ﮔﯧﻨﯧﺮﺍﻝ ﺯﺍﻫﯩﺮ ﺳﺎﯞﺩﺍﻧﻮﻓﻘﺎ ﻣﺎﺗﻪﻡ ﻣﯘﺭﺍﺳﯩﻤﻰ ﺋﯚﺗﻜﯜﺯﯛﻟﺪﻯ

15- ﺋﺎﯞﻏﯘﺳﺖ ﻛﯜﻧﻰ ﺋﯘﺯﯗﻥ ﻣﻪﺯﮔﯩﻠﻠﯩﻚ ﺋﯧﻐﯩﺮ ﻛﯧﺴﻪﻟﺪﯨﻦ ﻛﯧﻴﯩﻦ، 87 ﻳﯧﺸﯩﺪﺍ ﯞﺍﭘﺎﺕ ﺑﻮﻟﻐﺎﻥ ﺳﺎﺑﯩﻖ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺟﯘﻣﻬﯘﺭﯨﻴﯩﺘﻰ ﻣﯩﻠﻠﯩﻲ ﺋﺎﺭﻣﯩﻴﯩﺴﯩﻨﯩﯔ ﻣﺎﻳﻮﺭ ﺩﻩﺭﯨﺠﯩﻠﯩﻚ ﺋﻮﻓﯩﺘﺴﯧﺮﻯ، 1949-ﻳﯩﻠﯩﺪﯨﻦ ﻛﯧﻴﯩﻦ ﺋﯚﻣﯜﺭ ﺑﻮﻳﻰ ﺧﯩﺘﺎﻱ ﺋﺎﺭﻣﯩﻴﯩﺴﻰ ﺋﯜﭼﯜﻥ ﺧﯩﺰﻣﻪﺕ ﻗﯩﻠﯩﭗ ، ﮔﯧﻨﯧﺮﺍﻟﻠﯩﻖ ﺋﯘﻧﯟﺍﻧﯩﻐﺎ ﺳﺎﺯﺍﯞﻩﺭ ﺑﻮﻟﻐﺎﻥ ﺯﺍﻫﯩﺮ ﺳﺎﯞﺩﺍﻧﻮﻓﻘﺎ ﺗﻪﺯﯨﻴﻪ ﺑﯩﻠﺪﯛﺭﯛﺵ ﻣﯘﺭﺍﺳﯩﻤﻰ 17-ﺋﺎﯞﻏﯘﺳﺖ ﻛﯜﻧﻰ ﺋﯜﺭﯛﻣﭽﯩﺪﻩ ﺋﯚﺗﻜﯜﺯﯛﻟﮕﻪﻥ.

ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻠﯘﻕ ﻛﻮﻣﻤﯘﻧﯩﺴﺘﯩﻚ ﭘﺎﺭﺗﯩﻴﻪ ﻛﻮﻣﯩﺘﯧﺘﯩﻨﯩﯔ ﻣﻪﺧﺴﯘﺱ ﺋﯘﭼﯘﺭ ﺗﻮﺭﻯ ﻫﯧﺴﺎﺑﻠﯩﻨﯩﺪﯨﻐﺎﻥ" ﺗﻪﯕﺮﻯ ﺗﺎﻍ " ﺗﻮﺭﯨﻨﯩﯔ ﺧﻪﯞﯨﺮﯨﮕﻪ ﺋﺎﺳﺎﺳﻼﻧﻐﺎﻧﺪﺍ، ﺧﯩﺘﺎﻱ ﻣﻪﺭﻛﯩﺰﯨﻲ ﻫﻪﺭﺑﯩﻲ ﺋﯩﺸﻼﺭ ﻛﻮﻣﯩﺘﯧﺘﯩﻨﯩﯔ ﻣﯘﺋﺎﯞﯨﻦ ﺭﻩﺋﯩﺴﻰ ﮔﯘ ﺑﻮﺷﯘﯓ، ﻟﻪﻧﺠﯘ ﻫﻪﺭﺑﯩﻲ ﺭﺍﻳﻮﻥ ﻗﻮﻣﺎﻧﺪﺍﻧﻰ ﯞﺍﯓ ﮔﻮ ﺷﯧﯔ ، ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻰ ﭘﺎﺭﺗﻜﻮﻡ ﺳﯧﻜﺮﯨﺘﺎﺭﻯ ﯞﺍﯕﻠﯧﭽﯜﺋﻪﻥ ﺷﯘﻧﯩﯖﺪﻩﻙ ﺧﯩﺘﺎﻱ ﻣﻪﺭﻛﯩﺰﯨﻲ ﻫﯚﻛﯜﻣﯩﺘﯩﺪﻩ ﺋﻪﻣﻪﻝ ﺗﯘﺗﯘﯞﺍﺗﻘﺎﻥ ﺋﯘﻳﻐﯘﺭﻻﺭﺩﯨﻦ ﺋﯩﺴﻤﺎﺋﯩﻞ ﺋﻪﻣﻪﺕ، ﺋﺎﺑﻠﻪﺕ ﺋﺎﺑﺪﯗﺭﯦﺸﯩﺖ ﯞﻩ ﺗﯚﻣﯜﺭ ﺩﺍﯞﺍﻣﻪﺕ ﻫﻪﻡ ﺑﺎﺷﻘﺎ ﻧﻪﭼﭽﻪ ﺋﻮﻧﻠﯩﻐﺎﻥ ﺧﯩﺘﺎﻱ ﯞﻩ ﺋﺎﭘﺘﻮﻧﻮﻡ ﺭﺍﻳﻮﻧﻨﯩﯔ ﺭﻩﻫﺒﯩﺮﯨﻲ ﺷﻪﺧﺴﻠﯩﺮﻯ ﻣﺎﺗﻪﻡ ﻣﯘﺭﺍﺳﯩﻤﻐﺎ ﺋﯩﺸﺘﯩﺮﺍﻙ ﻗﯩﻠﻐﺎﻥ ﻫﻪﻡ ﮔﯜﻝ ﭼﻪﻣﺒﯩﺮﻩﻙ ﺗﻪﻗﺪﯨﻢ ﻗﯩﻠﻐﺎﻥ.

ﺧﻪﯞﻩﺭﮔﻪ ﺋﺎﺳﺎﺳﻼﻧﻐﺎﻧﺪﺍ، ﺯﺍﻫﯩﺮ ﺳﺎﯞﺩﺍﻧﻮﻓﻘﺎ " ﺳﺎﺩﯨﻖ ﻛﻮﻣﻤﯘﻧﯩﺰﻡ ﺟﻪﯕﭽﯩﺴﻰ، ﺟﯘﯕﮕﻮ ﻛﻮﻣﭙﺎﺭﺗﯩﻴﯩﺴﯩﻨﯩﯔ ﺋﯩﻠﻐﺎﺭ ﺋﻪﺯﺍﺳﻰ، ﺧﯩﺘﺎﻱ ﺋﺎﺭﻣﯩﻴﯩﺴﯩﻨﯩﯔ ﺋﯩﻠﻐﺎﺭ ﺳﯩﻴﺎﺳﯩﻲ ﺧﯩﺰﻣﻪﺗﭽﯩﺴﻰ" ﺩﻩﭖ ﺑﺎﻫﺎ ﺑﯧﺮﯨﻠﮕﻪﻥ. ﻟﯧﻜﯩﻦ، ﭼﻪﺕ ﺋﻪﻟﻠﻪﺭﺩﻩ ﻳﺎﺷﺎﯞﺍﺗﻘﺎﻥ ﺑﯩﺮ ﻗﯩﺴﯩﻢ ﺳﺎﺑﯩﻖ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺟﯘﻣﻬﯘﺭﯨﻴﯩﺘﻰ ﻣﯩﻠﻠﯩﻲ ﺋﺎﺭﻣﯩﻴﯩﺴﯩﻨﯩﯔ ﺋﻮﻓﯩﺘﺴﯧﺮﻟﯩﺮﯨﻨﯩﯔ ﺑﺎﻫﺎﺳﻰ ﺑﺎﺷﻘﯩﭽﻪ ﺑﻮﻟﯘﭖ، ﺋﯘﻻﺭﻧﯩﯔ ﻗﺎﺭﯨﺸﯩﭽﻪ، ﺳﺎﯞﺩﺍﻧﻮﻑ ﮔﻪﺭﭼﻪ ﻣﯩﻠﻠﯩﻲ ﺋﺎﺭﻣﯩﻴﯩﻨﯩﯔ ﺋﻮﻓﯩﺘﺴﯧﺮﻯ ﺑﻮﻟﺴﯩﻤﯘ، ﻟﯧﻜﯩﻦ 1949-ﻳﯩﻠﺪﯨﻦ ﻛﯧﻴﯩﻦ ﺧﯩﺘﺎﻱ ﻫﯚﻛﯜﻣﯩﺘﻰ ﺋﯜﭼﯜﻥ ﺋﺎﻛﺘﯩﭗ ﺧﯩﺰﻣﻪﺕ ﻗﯩﻠﻐﺎﻧﻠﯩﻘﻰ، ﻣﯩﻠﻠﯩﻲ ﻣﯘﺳﺘﻪﻗﯩﻠﻠﯩﻖ، ﺋﻪﺭﻛﯩﻨﻠﯩﻚ ﺋﯩﺪﯨﻴﯩﻠﯩﺮﯨﮕﻪ ﻗﺎﺭﺷﻰ ﺧﯩﺘﺎﻱ ﻫﯚﻛﯜﻣﯩﺘﻰ ﺑﯩﻠﻪﻥ ﺑﯩﺮ ﺳﻪﭘﺘﻪ ﺗﯘﺭﯗﭖ ﻛﯜﺭﻩﺵ ﻗﯩﻠﻐﺎﻧﻠﯩﻘﻰ ﺋﯜﭼﯜﻥ ﺋﯜﺯﻟﯜﻛﺴﯩﺰ ﺩﻩﺭﯨﺠﯩﺴﻰ ﺋﯚﺳﯜﭖ، ﺋﯧﺘﯩﺒﺎﺭ ﺑﯧﺮﯨﺶ ﻫﻪﻡ ﺋﻪﺗﯩﯟﺍﺭﻻﭖ ﺋﯩﺸﻠﯩﺘﯩﻠﯩﺸﻜﻪ ﺋﯧﺮﯨﺸﻜﻪﻥ. ﺋﻪﻣﻤﺎ، ﺑﺎﺷﻘﺎ ﻳﯜﺯﻟﯩﮕﻪﻥ، ﺋﯚﺯ ﻳﻮﻟﯩﺪﯨﻦ ﯞﺍﺯ ﻛﻪﭼﻤﯩﮕﻪﻥ ﺋﻮﻓﯩﺘﺴﯧﺮﻻﺭ ﻫﻪﻡ ﺟﻪﯕﭽﯩﻠﻪﺭ، ﻣﻪﺳﯩﻠﻪﻥ، ﭘﻮﻟﻜﻮﯞﻧﯩﻚ ﺋﺎﺑﺪﯗﻏﻮﭘﯘﺭ ﺳﺎﺑﯩﺮ ﻫﺎﺟﻰ، ﺋﯩﻠﺪﯨﺮﯨﻢ، ﺭﺍﺧﻤﺎﻧﻮﻑ ﻗﺎﺗﺎﺭﻟﯩﻘﻼﺭ ﺑﻮﻟﺴﺎ ﺋﯧﺘﯩﭗ ﺗﺎﺷﻼﻧﻐﺎﻥ ﻫﻪﻡ ﺟﺎﺯﺍﻻﺭﻏﺎ ﻳﻮﻟﯘﻗﻘﺎﻥ.

ﺳﺎﯞﺩﺍﻧﻮﻓﻘﺎ 1955-ﻳﯩﻠﻰ ﻣﺎﯞﺯﯦﺪﯗﯓ ﺗﻪﺭﯨﭙﯩﺪﯨﻦ ﮔﯧﻨﯧﺮﺍﻝ ﻣﺎﻳﻮﺭﻟﯘﻕ ﺋﯘﻧﯟﺍﻧﻰ ﺑﯧﺮﯨﻠﮕﻪﻥ ﺑﻮﻟﯘﭖ، ﺷﯘ ﻗﺎﺗﺎﺭﺩﺍ ﻣﯩﻠﻠﯩﻲ ﺋﺎﺭﻣﯩﻴﻪ ﭘﻮﻟﻜﻮﯞﻧﯩﻜﻠﯩﺮﯨﺪﯨﻦ ﺯﯗﻧﯘﻥ ﺗﯧﻴﯩﭙﻮﻑ ، ﻣﯘﻫﻪﻣﻤﻪﺩ ﺋﯩﻤﯩﻦ ﺋﯩﻤﯩﻨﻮﻑ، ﻣﻪﺭﻏﯘﭖ ﺋﯩﺴﻬﺎﻗﻮﭖ ﻗﺎﺗﺎﺭﻟﯩﻘﻼﺭﻏﯩﻤﯘ ﮔﯧﻨﯧﺮﺍﻝ ﻣﺎﻳﻮﺭﻟﯘﻕ ﺋﯘﻧﯟﺍﻧﻰ ﺑﯧﺮﯨﻠﮕﻪﻥ ﺑﻮﻟﺴﯩﻤﯘ، ﻟﯧﻜﯩﻦ ﺑﯘ ﺋﯜﭺ ﻛﯩﺸﻰ ﻛﯚﭖ ﺗﻪﻧﻘﯩﺪ ﯞﻩ ﺟﺎﺯﺍﻻﺭﻏﺎ ﺩﯗﭺ ﻛﻪﻟﮕﻪﻥ ﺋﯩﻜﻪﻥ. ﺯﯗﻧﯘﻥ ﺗﯧﻴﯩﭙﻮﻑ ﺑﯩﻠﻪﻥ ﻣﻪﺭﻏﯘﭖ ﺋﯩﺴﻬﺎﻗﻮﻑ ﻗﺎﺯﺍﻗﯩﺴﺘﺎﻧﻐﺎ ﻛﯧﺘﯩﭗ، ﺋﯘﻳﻐﯘﺭ ﻣﯘﺳﺘﻪﻗﯩﻠﻠﯩﻖ ﻫﻪﺭﯨﻜﻪﺗﻠﯩﺮﻯ ﺑﯩﻠﻪﻥ ﺷﯘﻏﯘﻟﻠﯩﻨﯩﭗ ﯞﺍﭘﺎﺕ ﺑﻮﻟﻐﺎﻥ ﺑﻮﻟﺴﺎ، ﺋﯩﻤﯩﻨﻮﻑ 70-ﻳﯩﻠﻼﺭﺩﺍ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺧﻪﻟﻖ ﺋﯩﻨﻘﯩﻼﺑﻰ ﭘﺎﺭﺗﯩﻴﯩﺴﻰ ﺑﯩﻠﻪﻥ ﺑﺎﻏﻠﯩﻨﯩﭗ ﺟﺎﺯﺍﻻﻧﻐﺎﻥ ﻫﻪﻣﺪﻩ ﺳﯩﺮﻟﯩﻖ ﺗﯜﺭﺩﻩ ﻫﺎﻳﺎﺗﯩﺪﯨﻦ ﺋﺎﻳﺮﯨﻠﻐﺎﻥ ﺋﯩﻜﻪﻥ.

ﺳﺎﯞﺩﺍﻧﻮﻑ ﻣﯩﻠﻠﯩﻲ ﺋﺎﺭﻣﯩﻴﯩﻨﯩﯔ ﺋﯘﺭﯗﺵ ﻣﯘﺳﺎﭘﯩﻠﯩﺮﯨﻨﻰ ﺋﻪﻛﯩﺲ ﺋﻪﺗﺘﯜﺭﯨﺪﯨﻐﺎﻥ " ﻣﺎﻧﺎﺱ ﺩﻩﺭﻳﺎﺳﯩﺪﯨﻦ ﻗﺎﻳﺘﯩﺶ"، " ﺑﻪﺷﯩﻨﭽﻰ ﻛﻮﺭﭘﯘﺳﻨﯩﯔ ﻣﯘﺳﺎﭘﯩﻠﯩﺮﻯ" ﻗﺎﺗﺎﺭﻟﯩﻖ ﺋﻪﺳﻠﯩﻤﻪ ﺧﺎﺭﺍﻛﺘﯧﺮﻟﯩﻖ ﺋﻪﺳﻪﺭﻟﻪﺭﻧﻰ ﻳﯧﺰﯨﭗ ﻧﻪﺷﯩﺮ ﻗﯩﻠﺪﯗﺭﻏﺎﻥ ﺑﻮﻟﯘﭖ، ﺋﯘﻳﻐﯘﺭ ﺟﻪﻣﯩﻴﯩﺘﯩﺪﻩ ﺳﺎﯞﺩﺍﻧﻮﻑ ﻫﻪﻡ ﺋﯘﻧﯩﯔ ﺋﻪﺳﻪﺭﻟﯩﺮﻯ ﻫﻪﻗﻘﯩﺪﻩ ﻫﻪﺭ ﺧﯩﻞ ﺋﯩﻨﻜﺎﺳﻼﺭ ﺩﺍﯞﺍﻣﻼﺷﻤﺎﻗﺘﺎ.(ﺋﯜﻣﯩﺪﯞﺍﺭ)