ﺧﻪﯞﻩﺭﻟﻪﺭﺩﻩ ﺑﺎﻳﺎﻥ ﻗﯩﻠﯩﻨﯩﺸﯩﭽﻪ، ﺧﯩﺘﺎﻱ ﻫﯚﻛﯜﻣﯩﺘﻰ ﺑﯘ ﻗﯧﺘﯩﻤﻘﻰ ﻛﻪﯓ - ﻛﯚﻟﻪﻣﻠﯩﻚ ﺗﯘﺗﻘﯘﻥ ﻗﯩﻠﯩﺶ ﻫﻪﺭﯨﻜﯩﺘﯩﮕﻪ ﮔﯩﻠﻪﻡ ﺗﺎﺯﯨﻼﺵ ﻫﻪﺭﯨﻜﯩﺘﻰ ﺩﻩﭖ ﻧﺎﻡ ﺑﻪﺭﮔﻪﻥ ﯞﻩ ﺑﯘ ﻧﺎﻡ ﺋﺎﺳﺘﯩﺪﺍ 150 ﻗﯧﺘﯩﻢ ﺋﺎﺧﺘﯘﺭﯗﺵ ﻫﻪﻡ ﺗﯘﺗﯘﺵ ﻫﻪﺭﯨﻜﯩﺘﻰ ﺋﯧﻠﯩﭗ ﺑﯧﺮﯨﭗ 500ﺩﯨﻦ ﺋﺎﺭﺗﯘﻕ ﻛﯩﺸﯩﻨﻰ ﻗﻮﻟﻐﺎ ﺋﺎﻟﻐﺎﻥ. ﺑﯘ ﻗﯧﺘﯩﻤﻘﻰ ﺗﯘﺗﻘﯘﻥ ﻗﯩﻠﯩﺶ ﻫﻪﺭﻛﯩﺘﯩﻨﻰ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻚ، ﺩﯙﻟﻪﺕ ﺑﯩﺨﻪﺗﻪﺭﻟﯩﻚ، ﭼﯧﮕﺮﺍ ﻣﯘﺩﺍﭘﯩﺌﻪ ﻗﺎﺗﺎﺭﻟﯩﻖ ﺗﺎﺭﻣﺎﻗﻼﺭ ﺑﯩﺮﻟﯩﻜﺘﻪ ﺋﯧﻠﯩﭗ ﺑﺎﺭﻏﺎﻥ.

ﺧﻪﯞﻩﺭﻟﻪﺭﺩﻩ ﺋﻪﺳﻜﻪﺭﺗﯩﻠﯩﺸﯩﭽﻪ، ﻧﯚﯞﻩﺗﺘﻪ ﻗﻪﺷﻘﻪﺭﺩﻩ ﻳﺎﺷﻼﺭ ﺋﺎﺭﯨﺴﯩﺪﺍ ﺋﯘﺷﺘﯘﻣﺘﯘﺕ ﻏﺎﻳﯩﭗ ﺑﻮﻟﯘﭖ ﻛﯧﺘﯩﺶ، ﺋﯘﺭﯗﻕ - ﺗﯘﻏﻘﺎﻥ ﻗﯧﺮﯨﻨﺪﺍﺷﻼﺭ ﺋﺎﺭﺍ ﺧﻪﯞﻩﺭ ﺋﺎﻻﻗﯩﺴﯩﺰ ﻗﯧﻠﯩﺶ ﺋﺎﺩﻩﺗﺘﯩﻜﻰ ﺋﯩﺸﻘﺎ ﺋﺎﻳﻠﯩﻨﯩﭗ ﻗﺎﻟﻐﺎﻥ. ﻧﯚﯞﻩﺗﺘﻪ ﻛﯚﺯﻩﺗﻜﯜﭼﯩﻠﻪﺭ، ﺑﯘ ﻫﻪﺭﯨﻜﻪﺗﻨﻰ ﺧﯩﺘﺎﻳﻨﯩﯔ 4 ‏ - ﺋﺎﯞﻏﯘﺳﺖ ﺳﻪﻣﻪﻥ ﻳﻮﻟﻰ ﯞﻩﻗﻪﺳﻰ ﺳﻪﯞﻩﺑﻠﯩﻚ ﺋﯘﻳﻐﯘﺭﻻﺭﺩﯨﻦ ﺋﯚﭺ ﺋﯧﻠﯩﺶ ﻫﻪﺭﯨﻜﯩﺘﻰ ﺩﻩﭖ ﻗﺎﺭﯨﻤﺎﻗﺘﺎ.

ﻳﻪﻧﻪ ﺑﻪﺯﻯ ﻛﯚﺯﻩﺗﻜﯜﭼﯩﻠﻪﺭ ﺑﻮﻟﺴﺎ ﺑﯘ ﺧﯩﻞ ﺧﺎﻟﯩﻐﺎﻧﭽﻪ ﺗﯘﺗﻘﯘﻥ ﻗﯩﻠﯩﺸﻨﯩﯔ ﺋﯘﻳﻐﯘﺭ ﺭﺍﻳﻮﻧﯩﺪﺍ ﺋﯘﺯﯗﻧﺪﯨﻦ ﺑﯧﺮﻯ ﺩﺍﯞﺍﻣﻠﯩﺸﯩﭗ ﻛﯧﻠﯩﯟﺍﺗﻘﺎﻧﻠﯩﻘﯩﻨﻰ، 4 ‏ - ﺋﺎﯞﻏﯘﺳﺖ ﺳﻪﻣﻪﻥ ﻳﻮﻟﻰ ﯞﻩﻗﻪﺳﻰ ﺳﻪﯞﻩﺑﻠﯩﻚ ﯞﻩﺯﯨﻴﻪﺗﻨﯩﯔ ﺋﻪﻣﺪﯨﻼ ﺩﯗﻧﻴﺎﻏﺎ ﺋﺎﺷﻜﺎﺭﯨﻠﯩﻨﯩﯟﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﯛﺷﻤﻪﻛﺘﻪ.

4‏ - ﺋﺎﯞﻏﯘﺳﺖ ﺳﻪﻣﻪﻥ ﻳﻮﻟﻰ ﯞﻩﻗﻪﺳﯩﺪﯨﻦ ﻛﯧﻴﯩﻦ، ﻗﻪﺷﻘﻪﺭ ﺳﺎﻗﭽﻰ ﺋﯩﺪﺍﺭﯨﺴﻰ ﻣﯘﺧﺒﯩﺮﻻﺭﻧﯩﯔ ﺳﻮﺋﺎﻟﯩﻐﺎ ﺟﺎﯞﺍﺏ ﺑﯧﺮﯨﭗ، ﻗﻪﺷﻘﻪﺭﺩﻩ ﻗﻮﻟﻠﯩﻨﯩﺸﻘﺎ ﺑﻮﻟﯩﺪﯨﻐﺎﻥ ﺑﺎﺭﻟﯩﻖ ﺑﯩﺨﻪﺗﻪﺭﻟﯩﻚ ﺗﻪﺩﺑﯩﺮﻟﯩﺮﯨﻨﻰ ﻗﻮﻟﻠﯩﻨﯩﭗ ﺑﻮﻟﻐﺎﻧﻠﯩﻘﯩﻨﻰ، ﻗﻮﻟﻠﯩﻨﯩﺪﯨﻐﺎﻥ ﭼﺎﺭﻩ ﻗﺎﻟﻤﯩﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﺋﯩﺪﻯ. ﻣﻪﺯﻛﯘﺭ ﺧﻪﯞﻩﺭ ﺋﺎﮔﯧﻨﺘﻠﯩﻘﻠﯩﺮﻯ ﺧﻪﯞﻩﺭﻧﻰ ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻨﯩﯔ ﺑﺎﻳﺎﻧﺎﺗﭽﯩﺴﻰ ﺩﯨﻠﺸﺎﺕ ﺭﯦﺸﯩﺖ ﺗﻪﻣﯩﻨﻠﯩﮕﻪﻥ ﺋﯘﭼﯘﺭﻻﺭﻏﺎ ﺋﺎﺳﺎﺳﻪﻥ ﺗﻪﻳﻴﺎﺭﻟﯩﻐﺎﻥ. ﺩﯨﻠﺸﺎﺕ ﺭﯦﺸﯩﺖ ﺧﻪﻟﻘﺌﺎﺭﺍ ﺟﺎﻣﺎﺋﻪﺗﻨﻰ ﺋﯘﻳﻐﯘﺭ ﺭﺍﻳﻮﻧﯩﻨﯩﯔ ﺋﻮﻟﯩﻤﭙﯩﻜﺘﯩﻦ ﻛﯧﻴﯩﻨﻜﻰ ﯞﻩﺯﯨﻴﯩﺘﯩﮕﻪ ﺟﯩﺪﺩﯨﻲ ﻛﯚﯕﯜﻝ ﺑﯚﻟﯜﺷﻜﻪ ﭼﺎﻗﯩﺮﻏﺎﻥ.