ﺋﯘﻳﻐﯘﺭ ﺋﯧﻠﯩﺪﻩ ﺋﻮﻗﯘﺵ ﻳﺎﺭﺩﻩﻡ ﻗﻪﺭﺯ ﭘﯘﻟﯩﻐﺎ ﺋﯧﺮﯨﺸﻜﻪﻧﻠﻪﺭ ﺳﺎﻧﻰ ﺋﯩﻨﺘﺎﻳﯩﻦ ﭼﻪﻛﻠﯩﻚ ﺑﻮﻟﻤﺎﻗﺘﺎ

ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻠﯘﻕ ﻣﺎﺋﺎﺭﯨﭗ ﻧﺎﺯﺍﺭﯨﺘﯩﻨﯩﯔ ﭼﺎﺭﺷﻪﻧﺒﻪ ﻛﯜﻧﻰ ﺋﯧﻼﻥ ﻗﯩﻠﻐﺎﻥ ﻣﻪﻟﯘﻣﺎﺗﻠﯩﺮﯨﺪﯨﻦ ﺋﺎﺷﻜﺎﺭﯨﻠﯩﻨﯩﺸﯩﭽﻪ، ﺋﯘﻳﻐﯘﺭ ﺋﯧﻠﯩﺪﻩ ﺑﯘ ﻳﯩﻞ ﺋﻮﻗﯘﺵ ﻳﺎﺭﺩﻩﻡ ﻗﻪﺭﺯ ﭘﯘﻟﻰ ﺋﺎﻟﻐﺎﻧﻼﺭﻧﯩﯔ ﺳﺎﻧﻰ ﺋﺎﺭﺍﻥ 426 ﻧﻪﭘﻪﺭ ﺑﻮﻟﯘﭖ، ﺑﯘ ﺩﯙﻟﻪﺕ ﭼﯜﺷﯜﺭﯛﭖ ﺑﻪﺭﮔﻪﻥ ﺳﺎﻧﻨﯩﯔ ﺋﺎﺭﺍﻥ 4٪ ﺋﯩﻨﻰ ﺋﯩﮕﯩﻠﻪﻳﺪﯗ.

ﺑﯘﻧﯩﯔ ﺋﺎﻟﺪﯨﺪﯨﻼ، ﺧﯩﺘﺎﻱ ﺩﯙﻟﻪﺗﻠﯩﻚ ﻣﺎﺋﺎﺭﯨﭗ ﻣﯩﻨﯩﺴﺘﯩﺮﻟﯩﻘﻰ ﺋﯘﻳﻐﯘﺭ ﺋﯧﻠﯩﺪﻩ ﺋﻮﻗﯘﺵ ﻳﺎﺭﺩﻩﻡ ﻗﻪﺭﺯ ﭘﯘﻟﻰ ﺑﯧﺮﯨﺶ ﺧﯩﺰﻣﯩﺘﯩﻨﯩﯔ ﺋﯩﺠﺮﺍ ﻗﯩﻠﯩﻨﯩﺶ ﺋﻪﮬﯟﺍﻟﯩﻨﯩﯔ ﻳﺎﺧﺸﻰ ﺋﻪﻣﻪﺳﻠﯩﻜﯩﻨﻰ ﺑﯩﻠﺪﯛﺭﯛﭖ، ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻠﯘﻕ ﻣﺎﺋﺎﺭﯨﭗ ﺩﺍﺋﯩﺮﯨﻠﯩﺮﯨﻨﻰ ﺗﯩﻠﻐﺎ ﺋﯧﻠﯩﭗ ﺗﻪﻧﻘﯩﺪ ﻗﯩﻠﻐﺎﻥ ﺋﯩﺪﻯ.

ﻣﻪﻟﯘﻣﺎﺗﻼﺭﻏﺎ ﻗﺎﺭﯨﻐﺎﻧﺪﺍ، ﺧﯩﺘﺎﻱ ﺩﯙﻟﻪﺗﻠﯩﻚ ﻣﺎﺋﺎﺭﯨﭗ ﻣﯩﻨﯩﺴﺘﯩﺮﻟﯩﻘﯩﻨﯩﯔ ﺋﻮﻗﯘﺵ ﻳﺎﺭﺩﻩﻡ ﭘﯘﻟﻰ ﺑﯧﺮﯨﺶ ﺳﯩﻴﺎﺳﯩﺘﻰ ﺑﻮﻳﯩﭽﻪ، ﺳﻮﺩﺍ - ﺳﺎﻧﺎﺋﻪﺕ ﺑﺎﻧﻜﯩﺴﻰ، ﻳﯧﺰﺍ ﺋﯩﮕﯩﻠﯩﻚ ﺑﺎﻧﻜﯩﺴﻰ ﻗﺎﺗﺎﺭﻟﯩﻘﻼﺭﻧﯩﯔ ﺋﯘﻳﻐﯘﺭ ﺋﯧﻠﯩﺪﯨﻜﻰ ﺗﺎﺭﻣﺎﻕ ﺑﺎﻧﻜﯩﻠﯩﺮﻯ ﺑﯘ ﻳﯩﻞ ﺋﯘﻳﻐﯘﺭ ﺋﯧﻠﯩﺪﯨﻜﻰ 10200 ﺋﺎﻟﯩﻲ ﻣﻪﻛﺘﻪﭖ ﺋﻮﻗﯘﻏﯘﭼﯩﺴﯩﻐﺎ ﺋﻮﻗﯘﺵ ﻳﺎﺭﺩﻩﻡ ﻗﻪﺭﺯ ﭘﯘﻟﻰ ﺑﯧﺮﯨﺸﻨﻰ ﭘﯩﻼﻧﻠﯩﻐﺎﻥ. ﺋﻪﻣﻤﺎ 15 - ﺳﯧﻨﺘﻪﺑﯩﺮﮔﻪ ﻗﻪﺩﻩﺭ ﮬﻪﺭ ﻗﺎﻳﺴﻰ ﺑﺎﻧﻜﯩﻼﺭ 1700 ﺋﻮﻗﯘﻏﯘﭼﯩﻨﯩﯔ ﺋﯩﻠﺘﯩﻤﺎﺳﯩﻨﻰ ﺗﻪﺳﺘﯩﻘﻠﯩﻐﺎﻥ ﺑﻮﻟﯘﭖ، ﺑﯘﻧﯩﯔ ﺋﯩﭽﯩﺪﻩ ﮬﻪﻗﯩﻘﯩﻲ ﻗﻪﺭﺯ ﭘﯘﻟﯩﻨﻰ ﺋﺎﻻﻟﯩﻐﺎﻧﻼﺭ ﺋﺎﺭﺍﻥ 426 ﻧﻪﭘﻪﺭ ﺑﻮﻟﻐﺎﻥ.

ﺧﯩﺘﺎﻳﺪﺍ ﺋﻮﻗﯘﺵ ﭘﯘﻟﯩﻨﯩﯔ ﺗﯧﺰ ﺋﯚﺳﯜﺷﻰ ﯞﻩ ﺋﻮﻗﯘﺵ ﭼﯩﻘﯩﻤﻠﯩﺮﯨﻨﯩﯔ ﺷﻪﺧﺴﻨﯩﯔ ﺯﯨﻤﻤﯩﺴﯩﮕﻪ ﻳﯚﺗﻜﯩﻠﯩﺸﻰ، ﻧﯘﺭﻏﯘﻥ ﻧﺎﻣﺮﺍﺕ ﺋﻮﻗﯘﻏﯘﭼﯩﻼﺭﻧﻰ ﺋﺎﻟﯩﻲ ﻣﻪﻛﺘﻪﭘﻠﻪﺭﺩﻩ ﺋﻮﻗﯘﺷﺘﯩﻦ ﻣﻪﮬﺮﯗﻡ ﻗﯩﻠﻤﺎﻗﺘﺎ. ﺧﯩﺘﺎﻱ ﮬﯚﻛﯜﻣﯩﺘﻰ ﻧﺎﻣﺮﺍﺕ ﺋﻮﻗﯘﻏﯘﭼﯩﻼﺭﻏﺎ ﺋﻮﻗﯘﺵ ﻳﺎﺭﺩﻩﻡ ﻗﻪﺭﺯ ﭘﯘﻟﻰ ﺑﯧﺮﯨﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﺑﻮﻟﺴﯩﻤﯘ، ﺑﯩﺮﺍﻕ ﻧﯘﺭﻏﯘﻥ ﺋﻮﻗﯘﻏﯘﭼﯩﻼﺭ، ﺋﻮﻗﯘﺵ ﻳﺎﺭﺩﻩﻡ ﻗﻪﺭﺯ ﭘﯘﻟﻰ ﺋﯧﻠﯩﺶ ﺭﻩﺳﻤﯩﻴﻪﺗﻠﯩﺮﯨﻨﯩﯔ ﻣﯘﺭﻩﻛﻜﻪﭘﻠﯩﻜﻰ ﯞﻩ ﻗﯩﻴﯩﻨﻠﯩﻘﯩﻨﻰ ﺷﯩﻜﺎﻳﻪﺕ ﻗﯩﻠﻤﺎﻗﺘﺎ. (ﺋﺎﺭﺯﯗ)