ﺧﯩﺘﺎﻱ ﻫﯚﻛﯜﻣﯩﺘﻰ 2008 - ﻳﯩﻠﻠﯩﻖ ﻳﯧﺰﺍ ﺧﯩﺰﻣﯩﺘﻰ ﭘﯩﻼﻧﯩﺪﺍ ﻳﺎﺷﻼﺭﻧﻰ ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ ﻳﯚﺗﻜﻪﺷﻨﻰ ﺩﺍﯞﺍﻣﻼﺷﺘﯘﺭﻣﺎﻗﭽﻰ

ﺋﯘﻳﻐﯘﺭ ﺋﯧﻠﻰ ﻫﯚﻛﯜﻣﻪﺕ ﺗﻮﺭ ﺑﻪﺗﻠﯩﺮﯨﺪﯨﻦ ﺋﺎﺷﻜﺎﺭﯨﻠﯩﻨﯩﺸﯩﭽﻪ، ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻠﯘﻕ 2008 - ﻳﯩﻠﻠﯩﻖ ﻳﯧﺰﺍ ﺧﯩﺰﻣﻪﺕ ﻳﯩﻐﯩﻨﻰ،4 - ﯞﻩ 5 - ﻳﺎﻧﯟﺍﺭ ﺋﯜﺭﯛﻣﭽﯩﺪﻩ ﭼﺎﻗﯩﺮﯨﻠﻐﺎﻥ ﺑﻮﻟﯘﭖ، ﻳﯩﻐﯩﻨﺪﺍ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭ ﺋﯧﻠﻰ ﻳﯧﺰﯨﻠﯩﺮﯨﺪﺍ ﺑﯘ ﺑﯩﺮ ﻳﯩﻞ ﻳﯜﺭﮔﯜﺯﯨﺪﯨﻐﺎﻥ ﻣﯘﻫﯩﻢ ﺳﯩﻴﺎﺳﻪﺕ ﻫﻪﻡ ﺧﯩﺰﻣﻪﺗﻠﯩﺮﻯ ﺋﯧﻼﻥ ﻗﯩﻠﯩﻨﻐﺎﻥ.

ﻳﯩﻐﯩﻦ ﻫﻪﻗﻘﯩﺪﯨﻜﻰ ﺧﻪﯞﻩﺭﻟﻪﺭﺩﯨﻦ ﻣﻪﻟﯘﻡ ﺑﻮﻟﯘﺷﯩﭽﻪ، ﻳﯧﺰﺍ ﺋﯧﺸﯩﻨﭽﺎ ﺋﻪﻣﮕﻪﻙ ﻛﯜﭼﻠﯩﺮﯨﻨﻰ ﺳﯩﺮﺗﻼﺭﻏﺎ ﻳﯚﺗﻜﻪﭖ ﺋﯩﺸﻘﺎ ﺋﻮﺭﯗﻧﻼﺷﺘﯘﺭﯗﺵ ﺳﯩﻴﺎﺳﯩﺘﻰ 2008 - ﻳﯩﻠﺪﯨﻜﻰ ﺋﻪﯓ ﻣﯘﻫﯩﻢ ﺧﯩﺰﻣﻪﺕ ﭘﯩﻼﻧﻰ ﺋﯩﭽﯩﮕﻪ ﻛﯩﺮﮔﯜﺯﯛﻟﮕﻪﻥ ﺑﻮﻟﯘﭖ، ﺧﯩﺘﺎﻱ ﻫﯚﻛﯜﻣﯩﺘﻰ ﺑﯘ ﻳﯩﻞ ﻳﻪﻧﻪ،ﺳﯩﺮﺗﻼﺭﻏﺎ ﻳﯚﺗﻜﻪﭖ ﺋﯩﺸﻘﺎ ﺋﻮﺭﯗﻧﻼﺷﺘﯘﺭﯗﻟﯩﺪﯨﻐﺎﻥ ﻳﯧﺰﺍ ﺋﻪﻣﮕﻪﻙ ﻛﯜﭼﻠﯩﺮﯨﻨﻰ ﺑﯩﺮ ﻣﯩﻠﻴﻮﻥ 500 ﻣﯩﯔ ﺋﺎﺩﻩﻡ ‏- ﻗﯧﺘﯩﻤﻐﺎ ﻳﻪﺗﻜﯜﺯﮔﻪﻧﺪﯨﻦ ﺑﺎﺷﻘﺎ، ﺗﯘﺭﺍﻗﻠﯩﻖ ﻫﺎﻟﺪﺍ 300 ﻣﯩﯔ ﺋﯧﺸﯩﻨﭽﺎ ﺋﻪﻣﮕﻪﻙ ﻛﯜﭼﻠﯩﺮﯨﻨﻰ ﺳﯩﺮﺗﻼﺭﻏﺎ ﻳﯚﺗﻜﻪﭖ ﺋﯩﺸﻘﺎ ﺋﻮﺭﯗﻧﻼﺷﺘﯘﺭﯗﺷﻘﺎ ﻛﺎﭘﺎﻟﻪﺗﻠﯩﻚ ﻗﯩﻠﯩﺶ ﭘﯩﻼﻧﯩﻨﻰ ﺋﯩﺸﻘﺎ ﺋﺎﺷﯘﺭﻣﺎﻗﭽﻰ ﺋﯩﻜﻪﻥ.

ﻣﻪﻟﯘﻡ ﺑﻮﻟﯘﺷﯩﭽﻪ، ﺧﯩﺘﺎﻱ ﻫﯚﻛﯜﻣﯩﺘﻰ 2007 - ﻳﯩﻠﯩﺪﺍ ﺋﯘﻳﻐﯘﺭ ﺋﯧﻠﯩﺪﯨﻦ ﺳﯩﺮﺗﻼﺭﻏﺎ ﻳﯚﺗﻜﻪﭖ ﺋﯩﺸﻘﺎ ﺋﻮﺭﯗﻧﻼﺷﺘﯘﺭﻏﺎﻥ ﻳﯧﺰﺍ ﺋﯧﺸﯩﻨﭽﺎ ﺋﻪﻣﮕﻪﻙ ﻛﯜﭼﻠﯩﺮﯨﻨﻰ ﺑﯩﺮ ﻣﯩﻠﻴﻮﻥ ﺋﯩﻜﻜﻰ ﻳﯜﺯ ﻣﯩﯔ ﺋﺎﺩﻩﻡ ‏- ﻗﯧﺘﯩﻤﻐﺎ ﻳﻪﺗﻜﯜﺯﮔﻪﻥ. ﺧﯩﺘﺎﻱ ﻫﯚﻛﯜﻣﯩﺘﻰ ﺗﻪﺭﯨﭙﯩﺪﯨﻦ ﺋﯘﻳﻐﯘﺭ ﺩﯦﻬﻘﺎﻧﻠﯩﺮﯨﻨﻰ ﻧﺎﻣﺮﺍﺗﻠﯩﻘﺘﯩﻦ ﻗﯘﺗﯘﻟﺪﯗﺭﯗﺷﺘﯩﻜﻰ ﻣﯘﻫﯩﻢ ﺗﻪﺩﺑﯩﺮ ﺩﻩﭖ ﺗﻪﺭﯨﭙﻠﯩﻨﯩﯟﺍﺗﻘﺎﻥ ﺋﯘﻳﻐﯘﺭ ﻳﯧﺰﺍ ﺋﻪﻣﮕﻪﻙ ﻛﯜﭼﻠﯩﺮﯨﻨﻰ ﺧﯩﺘﺎﻱ ﺋﯚﻟﻜﯩﻠﯩﺮﻯ ﻫﻪﻣﺪﻩ ﺑﺎﺷﻘﺎ ﻳﯘﺭﺗﻼﺭﻏﺎ ﻳﯚﺗﻜﻪﭖ ﺋﯩﺸﻘﺎ ﺋﻮﺭﯗﻧﻼﺷﺘﯘﺭﯗﺵ ﺳﯩﻴﺎﺳﯩﺘﯩﻨﻰ ﺋﻪﻣﻪﻟﯩﻴﻠﻪﺷﺘﯜﺭﯛﺵ ﺟﻪﺭﻳﺎﻧﯩﺪﺍ ﺋﺎﺳﺎﺳﻪﻥ 18 ﻳﺎﺷﺘﯩﻦ 25 ﻳﺎﺷﻘﯩﭽﻪ ﺑﻮﻟﻐﺎﻥ ﺋﯘﻳﻐﯘﺭ ﻳﯧﺰﺍ ﻗﯩﺰﻟﯩﺮﯨﻨﻰ ﺋﺎﺳﺎﺱ ﻗﯩﻠﯩﭗ،ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ ﻣﻪﺟﺒﯘﺭﯨﻲ ﻳﯚﺗﻜﯩﮕﻪﻥ ﺑﻮﻟﯘﭖ،ﺋﯘﻻﺭﻧﯩﯔ ﻫﻪﻕ ‏- ﻫﻮﻗﯘﻗﻠﯩﺮﻯ ﺋﯧﻐﯩﺮ ﺩﻩﺧﻠﯩﮕﻪ ﺋﯘﭼﺮﯨﻐﺎﻥ، ﺑﯘ ﺋﯘﻳﻐﯘﺭﻻﺭﺩﺍ ﻛﯜﭼﻠﯜﻙ ﻧﺎﺭﺍﺯﯨﻠﯩﻖ ﻗﻮﺯﻏﯩﻐﺎﻥ ﺑﻮﻟﯘﭖ، ﻛﯘﭼﺎﺩﺍ ﻫﻪﺗﺘﺎ ﻣﯘﺷﯘ ﺳﻪﯞﻩﺑﺘﯩﻦ ﺧﻪﻟﻖ ﻫﯚﻛﯜﻣﻪﺗﻜﻪ ﻗﺎﺭﺷﻰ ﻧﺎﺭﺍﺯﯨﻠﯩﻖ ﻧﺎﻣﺎﻳﯩﺸﻰ ﺋﯧﻠﯩﭗ ﺑﺎﺭﻏﺎﻥ ﺋﯩﺪﻯ.

ﺋﺎﻣﯧﺮﯨﻜﺎ ﺋﺎﯞﺍﻡ ﭘﺎﻻﺗﺎ ﺋﻪﺯﺍﻟﯩﺮﻯ ﻳﯧﻘﯩﻨﺪﺍ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭ ﺋﯧﻠﯩﺪﻩ ﻳﯜﺭﮔﯜﺯﯛﯞﺍﺗﻘﺎﻥ ﻣﻪﺯﻛﯘﺭ ﺳﯩﻴﺎﺳﯩﺘﯩﻨﻰ، ﺋﯘﻳﻐﯘﺭﻻﺭﻏﺎ ﻗﺎﺭﯨﺘﺎ ﺋﯩﺮﻗﯩﻲ ﻗﯩﺮﻏﯩﻨﭽﯩﻠﯩﻖ ﺗﯜﺳﯩﻨﻰ ﺋﺎﻟﻐﺎﻥ ﺑﯩﺮ ﺳﯩﻴﺎﺳﻪﺕ ﺩﻩﭖ ﺋﻪﻳﯩﺒﻠﯩﮕﻪﻥ ﺋﯩﺪﻯ. ﺧﯩﺘﺎﻱ ﻫﯚﻛﯜﻣﯩﺘﻰ ﺋﯚﺗﻜﻪﻥ ﻳﯩﻠﻰ ﺋﺎﺳﺎﺳﻪﻥ ﻗﻪﺷﻘﻪﺭ، ﺧﻮﺗﻪﻥ، ﻗﯩﺰﯨﻠﺴﯘ ﻫﻪﻣﺪﻩ ﺋﺎﻗﺴﯘﺩﯨﻦ ﺋﯩﺒﺎﺭﻩﺕ ﺋﯘﻳﻐﯘﺭﻻﺭ ﺋﻪﯓ ﺯﯨﭻ ﺋﻮﻟﺘﯘﺭﺍﻗﻼﺷﻘﺎﻥ ﺟﺎﻳﻼﺭﻧﻰ ﺋﺎﺳﺎﺱ ﻗﯩﻠﯩﭗ ﺋﯘﻳﻐﯘﺭ ﻗﯩﺰﻟﯩﺮﯨﻨﻰ ﺋﯩﺸﻘﺎ ﺋﻮﺭﯗﻧﻼﺷﺘﯘﺭﯗﺵ ﺑﺎﻫﺎﻧﯩﺴﯩﺪﻩ ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ ﻳﯚﺗﻜﯩﮕﻪﻥ ﺑﻮﻟﯘﭖ،ﻗﻪﺷﻘﻪﺭ ﻫﯚﻛﯜﻣﻪﺕ ﺗﻮﺭﯨﻨﯩﯔ 8 - ﻳﺎﻧﯟﺍﺭﺩﯨﻜﻰ ﺧﻪﯞﯨﺮﯨﺪﯨﻦ ﺋﺎﺷﻜﺎﺭﯨﻠﯩﻨﯩﺸﯩﭽﻪ، ﻗﻪﺷﻘﻪﺭ ﯞﯨﻼﻳﯩﺘﯩﺪﯨﻦ ﺋﯚﺗﻜﻪﻥ ﺑﯩﺮ ﻳﯩﻠﺪﺍ ﺳﯩﺮﺗﻼﺭﻏﺎ ﻳﯚﺗﻜﻪﻟﮕﻪﻧﻠﻪﺭ 606 ﻣﯩﯔ ﺋﺎﺩﻩﻡ ‏- ﻗﯧﺘﯩﻤﻐﺎ ﻳﻪﺗﻜﯜﺯﯛﻟﮕﻪﻥ. (ﮔﯜﻟﭽﯧﻬﺮﻩ)