ﺋﯘﻳﻐﯘﺭ ﺋﯩﻠﯩﺪﻩ ﻣﯩﻴﯩﭗ ﺑﺎﻟﯩﻼﺭﻧﯩﯔ ﺋﺎﺯ ﺩﯦﮕﻪﻧﺪﻩ 40 % ﻯ ﺋﻮﻗﯘﺷﺴﯩﺰ ﻗﯧﻠﯩﯟﺍﺗﯩﺪﯗ

ﺋﯘﻳﻐﯘﺭ ﺋﯩﻠﯩﺪﻩ ﻣﯩﻴﯩﭗ ﺑﺎﻟﯩﻼﺭﻧﯩﯔ ﺋﻮﻗﯘﺷﺴﯩﺰ ﻗﯧﻠﯩﺶ ﻧﯩﺴﺒﯩﺘﻰ ﺧﯩﺘﺎﻳﺪﯨﻜﻰ ﻫﻪﺭ ﻗﺎﻳﺴﻰ ﺋﯚﻟﻜﻪ - ﺋﺎﭘﺘﻮﻧﻮﻡ ﺭﺍﻳﻮﻥ ﯞﻩ ﺋﺎﻻﻫﯩﺪﻩ ﺷﻪﻫﻪﺭﻟﻪﺭ ﺋﯩﭽﯩﺪﻩ ﺋﻪﯓ ﻳﯘﻗﯩﺮﻯ ﺑﻮﻟﯘﭖ،ﺋﻮﻗﯘﺵ ﻳﯧﺸﯩﺪﯨﻜﻰ ﻣﯩﻴﯩﭗ ﺑﺎﻟﯩﻼﺭﻧﯩﯔ ﺋﺎﺯ ﺩﯦﮕﻪﻧﺪﻩ 40 % ﻯ ﻣﻪﻛﺘﻪﭘﻜﻪ ﺑﺎﺭﺍﻟﻤﺎﻳﺪﯨﻜﻪﻥ. ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻰ ﻣﺎﺋﺎﺭﯨﭗ ﻧﺎﺯﺍﺭﯨﺘﯩﻨﯩﯔ ﭘﺎﺭﺗﯩﻴﻪ ﺳﯧﻜﺮﯨﺘﺎﺭﻯ ﺟﺎﯞ ﺩﯦﺠﯘﯕﻨﯩﯔ ﺋﺎﻟﺪﯨﻨﻘﻰ ﻛﯜﻧﻰ ﺋﯧﭽﯩﻠﻐﺎﻥ ﺋﺎﭘﺘﻮﻧﻮﻡ ﺭﺍﻳﻮﻥ ﻣﺎﺋﺎﺭﯨﭗ ﺧﯩﺰﻣﻪﺕ ﻳﯩﻐﯩﻨﯩﺪﺍ ﺋﻪﺳﻜﻪﺭﺗﯩﺸﯩﭽﻪ، ﻧﯚﯞﻩﺗﺘﻪ ﺋﯘﻳﻐﯘﺭ ﺋﯩﻠﯩﺪﻩ ﺋﻮﻗﯘﺵ ﻳﯧﺸﯩﺪﯨﻜﻰ ﻣﯩﻴﯩﭗ ﺋﯚﺳﻤﯜﺭﻟﻪﺭﻧﯩﯔ ﻣﻪﻛﺘﻪﭘﻜﻪ ﻛﯩﺮﯨﺶ ﻧﯩﺴﺒﯩﺘﻰ 59% ﺑﻮﻟﯘﭖ، ﺋﺎﺯ ﺩﯦﮕﻪﻧﺪﻩ 40 % ﺋﯚﺳﻤﯜﺭﻧﯩﯔ ﺋﻮﻗﯘﺷﺴﯩﺰ ﻗﯧﻠﯩﯟﺍﺗﻘﺎﻧﻠﯩﻘﻰ ﻣﻪﻟﯘﻡ ﺑﻮﻟﺪﻯ.

ﺟﺎﯞ ﺩﯦﺠﯘﯓ ﻳﻪﻧﻪ ، ﺑﯘ ﻧﯩﺴﺒﻪﺕ ﺧﯩﺘﺎﻳﻨﯩﯔ ﻣﻪﻣﻠﯩﻜﻪﺗﻠﯩﻚ ﺋﻮﺗﺘﯘﺭﯨﭽﻪ ﺳﻪﯞﯨﻴﯩﺴﯩﺪﯨﻦ ﺗﯚﯞﻩﻥ ﺗﯘﺭﯨﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﯩﮕﻪﻥ. ﺧﯩﺘﺎﻳﻨﯩﯔ 2006 ‏- ﻳﯩﻠﺪﯨﻜﻰ ﺳﺘﺎﺗﯩﺴﺘﯩﻜﯩﺴﯩﺪﺍ ﺷﯘ ﻳﯩﻠﻰ ﺋﯘﻳﻐﯘﺭ ﺋﯩﻠﯩﺪﯨﻜﻰ 15 ﻳﺎﺷﺘﯩﻦ ﺗﯚﯞﻩﻥ ﻣﯩﻴﯩﭗ ﺋﯚﺳﻤﯜﺭﻟﻪﺭﻧﯩﯔ ﺳﺎﻧﯩﻨﻰ 35 ﻣﯩﯔ 818 ﺩﻩﭖ ﺋﯧﻼﻥ ﻗﯩﻠﻐﺎﻥ. ﺧﻪﯞﻩﺭﻟﻪﺭﮔﻪ ﻗﺎﺭﯨﻐﺎﻧﺪﺍ ، ﻧﯚﯞﻩﺗﺘﻪ ﺋﯘﻳﻐﯘﺭ ﺋﯩﻠﯩﺪﯨﻜﻰ ﺋﯜﺭﯛﻣﭽﻰ، ﻗﺎﺭﺍﻣﺎﻱ، ﻏﯘﻟﺠﺎ، ﺷﯩﺨﻪﻧﺰﻩ، ﭼﯚﭼﻪﻙ، ﻗﻪﺷﻘﻪﺭ ﯞﻩ ﻛﻮﺭﻟﯩﺪﯨﻦ ﺋﯩﺒﺎﺭﻩﺕ 7 ﺷﻪﻫﻪﺭﺩﻩ ﻣﯩﻴﯩﭙﻼﺭ ﻣﻪﻛﺘﯩﭙﻰ ﺑﻮﻟﻐﺎﻧﺪﯨﻦ ﺳﯩﺮﺕ، ﻗﺎﻟﻐﺎﻥ ﺷﻪﻫﻪﺭﻟﻪﺭﺩﻩ ﻣﯩﻴﯩﭙﻼﺭ ﻣﻪﻛﺘﯩﭙﻰ ﻳﻮﻕ ﺋﯩﻜﻪﻥ. ﺷﯩﻨﺨﯘﺍ ﺋﺎﮔﯧﻨﺘﻠﯩﻘﯩﻨﯩﯔ ﺋﻪﺳﻜﻪﺭﺗﯩﺸﯩﭽﻪ، ﺧﯩﺘﺎﻳﻨﯩﯔ 9 ﻳﯩﻠﻠﯩﻖ ﻣﻪﺟﺒﯘﺭﯨﻲ ﻣﺎﺋﺎﺭﯨﭗ ﻗﺎﻧﯘﻧﻰ ﻳﻮﻟﻐﺎ ﻗﻮﻳﯘﻟﻐﺎﻧﻐﺎ ﺧﯧﻠﻰ ﻳﯩﻠﻼﺭ ﺑﻮﻟﯘﭖ ﻗﺎﻟﻐﺎﻥ ﺑﻮﻟﺴﯩﻤﯘ، ﻟﯧﻜﯩﻦ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻰ ﺩﺍﺋﯩﺮﯨﻠﯩﺮﻯ ﻣﯩﻴﯩﭗ ﺑﺎﻟﯩﻼﺭﻏﺎ 9 ﻳﯩﻠﻠﯩﻖ ﻣﻪﺟﺒﯘﺭﯨﻲ ﻣﺎﺋﺎﺭﯨﭗ ﺗﯜﺯﯛﻣﯩﻨﻰ ﺑﯘ ﻳﯩﻠﺪﯨﻦ ﺑﺎﺷﻼﭖ ﻳﻮﻟﻐﺎ ﻗﻮﻳﯘﺷﻨﻰ ﻗﺎﺭﺍﺭ ﻗﯩﻠﻐﺎﻥ.

ﺷﯩﻨﺨﯘﺍ ﺋﺎﮔﯧﻨﺘﻠﯩﻘﯩﻨﯩﯔ ﺑﯘ ﻫﻪﻗﺘﯩﻜﻰ ﺧﻪﯞﯨﺮﯨﺪﻩ ﺩﺍﺋﯩﺮﯨﻠﻪﺭﻧﯩﯔ 2008 ‏- ﻳﯩﻠﺪﯨﻦ 2012 ‏- ﻳﯩﻠﻐﯩﭽﻪ ﺋﯘﻳﻐﯘﺭ ﺋﯩﻠﯩﺪﯨﻜﻰ ﻣﯩﻴﯩﭗ ﺋﯚﺳﻤﯜﺭﻟﻪﺭﮔﻪ ﻗﺎﺭﯨﺘﺎ " ﺋﺎﻻﻫﯩﺪﻩ ﻣﺎﺋﺎﺭﯨﭗ ﺗﻪﺭﻩﻗﻘﯩﻴﺎﺕ ﭘﯩﻼﻧﻰ " ﻫﺎﺯﯨﺮﻻﭖ، ﻧﻮﭘﯘﺳﻰ 30 ﻣﯩﯖﺪﯨﻦ ﺋﺎﺷﯩﺪﯨﻐﺎﻥ ﻫﻪﺭ ﺑﯩﺮ ﻧﺎﻫﯩﻴﻪ ﯞﻩ ﺷﻪﻫﻪﺭﺩﻩ ﺑﯩﺮﺩﯨﻦ ﻣﯩﻴﯩﭙﻼﺭ ﻣﻪﻛﺘﯩﭙﻰ ﻗﯘﺭﯗﺷﻨﻰ ﻗﺎﺭﺍﺭ ﻗﯩﻠﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﻛﯚﺯﻩﺗﻜﯜﭼﯩﻠﻪﺭﻧﯩﯔ ﺋﻪﺳﻜﻪﺭﺗﯩﺸﯩﭽﻪ، ﺋﯘﻳﻐﯘﺭﻻﺭﺩﯨﻜﻰ ﻣﯩﻴﯩﭙﻼﺭ ﻣﻪﺳﯩﻠﯩﺴﻰ ﻫﺎﺯﯨﺮﻏﺎ ﻗﻪﺩﻩﺭ ﺟﻪﻣﺌﯩﻴﻪﺕ ﺗﻪﺭﯨﭙﯩﺪﯨﻦ ﻛﯚﯕﯜﻝ ﺑﯚﻟﯜﺷﻜﻪ ﺋﯧﺮﯨﺸﻪﻟﻤﻪﻱ ﻛﻪﻟﮕﻪﻥ ﺟﯩﺪﺩﯨﻲ ﻣﻪﺳﯩﻠﯩﻠﻪﺭﻧﯩﯔ ﺑﯩﺮﯨﺪﯗﺭ.