ﻧﯘﺭ ﺑﻪﻛﺮﻯ ﺋﺎﭘﺘﻮﻧﻮﻡ ﺭﺍﻳﻮﻧﻨﯩﯔ ﺭﻩﺋﯩﺴﻠﯩﻜﯩﮕﻪ ﺑﯧﻜﯩﺘﯩﻠﮕﻪﻥ

• ﻣﯘﺧﺒﯩﺮﯨﻤﯩﺰ ﺟﯜﻣﻪﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

22- ﻳﺎﻧﯟﺍﺭ ﻛﯜﻧﻰ ﺧﯩﺘﺎﻳﻨﯩﯔ ﺋﯘﻳﻐﯘﺭ ﺋﯩﻠﯩﺪﯨﻜﻰ ﻫﯚﻛﯜﻣﯩﺘﻰ 11- ﻧﯚﯞﻩﺗﻠﯩﻚ ﺧﻪﻟﻖ ﻗﯘﺭﯗﻟﺘﯩﻴﻰ 1- ﻳﯩﻐﯩﻨﻰ 3- ﻗﯧﺘﯩﻤﻠﯩﻖ ﺋﻮﻣﯘﻣﻴﯩﻐﯩﻨﻰ ﺋﯧﭽﯩﭗ، ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﻨﯩﯔ ﺭﻩﺋﯩﺴﻰ، ﻣﯘﺋﺎﯞﯨﻦ ﺭﻩﺋﯩﺴﻠﯩﺮﻯ ﯞﻩ ﻳﯘﻗﯩﺮﻯ ﺧﻪﻟﻖ ﺳﻮﺕ ﻣﻪﻫﻜﯩﻤﯩﺴﯩﻨﯩﯔ ﺑﺎﺷﻠﯩﻘﻰ ﻗﺎﺗﺎﺭﻟﯩﻘﻼﺭﻧﻰ ﺑﯧﻜﯩﺘﯩﭗ ﭼﯩﻘﻘﺎﻥ.

ﺗﻪﯕﺮﯨﺘﺎﻍ ﺗﻮﺭﯨﺪﺍ ﻛﯚﺭﺳﯩﺘﯩﻠﯩﺸﯩﭽﻪ، ﺑﯘ ﻧﯚﯞﻩﺗﻠﯩﻚ ﻳﯩﻐﯩﻨﺪﺍ ﻳﻪﻧﻪ،9 ﻧﻪﭘﻪﺭ ﻣﯘﺋﺎﯞﯨﻦ ﺭﻩﺋﯩﺴﻠﻪﺭ ﺑﯧﻜﯩﺘﯩﭗ ﭼﯩﻘﯩﻠﻐﺎﻥ ﺑﻮﻟﯘﭖ، ﺑﯘﻻﺭﻧﯩﯔ ﺋﯩﭽﯩﺪﻩ ﺑﻪﺵ ﻧﻪﭘﻪﺭ ﺧﯩﺘﺎﻱ ، ﺑﯩﺮ ﻧﻪﭘﻪﺭ ﻗﺎﺯﺍﻕ ﻗﺎﺗﺎﺭﻟﯩﻘﻼﺭ ﺑﺎﺭ.

" ﺋﯘ ﺧﯩﺘﺎﻱ ﻣﻪﺭﻛﯩﺰﻯ ﻫﯚﻛﯜﻣﯩﺘﻰ ﺗﻪﺭﯨﭙﯩﺪﯨﻦ ﺗﺎﻟﻼﭖ ﺑﯧﻜﯩﺘﯩﻠﮕﻪﻥ ﺑﯩﺮ ﻗﻮﺭﭼﺎﻕ ﺭﻩﻫﺒﻪﺭ "

ﻧﯘﺭ ﺑﻪﻛﺮﯨﻨﯩﯔ ﺋﯘﻳﻐﯘﺭ ﺋﯩﻠﯩﮕﻪ ﺭﻩﺋﯩﺲ ﺑﻮﻟﯘﭖ ﺳﺎﻳﻼﻧﻐﺎﻧﻠﯩﻘﯩﻐﺎ ﻗﺎﻧﺪﺍﻕ ﻗﺎﺭﺍﻳﺴﯩﺰ ﺩﻩﭖ ﺳﻮﺭﯨﻐﺎﻥ ﺳﻮﺋﺎﻟﻠﯩﺮﯨﻤﯩﺰﻏﺎ ﺟﺎﯞﺍﺏ ﺑﻪﺭﮔﻪﻥ ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﻰ ﺭﻩﺋﯩﺴﻰ، ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ، ﺋﺎﻟﺪﻯ ﺑﯩﻠﻪﻥ ﻧﯘﺭ ﺑﻪﻛﺮﯨﻨﻰ ﺳﺎﻳﻼﻧﺪﻯ ﺩﻩﭖ ﺋﯧﻴﺘﯩﺸﻘﺎ ﺑﻮﻟﻤﺎﻳﺪﯨﻐﺎﻧﻠﯩﻘﯩﻨﻰ ، ﺋﯘﻧﯩﯔ ﺧﯩﺘﺎﻱ ﻣﻪﺭﻛﯩﺰﻯ ﻫﯚﻛﯜﻣﯩﺘﻰ ﺗﻪﺭﯨﭙﯩﺪﯨﻦ ﺗﺎﻟﻼﭖ ﺑﯧﻜﯩﺘﯩﻠﮕﻪﻥ ﺑﯩﺮ ﻗﻮﺭﭼﺎﻕ ﺭﻩﻫﺒﻪﺭ ﺋﯩﻜﻪﻧﻠﯩﻜﯩﻨﻰ ﻛﯚﺭﺳﻪﺗﺘﻰ.

ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ: " ﺭﻩﻫﺒﻪﺭﻟﻪﺭﻧﻰ ﺋﺎﻟﻤﺎﺷﺘﯘﺭﯗﺵ ﺋﯘﻳﻐﯘﺭ ﺋﯩﻠﯩﺪﯨﻜﻰ ﺧﻪﻟﻘﻨﯩﯔ ﺋﯩﺮﺍﺩﯨﺴﯩﻨﻰ ﺋﻪﻛﺲ ﺋﻪﺗﺘﯜﺭﻩﻟﻤﻪﻳﺪﯗ"

ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭ ﺋﯩﻠﯩﺪﻩ ﺑﺎﺷﻠﯩﻖ ﺋﺎﻟﻤﺎﺷﺘﯘﺭﯗﺵ ﺳﯩﻴﺎﺳﯩﺘﯩﻨﯩﯔ ﻫﯧﭽﻘﺎﻧﺪﺍﻕ ﻳﯧﯖﯩﻠﯩﻘﺘﯩﻦ ﺩﯦﺮﻩﻙ ﺑﻪﺭﻣﻪﻳﺪﯨﻐﺎﻧﻠﯩﻘﯩﻨﻰ ﯞﻩ ﺑﯘ ﺧﯩﻞ ﺳﯩﻴﺎﺳﻪﺗﻨﯩﯔ ﺧﯩﺘﺎﻱ ﻫﯚﻛﯜﻣﯩﺘﻰ 1949- ﻳﯩﻠﻰ ﺋﯘﻳﻐﯘﺭ ﺋﯩﻠﯩﻨﻰ ﺑﯧﺴﯩﯟﺍﻟﻐﺎﻧﺪﯨﻦ ﺑﯘﻳﺎﻥ ﻫﻪﺭ ﺑﻪﺵ ﻳﯩﻠﺪﺍ ﻳﺎﻛﻰ 10 ﻳﯩﻠﺪﺍ ﺑﯩﺮ ﻗﯧﺘﯩﻢ ﻳﯜﺭﮔﯜﺯﯛﻟﯜﭖ ﺭﻩﻫﺒﻪﺭﻟﻪﺭ ﺋﺎﻟﻤﺎﺷﺘﯘﺭﯗﻟﯘﭖ ﺗﯘﺭﯗﻟﻐﺎﻧﻠﯩﻘﯩﻨﻰ، ﺑﯘﻧﯩﯔ ﺋﯘﻳﻐﯘﺭ ﺋﯩﻠﯩﺪﯨﻜﻰ ﺧﻪﻟﻘﻨﯩﯔ ﺋﯩﺮﺍﺩﯨﺴﯩﻨﻰ ﺋﻪﻛﺲ ﺋﻪﺗﺘﯜﺭﻩﻟﻤﻪﻳﺪﯨﻐﺎﻧﻠﯩﻘﯩﻨﻰ ﻛﯚﺭﺳﻪﺗﺘﻰ.

ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﻳﻪﻧﻪ ، ﻧﯘﺭ ﺑﻪﻛﺮﯨﻨﯩﯔ ﺋﯩﻠﮕﯩﺮﻯ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻠﯘﻕ ﭘﺎﺭﺗﻜﻮﻣﻨﯩﯔ ﻳﯘﻗﯩﺮﻯ ﻗﺎﺗﻠﯩﻤﯩﺪﺍ ﯞﻩﺯﯨﭙﻪ ﺋﯚﺗﻪﯞﺍﺗﻘﺎﻥ ﯞﻩ ﭘﺎﺭﺗﻜﻮﻣﻨﯩﯔ ﻣﯘﺋﺎﯞﯨﻦ ﺳﯧﻜﺮﯦﺘﺎﺭﻯ ﺑﻮﻟﯘﭖ ﺗﯘﺭﻏﺎﻥ ﻣﻪﺯﮔﯩﻠﺪﻩ ﺋﯘﻳﻐﯘﺭ ﻣﯩﻠﻠﯩﻲ ﻣﺎﺋﺎﺭﯨﭙﯩﻨﻰ ﯞﻩﻳﺮﺍﻥ ﻗﯩﻠﯩﺶ ﺧﺎﺭﺍﻛﺘﯧﺮﯨﮕﻪ ﺋﯩﮕﻪ ﺑﻪﺯﻯ ﺳﯩﻴﺎﺳﻪﺗﻠﻪﺭﻧﻰ ﻛﯜﭼﻪﭖ ﺋﯩﺠﺮﺍ ﻗﯩﻠﻐﺎﻧﻠﯩﻘﻰ، ﺋﯘﻧﯩﯔ ﺋﺎﺗﺎﻟﻤﯩﺶ "ﻗﻮﺵ ﺗﯩﻞ ﻣﺎﺋﺎﺭﯨﭙﻰ" ﺳﯩﻴﺎﺳﯩﺘﯩﻨﻰ ﺩﺍﯞﺍﻣﻠﯩﻖ ﺗﻪﻛﯩﺘﻠﻪﭖ ﺋﯘﻳﻐﯘﺭ ﺋﺎﻧﺎ ﺗﯩﻠﯩﻨﯩﯔ ﺋﺎﻟﯩﻲ ﻣﺎﺋﺎﺭﯨﭗ ﺳﻪﻫﻨﯩﺴﯩﺪﯨﻦ ﭼﯜﺷﯜﭖ ﻗﯧﻠﯩﺸﯩﻐﺎ ﻗﻮﺷﻘﺎﻥ ﺗﯚﻫﭙﯩﺴﻰ ﺳﻪﯞﻩﺑﻠﯩﻚ ﺧﯩﺘﺎﻱ ﺋﯘﻧﻰ ﺋﯘﻳﻐﯘﺭ ﺋﯩﻠﯩﻨﯩﯔ ﺭﻩﺋﯩﺴﻠﯩﻚ ﯞﻩﺯﯨﭙﯩﺴﻰ ﺑﯩﻠﻪﻥ ﺗﺎﺭﺗﯘﻗﻠﯩﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ: "ﻧﯘﺭ ﺑﻪﻛﺮﻯ ﺧﯩﺘﺎﻳﻼﺭﻧﯩﯔ ﮔﯘﻣﺎﺷﺘﯩﺴﻰ"

ﺧﺎﻧﯩﻢ ﻳﻪﻧﻪ ، ﻫﻪﺭ ﻗﺎﻧﺪﺍﻕ ﺑﯩﺮ ﺋﯘﻳﻐﯘﺭﻧﯩﯔ ﻧﯘﺭ ﺑﻪﻛﺮﯨﻨﻰ ﺭﻩﺋﯩﺲ ﺩﻩﭖ ﺋﯧﺘﯩﺮﺍﭖ ﻗﯩﻠﻤﺎﻳﺪﯨﻐﺎﻧﻠﯩﻘﯩﻨﻰ ، ﭘﻪﻗﻪﺕ ﻗﻮﺭﻗﯘﭖ ﺭﻩﺋﯩﺲ ﺩﻩﭖ ﺋﺎﺗﺎﭖ ﻗﻮﻳﯩﺪﯨﻐﺎﻧﻠﯩﻘﯩﻨﻰ ﻗﻮﺷﯘﻣﭽﻪ ﻗﯩﻠﺪﻯ ﯞﻩ ﺋﯘﻧﯩﯔ ﺋﯩﻠﮕﯩﺮﯨﻜﻰ ﺋﯘﻳﻐﯘﺭ ﺭﻩﺋﯩﺴﻠﻪﺭ ﺑﯩﻠﻪﻥ ﺑﻮﻟﻐﺎﻥ ﭘﻪﺭﻗﻰ ﺋﯜﺳﺘﯩﺪﻩ ﺗﻮﺧﺘﯩﻠﯩﭗ، ﺋﯩﻠﮕﯩﺮﯨﻜﻰ ﺭﻩﺋﯩﺴﻠﻪﺭﻧﯩﯔ ﻫﯧﭻ ﺑﻮﻟﻤﯩﺪﻯ ﺩﯦﮕﻪﻧﺪﻩ ﺋﯘﻳﻐﯘﺭ ﺋﺎﻧﺎ ﺗﯩﻠﯩﻨﻰ ﻣﺎﺋﺎﺭﯨﭗ ﺳﻪﻫﻨﯩﺴﯩﺪﯨﻦ ﺋﻪﻣﻪﻟﺪﯨﻦ ﻗﺎﻟﺪﯗﺭﯗﺷﺘﺎ ﺧﯩﺘﺎﻳﻼﺭﻏﺎ ﺋﯘﻧﭽﯩﻠﯩﻚ ﮔﯘﻣﺎﺷﺘﯩﻠﯩﻖ ﻗﯩﻠﯩﭗ ﻛﻪﺗﻤﯩﮕﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.

ﺧﯩﺘﺎﻱ ﺗﻮﺭ ﺑﻪﺗﻠﯩﺮﯨﺪﻩ ﻧﯘﺭ ﺑﻪﻛﺮﯨﻨﯩﯔ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﻐﺎ ﺭﻩﺋﯩﺲ ﺑﻮﻟﯘﭖ ﺳﺎﻳﻼﻧﻐﺎﻧﻠﯩﻘﻰ ﺧﻪﯞﻩﺭ ﻗﯩﻠﯩﻨﺪﻯ. ﺋﻪﻣﻤﺎ ﺧﯩﺘﺎﻳﻨﯩﯔ ﺑﺎﺷﻠﯩﻖ ﺑﻪﻟﮕﯩﻠﻪﺵ ﺳﯩﻴﺎﺳﯩﺘﻰ ﻫﻪﻗﻘﯩﺪﻩ ﺗﻮﺧﺘﺎﻟﻐﺎﻥ ﺳﯩﻴﺎﺳﯩﻲ ﻛﯚﺯﻩﺗﭽﻰ ﺋﯩﻠﺸﺎﺕ ﺋﻪﭘﻪﻧﺪﻯ، ﻣﻪﻳﻠﻰ ﻗﺎﻳﺴﻰ ﺩﻩﺭﯨﺠﯩﻠﯩﻚ ﺑﺎﺷﻠﯩﻖ ﺑﻮﻟﯘﺷﯩﺪﯨﻦ ﻗﻪﺗﺌﯩﻲ ﻧﻪﺯﻩﺭ ، ﺋﯘﻻﺭﻧﻰ ﺧﯩﺘﺎﻱ ﻛﻮﻣﭙﺎﺭﺗﯩﻴﯩﺴﯩﻨﯩﯔ ﺑﯧﻜﯩﺘﯩﺪﯨﻐﺎﻧﻠﯩﻘﯩﻨﻰ ﺑﯘﻧﻰ ﻫﻪﺭﮔﯩﺰﻣﯘ ﺳﺎﻳﻼﻡ ﺩﻩﭖ ﺋﺎﺗﺎﺷﻘﺎ ﺑﻮﻟﻤﺎﻳﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﯩﺪﻯ.

" ﺋﯘ ﺋﯚﺯﯨﻨﻰ ﺧﯩﺘﺎﻱ ﻫﯚﻛﯜﻣﯩﺘﯩﮕﻪ ﺋﻪﯓ ﺳﺎﺩﯨﻖ ﭼﺎﻛﺎﺭ ﺳﯜﭘﯩﺘﯩﺪﻩ ﻛﯚﺭﺳﯩﺘﻪﻟﯩﺪﻯ "

ﻧﯘﺭ ﺑﻪﻛﺮﯨﻨﯩﯔ، 1989- ﻳﯩﻠﻰ 11- ﺋﺎﻳﺪﺍ ﺧﯩﺘﺎﻱ ﻛﻮﻣﻤﯘﻧﯩﺴﺘﯩﻚ ﻳﺎﺷﻼﺭ ﺋﯩﺘﺘﯩﭙﺎﻗﻰ ﺷﯩﻨﺠﺎﯓ ﺋﯘﻧﯩﯟﯦﺮﺳﯩﺘﯧﺘﻰ ﻛﻮﻣﯩﺘﯧﺘﯩﻨﯩﯔ ﻣﯘﺋﺎﯞﯨﻦ ﺑﺎﺵ ﺳﯧﻜﺮﯦﺘﺎﺭﻯ ﺑﻮﻟﻐﺎﻧﺪﯨﻦ، 2007- ﻳﯩﻠﻰ 12 ‏- ﺋﺎﻳﺪﺍ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﻐﺎ ﻣﯘﯞﻩﻗﻘﻪﺕ ﺭﻩﺋﯩﺲ ﯞﻩ ﺭﻩﺋﯩﺲ ﺑﻮﻟﻐﺎﻧﻐﺎ ﻗﻪﺩﻩﺭ ﺟﻪﺭﻳﺎﻧﺪﺍ ﺷﯘﻧﭽﻪ ﻛﯚﭖ ﺩﻩﺭﯨﺠﻪ ﺗﻮﺳﯘﻗﻠﯩﺮﯨﺪﯨﻦ ﻣﯜﺩﯛﺭﯛﭖ ﻛﻪﺗﻤﻪﻱ ﺋﯚﺗﯜﭖ، ﺗﯩﺰ ﺋﯚﺭﻟﯩﺸﯩﺪﯨﻜﻰ ﺳﯩﺮ ﺋﯜﺳﺘﯩﺪﻩ ﺗﻮﺧﺘﺎﻟﻐﺎﻥ ﺋﯩﻠﺸﺎﺕ ﺋﻪﭘﻪﻧﺪﻯ ﺋﯘﻧﯩﯔ ﺋﯚﺯﯨﻨﻰ ﺧﯩﺘﺎﻱ ﻫﯚﻛﯜﻣﯩﺘﯩﮕﻪ ﺋﻪﯓ ﺳﺎﺩﯨﻖ ﭼﺎﻛﺎﺭ ﺳﯜﭘﯩﺘﯩﺪﻩ ﻛﯚﺭﺳﯩﺘﻪﻟﯩﮕﻪﻧﻠﯩﻜﯩﺪﻩ ﺩﯦﺪﻯ.

ﺋﯘﻳﻐﯘﺭ ﺗﯩﻠﯩﻨﻰ ﺋﺎﻟﯩﻲ ﻣﺎﺋﺎﺭﯨﭗ ﺳﻪﻫﻨﯩﺴﯩﺪﯨﻦ ﺋﻪﻣﻪﻝ ﻗﺎﻟﺪﯗﺭﯗﺵ ﺋﯘﻳﻐﯘﺭﻻﺭﻧﯩﯔ ﻣﯩﻠﻠﯩﻲ ﻛﯩﻤﻠﯩﻜﻰ ﻛﺮﯨﺰﯨﺴﯩﻐﺎ ﻣﯘﭘﺘﯩﻼ ﻗﯩﻠﯩﺪﯗ

ﻛﯚﭘﻠﯩﮕﻪﻥ ﺋﯘﻳﻐﯘﺭ ﺯﯨﻴﺎﻟﯩﻴﻼﺭ ﺋﯘﻳﻐﯘﺭ ﺗﯩﻠﯩﻨﻰ ﺋﺎﻟﯩﻲ ﻣﺎﺋﺎﺭﯨﭗ ﺳﻪﻫﻨﯩﺴﯩﺪﯨﻦ ﺋﻪﻣﻪﻝ ﻗﺎﻟﺪﯗﺭﯗﺵ، ﺋﯘﻳﻐﯘﺭ ﻣﯩﻠﻠﯩﻲ ﻛﯩﻤﻠﯩﻜﻰ ﯞﻩ ﻛﻪﻟﮕﯜﺳﻰ ﻣﻪﯞﺟﯘﺩﻟﯘﻗﯩﻐﺎ ﺋﯩﻨﺘﺎﻳﯩﻦ ﭘﺎﺳﺴﯩﭗ ﺗﻪﺳﯩﺮ ﻛﯚﺭﺳﯩﺘﯩﺪﯗ، ﯞﻩ ﻛﻪﻟﮕﯜﺳﯩﺪﻩ ﺋﯘﻳﻐﯘﺭﻻﺭﻧﻰ ﻣﯚﻟﭽﻪﺭﻟﻪﺵ ﻗﯩﻴﯩﻦ ﺑﻮﻟﻐﺎﻥ ﻣﯩﻠﻠﯩﻲ ﻛﯩﻤﻠﯩﻜﻰ ﻛﺮﯨﺰﯨﺴﯩﻐﺎ ﻣﯘﭘﺘﯩﻼ ﻗﯩﻠﯩﺪﯗ ﺩﻩﭖ ﺗﻮﻧﯘﭖ، ﺋﯘﻳﻐﯘﺭ ﺋﯩﻠﯩﺪﻩ ﻗﻮﺵ ﺗﯩﻞ ﻣﺎﺋﺎﺭﯨﭙﯩﻨﻰ ﺋﻪﻣﻪﻟﺪﯨﻦ ﻗﺎﻟﺪﯗﺭﯗﺷﻨﻰ ﺗﻪﺷﻪﺑﺒﯘﺱ ﻗﯩﻠﯩﭗ ﻛﯧﻠﯩﯟﺍﺗﻘﺎﻥ ﭘﻪﻳﺘﻠﻪﺭﺩﻩ، ﻧﯘﺭ ﺑﻪﻛﺮﻯ ﺋﻪﻛﺴﯩﭽﻪ ﺋﯘﻳﻐﯘﺭ ﺋﯩﻠﯩﺪﻩ ﻗﻮﺵ ﺗﯩﻞ ﻣﺎﺋﺎﺭﯨﭙﯩﻨﻰ ﺗﯧﺨﯩﻤﯘ ﺋﯩﻠﮕﯩﺮﯨﻠﻪﭖ ﺟﺎﻧﻼﻧﺪﯗﺭﯗﺵ، ﭘﯩﻼﻧﻠﯩﻖ ﺗﯘﻏﯘﺕ ﺳﯩﻴﺎﺳﯩﺘﯩﻨﻰ ﺗﯧﺨﯩﻤﯘ ﻗﺎﺗﺘﯩﻖ ﻳﯜﺭﮔﯜﺯﯛﺵ ﺗﻮﻏﺮﯨﺴﯩﺪﺍ ﻫﻪﺭ ﺧﯩﻞ ﻧﯘﺗﯘﻗﻼﺭﻧﻰ ﺳﯚﺯﻟﻪﭖ ﺧﯩﺘﺎﻳﻨﯩﯔ ﺑﯘ ﺧﯩﻞ ﺳﯩﻴﺎﺳﻪﺗﻠﯩﺮﯨﻨﻰ ﻛﯜﭼﻪﭖ ﺗﻪﺷﯟﯨﻖ ﻗﯩﻠﻐﺎﻥ ﯞﻩ ﺋﺎﻛﺘﯩﭙﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﺋﯩﺪﻯ.

ﻧﯘﺭ ﺑﻪﻛﺮﯨﻨﯩﯔ ﻫﻮﻗﯘﻕ ﺳﻪﻫﻨﯩﺴﯩﮕﻪ ﭼﯩﻘﯩﺸﻰ ﺋﯘﻳﻐﯘﺭﻻﺭ ﺋﯜﭼﯜﻥ ﺯﯨﻴﺎﻧﻠﯩﻖ

ﻧﯘﺭ ﺑﻪﻛﺮﯨﻨﯩﯔ ﺋﯘﻳﻐﯘﺭ ﺋﯩﻠﯩﺪﻩ ﺭﻩﺋﯩﺴﻠﯩﻚ ﺳﻪﻫﻨﯩﺴﯩﮕﻪ ﭼﯩﻘﯩﺶ ﺑﯩﻠﻪﻥ ﻫﺎﺯﯨﺮ ﺋﯧﻐﯩﺮ ﻛﺮﯨﺰﯨﺴﻘﺎ ﺩﯗﭺ ﻛﯧﻠﯩﯟﺍﺗﻘﺎﻥ ﺋﯘﻳﻐﯘﺭ ﻣﯩﻠﻠﯩﻲ ﻣﺎﺋﺎﺭﯨﭙﻰ، ﺋﯘﻳﻐﯘﺭ ﺗﯩﻠﻰ ﯞﻩ ﻣﯩﻠﻠﯩﻲ ﻛﯩﻤﻠﯩﻜﯩﮕﻪ ﻗﺎﻧﺪﺍﻕ ﺗﻪﺳﯩﺮﻟﻪﺭﻧﻰ ﺋﯧﻠﯩﭗ ﻛﯧﻠﯩﺸﻰ ﻣﯘﻣﻜﯩﻦ ﺩﯦﮕﻪﻥ ﺳﻮﺋﺎﻟﯩﻤﯩﺰﻏﺎ ﺟﺎﯞﺍﺏ ﺑﻪﺭﮔﻪﻥ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﺑﯘﻧﯩﯔ ﺋﺎﻗﯩﯟﯨﺘﯩﻨﻰ ﻣﯚﻟﭽﻪﺭﻟﻪﺷﻨﯩﯔ ﻗﯧﻴﯩﻦ ﺋﯩﻜﻪﻧﻠﯩﻜﯩﻨﻰ ﻛﯚﺭﺳﻪﺗﺘﻰ.

2007- ﻳﯩﻠﻰ 12- ﺋﺎﻳﻨﯩﯔ 28 - ﻛﯜﻧﻰ ﺋﺎﭘﺘﻮﻧﻮﻡ ﺭﺍﻳﻮﻧﻠﯘﻕ ﺧﻪﻟﻖ ﻗﯘﺭﯗﻟﺘﯩﻴﻰ ﺩﺍﺋﯩﻤﯩﻲ ﻛﻮﻣﯩﺘﯧﺘﯩﻨﯩﯔ 35 ‏- ﻗﯧﺘﯩﻤﻠﯩﻖ ﻳﯩﻐﯩﻨﯩﺪﺍ ، ﺷﯘ ﯞﺍﻗﺘﺘﺎ ﺭﻩﺋﯩﺴﻠﯩﻚ ﯞﻩﺯﯨﭙﯩﺴﯩﻨﻰ ﺋﯚﺗﻪﯞﺍﺗﻘﺎﻥ ﺋﯩﺴﻤﺎﺋﯩﻞ ﺗﯩﻠﯩﯟﺍﻟﺪﯨﻨﯩﯔ ﯞﻩﺯﯨﭙﯩﺴﯩﺪﯨﻦ ﺋﯩﺴﺘﯩﭙﺎ ﺑﻪﺭﮔﻪﻧﻠﯩﻜﻰ ﺋﯘﻗﺘﯘﺭﯗﻟﯘﭖ، ﻧﯘﺭ ﺑﻪﻛﺮﻯ ﻣﯘﯞﻩﻗﻘﻪﺕ ﺭﻩﺋﯩﺴﻠﯩﻜﻜﻪ ﺗﻪﻳﯩﻨﻠﻪﻧﮕﻪﻥ ﺋﯩﺪﻯ.

ﻳﯘﻗﯩﺮﯨﺪﯨﻜﻰ ﺋﯘﻟﯩﻨﯩﺸﺘﯩﻦ، ﻣﯘﺧﺒﯩﺮﯨﻤﯩﺰ ﺟﯜﻣﻪﻧﯩﯔ ﺑﯘ ﻫﻪﻗﺘﯩﻜﻰ ﻣﻪﻟﯘﻣﺎﺗﯩﻨﻰ ﺋﺎﯕﻼﻳﺴﯩﺰ.