ﻗﻪﺷﻘﻪﺭ 25- ﺩﯦﻜﺎﺑﯩﺮ ﯞﻩﻗﻪﺳﯩﺪﻩ ﻗﻮﻟﻐﺎ ﭼﯜﺷﻜﻪﻥ ﺋﯘﻳﻐﯘﺭﻻﺭﺩﯨﻦ ﺑﯩﺮ ﻗﯩﺴﯩﻤﻰ ﺋﯚﻟﯜﻣﮕﻪ ﻫﯚﻛﯜﻡ ﻗﯩﻠﯩﻨﺪﻯ

8 - ﻧﻮﻳﺎﺑﯩﺮ ﻗﻪﺷﻘﻪﺭ ﯞﯨﻼﻳﻪﺗﻠﯩﻚ ﺋﻮﺗﺘﯘﺭﺍ ﺳﻮﺕ ﻣﻪﻫﻜﯩﻤﯩﺴﻰ ﺳﻮﺕ ﺋﯧﭽﯩﭗ، ﺧﯩﺘﺎﻱ ﺩﺍﺋﯩﺮﯨﻠﯩﺮﻯ "25- ﺩﯦﻜﺎﺑﯩﺮ ﺩﯙﻟﻪﺕ ﺑﯩﺨﻪﺗﻪﺭﻟﯩﻜﯩﮕﻪ ﺯﯨﻴﺎﻥ ﺳﯧﻠﯩﺶ ﺩﯦﻠﻮﺳﻰ"ﺩﺍ ﻗﻮﻟﻐﺎ ﭼﯜﺷﻜﻪﻥ ﺋﯘﻳﻐﯘﺭﻻﺭﺩﯨﻦ ﺋﺎﺑﺪﯗ ﯞﻩﻟﻰ ﺋﯩﻤﯩﻦ ﻗﺎﺭﺍﺭﻟﯩﻖ 6 ﻧﻪﭘﻪﺭ ﺋﯘﻳﻐﯘﺭﻏﺎ " ﺩﯙﻟﻪﺗﻨﻰ ﭘﺎﺭﭼﯩﻼﺵ"، " ﺗﯧﺮﺭﻭﺭﻟﯘﻕ ﺗﻪﺷﻜﯩﻼﺕ ﺗﻪﺷﻜﯩﻠﻠﻪﺵ ﯞﻩ ﺭﻩﻫﺒﻪﺭﻟﯩﻚ ﻗﯩﻠﯩﺶ"، " ﻗﺎﻧﯘﻧﺴﯩﺰ ﺑﻮﻣﺒﺎ ﻳﺎﺳﺎﺵ" ﺟﯩﻨﺎﻳﻪﺗﻠﯩﺮﯨﻨﻰ ﺋﺎﺭﺗﯩﭗ ﺋﺎﻳﺮﯨﻢ- ﺋﺎﻳﺮﯨﻢ ﻫﺎﻟﺪﺍ ﺋﯚﻟﯘﻡ ﯞﻩ ﻣﯘﺩﺩﻩﺗﺴﯩﺰ ﻗﺎﻣﺎﻕ ﺟﺎﺯﺍﻟﯩﺮﯨﻨﻰ ﺑﻪﺭﮔﻪﻥ.

ﺷﯩﻨﺨﯘﺍ ﺋﺎﮔﯧﻨﺘﻠﯩﻘﯩﺪﺍ ﺑﯘ ﻫﻪﻗﺘﻪ ﺑﯧﺮﯨﻠﮕﻪﻥ ﺧﻪﯞﻩﺭﺩﻩ: " ﺋﺎﺑﺪﯗﯞﻩﻟﻰ ﺋﯩﻤﯩﻦ ﻗﺎﺗﺎﺭﻟﯩﻖ 6 ﻧﻪﭘﻪﺭ ﺋﻪﻳﯩﺒﻜﺎﺭ، ﺩﯙﻟﻪﺗﻨﻰ ﭘﺎﺭﭼﯩﻼﺵ ﻣﻪﻗﺴﯩﺘﯩﮕﻪ ﻳﯧﺘﯩﺶ ﺋﯜﭼﯜﻥ، 2005- ﻳﯩﻠﻰ 8- ﺋﺎﻳﺪﯨﻦ 2007- ﻳﯩﻠﻰ 1 ‏- ﺋﺎﻳﻐﯩﭽﻪ، ﺩﯨﻨﯩﻲ ﭘﺎﺋﺎﻟﯩﻴﻪﺗﻠﻪﺭ ﺑﯩﻠﻪﻥ ﺋﺎﻛﺘﯩﭗ ﺷﯘﻏﯘﻟﻼﻧﻐﺎﻥ ﻫﻪﻣﺪﻩ ﻏﺎﺯﺍﺕ ﺗﻪﺭﻏﯩﺒﺎﺗﻰ ﺋﯧﻠﯩﭗ ﺑﺎﺭﻏﺎﻥ ﯞﻩ ﺗﯧﺮﺭﻭﺭﻟﯘﻕ ﻣﻪﺷﯩﻖ ﺑﺎﺯﯨﺴﻰ ﻗﯘﺭﯗﭖ ﺋﯩﺴﻼﻡ ﺧﻪﻟﯩﭙﻪ ﺩﯙﻟﯩﺘﻰ ﻗﯘﺭﯗﺵ ﺋﯜﭼﯜﻥ ﺗﻪﻳﻴﺎﺭﻟﯩﻖ ﻗﯩﻠﻐﺎﻥ" ﺩﻩﭖ ﻛﯚﺭﺳﯩﺘﯩﻠﮕﻪﻥ.

ﻣﻪﺯﻛﯘﺭ ﺧﻪﯞﻩﺭﺩﻩ ﺑﯩﻠﺪﯛﺭﯛﺷﯩﭽﻪ، ﺟﺎﺯﺍﻏﺎ ﺗﺎﺭﺗﯩﻠﻐﺎﻥ ﺑﯘ 6 ﻧﻪﭘﻪﺭ ﺋﯘﻳﻐﯘﺭ، "ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺋﯩﺴﻼﻡ ﭘﺎﺭﺗﯩﻴﯩﺴﯩﻨﻰ ﺗﻪﺷﻜﯩﻠﻠﯩﮕﻪﻥ ﯞﻩ ﺧﯩﺘﺎﻱ ﺋﺎﺭﻣﯩﻴﯩﺴﻰ ﺋﯧﻠﯩﭗ ﺑﺎﺭﻏﺎﻥ ﺋﯩﻜﻜﻰ ﻗﯧﺘﯩﻤﻠﯩﻖ ﺋﺎﺧﺘﯘﺭﯗﭖ ﺗﯘﺗﯘﺵ ﻣﺎﻧﯧﯟﯨﺮﯨﻐﺎ ﻗﺎﺭﺷﯩﻠﯩﻖ ﻛﯚﺭﺳﻪﺗﻜﻪﻥ ﻫﻪﻣﺪﻩ ﺧﻪﯞﻩﺭﻟﯩﺸﯩﺶ ﺋﯜﺳﻜﯜﻧﻠﯩﺮﯨﮕﻪ ﺑﯘﺯﻏﯘﻧﭽﯩﻠﯩﻖ ﻗﯩﻠﯩﺶ، ﺋﺎﭘﺘﻮﺑﯘﺱ ﭘﺎﺭﺗﻠﯩﺘﯩﺶ، ﻛﻮﺳﺮﺍﭖ ﻳﯧﺰﯨﺴﯩﻨﻰ ﺋﯩﮕﯩﻠﻪﭖ ﻣﯘﺳﺘﻪﻗﯩﻠﻠﯩﻖ ﺋﯧﻼﻥ ﻗﯩﻠﯩﺶ ﻗﻪﺳﺘﯩﺪﻩ ﺑﻮﻟﻐﺎﻥ ﺋﯩﻜﻪﻥ.

ﺑﯘ ﻧﯚﯞﻩﺕ ﺧﯩﺘﺎﻳﺪﺍ ﺟﺎﺯﺍﻏﺎ ﺗﺎﺭﺗﯩﻠﻐﺎﻧﻼﺭ ﺋﯩﭽﯩﺪﻩ، ﺋﺎﺑﺪﯗﯞﻩﻟﻰ ﺋﯩﻤﯩﻦ، ﻣﯘﺧﺘﻪﺭ ﺳﯧﺘﯩﯟﺍﻟﺪﻯ، ﻗﯘﺭﺑﺎﻥ ﻣﺎﻣﯘﺕ ﻗﺎﺗﺎﺭﻟﯩﻘﻼﺭ ﺋﯚﻟﯜﻣﮕﻪ ﺑﯘﻳﺮﯗﻟﻐﺎﻧﺪﯨﻦ ﺑﺎﺷﻘﺎ ﺋﻪﺧﻤﻪﺕ ﺭﺍﺧﻤﺎﻥ، ﺋﯩﻤﯩﻦ ﻣﯧﻬﻤﺎﻥ ﻗﺎﺗﺎﺭﻟﯩﻘﻼﺭﻏﺎ ﺋﯚﻟﯘﻡ ﺟﺎﺯﺍﺳﻰ ﺑﯧﺮﯨﻠﯩﭗ ﺋﯩﻜﻜﻰ ﻳﯩﻞ ﻛﯧﭽﯩﻜﺘﯜﺭﯛﭖ ﺋﯩﺠﺮﺍ ﻗﯩﻠﯩﺶ ﺑﯘﻳﺮﯗﻟﻐﺎﻥ.