ﺗﯩﺒﻪﺗﺘﯩﻜﻰ ﺗﻮﻗﯘﻧﯘﺷﻼﺭ ﻛﯧﯖﻪﻳﻤﻪﻛﺘﻪ

ﺗﯩﺒﻪﺕ ﭘﺎﻳﺘﻪﺧﺘﻰ ﻟﺨﺎﺳﺎ ﻛﻮﭼﯩﻠﯩﺮﯨﻨﻰ ﺋﯩﮕﯩﻠﯩﯟﺍﻟﻐﺎﻥ ﺧﯩﺘﺎﻱ ﺗﺎﻧﻜﺎ ﯞﻩ ﺋﺎﺭﻣﯩﻴﯩﺴﻰ. ﺳﯜﺭﻩﺕ، 15 - ﻣﺎﺭﺕ ﻛﯜﻧﻰ ﺗﺎﺭﺗﯩﻠﻐﺎﻥ. AFP Photo

ﻟﺨﺎﺳﺎﺩﯨﻜﻰ ﺑﯩﺮ ﺗﯩﺒﻪﺗﻠﯩﻚ ﺭﺍﺩﯨﺌﻮ ﺋﺎﯕﻠﯩﻐﯘﭼﯩﻨﯩﯔ، ﺋﻪﺭﻛﯩﻦ ﺋﺎﺳﯩﻴﺎ ﺭﺍﺩﯨﺌﻮﺳﯩﻨﯩﯔ ﺗﯩﺒﻪﺕ ﺑﯚﻟﯜﻣﯩﮕﻪ ﺗﯧﻠﯧﻔﻮﻥ ﺋﺎﺭﻗﯩﻠﯩﻖ ﺧﻪﯞﻩﺭ ﻗﯩﻠﯩﺸﯩﭽﻪ، ﻟﺨﺎﺳﺎﺩﯨﻜﻰ ﺗﻮﻗﯘﻧﯘﺷﻼﺭﺩﺍ ﺗﯩﺒﻪﺗﻠﯩﻚ ﻧﺎﻣﺎﻳﯩﺸﭽﯩﻼﺭ، ﻟﺨﺎﺳﺎ ﺷﻪﻫﯩﺮﯨﻨﯩﯔ ﺑﺎﺭﺧﻮﺭ ﺭﺍﻳﻮﻧﯩﺪﯨﻜﻰ ﺧﯩﺘﺎﻳﻼﺭﻏﺎ ﺋﺎﺋﯩﺖ ﭘﯜﺗﯜﻥ ﺩﯗﻛﺎﻥ ﯞﻩ ﻣﺎﮔﯩﺰﯨﻨﻼﺭﻏﺎ ﺋﻮﺕ ﻗﻮﻳﯘﭖ ﺑﻪﺭﮔﻪﻥ، ﻧﯘﺭﻏﯘﻧﻠﯩﻐﺎﻥ ﻣﺎﺷﯩﻨﯩﻼﺭﻧﻰ ﻛﯚﻳﺪﯛﺭﯛﯞﻩﺗﻜﻪﻥ.

ﺗﯩﺒﻪﺗﺘﯩﻜﻰ ﺗﻮﻗﯘﻧﯘﺷﻼﺭ ﻫﻪﻗﻘﯩﺪﻩ ﺩﺍﻻﻱ ﻻﻣﺎﻧﻰ ﺋﻪﻳﯩﺒﻠﯩﮕﻪﻥ ﺧﯩﺘﺎﻱ ﻫﯚﻛﯜﻣﯩﺘﻰ، ﻟﺨﺎﺳﺎﺩﯨﻜﻰ ﯞﻩﻗﻪﻟﻪﺭﺩﻩ 160 ﺟﺎﻳﻐﺎ ﺋﻮﺕ ﻗﻮﻳﯘﭖ ﺑﯧﺮﯨﻠﮕﻪﻧﻠﯩﻜﯩﻨﻰ، 580 ﻛﯩﺸﯩﻨﯩﯔ ﻗﯘﺗﻘﯘﺯﯗﯞﯨﻠﯩﻨﻐﺎﻧﻠﯩﻘﯩﻨﻰ ﯞﻩ ﺋﻮﻥ ﻛﯩﺸﯩﻨﯩﯔ ﺋﯚﻟﮕﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.

ﺑﯘ ﺋﺎﺭﯨﺪﺍ، ﻟﺨﺎﺳﺎﺩﺍ ﺑﺎﺷﻼﻧﻐﺎﻥ ﻧﺎﻣﺎﻳﯩﺶ ﯞﻩ ﻧﺎﺭﺍﺯﻟﯩﻖ ﻫﻪﺭﯨﻜﻪﺗﻠﯩﺮﻯ، ﺗﯩﺒﻪﺗﻨﯩﯔ ﺋﺎﻣﺪﻭ ﯞﻩ ﻛﺎﻡ ﺭﺍﻳﻮﻧﻠﯩﺮﯨﻐﺎ ﻫﻪﺗﺘﺎ ﺧﯩﺘﺎﻳﻨﯩﯔ ﭼﯩﯖﺨﻪﻱ ﯞﻩ ﺳﯩﭽﯜﻩﻥ ﺋﯚﻟﻜﯩﻠﯩﺮﯨﮕﯩﭽﻪ ﻛﯧﯖﻪﻳﮕﻪﻥ ﺑﻮﻟﯘﭖ، ﺷﻪﻧﺒﻪ ﻛﯜﻧﻰ ﺷﯩﻴﺎﯞﺧﯥ ﺷﻪﻫﯩﺮﯨﺪﻩ ﺗﯩﺒﻪﺗﻠﯩﻜﻠﻪﺭ ﺗﻪﺭﯨﭙﯩﺪﯨﻦ ﺋﯧﻠﯩﭗ ﺑﯧﺮﯨﻠﻐﺎﻥ ﻧﺎﺭﺍﺯﯨﻠﯩﻖ ﻫﻪﺭﯨﻜﯩﺘﻰ ﺟﻪﺭﻳﺎﻧﯩﺪﺍ، ﺗﯩﺒﻪﺗﻠﯩﻚ ﻧﺎﻣﺎﻳﯩﺸﭽﯩﻼﺭ " ﻳﺎﺷﯩﺴﯘﻥ ﺩﺍﻻﻱ ﻻﻣﺎ" ﺩﻩﭖ ﺷﯘﺋﺎﺭﻻﺭ ﺗﻮﯞﻻﭖ، ﻳﻪﺭﻟﯩﻚ ﻫﯚﻛﯜﻣﻪﺕ ﺑﯩﻨﺎﻟﯩﺮﯨﻐﺎ ﻫﯘﺟﯘﻡ ﻗﯩﻠﻐﺎﻥ.

ﺋﯩﮕﯩﻠﻪﺷﻠﻪﺭﮔﻪ ﻗﺎﺭﯨﻐﺎﻧﺪﺍ، ﺗﯩﺒﻪﺗﻨﯩﯔ ﻟﯩﺘﻮﯓ، ﻛﺎﻡ ﯞﻩ ﺳﺎﻣﯩﻴﻪ ﺷﻪﻫﻪﺭﻟﯩﺮﯨﺪﯨﻤﯘ ﻧﺎﺭﺍﺯﯨﻠﯩﻖ ﻫﻪﺭﯨﻜﻪﺗﻠﯩﺮﻯ ﺋﯧﻠﯩﭗ ﺑﯧﺮﯨﻠﻐﺎﻥ.

ﺭﻭﻳﺘﯧﺮﺱ ﺋﺎﮔﯧﻨﺘﻠﯩﻘﯩﻨﯩﯔ ﺑﯧﻴﺠﯩﯖﺪﯨﻦ ﺧﻪﯞﻩﺭ ﻗﯩﻠﯩﺸﯩﭽﻪ، ﺧﯩﺘﺎﻱ ﻫﯚﻛﯜﻣﯩﺘﻰ ﺷﻪﻧﺒﻪ ﻛﯜﻧﻰ ﺑﯩﺮ ﺋﯘﻗﺘﯘﺭﯗﺵ ﭼﯩﻘﯩﺮﯨﭗ، ﺗﯩﺒﻪﺗﻠﯩﻚ ﻧﺎﻣﺎﻳﯩﺸﭽﯩﻼﺭﻏﺎ ﻧﺎﺭﺍﺯﯨﻠﯩﻖ ﻫﻪﺭﯨﻜﯩﺘﯩﻨﻰ ﺗﻮﺧﺘﯩﺘﯩﭗ، ﺧﯩﺘﺎﻱ ﺑﯩﺨﻪﺗﻪﺭﻟﯩﻚ ﻗﯩﺴﯩﻤﻠﯩﺮﯨﻐﺎ ﺗﻪﺳﻠﯩﻢ ﺑﻮﻟﯘﺷﻰ ﺋﯜﭼﯜﻥ، ﺩﯛﺷﻪﻧﺒﻪ ﻛﯜﻧﯩﮕﯩﭽﻪ ﯞﺍﻗﯩﺖ ﺑﻪﺭﮔﻪﻥ.

ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺑﯘ ﻫﻪﻗﺘﯩﻜﻰ ﺋﯘﻗﺘﯘﺭﯗﺷﯩﺪﺍ، ﻫﯚﻛﯜﻣﻪﺗﻨﯩﯔ ﺩﯛﺷﻪﻧﺒﻪ ﻛﯜﻧﯩﮕﯩﭽﻪ ﺗﻪﺳﻠﯩﻢ ﺑﻮﻟﻐﺎﻧﻼﺭﻏﺎ ﻛﻪﯕﭽﯩﻠﯩﻚ ﻗﯩﻠﯩﺪﯨﻐﺎﻧﻠﯩﻘﻰ، ﺗﻪﺳﻠﯩﻢ ﺑﻮﻟﻤﯩﻐﺎﻧﻼﺭﻧﻰ، ﻗﺎﺗﺘﯩﻖ ﺟﺎﺯﺍﻻﻳﺪﯨﻐﺎﻧﻠﯩﻘﻰ ﺗﻪﻛﯩﺘﻠﻪﻧﮕﻪﻥ. (ﺋﯚﻣﻪﺭ ﻗﺎﻧﺎﺕ)