ﺋﺎﻣﯧﺮﯨﻜﯩﺪﺍ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺟﯘﻣﻬﯘﺭﯨﻴﻪﺕ ﺧﺎﺗﯩﺮﻩ ﻛﯜﻧﻰ ﺋﯚﺗﻜﯜﺯﯛﻟﺪﻯ

1933-ﻳﯩﻠﻰ 12-ﻧﻮﻳﺎﺑﯩﺮ ﻛﯜﻧﻰ ﺳﺎﺑﯩﺖ ﺩﺍﻣﻮﻟﻼﻡ ﺑﺎﺷﭽﯩﻠﯩﻘﯩﺪﺍ ﻗﻪﺷﻘﻪﺭﺩﻩ ﻗﯘﺭﯗﻟﻐﺎﻥ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺋﯩﺴﻼﻡ ﺟﯘﻣﻬﯘﺭﯨﻴﯩﺘﻰ، 1944-ﻳﯩﻠﻰ 12-ﻧﻮﻳﺎﺑﯩﺮ ﻛﯜﻧﻰ ﺋﻪﻟﯩﺨﺎﻥ ﺗﯚﺭﻩ ﻳﯧﺘﻪﻛﭽﯩﻠﯩﻜﯩﺪﻩ ﻏﯘﻟﺠﺎ ﺷﻪﻫﯩﺮﯨﺪﻩ ﻗﯘﺭﯗﻟﻐﺎﻥ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺟﯘﻣﻬﯘﺭﯨﻴﯩﺘﯩﻨﻰ ﺧﺎﺗﯩﺮﯨﻠﻪﺵ ﭘﺎﺋﺎﻟﯩﻴﻪﺗﻠﯩﺮﻯ ﺋﯘﺯﯗﻥ ﻳﯩﻠﻼﺭﺩﯨﻦ ﺑﯘﻳﺎﻥ ﺋﯜﺯﯛﻟﻤﻪﺱ ﺋﻪﻧﺌﻪﻧﻪ ﺳﯜﭘﯩﺘﯩﺪﻩ ﭼﻪﺗﺌﻪﻟﻠﻪﺭﺩﯨﻜﻰ ﺋﯘﻳﻐﯘﺭ ﺟﺎﻣﺎﺋﯩﺘﻰ ﺗﻪﺭﯨﭙﯩﺪﯨﻦ ﺩﺍﯞﺍﻣﻼﺷﺘﯘﺭﯗﻟﻤﺎﻗﺘﺎ.

ﺋﯘﻳﻐﯘﺭﻻﺭﻧﯩﯔ ﻳﺎﯞﺭﻭﭘﺎ ﯞﻩ ﺷﯩﻤﺎﻟﯩﻲ ﺋﺎﻣﯧﺮﯨﻜﺎ ﻗﯩﺘﺌﻪﻟﯩﺮﯨﺪﻩ ﻣﺎﻛﺎﻧﻠﯩﺸﯩﺸﯩﻐﺎ ﺋﻪﮔﯩﺸﯩﭗ، ﺋﯩﻜﻜﻰ ﺟﯘﻣﻬﯘﺭﯨﻴﻪﺗﻨﻰ ﺧﺎﺗﯩﺮﯨﻠﻪﺵ ﺑﯘ ﺟﺎﻳﻼﺭﺩﯨﻤﯘ ﺋﻪﻧﺌﻪﻧﯩﮕﻪ ﺋﺎﻳﻼﻧﻤﺎﻗﺘﺎ.

ﺑﯘ ﺑﯩﺮ ﻫﻪﭘﺘﻪ ﺋﯩﭽﯩﺪﻩ ﺋﻮﺗﺘﯘﺭﺍ ﺋﺎﺳﯩﻴﺎ ﺟﯘﻣﻬﯘﺭﯨﻴﻪﺗﻠﯩﺮﻯ ﯞﻩ ﻳﺎﯞﺭﻭﭘﺎﺩﯨﻜﻰ ﺋﯘﻳﻐﯘﺭﻻﺭﺩﯨﻦ ﺑﺎﺷﻘﺎ ﻳﻪﻧﻪ ﺋﺎﻣﯧﺮﯨﻜﯩﺪﯨﻜﻰ ﺋﯘﻳﻐﯘﺭ ﺟﺎﻣﺎﺋﯩﺘﯩﻤﯘ ﺟﯘﻣﻬﯘﺭﯨﻴﻪﺕ ﻛﯜﻧﻰ ﺋﯚﺗﻜﯜﺯﺩﻯ.

12-13-ﻧﻮﻳﺎﺑﯩﺮ ﻛﯜﻧﻠﯩﺮﻯ ﺋﺎﻣﯧﺮﯨﻜﯩﻨﯩﯔ ﭘﺎﻳﺘﻪﺧﺘﻰ ﯞﺍﺷﯩﻨﮕﺘﻮﻥ ﺷﻪﻫﯩﺮﻯ ﺋﻪﺗﺮﺍﭘﯩﺪﯨﻜﻰ ﯞﯨﺮﮔﯩﻨﯩﻴﺎ، ﻣﺎﺭﯨﻴﻠﻪﻧﺪ ﺷﯩﺘﺎﺗﻠﯩﺮﯨﻐﺎ ﺗﺎﺭﻗﺎﻟﻐﺎﻥ ﺋﯘﻳﻐﯘﺭ ﺟﺎﻣﺎﺋﯩﺘﯩﻤﯘ ﺩﺍﻏﺪﯗﻏﯘﻟﯘﻕ ﭘﺎﺋﺎﻟﯩﻴﻪﺗﻠﻪﺭ ﺋﯘﻳﯘﺷﺘﯘﺭﯗﭖ، ﺋﯘﻳﻐﯘﺭﻻﺭﻧﯩﯔ ﺋﯚﺗﻜﻪﻥ ﺋﻪﺳﯩﺮﺩﻩ ﻗﻮﻟﻐﺎ ﻛﻪﻟﺘﯜﺭﮔﻪﻥ ﺷﺎﻧﻠﯩﻖ ﻧﻪﺗﯩﺠﯩﻠﯩﺮﯨﻨﻰ ﺋﻪﺳﻠﻪﭖ، ﺋﯚﺯﻟﯩﺮﯨﻨﯩﯔ ﺑﯘﻧﯩﯖﺪﯨﻦ ﻛﯧﻴﯩﻦ ﺋﻪﻧﻪ ﺷﯘﻧﺪﺍﻕ ﻛﯜﻧﻠﻪﺭﻧﯩﯔ ﻗﺎﻳﺘﺎ ﻗﻮﻟﻐﺎ ﻛﯧﻠﯩﺸﯩﮕﻪ ﺑﻮﻟﻐﺎﻥ ﺋﯩﺸﻪﻧﭽﯩﻠﯩﺮﯨﻨﻰ ﺋﺎﺷﯘﺭﺩﻯ.

ﺋﺎﻣﯧﺮﯨﻜﺎ ﺋﯘﻳﻐﯘﺭﻟﯩﺮﻯ ﻫﻪﺭ ﻳﯩﻠﻰ 12-ﻧﻮﻳﺎﺑﯩﺮﻧﻰ ﺧﺎﺗﯩﺮﯨﻠﯩﻤﻪﻛﺘﻪ. (ﺋﯜﻣﯩﺪﯞﺍﺭ)