ﺋﯘﻳﻐﯘﺭ ﺋﯧﻠﯩﺪﯨﻜﻰ ﺳﻪﻛﻜﯩﺰ ﺷﻪﻫﻪﺭﺩﻩ " ﺷﯩﻨﺠﺎﯓ ﺗﻮﻟﯘﻕ ﺋﻮﺗﺘﯘﺭﺍ ﺳﯩﻨﯩﭙﻠﯩﺮﻯ" ﺗﻪﺳﯩﺲ ﻗﯩﻠﯩﻨﺪﻯ

ﺧﯩﺘﺎﻱ ﺩﺍﺋﯩﺮﯨﻠﯩﺮﯨﻨﯩﯔ ﺋﯘﻳﻐﯘﺭ ﺋﯧﻠﯩﺪﯨﻜﻰ ﺋﯘﻳﻐﯘﺭ ﻗﺎﺗﺎﺭﻟﯩﻖ ﺧﯩﺘﺎﻱ ﺋﻪﻣﻪﺱ ﻣﯩﻠﻠﻪﺗﻠﻪﺭﮔﻪ ﻗﺎﺭﺍﺗﻘﺎﻥ ﻗﻮﺵ ﺗﯩﻠﻠﯩﻖ ﻣﺎﺋﺎﺭﯨﭗ ﺋﯩﺴﺘﺮﺍﺗﯧﮕﯩﻴﯩﺴﯩﻨﯩﯔ ﺑﯩﺮ ﻗﯩﺴﻤﻰ ﻫﯧﺴﺎﺑﻠﯩﻨﯩﺪﯨﻐﺎﻥ ﺧﯩﺘﺎﻱ ﺋﻪﻣﻪﺱ ﻣﯩﻠﻠﻪﺕ ﺑﺎﻟﯩﻠﯩﺮﯨﻨﻰ ﺋﯩﭽﻜﯩﺮﯨﺪﯨﻜﻰ ﺗﻮﻟﯘﻕ ﺋﻮﺗﺘﯘﺭﺍ ﺳﯩﻨﯩﭙﻠﯩﺮﯨﻐﺎ ﺋﯧﻠﯩﭗ ﺑﯧﺮﯨﭗ ﺗﻪﺭﺑﯩﻴﯩﻠﻪﺵ ﺳﯩﻴﺎﺳﯩﺘﯩﮕﻪ ﻳﯧﯖﻰ ﻣﻪﺯﻣﯘﻧﻼﺭ ﻗﯧﺘﯩﻠﺪﻯ.

ﺧﯩﺘﺎﻱ ﺋﺎﺧﺒﺎﺭﺍﺕ ﯞﺍﺳﯩﺘﯩﻠﯩﺮﯨﻨﯩﯔ ﺋﺎﺷﻜﺎﺭﯨﻠﯩﺸﯩﭽﻪ، ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻠﯘﻕ ﻣﺎﺋﺎﺭﯨﭗ ﻧﺎﺯﺍﺭﯨﺘﻰ ﺗﯘﻧﺠﻰ ﻗﯧﺘﯩﻢ ﺋﯘﻳﻐﯘﺭ ﺋﯧﻠﯩﺪﯨﻜﻰ ﺋﯜﺭﯛﻣﭽﻰ، ﺳﺎﻧﺠﻰ، ﺷﯩﺨﻪﻧﺰﻩ، ﻗﺎﺭﺍﻣﺎﻱ، ﺋﺎﻗﺴﯘ، ﻛﻮﺭﻻ، ﻗﯘﻣﯘﻝ ﻗﺎﺗﺎﺭﻟﯩﻖ ﺳﻪﻛﻜﯩﺰ ﺷﻪﻫﻪﺭﺩﯨﻜﻰ ﺑﯩﺮ ﻗﯩﺴﯩﻢ ﺋﻮﺗﺘﯘﺭﺍ ﻣﻪﻛﺘﻪﭘﻠﻪﺭﺩﻩ ﻳﯩﺮﺍﻕ ﭼﻪﺕ ﺟﺎﻳﻼﺭﺩﯨﻜﻰ ﺋﻮﻗﯘﻏﯘﭼﯩﻼﺭﻧﻰ ﻗﻮﺑﯘﻝ ﻗﯩﻠﯩﭗ، ﻣﻪﺧﺴﯘﺱ ﺗﻪﺭﺑﯩﻴﯩﻠﻪﻳﺪﯨﻐﺎﻥ ﺋﺎﭘﺘﻮﻧﻮﻡ ﺭﺍﻳﻮﻧﻨﯩﯔ ﺋﯩﭽﯩﺪﯨﻜﻰ ﺗﻮﻟﯘﻕ ﺋﻮﺗﺘﯘﺭﺍ ﺳﯩﻨﯩﭙﻠﯩﺮﻯ ﺗﻪﺳﯩﺲ ﻗﯩﻠﯩﭗ، 9-ﺋﺎﻳﺪﯨﻦ ﺋﯧﺘﯩﺒﺎﺭﻩﻥ ﺋﻮﻗﯘﺵ ﺑﺎﺷﻼﺷﻨﻰ ﻗﺎﺭﺍﺭ ﻗﯩﻠﻐﺎﻥ.

ﺧﻪﯞﻩﺭﻟﻪﺭﺩﯨﻦ ﻗﺎﺭﯨﻐﺎﻧﺪﺍ، ﺋﺎﭘﺘﻮﻧﻮﻡ ﺭﺍﻳﻮﻥ ﺩﺍﺋﯩﺮﯨﻠﯩﺮﻯ 2004-ﻳﯩﻠﯩﺪﯨﻦ ﺋﯧﺘﯩﺒﺎﺭﻩﻥ ﺋﯘﻳﻐﯘﺭ ﺋﯧﻠﯩﺪﻩ ﺗﻮﻟﯘﻗﺴﯩﺰ ﺋﻮﺗﺘﯘﺭﺍ ﺳﯩﻨﯩﭙﻠﯩﺮﻯ ﺗﻪﺳﯩﺲ ﻗﯩﻠﯩﭗ، ﺑﯘ ﻳﻪﺭﻧﻰ ﭘﯜﺗﺘﯜﺭﮔﻪﻧﻠﻪﺭﻧﻰ ﺋﯩﭽﻜﯩﺮﯨﺪﯨﻜﻰ ﺷﯩﻨﺠﺎﯓ ﺗﻮﻟﯘﻕ ﺋﻮﺗﺘﯘﺭﺍ ﺳﯩﻨﯩﭙﻠﯩﺮﯨﻐﺎ ﺋﻪﯞﻩﺗﯩﺸﻨﻰ ﺑﯧﻜﯩﺘﻜﻪﻥ ﺋﯩﺪﻯ. ﺑﯘ ﻳﯩﻞ ﻣﻪﺯﻛﯘﺭ ﺗﻮﻟﯘﻗﺴﯩﺰ ﺋﻮﺗﺘﯘﺭﺍ ﺳﯩﻨﯩﭙﻠﯩﺮﯨﻨﻰ ﭘﯜﺗﺘﯜﺭﮔﻪﻥ ﺋﻮﻗﯘﻏﯘﭼﯩﻼﺭﻧﯩﯔ %85 ﺋﯩﭽﻜﯩﺮﯨﺪﯨﻜﻰ ﺷﯩﻨﺠﺎﯓ ﺗﻮﻟﯘﻕ ﺋﻮﺗﺘﯘﺭﺍ ﺳﯩﻨﯩﭙﻠﯩﺮﯨﻐﺎ ﺋﻪﯞﻩﺗﯩﻠﯩﭗ، ﺋﯘﻻﺭﻧﯩﯔ ﺋﯩﭽﯩﺪﯨﻜﻰ 160 ﻧﻪﭼﭽﻪ ﻛﯩﺸﻰ ﻳﯧﯖﯩﺪﯨﻦ ﻗﯘﺭﯗﻟﻐﺎﻥ ﺋﺎﭘﺘﻮﻧﻮﻡ ﺭﺍﻳﻮﻧﻨﯩﯔ ﺋﯩﭽﯩﺪﯨﻜﻰ ﺑﯘ ﺗﻮﻟﯘﻕ ﺋﻮﺗﺘﯘﺭﺍ ﺳﯩﻨﯩﭙﻠﯩﺮﯨﻐﺎ ﻗﻮﺑﯘﻝ ﻗﯩﻠﯩﻨﻐﺎﻥ. ﺑﯘ ﺋﻮﻗﯘﻏﯘﭼﯩﻼﺭ ﺗﯜﺭﻟﯜﻙ ﺋﻮﻗﯘﺵ ﻳﺎﺭﺩﻩﻡ ﯞﻩ ﭘﺎﺭﺍﯞﺍﻧﻠﯩﻘﻼﺭﺩﯨﻦ ﺑﻪﻫﺮﯨﻤﻪﻥ ﺑﻮﻟﯩﺪﯨﻜﻪﻥ.

ﺋﯩﻨﻜﺎﺳﻼﺭﺩﯨﻦ ﻗﺎﺭﯨﻐﺎﻧﺪﺍ، ﺑﺎﻟﯩﻠﯩﺮﯨﻨﯩﯔ ﻛﻪﻟﮕﯜﺳﯩﻨﯩﯔ ﻳﺎﺧﺸﻰ ﺑﻮﻟﻤﺎﻱ ﻗﯧﻠﯩﺸﯩﺪﯨﻦ ﺋﻪﻧﺴﯩﺮﯨﮕﻪﻥ ﻧﯘﺭﻏﯘﻧﻠﯩﻐﺎﻥ ﺋﯘﻳﻐﯘﺭ ﺋﺎﺗﺎ-ﺋﺎﻧﯩﻼﺭﻧﯩﯔ ﭘﻪﺭﺯﻩﻧﺘﻠﯩﺮﯨﻨﻰ ﺋﯩﭽﻜﯩﺮﯨﺪﯨﻜﻰ ﺷﯩﻨﺠﺎﯓ ﺗﻮﻟﯘﻕ ﺋﻮﺗﺘﯘﺭﺍ ﺳﯩﻨﯩﭙﻠﯩﺮﯨﻐﺎ ﺑﯧﺮﯨﺸﻘﺎ ﺋﯩﻨﺘﯩﻠﯩﺶ ﯞﻩﺯﯨﻴﯩﺘﻰ ﺷﻪﻛﯩﻠﻠﻪﻧﮕﻪﻥ، ﺋﯘﻳﻐﯘﺭ ﺗﯩﻠﯩﻨﯩﯔ ﺟﻪﻣﺌﯩﻴﻪﺗﺘﯩﻦ ﺳﯩﻘﯩﭗ ﭼﯩﻘﯩﺮﯨﻠﯩﭗ، ﺧﯩﺘﺎﻱ ﺗﯩﻠﯩﻨﯩﯔ ﺋﯜﺳﺘﯜﻧﻠﯜﻛﻨﻰ ﺋﯩﮕﯩﻠﯩﺸﻰ ﺳﻪﯞﻩﺑﯩﺪﯨﻦ ﺋﯘﻳﻐﯘﺭﻻﺭ ﭘﻪﺭﺯﻩﻧﺘﻠﯩﺮﯨﻨﯩﯔ ﺋﯩﺴﺘﯩﻘﺒﺎﻟﯩﺪﯨﻦ ﺋﻪﻧﺪﯨﺸﻪ ﻗﯩﻠﯩﭗ، ﺋﯘﻻﺭﻧﻰ ﺧﯩﺘﺎﻳﭽﻪ ﻣﻪﻛﺘﻪﭘﻠﻪﺭﺩﻩ ﺋﻮﻗﯘﺗﯘﺷﻘﺎ ﻳﯜﺯﻟﻪﻧﮕﻪﻥ.

ﭼﻪﺕ ﺋﻪﻟﻠﻪﺭﺩﯨﻜﻰ ﺋﯘﻳﻐﯘﺭ ﻣﺎﺋﺎﺭﯨﭙﺸﯘﻧﺎﺳﻠﯩﺮﯨﻨﯩﯔ ﺋﯧﻴﺘﯩﺸﯩﭽﻪ، ﺑﯘ ﺋﻪﻫﯟﺍﻟﻼﺭ ﺋﯘﻳﻐﯘﺭ ﻣﻪﺩﻩﻧﯩﻴﯩﺘﯩﻨﯩﯔ ﻛﻪﻟﮕﯜﺳﻰ ﺋﯜﭼﯜﻥ ﭘﺎﻳﺪﯨﺴﯩﺰ ﺋﺎﻣﯩﻠﻼﺭ ﺑﻮﻟﯘﭖ، ﺗﯩﻞ ﯞﻩ ﻣﯩﻠﻠﯩﻲ ﻣﻪﺩﻩﻧﯩﻴﻪﺕ ﺭﻭﻫﻰ ﺋﺎﺟﯩﺰﻟﯩﻐﺎﻥ ﻣﯩﻠﻠﻪﺗﻨﯩﯔ ﺋﯩﺴﺘﯩﻘﺒﺎﻟﻰ ﻣﻪﯞﻫﯘﻡ ﺑﻮﻟﯩﺪﯨﻜﻪﻥ.(ﺋﯜﻣﯩﺪﯞﺍﺭ)