ﺩﺍﯕﻠﯩﻖ ﺗﻪﻣﺒﯘﺭﭼﻰ ﻧﯘﺭﻣﻪﻣﻪﺕ ﺗﯘﺭﺳﯘﻥ ﯞﺍﭘﺎﺕ ﺑﻮﻟﺪﻯ

ﺋﯘﻳﻐﯘﺭ ﺧﻪﻟﻘﯩﻨﯩﯔ ﺩﺍﯕﻠﯩﻖ ﺗﻪﻣﺒﯘﺭ ﻣﺎﮬﯩﺮﻯ ﻧﯘﺭﻣﻪﻣﻪﺕ ﺗﯘﺭﺳﯘﻥ ﻳﻪﻛﺸﻪﻧﺒﻪ ﻛﯜﻧﻰ ﺋﻪﺗﯩﮕﻪﻥ ﺳﻪﮬﻪﺭﺩﻩ ﺋﯜﺭﯛﻣﭽﯩﺪﯨﻜﻰ ﺋﯚﻳﯩﺪﻩ ﺋﺎﻟﻪﻣﺪﯨﻦ ﺋﯚﺗﺘﻰ. ﺋﯘﻧﯩﯔ ﺗﯘﻳﯘﻗﺴﯩﺰ ﯞﺍﭘﺎﺕ ﺑﻮﻟﯩﺸﻨﯩﯔ ﺳﻪﯞﻩﺑﻰ ﺗﯧﺨﻰ ﺋﯧﻨﯩﻖ ﺋﻪﻣﻪﺱ.

ﻧﯘﺭﻣﻪﻣﻪﺕ ﺗﯘﺭﺳﯘﻥ ﺋﯘﻳﻐﯘﺭ ﺧﻪﻟﻖ ﺋﺎﮬﺎﯕﻠﯩﺮﯨﻨﻰ ﻳﯘﻗﯩﺮﻯ ﻣﺎﮬﺎﺭﻩﺕ ﺑﯩﻠﻪﻥ ﺋﻮﺭﯗﻧﺪﺍﭖ، ﺧﻪﻟﻘﻨﯩﯔ ﭼﻮﯕﻘﯘﺭ ﮬﯚﺭﻣﯩﺘﯩﮕﻪ ﺋﯧﺮﯨﺸﻜﻪﻥ ﺩﺍﯕﻠﯩﻖ ﺗﻪﻣﺒﯘﺭﭼﻰ ﺑﻮﻟﯘﭖ، ﺋﯘ 90 - ﻳﯩﻠﻼﺭﺩﺍ ﺋﯩﻠﮕﯩﺮﻯ ﻛﯩﻴﯩﻦ ﺑﻮﻟﯘﭖ، " ﺗﻪﻣﺒﯘﺭ ﺷﺎﮬﻰ"، " ﺗﻪﻣﺒﯘﺭﯗﻡ"،" ﻛﯜﻥ ﯞﻩ ﺗﯜﻥ " ﻗﺎﺗﺎﺭﻟﯩﻖ VCD ﭘﯩﻼﺳﺘﯩﻨﻠﯩﻜﯩﻨﻰ ﯞﻩ ﺋﯜﻧﺌﺎﻟﻐﯘ ﻟﯩﻨﺘﯩﻠﯩﺮﯨﻨﻰ ﻧﻪﺷﺮ ﻗﯩﻠﺪﯗﺭﻏﺎﻥ. ﺋﯘﻧﯩﯔ ﻳﯘﻗﯩﺮﻯ ﻣﺎﮬﺎﺭﻩﺕ ﺑﯩﻠﻪﻥ ﺋﻮﺭﯗﻧﺪﯨﻐﺎﻥ " ﺋﻪﺟﻪﻡ"، " ﻟﯩﯟﻩﻥ ﻳﺎﺭﻻﺭ" ﻗﺎﺗﺎﺭﻟﯩﻖ ﺋﺎﮬﺎﯕﻠﯩﺮﻯ ﺋﯘﻳﻐﯘﺭ ﺧﻪﻟﻘﻰ ﯞﻩ ﺋﻮﺗﺘﯘﺭﺍ ﺋﺎﺳﯩﻴﺎ ﺭﺍﻳﻮﻧﺪﯨﻜﻰ ﻗﯧﺮﯨﻨﺪﺍﺵ ﺧﻪﻟﻘﻠﻪﺭﻧﯩﯔ ﻳﺎﻗﺘﯘﺭﯗﭖ ﺋﺎﯕﻠﯩﺸﯩﻐﺎ ﺋﯧﺮﯨﺸﻜﻪﻥ.

ﺑﯩﺮﺍﻕ، ﻣﻪﺭﮬﯘﻡ ﻧﯘﺭﻣﻪﻣﻪﺕ ﺗﯘﺭﺳﯘﻧﻨﯩﯔ ﺳﻪﻧﺌﻪﺗﻜﺎﺭﻟﯩﻖ ﮬﺎﻳﺎﺗﻰ 2001 - ﻳﯩﻠﻰ ﺯﻭﺭ ﺯﻩﺭﺑﯩﮕﻪ ﺋﯘﭼﺮﯨﻐﺎﻥ. ﺋﯘﻧﯩﯔ 2001 - ﻳﯩﻠﯩﺪﯨﻜﻰ ﻳﯧﯖﻰ ﻳﯩﻠﻠﯩﻖ ﺳﻪﻧﺌﻪﺕ ﻛﯧﭽﯩﻠﯩﻜﯩﺪﻩ، ﺷﺎﺋﯩﺮ ﺗﯘﺭﺳﯘﻧﺠﺎﻥ ﺋﻪﻣﻪﺕ " ﻗﺎﻧﻐﺎ ﺑﻮﻳﺎﻟﻐﺎﻥ ﻧﺎﺧﻮﻝ " ﻧﺎﻣﻠﯩﻖ ﺷﯩﺌﯩﺮﻧﻰ ﺩﯦﻜﻼﻣﺎﺗﺴﯩﻴﻪ ﻗﯩﻠﻐﺎﻧﺪﯨﻦ ﻛﯩﻴﯩﻦ، ﺧﯩﺘﺎﻱ ﮬﯚﻛﯜﻣﯩﺘﻰ ﺋﯘﻳﻐﯘﺭ ﺋﯧﻠﯩﺪﻩ ﻛﻪﯓ - ﻛﯚﻟﻪﻣﺪﻩ ﺋﯩﺪﯦﺌﻮﻟﻮﮔﯩﻴﻪ ﺳﺎﮬﻪﺳﯩﺪﯨﻜﻰ ﻣﯩﻠﻠﯩﻲ ﺑﯚﻟﮕﯜﻧﭽﯩﻠﯩﻜﻜﻪ ﻗﺎﺭﺷﻰ ﮬﻪﺭﯨﻜﻪﺗﻨﻰ ﻗﻮﺯﻏﯩﻐﺎﻥ. ﮬﻪﻣﺪﻩ ﻧﯘﺭﻣﻪﻣﻪﺕ ﺗﯘﺭﺳﯘﻧﻨﻰ ﺟﺎﺯﺍﻻﭖ، ﺋﯘﻧﯩﯔ ﺳﻪﻧﺌﻪﺕ ﭘﺎﺋﺎﻟﯩﻴﻪﺗﻠﯩﺮﯨﻨﻰ ﭼﻪﺗﻜﻪ ﻗﺎﻗﻘﺎﻥ ﺋﯩﺪﻯ.

ﭼﻪﺗﺌﻪﻟﺪﯨﻜﻰ ﻧﯘﺭﻏﯘﻥ ﺋﯘﻳﻐﯘﺭﻻﺭ ﺋﯘﻧﯩﯔ ﯞﺍﭘﺎﺗﯩﻐﺎ ﭼﻮﯕﻘﯘﺭ ﺗﻪﺯﯨﻴﻪ ﺑﯩﻠﺪﯛﺭﻣﻪﻛﺘﻪ. (ﺋﺎﺭﺯﯗ)