ﺧﯩﺘﺎﻱ ﻫﯚﻛﯜﻣﯩﺘﻰ ﺋﯩﺴﻤﺎﻳﯩﻞ ﺳﻪﻣﻪﺗﻨﻰ ﺋﯚﻟﯜﻣﮕﻪ ﻫﯚﻛﯜﻡ ﻗﯩﻠﺪﻯ

ﺧﯩﺘﺎﻱ ﻫﯚﻛﯜﻣﯩﺘﻰ، 2003 ‏- ﻳﯩﻠﻰ ﭘﺎﻛﯩﺴﺘﺎﻥ ﻫﯚﻛﯜﻣﯩﺘﻰ ﺗﻪﺭﯨﭙﯩﺪﯨﻦ ﺧﯩﺘﺎﻳﻐﺎ ﺗﺎﭘﺸﯘﺭﯗﭖ ﺑﯧﺮﯨﻠﮕﻪﻥ ﺋﯩﺴﻤﺎﻳﯩﻞ ﻗﺎﺭﻯ ﯞﻩ ﺋﯩﻠﻬﺎﻡ ﺩﻩﭖ ﺗﻮﻧﻮﻟﻐﺎﻥ ﺋﯩﺴﻤﺎﻳﯩﻞ ﺳﻪﻣﻪﺗﻨﻰ، ﺩﯙﻟﻪﺗﻨﻰ ﭘﺎﺭﭼﯩﻼﺷﻘﺎ ﺋﯘﺭﯗﻧﻐﺎﻥ، ﻗﺎﻧﯘﻧﺴﯩﺰ ﭘﺎﺭﺗﻼﺗﻘﯘﭺ ﻳﺎﺳﺎﺵ ﺟﯩﻨﺎﻳﯩﺘﻰ ﺋﯚﺗﻜﯜﺯﮔﻪﻥ ﺩﻩﭖ ﺋﻪﻳﯩﺒﻠﻪﭖ، ﺋﯚﻟﯜﻡ ﺟﺎﺯﺍﺳﯩﻐﺎ ﻫﯚﻛﯜﻡ ﻗﯩﻠﺪﻯ.

ﺋﻪﺭﻛﯩﻦ ﺋﺎﺳﯩﻴﺎ ﺭﺍﺩﯨﺌﻮﺳﻰ ﻣﯘﺧﺒﯩﺮﯨﻨﯩﯔ ﺋﯩﮕﯩﻠﯩﺸﯩﭽﻪ، ﺋﺴﻤﺎﻳﯩﻞ ﺳﻪﻣﻪﺕ ﺋﯜﺭﯛﻣﭽﻰ ﺷﻪﻫﻪﺭﻟﯩﻚ ﺋﻮﺗﺘﯘﺭﺍ ﺧﻪﻟﻖ ﺳﻮﺕ ﻣﻪﻫﻜﯩﻤﯩﺴﻰ ﺗﻪﺭﯨﭙﯩﺪﯨﻦ 2005‏-ﻳﯩﻠﻰ 10‏- ﺋﺎﻳﻨﯩﯔ 31‏- ﻛﯜﻧﻰ ﺋﯚﻟﯜﻡ ﺟﺎﺯﺍﺳﯩﻐﺎ ﻫﯚﻛﯜﻡ ﻗﯩﻠﯩﻨﻐﺎﻥ. ﻟﯧﻜﯩﻦ ﺳﻮﺕ ﻫﯚﻛﯜﻣﯩﺪﻩ، ﺋﯩﺴﻤﺎﻳﯩﻞ ﺳﻪﻣﻪﺗﻨﯩﯔ ﺋﻪﮔﻪﺭ ﻫﯚﻛﯜﻣﮕﻪ ﻗﺎﻳﯩﻞ ﺑﻮﻟﻤﯩﺴﺎ، ﺋﺎﭘﺘﻮﻧﻮﻡ ﺭﺍﻳﻮﻧﻠﯘﻕ ﻳﯘﻗﯩﺮﻯ ﺧﻪﻟﻖ ﺳﻮﺕ ﻣﻪﻫﻜﯩﻤﯩﺴﯩﮕﻪ ﺋﻪﺭﺯ ﻗﯩﻼﻻﻳﺪﯨﻐﺎﻧﻠﯩﻘﻰ ﺑﺎﻳﺎﻥ ﻗﯩﻠﯩﻨﻐﺎﻥ.

ﺋﯩﮕﯩﻠﯩﺸﯩﻤﯩﺰﭼﻪ، ﺋﯘﺭﯗﻣﭽﻰ ﺷﻪﻫﻪﺭﻟﯩﻚ ﺧﻪﻟﻖ ﺗﻪﭘﺘﯩﺶ ﻣﻪﻫﻜﯩﻤﯩﺴﻰ، ﺋﯩﺴﻤﺎﻳﯩﻞ ﺳﻪﻣﻪﺗﻨﻰ، 1997‏- ﻳﯩﻠﻰ 3‏- ﺋﺎﻳﺪﺍ ﭘﺎﻛﯩﺴﺘﺎﻧﻨﯩﯔ ﺭﺍﯞﺍﻟﭙﯩﻨﺪﻯ ﺷﻪﻫﯩﺮﯨﺪﻩ ﻫﻪﺳﻪﻥ ﻣﻪﺧﺴﯘﻡ ﻗﺎﺗﺎﺭﻟﯩﻖ ﺗﻮﻗﻘﯘﺯ ﻛﯩﺸﻰ ﺑﯩﻠﻪﻥ ﺑﯩﺮﻟﯩﻜﺘﻪ "ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺋﯩﺴﻼﻡ ﭘﺎﺭﺗﯩﻴﯩﺴﻰ" ﻧﻰ ﻗﯘﺭﯗﭖ ﭼﯩﻘﻘﺎﻥ ﻫﻪﻣﺪﻩ ﻣﯘﺳﺘﻪﻗﯩﻞ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺩﯙﻟﯩﺘﯩﻨﻰ ﻗﯘﺭﯗﺵ ﻣﻪﻗﺴﯩﺘﯩﺪﻩ، ﻣﯘﺟﺎﻫﯩﺘﻼﺭ ﺗﻪﺭﺑﯩﻴﯩﻠﻪﺵ ﺋﯜﭼﯜﻥ 1997‏- ﻳﯩﻠﻰ 5‏- ﺋﺎﻳﺪﺍ ﺗﯘﻧﺠﻰ ﺗﯜﺭﻛﯜﻣﺪﯨﻜﻰ 11 ﺋﺎﺩﻩﻣﻨﻰ ﺋﺎﻓﻐﺎﻧﯩﺴﺘﺎﻧﻐﺎ ﺗﻪﺭﺑﯩﻴﯩﻠﻪﺷﻜﻪ ﺋﺎﭘﺎﺭﻏﺎﻥ، 1997‏- ﻳﯩﻠﻰ 9‏- ﺋﺎﻳﺪﺍ ﺋﺎﻓﻐﺎﻧﯩﺴﺘﺎﻧﺪﺍ ﺧﯩﻤﯩﻴﯩﯟﯨﻲ ﭘﺎﺭﺗﻠﯩﺘﯩﺶ ﻗﯘﺭﯗﻟﻤﯩﺴﻰ ﻳﺎﺳﺎﺷﻨﻰ ﺋﯚﮔﯩﺘﯩﺪﯨﻐﺎﻥ ﻟﯩﺰﺍ ﻻﮔﯩﺮﯨﻨﻰ ﻗﯘﺭﯗﭖ ﺷﯩﻨﺠﺎﯕﻠﯩﻖ 100ﮔﻪ ﻳﯧﻘﯩﻦ ﺋﺎﺩﻩﻣﻨﻰ ﺗﻪﺭﺑﯩﻴﻠﯩﮕﻪﻥ ﺩﻩﭖ ﺋﻪﻳﯩﺒﻠﯩﮕﻪﻥ.

ﺋﻪﻣﻤﺎ، ﺋﯩﺴﻤﺎﻳﯩﻞ ﺳﻪﻣﻪﺕ ﺳﻮﺗﻨﯩﯔ ﭘﯜﺗﯜﻥ ﺋﻪﻳﯩﺒﻠﻪﺷﻠﯩﺮﯨﻨﻰ ﺭﻩﺕ ﻗﯩﻠﯩﭗ، ﺋﻪﻳﯩﺒﻨﺎﻣﯩﺪﺍ ﺑﯧﻜﯩﺘﯩﻠﮕﻪﻥ ﭘﺎﻛﯩﺘﻼﺭ ﭘﯜﺗﯜﻧﻠﻪﻱ ﺧﺎﺗﺎ، ﻣﻪﻥ ﮔﯘﻧﺎﻫﺴﯩﺰ ﺩﯦﮕﻪﻥ.

ﺳﻮﺗﻨﯩﯔ ﻫﯚﻛﯜﻣﻨﺎﻣﯩﺴﯩﺪﺍ ﺑﺎﻳﺎﻥ ﻗﯩﻠﯩﻨﯩﺸﯩﭽﻪ، ﺋﯩﺴﻤﺎﻳﯩﻞ ﺳﻪﻣﻪﺗﻨﯩﯔ ﺋﺎﻗﻠﯩﻐﯘﭼﯩﺴﻰ ﺳﻮﺗﺘﺎ " ﺟﺎﯞﺍﺑﻜﺎﺭ ﺋﯩﺴﻤﺎﻳﯩﻞ ﺳﻪﻣﻪﺗﻜﻪ ﻗﺎﻧﯘﻧﺴﯩﺰ ﻗﻮﺭﺍﻝ-ﻳﺎﺭﺍﻍ، ﺋﻮﻕ ‏- ﺩﻭﺭﺍ، ﭘﺎﺭﺗﻼﺗﻘﯘﭺ ﻳﺎﺳﯩﻐﺎﻥ ﺩﯦﮕﻪﻥ ﭘﺎﻛﯩﺘﻨﻰ ﺑﯧﻜﯩﺘﯩﺸﻨﯩﯔ ﺩﻩﻟﯩﻞ-ﺋﯩﺴﭙﺎﺗﻰ ﺗﻮﻟﯘﻕ ﺋﻪﻣﻪﺱ، ﮔﯘﯞﺍﻫﭽﯩﻼﺭﻧﯩﯔ ﮔﯘﯞﺍﻫﻠﯩﻘﻰ ﺑﯩﻠﻪﻥ ﺟﺎﯞﺍﺑﻜﺎﺭﻧﯩﯔ ﺋﯩﻘﺮﺍﺭﻯ ﺋﯚﺯ- ﺋﺎﺭﺍ ﻣﺎﺱ ﻛﻪﻟﻤﻪﻳﺪﯗ ﺩﻩﭖ، ﺋﯩﺴﻤﺎﻳﯩﻞ ﺳﻪﻣﻪﺗﻨﻰ ﺋﺎﻗﻠﯩﻐﺎﻥ. (ﺋﻪﻗﯩﺪﻩ)