ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻨﯩﯔ ﺑﺎﻳﺎﻧﺎﺗﭽﯩﺴﻰ ﺩﯨﻠﺸﺎﺕ ﺭﯦﺸﯩﺖ ﺋﯩﺴﺘﺎﻧﺴﯩﻤﯩﺰ ﯞﻩ ﺗﻪﻳﯟﻩﻥ ﻣﻪﺭﻛﯩﺰﻯ ﺋﺎﮔﯧﻨﺘﻠﯩﻘﯩﻐﺎ، ﻣﯧﯔ ﺧﯘﯕﯟﯦﻴﻨﯩﯔ ﺑﯧﻴﺠﯩﯔ ﺋﻮﻟﯩﻤﭙﯩﻚ ﻣﯘﺭﺍﺳﯩﻤﻰ ﺋﯧﭽﯩﻠﯩﺶ ﻫﺎﺭﭘﯩﺴﯩﺪﺍ ﺋﯘﻳﻐﯘﺭﻻﺭﻧﻰ ﺗﯧﺮﺭﻭﺭﻟﯘﻕ ﻫﻪﺭﯨﻜﻪﺕ ﺑﯩﻠﻪﻥ ﺷﯘﻏﯘﻟﻠﯩﻨﯩﺪﯗ ﺩﻩﭖ ﺋﻪﻳﯩﺒﻠﯩﺸﯩﻨﯩﯔ ﺋﯜﭺ ﺗﯜﺭﻟﯜﻙ ﺳﯩﻴﺎﺳﯩﻲ ﻣﯘﺩﺩﯨﺌﺎﺳﻰ ﺑﺎﺭ ﺋﯩﻜﻪﻧﻠﯩﻜﯩﻨﻰ ﺗﻪﻛﯩﺘﻠﻪﭖ، ﺑﯩﺮﯨﻨﭽﯩﺪﯨﻦ، ﺧﻪﻟﻘﺌﺎﺭﺍﺩﺍ ﺋﯘﻳﻐﯘﺭﻻﺭﻧﻰ ﻳﺎﻟﻐﯘﺯ ﻗﺎﻟﺪﯗﺭﯗﭖ، ﺋﯘﻳﻐﯘﺭﻻﺭﻧﯩﯔ ﺩﯦﻤﻮﻛﺮﺍﺗﯩﻴﻪ ﯞﻩ ﻛﯩﺸﯩﻠﯩﻚ ﻫﻮﻗﯘﻕ ﺋﯩﺴﺘﯩﻜﯩﻨﻰ ﺑﺎﺳﺘﯘﺭﯗﺵ، ﺋﯩﻜﻜﯩﻨﭽﯩﺪﯨﻦ ﺗﯧﺮﺭﻭﺭﻟﯘﻕ ﻫﻪﺭﯨﻜﻪﺗﻠﻪﺭﮔﻪ ﻗﺎﺭﺷﻰ ﺗﯘﺭﯗﺵ ﻛﯚﺭﯛﺷﯩﺪﯨﻦ ﭘﺎﻳﺪﯨﻠﯩﻨﯩﭗ، ﺋﯘﻳﻐﯘﺭﻻﺭﻧﯩﯔ ﻗﺎﺭﺷﯩﻠﯩﻖ ﻫﻪﺭﯨﻜﻪﺗﻠﯩﺮﯨﻨﻰ ﺑﺎﺳﺘﯘﺭﯗﺵ، ﺋﯜﭼﯩﻨﭽﯩﺪﯨﻦ ﺑﯘ ﺋﺎﺭﻗﯩﻠﯩﻖ ﺧﻪﻟﻘﺌﺎﺭﺍﻧﯩﯔ ﺋﯘﻳﻐﯘﺭﻻﺭﻧﻰ ﺑﺎﺳﺘﯘﺭﯗﺵ ﺗﻮﻏﺮﯨﺴﯩﺪﯨﻜﻰ ﺋﻪﻳﯩﺒﻠﻪﺷﻠﯩﺮﯨﺪﯨﻦ ﺋﯚﺯﯨﻨﻰ ﻗﺎﭼﯘﺭﯗﺵ ﻣﯘﺩﺩﯨﺌﺎﺳﯩﻐﺎ ﻳﯧﺘﯩﺶ ﺋﯩﻜﻪﻧﻠﯩﻜﯩﻨﻰ ﺗﻪﻛﯩﺘﻠﯩﺪﻯ.

ﺩﯨﻠﺸﺎﺕ ﺭﯦﺸﯩﺖ ﺳﯚﺯﯨﺪﻩ،" ﮔﻪﺭﭼﻪ ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﻰ ﺑﯧﻴﺠﯩﯖﺪﺍ ﺋﻮﻟﯩﻤﭙﯩﻚ ﻣﯘﺭﺍﺳﯩﻤﻰ ﺋﯚﺗﻜﯜﺯﯛﻟﯩﺸﯩﮕﻪ ﻗﺎﺭﺷﻰ ﺑﻮﻟﺴﯩﻤﯘ، ﺑﯩﺮﺍﻕ ﺋﻮﻟﯩﻤﭙﯩﻚ ﺭﻭﻫﯩﻐﺎ ﻗﺎﺭﺷﻰ ﺋﻪﻣﻪﺱ، ﺷﯘﯕﺎ ﺋﻮﻟﯩﻤﭙﯩﻜﻜﻪ ﺑﯘﺯﻏﯘﻧﭽﯩﻠﯩﻖ ﺋﯧﻠﯩﭗ ﻛﯧﻠﯩﺪﯨﻐﺎﻥ ﻫﻪﺭﯨﻜﻪﺗﻠﻪﺭﻧﻰ ﺳﺎﺩﯨﺮ ﻗﯩﻠﻤﺎﻳﺪﯗ " ﺩﯦﺪﻯ.

ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﻰ ﺧﻪﻟﻘﺌﺎﺭﺍ ﺟﺎﻣﺎﺋﻪﺗﻨﯩﯔ، ﻧﯚﯞﻩﺗﺘﻪ ﺧﯩﺘﺎﻳﻨﯩﯔ ﺋﯘﻳﻐﯘﺭﻻﺭﻧﻰ ﺗﯧﺮﺭﻭﺭﻟﯘﻕ ﻫﻪﺭﯨﻜﻪﺗﻠﻪﺭ ﺑﯩﻠﻪﻥ ﺷﯘﻏﯘﻟﻠﯩﻨﯩﺪﯗ ﺩﯦﮕﻪﻥ ﺋﻪﻳﯩﺒﻠﻪﺷﻠﯩﺮﻯ ﺷﯘﻧﯩﯖﺪﻩﻙ ﺑﯘﻧﯩﯖﻐﺎ ﺋﺎﺭﻗﯩﺴﯩﻐﺎ ﻳﻮﺷﯘﺭﯗﻧﻐﺎﻥ ﺳﯩﻴﺎﺳﯩﻲ ﻣﯘﺩﺩﯨﺌﺎﻟﯩﺮﯨﻐﺎ ﺋﺎﻻﻫﯩﺪﻩ ﺩﯨﻘﻘﻪﺕ ‏ - ﻧﻪﺯﯨﺮﯨﻨﻰ ﺑﯧﺮﯨﺸﯩﻨﻰ ﺗﻪﺷﻪﺑﺒﯘﺱ ﻗﯩﻠﯩﺶ ﺑﯩﻠﻪﻥ ﺑﯩﺮﮔﻪ، ﺧﯩﺘﺎﻳﻨﯩﯔ ﺋﯘﻳﻐﯘﺭﻻﺭﻧﯩﯔ ﻗﺎﻧﯘﻧﯩﻲ ﻳﻮﺳﯘﻧﺪﯨﻜﻰ ﺳﯩﻴﺎﺳﯩﻲ ﺗﻪﻟﻪﭘﻠﯩﺮﯨﮕﻪ ﺋﺎﺩﯨﻠﻠﯩﻖ ﺑﯩﻠﻪﻥ ﻣﯘﺋﺎﻣﯩﻠﻪ ﻗﯩﻠﯩﺸﯩﻨﻰ ﺗﻪﻟﻪﭖ ﻗﯩﻠﺪﻯ.