ﺗﯜﺭﻛﯩﺴﺘﺎﻥ ﺋﯩﺴﻼﻡ ﭘﺎﺭﺗﯩﻴﯩﺴﻰ ﻧﺎﻣﻠﯩﻖ ﺗﻪﺷﻜﯩﻼﺗﻨﯩﯔ ﻳﯧﻘﯩﻨﺪﺍ ﺋﯩﻨﺘﯧﺮﻧﯧﺘﺘﻪ ﺋﯧﻼﻥ ﻗﯩﻠﻐﺎﻥ ﺑﺎﻳﺎﻧﺎﺗﻰ ﯞﻩ ﺧﯩﺘﺎﻱ ﺩﺍﺋﯩﺮﯨﻠﯩﺮﯨﻨﯩﯔ ﺧﯩﺘﺎﻳﺪﯨﻜﻰ ﺗﯧﺮﺭﻭﺭ ﺗﻪﻫﺪﯨﺘﻰ ﻫﻪﻗﻘﯩﺪﯨﻜﻰ ﺑﯩﺮ - ﺑﯩﺮﯨﮕﻪ ﺯﯨﺖ ﺑﺎﻳﺎﻧﺎﺗﻠﯩﺮﻯ، ﺧﻪﻟﻘﺌﺎﺭﺍ ﺟﺎﻣﺎﺋﻪﺗﻨﯩﯔ ﺩﯨﻘﻘﯩﺘﯩﻨﯩﯔ ﻗﺎﻳﺘﯩﺪﯨﻦ ﺋﯘﻳﻐﯘﺭﻻﺭ ﯞﻩ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﻣﻪﺳﯩﻠﯩﺴﯩﮕﻪ ﺑﯘﺭﯗﻟﯘﺷﯩﻐﺎ ﺳﻪﯞﻩﺏ ﺑﻮﻟﺪﻯ.

ﻫﻪﺭ ﻛﯜﻧﻰ ﺩﯦﮕﯜﺩﻩﻙ ﺧﻪﻟﻘﺌﺎﺭﺍ ﻣﻪﺗﺒﯘﺋﺎﺗﺘﺎ، ﺋﯘﻳﻐﯘﺭﻻﺭ، ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﯞﻩ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭﻻﺭﻏﺎ ﻗﺎﺭﺍﺗﻘﺎﻥ ﺳﯩﻴﺎﺳﯩﺘﻰ ﻫﻪﻗﻘﯩﺪﻩ ﻣﺎﻗﺎﻟﻪ ﯞﻩ ﻣﯘﻻﻫﯩﺰﯨﻠﻪﺭ ﺋﯧﻼﻥ ﻗﯩﻠﯩﻨﻤﺎﻗﺘﺎ ﺷﯘﻧﯩﯖﺪﻩﻙ ﺗﻪﺗﻘﯩﻘﺎﺕ ﺋﯩﻨﺴﺘﯩﺘﯘﺗﻠﯩﺮﻯ ﺋﯘﻳﻐﯘﺭﻻﺭﻧﯩﯔ ﺗﺎﺭﯨﺨﻰ، ﺑﯜﮔﯜﻧﻜﻰ ﺋﻪﻫﯟﺍﻟﻰ ﯞﻩ ﺧﯩﺘﺎﻱ ﻫﺎﻛﯩﻤﯩﻴﯩﺘﯩﮕﻪ ﻗﺎﺭﺷﻰ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﻛﯜﺭﻩﺷﻠﯩﺮﯨﻨﯩﯔ ﻧﯩﺸﺎﻧﻰ ﻫﻪﻗﻘﯩﺪﻩ ﻣﯘﻻﻫﯩﺰﯨﻠﻪﺭ ﺋﯧﻼﻥ ﻗﯩﻠﻤﺎﻗﺘﺎ.

7‏ - ﺋﺎﻳﻨﯩﯔ 31‏ - ﻛﯜﻧﻰ ﺋﺎﻣﯧﺮﯨﻜﯩﺪﯨﻜﻰ ﻣﯘﻫﯩﻢ ﯞﻩ ﻧﻮﭘﯘﺯﻟﯘﻕ ﺗﻪﺗﻘﯩﻘﺎﺕ ﻣﻪﺭﻛﻪﺯﻟﯩﺮﯨﻨﯩﯔ ﺑﯧﺮﻯ ﻫﯧﺴﺎﺑﻼﻧﻐﺎﻥ ﺗﺎﺷﻘﻰ ﻣﯘﻧﺎﺳﯩﯟﻩﺗﻠﻪﺭ ﻛﯧﯖﯩﺸﻰ ﺗﻪﺭﯨﭙﯩﺪﯨﻦ ﺋﺎﺭﻗﺎ - ﺋﺎﺭﻗﯩﺪﯨﻦ ﺋﯧﻼﻥ ﻗﯩﻠﯩﻨﻐﺎﻥ "ﺋﯘﻳﻐﯘﺭﻻﺭ ﯞﻩ ﺷﯩﻨﺠﺎﯓ ﺭﺍﻳﻮﻧﻰ" ﯞﻩ " ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺋﯩﺴﻼﻣﯩﻲ ﻫﻪﺭﯨﻜﯩﺘﻰ" ﻧﺎﻣﻠﯩﻖ ﺋﯩﻜﻜﻰ ﻣﺎﻗﺎﻟﻪ ﺑﯘ ﻧﯩﯔ ﻳﯩﺮﯨﻚ ﻣﯩﺴﺎﻟﯩﺪﯗﺭ.

ﺑﯩﺮﯨﻨﭽﻰ ﻣﺎﻗﺎﻟﯩﺪﻩ، ﺷﻪﺭﻗﯩﻲ ﺗﯜﺭﻛﯩﺴﺘﺎﻧﻨﯩﯔ ﻗﯩﺴﻘﯩﭽﻪ ﺗﺎﺭﯨﺨﻰ، ﺗﻪﺑﺌﯩﻲ ﺑﺎﻳﻠﯩﻘﻠﯩﺮﻯ، ﺋﯘﻳﻐﯘﺭ ﺋﯧﻠﯩﺪﯨﻜﻰ ﺧﯩﺘﺎﻱ ﻫﺎﻛﯩﻤﯩﻴﯩﺘﻰ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭ ﺋﯧﻠﯩﮕﻪ ﻗﺎﺭﺍﺗﻘﺎﻥ ﺋﯩﻘﺘﯩﺴﺎﺩﯨﻲ ﯞﻩ ﺋﯘﻳﻐﯘﺭ ﺋﯧﻠﯩﮕﻪ ﺧﯩﺘﺎﻱ ﻳﯚﺗﻜﻪﺵ ﺳﯩﻴﺎﺳﯩﺘﻰ، ﺋﯘﻳﻐﯘﺭﻻﺭ ﺑﯩﻠﻪﻥ ﺧﯩﺘﺎﻳﻼﺭ ﺋﻮﺗﺘﯘﺭﯨﺴﯩﺪﯨﻜﻰ ﺋﯩﺨﺘﯩﻼﭖ ﯞﻩ ﺯﯨﺪﺩﯨﻴﻪﺗﻠﻪﺭ، ﺑﯧﻴﺠﯩﯔ ﻫﯚﻛﯜﻣﯩﺘﯩﻨﯩﯔ ﺧﻪﻟﻘﺌﺎﺭﺍ ﺗﯧﺮﺭﻭﺭﻟﯘﻗﻘﺎ ﻗﺎﺭﺷﻰ ﺋﯘﺭﯗﺷﺘﯩﻦ ﺋﯘﻳﻐﯘﺭﻻﺭﻧﻰ ﺑﺎﺳﺘﯘﺭﯗﺵ ﺋﯜﭼﯜﻥ ﻗﺎﻧﺪﺍﻕ ﭘﺎﻳﺪﯨﻼﻧﻐﺎﻧﻠﯩﻘﻰ، ﻗﺎﺗﺎﺭﻟﯩﻖ ﻣﻪﺳﯩﻠﯩﻠﻪﺭ ﻫﻪﻗﻘﯩﺪﻩ ﻣﻪﻟﯘﻣﺎﺕ ﺑﯧﺮﯨﻠﮕﻪﻥ.

ﺗﺎﺷﻘﻰ ﻣﯘﻧﺎﺳﯩﯟﻩﺗﻠﻪﺭ ﻛﯧﯖﯩﺸﻰ ﺗﻪﺭﯨﭙﯩﺪﯨﻦ ﺋﯧﻼﻥ ﻗﯩﻠﯩﻨﻐﺎﻥ ﺋﯩﻜﻜﯩﻨﭽﻰ ﻣﺎﻗﺎﻟﯩﺪﻩ ﺑﻮﻟﺴﺎ، ﺋﯘﻳﻐﯘﺭﻻﺭ ﯞﻩ ﺋﯘﻳﻐﯘﺭﻻﺭﻧﯩﯔ ﺧﯩﺘﺎﻱ ﻫﺎﻛﯩﻤﯩﻴﯩﺘﯩﮕﻪ ﻗﺎﺭﺷﻰ ﺋﯧﻠﯩﭗ ﺑﯩﺮﯨﯟﺍﺗﻘﺎﻥ ﻗﺎﺭﺷﯩﻠﯩﻖ ﻫﻪﺭﯨﻜﻪﺗﻠﯩﺮﻯ، ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺋﯩﺴﻼﻣﯩﻲ ﻫﻪﺭﯨﻜﯩﺘﻰ، ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺋﯩﺴﻼﻣﯩﻲ ﻫﻪﺭﯨﻜﯩﺘﯩﻨﯩﯔ ﺧﯩﺘﺎﻱ ﻫﯚﻛﯜﻣﯩﺘﯩﮕﻪ ﻗﺎﺭﺷﻰ ﺋﯧﻠﯩﭗ ﺑﺎﺭﻏﺎﻥ ﻫﯘﺟﯘﻣﻠﯩﺮﻯ، ﺑﯘ ﺗﻪﺷﻜﯩﻼﺗﻨﯩﯔ ﺧﻪﻟﻘﺌﺎﺭﺍ ﺗﯧﺮﺭﻭﺭﻟﯘﻕ ﺗﻪﺷﻜﯩﻼﺗﻠﯩﺮﻯ ﺑﯩﻠﻪﻥ ﺋﺎﻻﻗﯩﺴﯩﻨﯩﯔ ﺑﺎﺭ ﻳﺎﻛﻰ ﻳﻮﻗﻠﯩﻘﻰ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺑﯘ ﻫﻪﺭﯨﻜﻪﺗﻜﻪ ﻗﺎﺭﺷﻰ ﺋﺎﻟﻐﺎﻥ ﺗﻪﺩﺑﯩﺮﻟﯩﺮﻯ ﯞﻩ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺋﯩﺴﻼﻣﯩﻲ ﻫﻪﺭﯨﻜﯩﺘﯩﻨﯩﯔ ﺑﯧﻴﺠﯩﯔ ﺋﻮﻟﯩﻤﭙﯩﻚ ﺗﻪﻧﻬﻪﺭﯨﻜﻪﺕ ﻳﯩﻐﯩﻨﻰ ﺋﯜﭼﯜﻥ ﺗﻪﻫﺪﯨﺖ ﺑﻮﻟﯘﭖ - ﺑﻮﻟﻤﯩﻐﺎﻧﻠﯩﻘﻰ ﻗﺎﺗﺎﺭﻟﯩﻖ ﻣﻪﺳﯩﻠﯩﻠﻪﺭ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ ﯞﻩ ﺑﯘ ﻫﻪﻗﺘﻪ ﻣﻪﻟﯘﻣﺎﺕ ﺑﯧﺮﯨﻠﮕﻪﻥ.