ﺋﯘﻳﻐﯘﺭ ﺋﯩﻠﻰ ﻛﻪﻟﮕﯜﺳﻰ 5 ﻳﯩﻠﺪﺍ ﺋﻪﻳﺪﯨﺰ ﯞﯨﺮﯗﺳﻰ ﺗﺎﺭﻗﯩﻠﯩﺪﯨﻐﺎﻥ ﻣﻪﺭﻛﻪﺯﻟﯩﻚ ﺭﺍﻳﻮﻥ ﺑﻮﻟﯘﭖ ﻗﺎﻻﻣﺪﯗ ؟

ﺋﺎﻣﯧﺮﯨﻜﺎ ﺋﯩﺴﺘﯩﺮﺍﺗﯧﮕﯩﻴﻪ ﯞﻩ ﺧﻪﻟﻘﺌﺎﺭﺍ ﺗﻪﺗﻘﯩﻘﺎﺕ ﻣﻪﺭﻛﯩﺰﻯ CSIS ﺧﯩﺘﺎﻳﺪﺍ ﺋﻪﻳﺪﯨﺰ ﻛﯧﺴﯩﻠﯩﻨﯩﯔ ﺗﺎﺭﻗﯩﻠﯩﺶ ﺋﻪﻫﯟﺍﻟﻰ ﻫﻪﻗﻘﯩﺪﻩ ﺩﻭﻛﻼﺕ ﺋﯧﻼﻥ ﻗﯩﻠﯩﭗ، ﻛﻪﻟﮕﯜﺳﻰ 5 ﻳﯩﻠﺪﺍ ﺋﻪﻳﺪﯨﺰ ﯞﯨﺮﯗﺳﯩﻨﯩﯔ ﺧﯩﺘﺎﻳﺪﯨﻜﻰ ﺋﯩﻜﻜﻰ ﺭﺍﻳﻮﻧﻐﺎ ﻣﻪﺭﻛﻪﺯﻟﯩﺸﯩﺪﯨﻐﺎﻧﻠﯩﻘﯩﻨﻰ ﯞﻩ ﺗﯧﺰ ﺗﺎﺭﻗﯩﻠﯩﺪﯨﻐﺎﻧﻠﯩﻘﯩﻨﻰ، ﺑﯘ ﺭﺍﻳﻮﻧﻼﺭﻧﯩﯔ ﺑﯩﺮﻯ ﺧﯩﺘﺎﻳﻨﯩﯔ ﺟﻪﻧﯘﺑﯩﻲ ﯞﻩ ﻏﻪﺭﺑﯩﻲ ﺟﻪﻧﯘﺑﯩﺪﯨﻜﻰ ﻳﯜﻧﻨﻪﻥ، ﮔﯘﺍﯕﺸﻰ، ﮔﯘﺍﯕﺪﯗﯓ، ﺧﯘﻧﻪﻥ، ﺳﯩﭽﯜﻩﻥ ﯞﻩ ﺧﻪﻳﻨﻪﻧﻠﻪﺭ ﺑﻮﻟﺴﺎ، ﻳﻪﻧﻪ ﺑﯩﺮﻯ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻰ ﺑﻮﻟﯘﭖ ﻗﺎﻟﯩﺪﯨﻐﺎﻧﻠﯩﻘﯩﻨﻰ ﺋﺎﮔﺎﻫﻼﻧﺪﯗﺭﺩﻯ.

ﺩﻭﻛﻼﺗﺘﺎ ﺋﻪﺳﻜﻪﺭﺗﯩﺸﯩﭽﻪ، ﺋﻪﻳﺪﯨﺰ ﯞﯨﺮﯗﺳﻰ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﺪﺍ ﺋﺎﺳﺎﺳﻠﯩﻘﻰ ﻳﻪﺭﻟﯩﻚ ﻣﯩﻠﻠﻪﺗﻜﻪ ﻣﻪﺭﻛﻪﺯﻟﻪﺷﻜﻪﻥ ﺑﻮﻟﯘﭖ، ﯞﺍﻗﯩﺘﻨﯩﯔ ﺋﯚﺗﯜﺷﻰ ﺑﯩﻠﻪﻥ ﺑﯘ ﯞﯨﺮﯗﺱ ﭘﺎﻫﯩﺸﯩﻠﻪﺭ ﯞﻩ ﺗﯧﺨﯩﻤﯘ ﻛﯚﭖ ﺋﺎﯞﺍﻡ ﭘﯘﻗﺮﺍﻻﺭﻏﺎ ﺗﺎﺭﻗﯩﻠﯩﺸﻰ ﻣﯘﻣﻜﯩﻦ. ﺑﻮﻟﯘﭘﻤﯘ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﺪﺍ ﺋﻪﻳﺪﯨﺰ ﺑﯩﻠﻪﻥ ﻳﯘﻗﯘﻣﻼﻧﻐﺎﻥ ﻫﺎﻣﯩﻠﺪﺍﺭ ﺋﺎﻳﺎﻟﻼﺭ ﺋﯜﺯﻟﯜﻛﺴﯩﺰ ﻛﯚﭘﯩﻴﯩﯟﺍﺗﻘﺎﻥ ﺑﻮﻟﯘﭖ، ﻗﻪﺷﻘﻪﺭﺩﻩ ﻫﺎﻣﯩﻠﺪﺍﺭ ﺋﺎﻳﺎﻟﻼﺭﻧﯩﯔ ﺋﻪﻳﺪﯨﺰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻠﯩﻨﯩﺶ ﻧﯩﺴﺒﯩﺘﻰ 3.5 ﭘﯩﺮﺳﻪﻧﺘﻜﻪ ﻳﯧﺘﯩﭗ ﺑﺎﺭﻏﺎﻥ. ﺩﻭﻛﻼﺗﺘﺎ، ﺋﯘﻳﻐﯘﺭ ﺋﯧﻠﯩﻨﯩﯔ ﺗﯘﺭﭘﺎﻥ ﺭﺍﻳﻮﻧﯩﺪﺍ ﭘﺎﻫﯩﺸﯩﻠﻪﺭﻧﯩﯔ 3.4 ﭘﯩﺮﺳﻪﻧﺘﻰ ﺋﻪﻳﺪﯨﺰ ﯞﯨﺮﯗﺳﯩﺪﺍ ﻳﯘﻗﯘﻣﻼﻧﻐﺎﻧﻠﯩﻘﯩﻨﻰ، ﺑﯘ ﺋﻪﻫﯟﺍﻟﻨﯩﯔ ﺋﯩﻠﻰ ﺭﺍﻳﻮﻧﯩﺪﺍ 3.3 ﭘﯩﺮﺳﻪﻧﺖ ﺋﯩﻜﻪﻧﻠﯩﻜﯩﻨﻰ ﻳﺎﺯﺩﻯ.

ﺩﻭﻛﻼﺗﺘﺎ ﻳﻪﻧﻪ، ﺧﯩﺘﺎﻱ ﺳﻪﻫﯩﻴﻪ ﻣﯩﻨﯩﺴﺘﯩﺮﻟﯩﻘﻰ ﺧﯩﺘﺎﻱ ﺑﯘﻳﯩﭽﻪ ﺋﻪﻳﺪﯨﺰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﯘﭼﯩﻼﺭﻧﻰ 650 ﻣﯩﯔ، ﺩﻩﭖ ﺋﯧﻼﻥ ﻗﯩﻠﻐﺎﻥ ﺑﻮﻟﺴﯩﻤﯘ، ﻟﯧﻜﯩﻦ ﺋﻪﻣﻪﻟﯩﻴﻪﺗﺘﯩﻜﻰ ﺳﺎﻥ ﺑﯘﻧﯩﯔ ﻛﯚﭖ ﺑﻮﻟﯘﺷﻰ ﻣﯘﻣﻜﯩﻨﻠﯩﻜﯩﻨﻰ ﯞﻩ 2012 ‏- ﻳﯩﻠﯩﻐﺎ ﺑﺎﺭﻏﺎﻧﺪﺍ 1 ﻳﯧﺮﯨﻢ ﻣﯩﻠﻴﻮﻧﺪﯨﻦ 2 ﻳﯧﺮﯨﻢ ﻣﯩﻠﻴﻮﻧﻐﯩﭽﻪ ﻛﯩﺸﻰ ﺑﯘ ﯞﯨﺮﯗﺱ ﺑﯩﻠﻪﻥ ﻳﯘﻗﯘﻣﻠﯩﻨﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺩﻭﻛﻼﺗﺘﺎ ﺋﻪﺳﻜﻪﺭﺗﯩﺸﯩﭽﻪ، ﺳﻪﻫﯩﻴﻪ ﺩﺍﺋﯩﺮﯨﻠﯩﺮﻯ ﺑﯩﻠﻪﻥ ﺝ ﺥ ﺩﺍﺋﯩﺮﯨﻠﯩﺮﻯ ﺋﺎﺭﯨﺴﯩﺪﯨﻜﻰ ﺋﯩﺨﺘﯩﻼﭖ ﺋﻪﻳﺪﯨﺰ ﯞﯨﺮﯗﺳﯩﻨﯩﯔ ﺯﻩﻫﻪﺭﻟﯩﻚ ﭼﯧﻜﯩﻤﻠﯩﻚ ﭼﻪﻛﻜﯜﭼﯩﻠﻪﺭ ﯞﻩ ﭘﺎﻫﯩﺸﯩﻠﻪﺭ ﺋﺎﺭﯨﺴﯩﺪﺍ ﺗﺎﺭﻗﯩﻠﯩﺸﺘﯩﻦ ﺳﺎﻗﻠﯩﻨﯩﺶ ﺗﻪﺩﺑﯩﺮﻯ ﺋﯧﻠﯩﺸﯩﻐﺎ ﺗﻮﺳﺎﻟﻐﯘ ﺑﻮﻟﻤﺎﻗﺘﺎ ﺋﯩﻜﻪﻥ. (ﺋﻪﺭﻛﯩﻦ)