎﺋﯩﺪﯨﮕﻪ ﺧﯩﻼﭘﻠﯩﻖ ﻗﯩﻠﻐﺎﻧﻠﯩﻘﻰ ﺳﻪﯞﻩﺑﻠﯩﻚ ﺳﯩﺴﺘﯧﻤﯩﻤﯩﺰﺩﺍ ﻧﯘﻗﺴﺎﻥ ﻛﯚﺭﯛﻟﺪﻯ. ﺑﯩﺰ ﺑﯘﻧﯩﯖﻐﺎ ﻗﺎﺭﯨﺘﺎ ﻛﻪﺳﻜﯩﻦ ﻫﻪﺭﯨﻜﻪﺕ ﻗﻮﻟﻠﯩﻨﯩﻤﯩﺰ" ﺩﯦﺪﻯ.

ﺏ ﺏ ﺱ ﻣﯘﺧﺒﯩﺮﻯ ﻛﯘﯞﯨﻨﺘﯩﻦ ﺳﻮﺋﯧﺮﯞﯨﻞ، ﺋﺎﻟﺪﯨﻨﻘﻰ ﻗﯧﺘﯩﻢ ﺧﯩﺘﺎﻳﺪﺍ ﺋﯩﺸﻠﻪﻧﮕﻪﻥ ﺑﺎﻟﯩﻼﺭ ﺋﻮﻳﯘﻧﭽﯘﻗﻼﺭﻧﯩﯔ ﻳﯩﻐﯩﯟﯦﻠﯩﺶ ﺋﯘﻗﺘﯘﺭﯗﺷﻰ ﭼﯩﻘﯩﺮﯨﻠﻐﺎﻧﺪﺍ ﺧﯩﺘﺎﻳﻨﯩﯔ ﺧﯧﻠﻰ ﺗﯩﺰ ﻫﻪﺭﯨﻜﻪﺗﻜﻪ ﻛﻪﻟﮕﻪﻧﻠﯩﻜﯩﻨﻰ ﻛﯚﺭﺳﯩﺘﯩﭗ:"ﺧﯩﺘﺎﻱ ﻫﯚﻛﯜﻣﯩﺘﻰ ﻛﯚﭘﯩﻨﭽﻪ ﻫﺎﻟﻼﺭﺩﺍ ﺗﯧﺰ ﻫﻪﺭﯨﻜﻪﺕ ﻗﻮﻟﻼﻧﻤﺎﻳﺪﯗ ﺋﻪﻣﻤﺎ ﺋﯘﻻﺭ ﻛﯩﺸﯩﻠﻪﺭﻧﯩﯔ " ﺧﯩﺘﺎﻳﺪﺍ ﺋﯩﺸﻠﻪﻧﺪﻯ" ﺩﯦﮕﻪﻥ ﻣﺎﺭﻛﯩﻐﺎ ﻧﯩﺴﺒﻪﺗﻪﻥ ﺋﯩﺸﻪﻧﭽﯩﻨﻰ ﺗﯧﺰﺩﯨﻦ ﻳﻮﻗﯩﺘﯩﺪﯨﻐﺎﻧﻠﯩﻘﯩﻨﻰ ﺗﻮﻧﯘﭖ ﻳﻪﺗﺘﻰ" ﺩﻩﻳﺪﯗ.

ﺋﯚﺗﻜﻪﻥ ﻫﻪﭘﺘﻪ ﺧﯩﺘﺎﻱ ﻫﯚﻛﯜﻣﯩﺘﻰ، ﻣﺎﺗﺘﯧﻞ ﺷﯩﺮﻛﯩﺘﻰ ﻳﯩﻐﯩﯟﯦﻠﯩﺶ ﺋﯘﻗﺘﯘﺭﯗﺷﻰ ﭼﯩﻘﺎﺭﻏﺎﻥ ﺋﻮﻳﯘﻧﭽﯘﻗﻼﺭﻧﻰ ﻳﺎﺳﯩﻐﺎﻥ ﻟﯩﺪﺍ ﺷﯩﺮﻛﯩﺘﯩﻨﯩﯔ ﺋﺎﻣﯧﺮﯨﻜﯩﻐﺎ ﻣﺎﻝ ﺋﯧﻜﺴﭙﻮﺭﺕ ﻗﯩﻠﯩﺸﯩﻨﻰ ﯞﺍﻗﯩﺘﻠﯩﻖ ﺗﻮﺧﺘﺎﺗﻘﺎﻧﺪﯨﻦ ﻛﯧﻴﯩﻦ، ﻣﻪﺯﻛﯘﺭ ﺷﯩﺮﻛﻪﺗﻨﯩﯔ ﺑﺎﺷﻠﯩﻘﻰ ﺋﯚﺗﻜﻪﻥ ﻫﻪﭘﺘﻪ ﺋﺎﺧﯩﺮﻯ ﺋﯚﺯﯨﻨﻰ ﺋﻮﻟﺘﯘﺭﯗﯞﺍﻟﻐﺎﻥ ﺋﯩﺪﻯ. (ﺟﯜﻣﻪ)