ﺋﯘﻳﻐﯘﺭ ﺋﯧﻠﯩﺪﻩ ﺑﺎﻳﻘﺎﻟﻐﺎﻥ ﻧﯧﻔﯩﺖ ﯞﻩ ﺗﻪﺑﯩﺌﻲ ﮔﺎﺯ ﺯﺍﭘﯩﺴﻰ ﻳﻪﻧﻪ ﻛﯚﭘﻪﻳﺪﻯ

31- ﻣﺎﻱ ﺟﯘﯕﮕﻮ ﻧﯧﻔﯩﺖ ﺧﯩﻤﯩﻴﻪ ﺳﺎﻧﺎﺋﯩﺘﻰ ﮔﯘﺭﯗﻫﻰ ﻏﻪﺭﺑﯩﻲ ﺷﯩﻤﺎﻝ ﺷﯚﺑﻪ ﺷﯩﺮﻛﯩﺘﯩﻨﯩﯔ ﺑﯩﻠﺪﯛﺭﯛﺷﯩﭽﻪ، ﺋﯘﻻﺭﻧﯩﯔ ﺑﺎﺷﻘﯘﺭﯗﺷﯩﺪﯨﻜﻰ ﺗﺎﺭﯨﻢ ﺩﻩﺭﻳﺎ ﻧﯧﻔﯩﺘﻠﯩﻜﻰ ﻳﯘﻗﯩﺮﻯ ﻫﻮﺳﯘﻟﻠﯘﻕ ﻗﯘﺩﯗﻗﻠﯩﺮﻯ ﯞﻩ ﺯﺍﭘﺎﺱ ﻗﯘﺩﯗﻗﻠﯩﺮﻯ ﻫﻮﺳﯘﻝ ﺑﯧﺮﯨﺸﻜﻪ ﺑﺎﺷﻠﯩﻐﺎﻥ.

ﻣﻪﻟﯘﻡ ﺑﻮﻟﯘﺷﯩﭽﻪ، ﻫﺎﺯﯨﺮ ﺗﺎﺭﯨﻢ ﻧﯧﻔﯩﺘﻠﯩﻚ ﺗﻪﯞﻩﺳﯩﺪﯨﻜﻰ 600 ﻛﯟﺍﺩﺭﺍﺕ ﻛﯩﻠﻮﻣﯧﺘﯩﺮﻟﯩﻖ ﺩﺍﺋﯩﺮﻩ ﺋﯩﭽﯩﺪﻩ 200 ﻣﯩﻠﻴﻮﻥ ﺗﻮﻧﻨﺎ ﻧﯧﻔﯩﺖ ﺯﺍﭘﯩﺴﯩﻐﺎ ﺋﯧﺮﯨﺸﯩﺶ ﻣﯚﻟﭽﻪﺭﻟﻪﻧﻤﻪﻛﺘﻪ ﺋﯩﻜﻪﻥ.

ﺗﻪﯕﺮﯨﺘﺎﻍ ﺗﻮﺭﯨﺪﺍ 31- ﻣﺎﻱ ﺟﯘﯕﮕﻮ ﻧﯧﻔﯩﺖ ﺧﯩﻤﯩﻴﻪ ﺳﺎﻧﺎﺋﯩﺘﻰ ﮔﯘﺭﯗﻫﻰ ﻏﻪﺭﺑﯩﻲ ﺷﯩﻤﺎﻝ ﺷﯚﺑﻪ ﺷﯩﺮﻛﯩﺘﻰ ﻣﻪﺳﺌﯘﻟﯩﻨﯩﯔ ﺋﯧﻴﺘﻘﺎﻧﻠﯩﺮﯨﻨﻰ ﻧﻪﻗﯩﻞ ﻛﻪﻟﺘﯜﺭﯛﺷﯩﭽﻪ، 11- ﺋﺎﭘﺮﯨﻞ ﺗﺎﺭﯨﻢ ﺩﻩﺭﻳﺎ ﻧﯧﻔﯩﺘﻠﯩﻜﻰ 12 ﺭﺍﻳﻮﻧﺪﺍ ﻳﯘﻗﯩﺮﻯ ﻫﻮﺳﯘﻟﻠﯘﻕ ﻗﯘﺩﯗﻕ ﺑﺎﻳﻘﯩﻐﺎﻥ. AD4 ﻗﯘﺩﯗﻗﯩﻨﯩﯔ ﺷﯘ ﻛﯜﻧﻠﯜﻙ ﺳﯩﻨﺎﻗﺘﺎ ﺋﯧﻠﯩﻨﻐﺎﻥ ﻧﯧﻔﯩﺖ ﻣﯩﻘﺪﺍﺭﻯ 1018 ﺗﻮﻧﻨﯩﻐﺎ ﻳﯧﺘﯩﭗ ﺗﺎﺭﯨﻢ ﺩﻩﺭﻳﺎ ﻧﯧﻔﯩﺘﻠﯩﻜﯩﺪﯨﻜﻰ ﻣﻪﻫﺴﯘﻻﺕ ﻣﯩﻘﺪﺍﺭﻯ ﺋﻪﯓ ﻳﯘﻗﯩﺮﻯ ﻗﯘﺩﯗﻗﻘﺎ ﺋﺎﻳﻠﯩﻨﯩﭗ ﻗﺎﻟﻐﺎﻥ ﻫﻪﻣﺪﻩ ﺷﯘﻧﯩﯖﻐﺎ ﻳﺎﻧﺪﺍﺵ ﻫﺎﻟﺪﺍ، AD5، AD7 ﻗﯘﺩﯗﻗﻠﯩﺮﻯ ﯞﻩ ﺑﺎﺷﻘﺎ ﺯﺍﭘﺎﺱ ﻗﯘﺩﯗﻗﻠﯩﺮﻯ ﻛﻪﻳﻨﻰ-ﻛﻪﻳﻨﯩﺪﯨﻦ ﻫﻮﺳﯘﻝ ﺑﯧﺮﯨﺸﻜﻪ ﺑﺎﺷﻠﯩﻐﺎﻥ.

ﺋﯘﻧﯩﯖﺪﯨﻦ ﺑﺎﺷﻘﺎ، ﺋﺎﻟﺪﯨﻨﻘﻰ ﺋﺎﻳﺪﺍ ﻗﺎﺭﯨﻤﺎﻱ ﻧﯧﻔﯩﺖ ﺭﺍﻳﻮﻧﻰ ﻣﺎﻧﺎﺱ ﺩﻩﺭﻳﺎ ﯞﺍﺩﯨﺴﯩﺪﺍ 30 ﻣﯩﻠﻴﺎﺭﺩ ﻛﯘﺏ ﻣﯧﺘﯩﺮﻟﯩﻖ ﺗﻪﺑﯩﺌﯩﻲ ﮔﺎﺯ ﺯﺍﭘﯩﺴﻰ ﺑﺎﻳﻘﯩﻐﺎﻥ ﺑﻮﻟﯘﭖ، ﺑﯘ ﻗﺎﺭﯨﻤﺎﻱ ﻧﯧﻔﯩﺖ ﺭﺍﻳﻮﻧﻰ ﺗﻪﯞﻩﺳﯩﺪﯨﻜﻰ ﺋﻪﯓ ﭼﻮﯓ ﮔﺎﺯﻟﯩﻖ ﺑﻮﻟﯘﭖ ﻗﺎﻟﻐﺎﻥ ﺋﯩﺪﻯ.

ﻫﺎﺯﯨﺮ ﺑﯘ ﮔﺎﺯﻟﯩﻘﺘﯩﻦ ﮔﺎﺯ ﺋﯧﻠﯩﺶ ﺑﺎﺷﻼﻧﻐﺎﻥ ﺑﻮﻟﯘﭖ، ﺗﻪﯕﺮﯨﺘﺎﻍ ﺗﻮﺭﯨﻨﯩﯔ ﺋﺎﺷﻜﺎﺭﯨﻠﯩﺸﯩﭽﻪ، ﻣﺎﻧﺎﺱ ﺩﻩﺭﻳﺎ ﯞﺍﺩﯨﺴﯩﺪﺍ 100 ﻗﯘﺩﯗﻗﺘﯩﻦ ﻛﯜﻧﯩﮕﻪ ﺗﻪﺧﻤﯩﻨﻪﻥ 1 ﻣﯩﻠﻴﻮﻥ 470 ﻣﯩﯔ ﻛﯘﺏ ﻣﯧﺘﯩﺮ ﺗﻪﺑﯩﺌﻲ ﮔﺎﺯ ﺋﺎﻟﻐﯩﻠﻰ ﺑﻮﻟﯩﺪﯨﻜﻪﻥ.(ﺟﯜﻣﻪ)