ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﺧﯩﺘﺎﻱ ﻫﯚﻛﯜﻣﯩﺘﯩﻨﻰ، ﺭﺍﺑﯩﻴﻪ ﻗﺎﺩﯨﺮﻧﯩﯔ ﺋﻮﻏﯘﻟﻠﯩﺮﯨﻐﺎ ﺋﯚﺯﻟﯩﺮﯨﻨﻰ ﺋﺎﻗﻼﺵ ﭘﯘﺭﺳﯩﺘﻰ ﺑﯧﺮﯨﺸﻜﻪ ﭼﺎﻗﯩﺮﺩﻯ

ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﭘﻪﻳﺸﻪﻧﺒﻪ ﻛﯜﻧﻰ ﺑﯩﺮ ﺑﺎﻳﺎﻧﺎﺕ ﺋﯧﻼﻥ ﻗﯩﻠﯩﭗ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﯞﻩ ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻨﯩﯔ ﺭﻩﺋﯩﺴﻰ ﺭﺍﺑﯩﻴﻪ ﻗﺎﺩﯨﺮﻧﯩﯔ ﺋﻮﻏﻠﻰ ﺋﺎﺑﻠﯩﻜﯩﻢ ﺋﺎﺑﺪﯗﺭﯨﻬﯩﻤﻨﻰ 9‏ ﻳﯩﻠﻠﯩﻖ ﻗﺎﻣﺎﻕ ﺟﺎﺯﺍﺳﯩﻐﺎ ﻫﯚﻛﯜﻡ ﻗﯩﻠﻐﺎﻧﻠﯩﻘﯩﻨﻰ ﻗﺎﺗﺘﯩﻖ ﺗﻪﻧﻘﯩﺪ ﻗﯩﻠﯩﭗ ، ﺧﯩﺘﺎﻱ ﺭﻩﻫﺒﻪﺭﻟﯩﺮﯨﻨﻰ ﺋﺎﺑﻠﯩﻜﯩﻢ ﺋﺎﺑﺪﯗﺭﯨﻬﯩﻤﮕﻪ ﺷﯘﻧﺪﺍﻗﻼ ﺋﺎﻟﯩﻢ ﺋﺎﺑﺪﯗﺭﯨﻬﯩﻢ ﯞﻩ ﻗﺎﻫﺎﺭ ﺋﺎﺑﺪﯗﺭﯨﻬﯩﻤﮕﻪ ﺋﯚﺯﯨﻨﻰ ﺋﺎﻗﻼﺵ ﭘﯘﺭﺳﯩﺘﻰ ﺑﯧﺮﯨﺸﻜﻪ ﭼﺎﻗﯩﺮﺩﻯ.

ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﯩﻨﯩﯔ ﺑﺎﻳﺎﻧﺎﺗﯩﺪﺍ " ﺧﯩﺘﺎﻱ ﻫﯚﻛﯜﻣﯩﺘﻰ ﺋﺎﺑﻠﯩﻜﯩﻢ ﺋﺎﺑﺪﯗﺭﯨﻬﯩﻤﻨﻰ ﻳﺎﺧﻮ ﺗﻮﺭ ﺷﯩﺮﻛﯩﺘﯩﻨﯩﯔ ﺋﯘﻳﻐﯘﺭﭼﻪ ﺗﻮﺭ ﺑﺎﺷﻘﯘﺭﻏﯘﭼﯩﺴﯩﻐﺎ "ﻣﯘﺳﺘﻪﻗﯩﻠﻠﯩﻖ ﺋﯜﭼﯜﻥ ﻛﯜﺭﻩﺵ" ﯞﻩ " ﺑﯧﻠﯩﺸﻜﻪ ﺗﯧﮕﯩﺸﻠﯩﻚ ﻣﻪﺳﯩﻠﯩﻠﻪﺭ ﯞﻩ ﭼﻪﻛﻠﻪﻧﮕﻪﻥ ﺟﺎﻫﺎﺕ" ﻧﺎﻣﻠﯩﻖ ﺋﯩﻜﻜﻰ ﻣﺎﻗﺎﻟﻪ ﺋﻪﯞﻩﺗﯩﭗ ﺋﯘﻧﯩﯖﺪﯨﻦ ﺑﯘ ﻣﺎﻗﺎﻟﯩﻠﻪﺭﻧﻰ ﺗﯘﺭﺩﺍ ﺋﯧﻼﻥ ﻗﯩﻠﯩﺸﯩﻨﻰ ﺗﻪﻟﻪﭖ ﻗﯩﻠﻐﺎﻥ ﺩﻩﭖ ﺋﻪﻳﯩﺒﻠﯩﮕﻪﻥ. ﻟﯧﻜﯩﻦ ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﻳﺎﺧﻮ ﺗﻮﺭ ﺷﯩﺮﻛﯩﺘﯩﻨﯩﯔ ﺋﯘﻳﻐﯘﺭ ﺗﻮﺭﻯ ﻳﻮﻗﻠﯘﻗﯩﻨﻰ ﺋﯧﻨﯩﻘﻠﯩﺪﻯ" ﺩﻩﭖ ﻛﯚﺭﺳﯩﺘﯩﻠﮕﻪﻥ.

ﺑﺎﻳﺎﻧﺎﺗﺘﺎ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﯞﻩ ﺋﺎﺋﯩﻠﯩﺴﯩﮕﻪ ﻗﺎﺭﺍﺗﻘﺎﻥ ﺑﯧﺴﯩﻤﯩﻨﻰ ﺗﯘﻧﺠﻰ ﻗﯧﺘﯩﻢ 1999‏- ﻳﯩﻠﻰ ﺭﺍﺑﯩﻴﻪ ﻗﺎﺩﯨﺮﻧﻰ ﻗﻮﻟﻐﺎ ﺋﯧﻠﯩﺶ ﺑﯩﻠﻪﻥ ﺑﺎﺷﻠﯩﻐﺎﻧﻠﯩﻘﯩﻨﻰ ﯞﻩ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﻨﯩﯔ 2005‏- ﻳﯩﻠﻰ 17‏- ﻣﺎﺭﺕ ﻛﯜﻧﻰ ﺗﯜﺭﻣﯩﺪﯨﻦ ﻗﻮﻳﯘﺏ ﺑﯧﺮﯨﻠﯩﺸﻰ ﺑﯩﻠﻪﻥ ﺑﯘ ﺑﯧﺴﯩﻤﯩﻨﻰ ﺗﯧﺨﯩﻤﯘ ﻛﯜﭼﻪﻳﺘﻜﻪﻧﻠﯩﻜﯩﻨﻰ ﺗﻪﻛﯩﺘﻠﻪﻧﮕﻪﻥ.

ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﺑﺎﻳﺎﻧﺎﺗﯩﺪﺍ، ﺩﯗﻧﻴﺎ ﺟﺎﻣﺎﺋﻪﺗﭽﯩﻠﯩﻜﯩﻨﻰ ﺧﯩﺘﺎﻱ ﺑﺎﺵ ﻣﯩﻨﺴﺘﯩﺮﻯ ﯞﯦﻦ ﺟﻴﺎﺑﺎﯞ ﯞﻩ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻰ ﺭﻩﻫﺒﻪﺭﻟﯩﺮﯨﺪﯨﻦ ﺋﺎﺑﻠﯩﻜﯩﻢ ﺋﺎﺑﺪﯗﺭﯨﻬﯩﻢ ﺷﯘﻧﺪﺍﻗﻼ ﺋﺎﻟﯩﻢ ﯞﻩ ﻗﺎﻫﺎﺭ ﺋﺎﺑﺪﯗﺭﯨﻬﯩﻤﮕﻪ ﺋﯚﺯﯨﻨﻰ ﺋﺎﻗﻼﺵ ﺋﯜﭼﯜﻥ ﭘﯘﺭﺳﻪﺕ ﺑﯧﺮﯨﻠﯩﺸﯩﻨﻰ ﺗﻪﻟﻪﭖ ﻗﯩﻠﯩﺸﻘﺎ ﭼﺎﻗﯩﺮﻏﺎﻥ. (ﺋﻮﻣﻪﺭ ﻗﺎﻧﺎﺕ)