ﺋﺎﻣﯧﺮﯨﻜﺎ ﺋﯘﻳﻐﯘﺭﻟﯩﺮﻯ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺟﯘﻣﻬﯘﺭﯨﻴﻪﺕ ﻛﯜﻧﯩﻨﻰ ﺧﺎﺗﯩﺮﯨﻠﯩﺪﻯ

12-ﻧﻮﻳﺎﺑﯩﺮ ﻛﯜﻧﻰ 1933-ﻳﯩﻠﻰ ﻗﻪﺷﻘﻪﺭﺩﻩ ﯞﻩ 1944-ﻳﯩﻠﻰ ﻏﯘﻟﺠﯩﺪﺍ ﻗﯘﺭﯗﻟﻐﺎﻥ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺟﯘﻣﻬﯘﺭﯨﻴﯩﺘﯩﻨﯩﯔ ﺧﺎﺗﯩﺮﻩ ﻛﯜﻧﯩﺪﯗﺭ.

ﺑﯘ ﻣﯘﻧﺎﺳﯩﯟﻩﺕ ﺑﯩﻠﻪﻥ ﺩﯗﻧﻴﺎﻧﯩﯔ ﻫﻪﺭ ﻗﺎﻳﺴﻰ ﺟﺎﻳﻠﯩﺮﯨﺪﯨﻜﻰ ﺋﯘﻳﻐﯘﺭ ﺗﻪﺷﻜﯩﻼﺗﻠﯩﺮﻯ ﯞﻩ ﺟﺎﻣﺎﺋﯩﺘﻰ ﺗﯜﺭﻟﯜﻙ ﺷﻪﻛﯩﻠﺪﻩ ﺧﺎﺗﯩﺮﯨﻠﻪﺵ ﺋﯧﻠﯩﭗ ﺑﺎﺭﻣﺎﻗﺘﺎ. ﺑﻪﺯﻯ ﺩﯙﻟﻪﺗﻠﻪﺭﺩﯨﻜﻰ ﺧﯩﺘﺎﻱ ﻛﻮﻧﺴﯘﻟﺨﺎﻧﯩﻠﯩﺮﻯ ﺋﺎﻟﺪﯨﺪﺍ ﻧﺎﺭﺍﺯﯨﻠﯩﻖ ﻧﺎﻣﺎﻳﯩﺸﻠﯩﺮﻯ ﻳﯜﺯ ﺑﻪﺭﮔﻪﻥ ﺑﻮﻟﺴﺎ، ﺑﯩﺮ ﻗﯩﺴﯩﻢ ﻣﻪﻣﻠﯩﻜﻪﺗﻠﻪﺭﺩﯨﻜﻰ ﺋﯘﻳﻐﯘﺭ ﺟﺎﻣﺎﺋﯩﺘﻰ ﺟﯘﻣﻬﯘﺭﯨﻴﻪﺕ ﻛﯜﻧﯩﻨﻰ ﺧﺎﺗﯩﺮﯨﻠﻪﺵ ﻳﯜﺯﯨﺴﯩﺪﯨﻦ ﻧﯘﺗﯘﻕ ﺳﯚﺯﻟﻪﺵ، ﺗﺎﺭﯨﺨﻨﻰ ﺋﻪﺳﻠﻪﺵ، ﺑﺎﻳﺮﺍﻕ ﭼﯩﻘﯩﺮﯨﺶ ﻫﻪﻡ ﺷﯧﻬﯩﺘﻠﻪﺭﮔﻪ ﺗﻪﺯﯨﻴﻪ ﺑﯩﻠﺪﯛﺭﯛﺵ ﻗﺎﺗﺎﺭﻟﯩﻖ ﯞﻩﺗﻪﻧﭙﻪﺭﯞﻩﺭﻟﯩﻚ ﭘﺎﺋﺎﻟﯩﻴﻪﺗﻠﯩﺮﻯ ﺋﯘﻳﯘﺷﺘﯘﺭﻏﺎﻥ.

ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻨﯩﯔ ﺗﻪﺷﻜﯩﻠﻠﯩﺸﻰ ﺑﯩﻠﻪﻥ 11- ﻧﻮﻳﺎﺑﯩﺮ ﻛﯜﻧﻰ ﺋﺎﻣﯧﺮﯨﻜﺎ ﭘﺎﻳﺘﻪﺧﺘﻰ ﻳﯧﻨﯩﺪﯨﻜﻰ ﻓﺎﺋﯩﺮﻓﺎﻛﯩﺲ ﺷﻪﻫﺮﯨﺪﯨﻜﻰ ﯞﯨﺮﮔﯩﻨﯩﺌﺎ ﺋﯩﺠﺘﯩﻤﺎﺋﯩﻲ ﺋﺎﻟﯩﻲ ﺗﯧﺨﻨﯩﻜﻮﻣﯩﻨﯩﯔ ﺯﺍﻟﯩﺪﺍ ﺟﯘﻣﻬﯘﺭﯨﻴﻪﺕ ﻛﯜﻧﻰ ﭘﺎﺋﺎﻟﯩﻴﯩﺘﻰ ﺋﯚﺗﻜﯜﺯﯛﻟﺪﻯ. ﺑﯘﻧﯩﯖﻐﺎ ﯞﺍﺷﯩﻨﮕﺘﻮﻥ ﺋﻪﺗﺮﺍﭘﯩﺪﯨﻜﻰ ﺋﯘﻳﻐﯘﺭ ﺟﺎﻣﺎﺋﯩﺘﻰ ﯞﻩ ﺑﺎﺷﻘﺎ ﺷﯩﺘﺎﺗﻼﺭﺩﯨﻦ ﻛﻪﻟﮕﻪﻥ ﺑﯩﺮ ﻗﯩﺴﯩﻢ ﺋﯘﻳﻐﯘﺭﻻﺭ ﺋﯩﺸﺘﯩﺮﺍﻙ ﻗﯩﻠﺪﻯ. ﭘﺎﺋﺎﻟﯩﻴﻪﺕ ﺟﻪﺭﻳﺎﻧﯩﺪﺍ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺟﯘﻣﻬﯘﺭﯨﻴﯩﺘﯩﻨﯩﯔ ﻗﯘﺭﯗﻟﯘﺷﻰ ﯞﻩ ﺋﺎﺧﯩﺮﻟﯩﺸﯩﺸﻰ ﻗﺎﺗﺎﺭﻟﯩﻖ ﺗﯜﺭﻟﯜﻙ ﻣﻪﺳﯩﻠﯩﻠﻪﺭ ﺑﻮﻳﯩﭽﻪ ﻣﯘﻫﺎﻛﯩﻤﯩﻠﻪﺭ ﺋﯧﻠﯩﭗ ﺑﯧﺮﯨﻠﻐﺎﻧﺪﯨﻦ ﺳﯩﺮﺕ ﻳﻪﻧﻪ ﺷﯧﻬﯩﺪﻟﻪﺭ ﺋﯜﭼﯜﻥ ﺧﻪﺗﻤﻪ ﻗﯘﺭﺋﺎﻥ ﻗﯩﻠﯩﻨﺪﻯ.

ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﻳﺎﭘﻮﻧﯩﻴﯩﺪﻩ ﺯﯨﻴﺎﺭﻩﺗﺘﻪ ﺑﻮﻟﻐﺎﻧﻠﯩﻘﻰ ﺋﯜﭼﯜﻥ،ﮔﻪﺭﭼﻪ ﭘﺎﺋﺎﻟﯩﻴﻪﺗﻜﻪ ﻗﺎﺗﻨﯩﺸﺎﻟﻤﯩﻐﺎﻥ ﺑﻮﻟﺴﯩﻤﯘ، ﻟﯧﻜﯩﻦ ﺋﯚﺯﯨﻨﯩﯔ ﻧﯘﺗﻘﯩﻨﻰ ﺟﺎﻣﺎﺋﻪﺗﻜﻪ ﻳﻪﺗﻜﯜﺯﯛﭖ، ﺋﯘﻻﺭﻧﻰ ﺋﻪﺟﺪﺍﺩﻻﺭﻧﯩﯔ ﺷﺎﻧﻠﯩﻖ ﺋﯩﺰﻟﯩﺮﯨﻨﻰ ﺋﯘﻧﺘﯘﭖ ﻗﺎﻟﻤﺎﻱ، ﺩﺍﯞﺍﻣﻠﯩﻖ ﺋﯩﺘﺘﯩﭙﺎﻗﻠﯩﺸﯩﭗ، ﺑﯩﺮ ﻧﯩﻴﻪﺗﺘﻪ ﻛﯜﺭﻩﺵ ﻗﯩﻠﯩﺸﻘﺎ ﭼﺎﻗﯩﺮﺩﻯ.

ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﻳﻪﻧﻪ ﻳﺎﭘﻮﻧﯩﻴﯩﺪﯨﻦ 12-ﻧﻮﻳﺎﺑﯩﺮ ﺟﯘﻣﻬﯘﺭﯨﻴﻪﺕ ﻛﯜﻧﻰ ﻣﯘﻧﺎﺳﯩﯟﯨﺘﻰ ﺑﯩﻠﻪﻥ ﺗﻪﺑﺮﯨﻜﻨﺎﻣﻪ ﺋﯧﻼﻥ ﻗﯩﻠﯩﭗ، ﭘﯜﺗﯜﻥ ﺩﯗﻧﻴﺎﺩﯨﻜﻰ ﺋﯘﻳﻐﯘﺭﻻﺭﻧﻰ 12 -ﻧﻮﻳﺎﺑﯩﺮ ﺟﯘﻣﻬﯘﺭﯨﻴﻪﺕ ﻛﯜﻧﻰ ﺑﯩﻠﻪﻥ ﺗﻪﺑﺮﯨﻜﻠﯩﺪﻯ.

12-ﻧﻮﻳﺎﺑﯩﺮ ﺟﯘﻣﻬﯘﺭﯨﻴﻪﺕ ﻛﯜﻧﻰ ﺗﯜﺭﻛﯩﻴﻪ، ﮔﯧﺮﻣﺎﻧﯩﻴﻪ، ﺷﯩﯟﯦﺘﺴﯩﻴﻪ ﯞﻩ ﺑﺎﺷﻘﺎ ﻳﺎﯞﺭﻭﭘﺎ ﺩﯙﻟﻪﺗﻠﯩﺮﯨﺪﻩ ﻫﻪﻣﺪﻩ ﺋﻮﺗﺘﯘﺭﺍ ﺋﺎﺳﯩﻴﺎ ﺟﯘﻣﻬﯘﺭﯨﻴﻪﺗﻠﯩﺮﯨﺪﯨﻤﯘ ﺑﯩﺮﺩﻩﻙ ﺋﯚﺗﻜﯜﺯﯛﻟﮕﻪﻥ.

ﺋﯘﻳﻐﯘﺭﻻﺭ ﻗﯩﺮﻏﯩﺰ، ﺋﯚﺯﺑﯧﻚ ﻗﺎﺗﺎﺭﻟﯩﻖ ﺗﯜﺭﻛﯩﻲ ﺧﻪﻟﻘﻠﻪﺭ ﺑﯩﻠﻪﻥ ﺑﯩﺮﻟﯩﻜﺘﻪ 1933-ﻳﯩﻠﻰ 12-ﻧﻮﻳﺎﺑﯩﺮ ﻛﯜﻧﻰ ﻗﻪﺷﻘﻪﺭﺩﻩ ﺳﺎﺑﯩﺖ ﺩﺍﻣﻮﻟﻼﻣﻨﯩﯔ ﺑﺎﺵ ﻣﯩﻨﯩﺴﺘﯩﺮﻟﯩﻜﻰ ﯞﻩ ﺧﻮﺟﺎ ﻧﯩﻴﺎﺯ ﻫﺎﺟﯩﻤﻨﯩﯔ ﺩﯙﻟﻪﺕ ﺭﻩﺋﯩﺴﻠﯩﻜﻰ ﺑﯩﻠﻪﻥ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺋﯩﺴﻼﻡ ﺟﯘﻣﻬﯘﺭﯨﻴﯩﺘﯩﻨﻰ ﻗﯘﺭﻏﺎﻥ ﺑﻮﻟﺴﯩﻤﯘ، ﻟﯧﻜﯩﻦ ﺑﯘ ﻫﺎﻛﯩﻤﯩﻴﻪﺕ 6 ﺋﺎﻳﺪﯨﻦ ﻛﯧﻴﯩﻦ ﺳﻮﯞﯦﺖ-ﺷﯧﯔ ﺷﯩﺴﻪﻱ ﺋﯩﺶ ﺑﯩﺮﻟﯩﻜﻰ ﻧﻪﺗﯩﺠﯩﺴﯩﺪﻩ ﺋﺎﺧﯩﺮﻻﺷﺘﯘﺭﯗﻟﻐﺎﻥ.

ﻟﯧﻜﯩﻦ، ﺋﺎﺭﯨﻠﯩﻘﺘﺎ 11 ﻳﯩﻞ ﺋﯚﺗﯜﭖ، 1944-ﻳﯩﻠﻰ 12-ﻧﻮﻳﺎﺑﯩﺮ ﻛﯜﻧﻰ ﻏﯘﻟﺠﺎ ﻗﻮﺯﻏﯩﻠﯩﯖﻰ ﻏﻪﻟﯩﺒﻪ ﻗﯩﻠﯩﭗ، ﺋﯧﻠﯩﺨﺎﻥ ﺗﯚﺭﯨﻨﯩﯔ ﺭﻩﺋﯩﺴﻠﯩﻜﯩﺪﻩ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺟﯘﻣﻬﯘﺭﯨﻴﯩﺘﻰ ﺗﻪﺳﯩﺲ ﻗﯩﻠﯩﻨﻐﺎﻥ. ﺑﯘ ﻣﯘﺳﺘﻪﻗﯩﻞ ﻫﺎﻛﯩﻤﯩﻴﻪﺕ ﺋﯩﻠﻰ، ﺗﺎﺭﺑﺎﻏﺎﺗﺎﻱ ﯞﻩ ﺋﺎﻟﺘﺎﻳﺪﯨﻦ ﺋﯩﺒﺎﺭﻩﺕ ﺋﯜﭺ ﯞﯨﻼﻳﻪﺗﺘﻪ ﺑﻪﺵ ﻳﯩﻞ ﻣﻪﯞﺟﯘﺕ ﺑﻮﻟﯘﭖ، ﺋﺎﺧﯩﺮﻯ 1949-ﻳﯩﻠﻰ 10-ﺋﺎﻳﺪﺍ ﺳﺘﺎﻟﯩﻦ ﺑﯩﻠﻪﻥ ﻣﺎﯞ ﺯﯦﺪﻭﯕﻨﯩﯔ ﻫﻪﻣﻜﺎﺭﻟﯩﻘﻰ ﻧﻪﺗﯩﺠﯩﺴﯩﺪﻩ ﺋﻪﻣﻪﻟﺪﯨﻦ ﻗﺎﻟﺪﯗﺭﯗﻟﻐﺎﻥ ﺋﯩﺪﻯ. (ﺋﯜﻣﯩﺪﯞﺍﺭ)