ﻏﻪﺭﺏ ﻣﻪﺗﺒﯘﺋﺎﺗﻠﯩﺮﯨﺪﺍ 5- ﻓﯧﯟﺭﺍﻝ ﺋﯩﻠﻰ ﯞﻩﻗﻪﺳﯩﮕﻪ ﺋﺎﻻﻗﯩﺪﺍﺭ ﺋﯘﭼﯘﺭﻻﺭ ﺋﺎﺷﻜﺎﺭﯨﻼﻧﺪﻯ

ﺋﻪﻧﮕﻠﯩﻴﯩﺪﻩ ﻧﻪﺷﺮ ﻗﯩﻠﯩﻨﯩﺪﯨﻐﺎﻥ (Sunday Times)ﻳﻪﻛﺸﻪﻧﺒﻪ ﻛﯜﻧﺪﯨﻠﯩﻚ ﮔﯧﺰﯨﺘﯩﻨﯩﯔ، 22 - ﺋﯩﻴﯘﻟﺪﯨﻜﻰ ﺳﺎﻧﯩﻐﺎ "ﺑﯧﻴﺠﯩﯖﻨﯩﯔ ﺗﯧﺮﺭﻭﺭﻟﯘﻗﻘﺎ ﻗﺎﺭﺷﻰ ﻛﯜﺭﯨﺸﯩﻨﯩﯔ ﻛﻪﻳﯩﻨﯩﮕﻪ ﻣﯘﺳﯘﻟﻤﺎﻧﻼﺭﻏﺎ ﻗﺎﺭﺍﺗﻘﺎﻥ ﯞﻩﻫﺸﯩﻲ ﺑﺎﺳﺘﯘﺭﯗﺷﻠﯩﺮﻯ ﻳﻮﺷﯘﺭﯗﻧﻐﺎﻥ" ﺳﻪﺭﻟﻪﯞﻫﯩﻠﯩﻚ ﺗﻪﭘﺴﯩﻠﯩﻲ ﺧﻪﯞﻩﺭ ﺑﯧﺮﯨﻠﺪﻯ.

ﺧﻪﯞﻩﺭ ﺑﯧﺸﯩﺪﺍ ﺑﯘ ﻳﯩﻞ ﺑﺎﻫﺎﺭﺩﺍ ﺧﯩﺘﺎﻱ ﻛﻮﻣﻤﯘﻧﯩﺴﺘﻠﯩﺮﻯ ﺗﻪﺭﯨﭙﯩﺪﯨﻦ ﻗﻪﺗﻠﻰ ﻗﯩﻠﯩﻨﻐﺎﻥ ﺋﯩﺴﻤﺎﺋﯩﻞ ﺳﻪﻣﻪﺗﻨﯩﯔ ﺗﯜﺭﻣﯩﮕﻪ ﺋﯧﻠﯩﻨﯩﺸﻰ ﯞﻩ ﺋﯧﺘﯩﻠﯩﺶ ﺋﺎﻟﺪﯨﺪﺍ 4 ﻳﯩﻠﺪﯨﻦ ﺑﯘﻳﺎﻥ ﻛﯚﺭﯛﺷﻤﯩﮕﻪﻥ ﺋﺎﻳﺎﻟﻰ ﺑﯜﻫﻪﺟﻪﺭ ﯞﻩ ﺋﯩﻜﻜﻰ ﺑﺎﻟﯩﺴﻰ ﺑﯩﻠﻪﻥ ﭘﻪﻗﻪﺕ 10 ﻣﯩﻨﯘﺕ ﯞﯨﺪﺍﻟﯩﺸﯩﺶ ﯞﺍﻗﻰ ﺑﯧﺮﯨﻠﮕﻪﻧﻠﯩﻜﻰ ﺋﯩﻨﺘﺎﻳﯩﻦ ﺗﻪﺳﯩﺮﻟﯩﻚ ﻳﻮﺳﯘﻧﺪﺍ ﺋﺎﺭﻗﺎ ﻛﯚﺭﯛﻧﯜﺵ ﻗﯩﻠﯩﻨﯩﭗ، ﺋﯘﻳﻐﯘﺭ ﻣﯘﺳﯘﻟﻤﺎﻧﻼﺭﻧﯩﯔ 11- ﺳﯧﻨﺘﻪﺑﯩﺮ ﯞﻩﻗﻪﺳﯩﺪﯨﻦ ﻛﯧﻴﯩﻦ ﺧﯩﺘﺎﻳﺪﺍ ﺗﯧﺨﯩﻤﯘ ﺋﯧﻐﯩﺮ ﺑﺎﺳﺘﯘﺭﯗﺷﻼﺭﻏﺎ ﺩﯗﭺ ﻛﯧﻠﯩﯟﺍﺗﻘﺎﻧﻠﯩﻘﻰ ﺑﺎﻳﺎﻥ ﻗﯩﻠﯩﻨﻐﺎﻥ.

ﻣﻪﺯﻛﯘﺭ ﺧﻪﯞﻩﺭﺩﻩ ﺋﻪﯓ ﻛﯚﺯﮔﻪ ﭼﯧﻠﯩﻘﯩﺪﯨﻐﯩﻨﻰ، 1997- ﻳﯩﻠﻰ ﺋﯘﻳﻐﯘﺭ ﺋﯧﻠﯩﻨﻰ ﺗﯩﺘﺮﻩﺗﻜﻪﻥ 5- ﻓﯧﯟﺭﺍﻝ ﯞﻩﻗﻪﺳﯩﻨﻰ ﺑﺎﺳﺘﯘﺭﯗﺷﻘﺎ ﻗﺎﺗﻨﺎﺷﻘﺎﻥ ، ﻫﺎﺯﯨﺮ ﻫﻪﺭﺑﯩﻲ ﺳﻪﭘﺘﯩﻦ ﭼﯧﻜﯩﻨﯩﭗ ﺗﺎﻛﺴﯩﭽﯩﻠﯩﻖ ﻗﯩﻠﯩﯟﺍﺗﻘﺎﻥ ﺧﯩﺘﺎﻱ ﺋﻪﺳﻜﯩﺮﯨﻨﯩﯔ ﻣﻪﺯﻛﯘﺭ ﺧﻪﯞﻩﺭﻧﯩﯔ ﻣﯘﺋﻪﻟﻠﯩﭙﯩﮕﻪ ﺋﯧﻴﺘﯩﭗ ﺑﻪﺭﮔﻪﻧﻠﯩﺮﯨﺪﯗﺭ.

ﺑﯘ ﺳﺎﺑﯩﻖ ﺋﻪﺳﻜﻪﺭ ﺋﻪﻳﻨﻰ ﯞﺍﻗﯩﺘﺘﯩﻜﻰ ﺋﯩﺸﻼﺭﻧﻰ ﻧﺎﻫﺎﻳﯩﺘﻰ ﻣﻪﻏﺮﯗﺭﻟﯘﻕ ﯞﻩ ﻣﻪﻣﻨﯘﻧﻠﯘﻕ ﺗﯘﻳﻐﯘﺳﯩﺪﺍ ﺋﻪﺳﻠﻪﭖ: "1997- ﻳﯩﻠﻰ ﺗﻮﭘﯩﻼﯓ ﻳﯜﺯ ﺑﻪﺭﮔﻪﻧﺪﻩ ﻣﻪﻥ ﺧﻪﻟﻖ ﻗﻮﺭﺍﻟﻠﯩﻖ ﺳﺎﻗﭽﻰ ﻗﯩﺴﯩﻤﺪﺍ ﺋﯩﺪﯨﻢ. ﺑﺎﺷﺘﺎ ﺑﯩﺰ ﺑﺎﺷﻘﯘﺭﺍﻟﻤﺎﻱ ﻗﺎﻟﺪﯗﻕ. ﻗﺎﻻﻳﻤﯩﻘﺎﻥ ﺑﻮﻟﯘﭖ ﻛﻪﺗﺘﻰ. ﺑﯩﺰ ﺋﻪﺳﻜﻪﺭ ﻳﯚﺗﻜﯩﺪﯗﻕ. ﺋﻪﺳﻜﻪﺭﻟﻪﺭ ﻫﻪﺭﺑﯩﻴﭽﻪ ﻛﯩﻴﯩﻤﻠﻪﺭﻧﻰ ﺳﺎﻗﭽﻰ ﻛﯩﻴﯩﻤﯩﮕﻪ ﺋﺎﻟﻤﺎﺷﺘﯘﺭﺩﻯ. ﺑﯩﺰﻣﯘ ﺳﺎﻗﭽﯩﻼﺭﻏﺎ ﺋﻮﺧﺸﯩﺪﯗﻕ. ﻣﻪﺭﻛﯩﺰﻯ ﻫﯚﻛﯜﻣﻪﺕ ﺋﯘﻻﺭﻧﻰ ﺋﯩﻜﻜﯩﻠﻪﻧﻤﻪﻱ ﻗﺎﺗﺘﯩﻖ ﺑﺎﺷﻘﯘﺭﯗﺵ ﺑﯘﻳﺮﯗﻗﻰ ﺑﻪﺭﮔﻪﻥ ﺋﯩﺪﻯ. ﺋﯩﺸﯩﻨﯩﯖﻜﻰ، ﺑﯩﺰ ﺭﺍﺳﺖ ﺷﯘﻧﺪﺍﻕ ﻗﯩﻠﺪﯗﻕ. "

ﺋﯘ ﻳﻪﻧﻪ ﺧﯩﺘﺎﻱ ﺋﺎﺭﻣﯩﻴﯩﺴﻰ ﺗﻪﺭﻩﭘﺘﯩﻨﻤﯘ ﺑﯩﺮ ﻧﻪﭼﭽﻪ ﺋﺎﺩﻩﻣﻨﯩﯔ ﭼﯩﻘﯩﻢ ﺑﻮﻟﻐﺎﻧﻠﯩﻘﯩﻨﻰ ﺋﻪﺳﻠﻪﭖ: "ﺑﯩﺰﻣﯘ ﺑﯩﺮﻧﻪﭼﭽﻪ ﺋﺎﺩﯨﻤﯩﻤﯩﺰﺩﯨﻦ ﺋﺎﻳﺮﯨﻠﺪﯗﻕ، ﺋﻪﻣﻤﺎ ﺑﯩﺰ ﺑﻪﻙ ﺟﯩﻖ ﺋﯚﻟﺘﯜﺭﺩﯗﻕ . ﺋﯧﻨﯩﻖ ﺳﺎﻧﯩﻨﻰ ﺑﯩﻠﻤﻪﻳﻤﻪﻥ . ﻧﻪﭼﭽﻪ ﻣﯩﯖﻨﻰ ﺋﯚﻟﺘﯜﺭﺩﯗﻕ. ﺋﯘﻻﺭﻏﺎ ﻛﯜﭼﯩﻤﯩﺰﻧﻰ ﺑﯩﺮ ﻛﯚﺭﺳﻪﺗﺘﯘﻕ ﯞﻩ ﻗﺎﺗﺘﯩﻖ ﺗﻪﻧﺒﯩﻬ ﺑﯧﺮﯨﭗ ﻗﻮﻳﺪﯗﻕ" ﺩﯦﮕﻪﻥ.

ﺋﯘ ﻳﻪﻧﻪ ، ﺋﻪﻳﻨﻰ ﯞﺍﻗﯩﺘﺘﺎ ﺑﯩﯖﺘﯜﻩﻧﻨﯩﻤﯘ ﻗﻮﺭﺍﻟﻼﻧﺪﯗﺭﻏﺎﻧﻠﯩﻘﯩﻨﻰ ﺑﺎﻳﺎﻥ ﻗﯩﻠﯩﭗ: " ﺋﯘﻻﺭﺩﺍ ﭼﻪﺗﺌﻪﻟﺪﯨﻦ ﺋﯧﻠﯩﭗ ﻛﯩﺮﮔﻪﻥ ﻗﻮﺭﺍﻝ ﺑﺎﺭ ﺩﻩﭖ ﺑﯩﻠﮕﻪﭼﻜﻪ، ﺑﯩﺰ ﺑﯘ ﺗﻪﺭﻩﭘﺘﯩﻦ ﺑﯩﯖﺘﯜﻩﻧﮕﻪ ﻗﻮﺭﺍﻝ ﺗﺎﺭﻗﯩﺘﯩﭗ، ﻣﻪﺷﯩﻘﻘﻪ ﺳﺎﻟﺪﯗﻕ" ﺩﻩﻳﺪﯗ. ﺋﺎﭘﺘﻮﺭ ﻣﺎﻗﺎﻟﯩﺴﯩﺪﻩ 5- ﻓﯧﯟﺭﺍﻝ ﯞﻩﻗﻪﺳﯩﻨﻰ ﺗﻮﻟﯘﻕ ﺋﺎﺷﻜﺎﺭﯨﻼﻧﻤﯩﻐﺎﻥ ﺋﯩﺮﻗﯩﻲ ﻗﯩﺮﻏﯩﻨﭽﯩﻠﯩﻘﻰ ﺩﻩﭖ ﻛﯚﺭﺳﻪﺗﻜﻪﻥ. (ﺟﯜﻣﻪ)