ﺧﯩﺘﺎﻱ، ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﺪﯨﻜﻰ ﺋﻮﻗﯘﺵ ﻳﯧﺸﯩﻐﺎ ﺗﻮﺷﻤﯩﻐﺎﻥ ﺋﯚﺳﻤﯜﺭﻟﻪﺭﮔﻪ ﺧﯩﺘﺎﻳﭽﻪ ﺋﯚﮔﯩﺘﯩﺶ ﺋﯜﭼﯜﻥ ﻣﻪﺑﻠﻪﻍ ﺋﺎﺟﺮﺍﺗﺘﻰ

ﺧﯩﺘﺎﻱ ﻫﯚﻛﯜﻣﯩﺘﻰ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﺪﺍ ﺋﻮﻗﯘﺵ ﻳﯧﺸﯩﻐﺎ ﺗﻮﺷﻤﯩﻐﺎﻥ ﺋﯚﺳﻤﯜﺭﻟﻪﺭﮔﻪ ﺧﯩﺘﺎﻳﭽﻪ ﺋﯚﮔﯩﺘﯩﺶ ﺋﯜﭼﯜﻥ ﻛﯚﭘﻠﻪﭖ ﻣﻪﺑﻠﻪﻍ ﺋﺎﺟﺮﺍﺗﻤﺎﻗﺘﺎ.

ﺧﯩﺘﺎﻳﻨﯩﯔ 'ﺗﻪﯕﺮﯨﺘﺎﻍ ﺗﻮﺭ ﺑﯧﺘﻰ'ﺩﻩ ﺑﺎﻳﺎﻥ ﻗﯩﻠﯩﻨﯩﺸﯩﭽﻪ، ﺋﺎﭘﺘﻮﻧﻮﻡ ﺭﺍﻳﻮﻧﻠﯘﻕ ﻣﺎﻟﯩﻴﻪ ﻧﺎﺯﺍﺭﯨﺘﻰ ﺧﻮﺗﻪﻥ، ﻗﻪﺷﻘﻪﺭ ﻗﺎﺗﺎﺭﻟﯩﻖ ﻳﻪﺗﺘﻪ ﯞﯨﻼﻳﻪﺕ ﯞﻩ ﺋﻮﺑﻼﺳﺖ ﺩﺍﺋﯩﺮﯨﺴﯩﺪﯨﻜﻰ ﻳﯧﺰﺍ-ﻗﯩﺸﻼﻗﻼﺭﺩﺍ ﺋﻮﻗﯘﺵ ﻳﯧﺸﯩﻐﺎ ﺗﻮﺷﻤﯩﻐﺎﻥ 122 ﻣﯩﯔ 939 ﻧﻪﭘﻪﺭ ﺋﯚﺳﻤﯜﺭﻟﻪﺭﻧﻰ ﺧﯩﺘﺎﻳﭽﻪ ﺋﻮﻗﯘﺗﯘﺷﻨﻰ ﭘﯩﻼﻧﻼﭖ، 'ﻗﻮﺵ ﺗﯩﻠﻠﯩﻖ ﻣﺎﺋﺎﺭﯨﭗ' ﺩﯦﮕﻪﻥ ﻧﺎﻡ ﺋﺎﺳﺘﯩﺪﺍ 70 ﻣﯩﻠﻴﻮﻥ 390 ﻣﯩﯔ ﻳﯘﻩﻥ ﻣﻪﺑﻠﻪﻍ ﺋﺎﺟﺮﺍﺗﻘﺎﻥ. ﻣﯘﺷﯘ ﭘﯩﻼﻧﻐﺎ ﻛﯩﺮﮔﯜﺯﯛﻟﮕﻪﻥ ﺋﯚﺳﻤﯜﺭﻟﻪﺭ ﺋﯜﭼﯜﻥ ﻛﯜﻧﯩﮕﻪ ﺑﯩﺮ ﻳﯧﺮﯨﻢ ﻳﯘﻩﻧﺪﯨﻦ ﺗﯘﺭﻣﯘﺵ ﻳﺎﺭﺩﻩﻡ ﭘﯘﻟﻰ ﻗﻮﺷﯘﭖ ﺑﯧﺮﯨﺸﻨﻰ ﺑﻪﻟﮕﯩﻠﯩﮕﻪﻥ.

ﺋﯘﻳﻐﯘﺭﻻﺭ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﺪﺍ 'ﻗﻮﺵ ﺗﯩﻠﻠﯩﻖ ﻣﺎﺋﺎﺭﯨﭗ'ﻧﻰ ﻳﻮﻟﻐﺎ ﻗﻮﻳﻐﺎﻧﻠﯩﻘﯩﻨﻰ، ﺋﯘﻳﻐﯘﺭ ﺗﯩﻠﯩﻨﻰ ﻳﻮﻕ ﻗﯩﻠﯩﭗ، ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﻨﻰ ﺧﯩﺘﺎﻳﻼﺷﺘﯘﺭﯗﺷﻨﻰ ﻣﻪﻗﺴﻪﺕ ﻗﯩﻠﯩﺪﯗ، ﺩﻩﭖ ﻗﺎﺭﺍﻳﺪﯗ ﯞﻩ ﺑﯘﻧﯩﯔ ﺋﻪﻣﻪﻟﯩﻲ ﭘﺎﻛﯩﺘﻠﯩﺮﯨﻨﻰ ﺩﯗﻧﻴﺎﻏﺎ ﺗﻮﻧﯘﺷﺘﯘﺭﻣﺎﻗﺘﺎ.

ﺋﺎﻣﯧﺮﯨﻜﺎ ﺩﯙﻟﻪﺕ ﻣﻪﺟﻠﯩﺴﯩﻨﯩﯔ ﺧﯩﺘﺎﻱ ﺋﯩﺸﻠﯩﺮﻯ ﺋﯩﺠﺮﺍﺋﯩﻴﻪ ﻛﻮﻣﯩﺘﯧﺘﻰ ﻳﯧﻘﯩﻨﺪﺍ ﺋﯧﻼﻥ ﻗﯩﻠﻐﺎﻥ 2007 ‏- ﻳﯩﻠﻠﯩﻖ ﺩﻭﻛﻼﺗﯩﻤﯘ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭﻻﺭﻧﯩﯔ ﻣﯩﻠﻠﯩﻲ ﻛﯩﻤﻠﯩﻜﯩﮕﻪ ﻗﺎﺭﯨﺘﺎ ﻳﯜﺭﮔﯜﺯﮔﻪﻥ 'ﻗﺎﺗﺘﯩﻖ ﺯﻩﺭﺑﻪ ﺑﯧﺮﯨﺶ' ﺳﯩﻴﺎﺳﯩﺘﻰ ﯞﻩ ﺋﯘﻳﻐﯘﺭ ﺗﯩﻠﯩﻨﯩﯔ ﺩﺍﺋﯩﺮﯨﺴﯩﻨﻰ ﭼﻪﻛﻠﻪﺵ ﺋﻪﻣﻪﻟﯩﻴﯩﺘﻰ ﺑﯩﯟﺍﺳﺘﻪ ﺗﻪﻧﻘﯩﺪ ﻗﯩﻠﯩﻨﺪﻯ.

ﻫﺎﺯﯨﺮ ﺋﯘﻳﻐﯘﺭﻻﺭﻧﯩﯔ ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﯩﻨﯩﯔ 'ﺧﯩﺘﺎﻳﻼﺷﺘﯘﺭﯗﺵ' ﺳﯩﻴﺎﺳﯩﺘﯩﮕﻪ ﻗﺎﺭﺷﻰ ﻫﯧﺴﺴﯩﻴﺎﺗﯩﻨﻰ ﭼﯜﺷﯩﻨﯩﯟﺍﺗﻘﺎﻥ ﯞﻩ ﺋﯘﻳﻐﯘﺭﻻﺭﻏﺎ ﻫﯧﺴﺪﺍﺷﻠﯩﻖ ﻗﯩﻠﯩﺪﯨﻐﺎﻥ ﺩﯙﻟﻪﺗﻠﻪﺭﻧﯩﯔ ﺳﺎﻧﻰ ﺑﺎﺭﻏﺎﻧﺴﯧﺮﻯ ﻛﯚﭘﻪﻳﻤﻪﻛﺘﻪ. (ﯞﻩﻟﻰ)