ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﺋﺎﯞﺳﺘﺮﺍﻟﯩﻴﯩﺪﻩ ﺯﯨﻴﺎﺭﻩﺕ ﭘﺎﺋﺎﻟﯩﻴﻪﺗﻠﯩﺮﯨﻨﻰ ﺩﺍﯞﺍﻣﻼﺷﺘﯘﺭﻣﺎﻗﺘﺎ

ﺋﺎﯞﺳﺘﺮﺍﻟﯩﻴﯩﺪﯨﻜﻰ ﻛﯩﺸﯩﻠﯩﻚ ﻫﻮﻗﯘﻕ ﺟﻪﻣﺌﯩﻴﻪﺗﻠﯩﺮﻯ ﻫﻪﻣﺪﻩ ﺋﯘﻳﻐﯘﺭ ﺟﺎﻣﺎﺋﯩﺘﯩﻨﯩﯔ ﺗﻪﻛﻠﯩﭙﻰ ﺑﯩﻠﻪﻥ ﺋﺎﯞﺳﺘﺮﺍﻟﯩﻴﯩﮕﻪ ﺯﯨﻴﺎﺭﻩﺗﻜﻪ ﻣﺎﯕﻐﺎﻥ ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﻰ ﺭﻩﻫﺒﯩﺮﻯ، ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻨﯩﯔ ﺭﻩﺋﯩﺴﻰ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﯞﻩ ﺋﯘﻧﯩﯔ ﻫﻪﻣﺮﺍﻫﻠﯩﺮﻯ، 19 - ﻓﯧﯟﺭﺍﻝ ﻛﯜﻧﻰ ﺷﯘ ﻳﻪﺭ ﯞﺍﻗﺘﻰ ﭼﯜﺷﺘﯩﻦ ﺑﯘﺭﯗﻥ ﺳﺎﺋﻪﺕ 10:50 ﻣﯩﻨﯘﺕ ﺋﯚﺗﻜﻪﻧﺪﻩ ﺋﺎﯞﺳﺘﺮﺍﻟﯩﻴﯩﻨﯩﯔ sydney ﺷﻪﻫﯩﺮﯨﮕﻪ ﻳﯧﺘﯩﭗ، ﺋﺎﯞﺳﺘﺮﺍﻟﯩﻴﯩﺪﯨﻜﻰ ﺋﯘﻳﻐﯘﺭ ﯞﻩﺗﻪﻧﺪﺍﺷﻼﺭﻧﯩﯔ ﻗﯩﺰﻏﯩﻦ ﻫﻪﻡ ﻫﺎﻳﺎﺟﺎﻧﻠﯩﻖ ﻛﯜﺗﯜﯞﯦﻠﯩﺸﯩﻐﺎ ﺋﯧﺮﯨﺸﺘﻰ.

ﺑﯘ ﺭﺍﺑﯩﻴﻪ ﺧﺎﻧﯩﻤﻨﯩﯔ ﺧﯩﺘﺎﻱ ﺗﯜﺭﻣﯩﺴﯩﺪﯨﻦ ﺋﺎﺯﺍﺕ ﻗﯩﻠﯩﻨﻐﺎﻧﺪﯨﻦ ﻛﯧﻴﯩﻨﻜﻰ ﺋﺎﯞﺳﺘﺮﺍﻟﯩﻴﯩﮕﻪ ﻗﺎﺭﺍﺗﻘﺎﻥ ﺗﯘﻧﺠﻰ ﺯﯨﻴﺎﺭﯨﺘﻰ ﺑﻮﻟﯘﭖ ﻫﯧﺴﺎﺑﻠﯩﻨﯩﺪﯗ.

ﺳﯧﺪﻧﯩﻴﺪﯨﻜﻰ ﺋﯘﻳﻐﯘﺭ ﺟﺎﻣﺎﺋﯩﺘﻰ 19 - ﻓﯧﯟﺭﺍﻝ ﺭﺍﺑﯩﻴﻪ ﺧﺎﻧﯩﻢ ﯞﻩ ﺋﯘﻧﯩﯔ ﻫﻪﻣﺮﺍﻫﻠﯩﺮﯨﻨﻰ ﻛﯜﺗﯜﯞﯦﻠﯩﺶ ﺋﯜﭼﯜﻥ، ﻣﻪﺧﺴﯘﺱ ﺯﯨﻴﺎﭘﻪﺕ ﺋﻮﻳﯘﺷﺘﯘﺭﻏﺎﻥ ﺑﻮﻟﯘﭖ، ﺯﯨﻴﺎﭘﻪﺗﻜﻪ 50 ﺗﯩﻦ ﺋﺎﺭﺗﯘﻕ ﻛﯩﺸﻰ ﻗﺎﺗﻨﺎﺷﻘﺎﻥ. ﺯﯨﻴﺎﭘﻪﺕ ﺟﻪﺭﻳﺎﻧﯩﺪﺍ ﺭﺍﺑﯩﻴﻪ ﺧﺎﻧﯩﻢ ﻣﻪﺧﺴﯘﺱ ﺳﯚﺯﮔﻪ ﭼﯩﻘﻘﺎﻥ ﯞﻩ ﺑﺎﺷﻘﺎ ﯞﻩﻛﯩﻠﻠﻪﺭ ﺗﻪﯓ، ﺑﯩﺮ ﻗﯩﺴﯩﻢ ﻳﻪﺭﻟﯩﻚ ﺋﺎﺧﺒﺎﺭﺍﺕ ﺋﻮﺭﯗﻧﻠﯩﺮﯨﻨﯩﯔ ﺯﯨﻴﺎﺭﻩﺗﻠﯩﺮﯨﻨﻰ ﻗﻮﺑﯘﻝ ﻗﯩﻠﻐﺎﻥ.

ﺑﯘ ﻗﯧﺘﯩﻢ ﺋﯘ ﺋﺎﯞﺳﺘﺮﺍﻟﯩﻴﻪ ﭘﺎﻳﺘﻪﺧﺘﻰ ﻛﺎﻣﺒﯧﺮﺍ ﯞﻩ ﺋﺎﯞﺳﺘﺮﺍﻟﯩﻴﻪ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺟﻪﻣﺌﯩﻴﯩﺘﯩﻨﯩﯔ ﺑﺎﺵ ﺷﯩﺘﺎﺑﻰ ﺟﺎﻳﻼﺷﻘﺎﻥ ﺋﺎﺩﯦﻠﯧﻴﺪ ﻗﺎﺗﺎﺭﻟﯩﻖ ﺟﺎﻳﻼﺭﺩﺍ ﺯﯨﻴﺎﺭﻩﺗﺘﻪ ﺑﻮﻟﯘﭖ ﺋﺎﯞﺳﺘﺮﺍﻟﯩﻴﻪ ﭘﺎﺭﻻﻣﯧﻨﺖ ﺋﻪﺯﺍﻟﯩﺮﻯ ﻫﻪﻣﺪﻩ ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺕ ﺭﻩﻫﺒﻪﺭﻟﯩﺮﻯ ﺑﯩﻠﻪﻥ ﺋﯘﭼﺮﯨﺸﯩﺪﯗ. (ﮔﯜﻟﭽﯧﻬﺮﻩ)