ﺧﯩﺘﺎﻱ ﺩﺍﺋﯩﺮﯨﻠﯩﺮﻯ ﺋﯘﻳﻐﯘﺭ ﺋﯧﻠﯩﺪﯨﻦ 41 ﺗﻮﻧﻨﺎ ﭘﺎﺭﺗﻼﺗﻘﯘﭺ ﺑﯘﻳﯘﻣﻰ ﻗﻮﻟﻐﺎ ﭼﯜﺷﯜﺭﮔﻪﻧﻠﯩﻜﯩﻨﻰ ﺑﯩﻠﺪﯛﺭﻣﻪﻛﺘﻪ

ﺧﻮﯕﻜﻮﯕﺪﺍ ﭼﯩﻘﯩﺪﯨﻐﺎﻥ "ﺩﺍﮔﻮﯓ ﺑﺎﯞ" ﮔﯧﺰﯨﺘﻰ، ﺋﺎﭘﺘﻮﻧﯘﻡ ﺭﺍﻳﻮﻧﻠﯘﻕ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻚ ﻣﯩﻨﯩﺴﺘﯩﺮﻟﯩﻘﻰ ﺧﺎﺩﯨﻤﯩﻨﯩﯔ ﺳﯚﺯﯨﻨﻰ ﻧﻪﻗﯩﻞ ﻛﻪﻟﺘﯜﺭﯛﭖ، ﺗﯧﺮﺭﻭﺭﭼﯩﻼﺭﻧﯩﯔ ﻫﻪﺭ ﺧﯩﻞ ﭘﺎﺭﺗﻼﺗﻘﯘﭺ ﺑﯘﻳﯘﻣﻠﯩﺮﻯ ﺗﻮﭘﻼﭖ، ﺗﻪﺑﯩﺌﻰ ﮔﺎﺯ ﺗﯘﺭﺑﺎ ﻳﻮﻟﻰ، ﺳﯘ ﺋﯧﻠﯧﻜﺘﯩﺮ ﺋﯩﺴﺘﺎﻧﺴﯩﺴﻰ، ﺗﺎﺵ ﻳﻮﻝ ﯞﻩ ﺗﯚﻣﯜﺭ ﻳﻮﻟﻼﺭﻏﺎ ﻫﯘﺟﯘﻡ ﻗﯩﻠﯩﺸﻨﻰ ﭘﯩﻼﻥ ﻗﯩﻠﯩﯟﺍﺗﻘﺎﻧﻠﯩﻘﯩﻨﻰ ﺋﯧﻼﻥ ﻗﯩﻠﺪﻯ. ﺧﻪﯞﻩﺭﺩﻩ ﻳﻪﻧﻪ 1990 ‏- ﻳﯩﻠﯩﺪﯨﻦ ﺑﯜﮔﯜﻧﮕﻪ ﻗﻪﺩﻩﺭ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻚ ﺋﻮﺭﮔﺎﻧﻠﯩﺮﯨﻨﯩﯔ ﺗﯧﺮﺭﻭﺭﭼﯩﻼﺭﺩﯨﻦ 41 ﺗﻮﻧﻨﯩﺪﯨﻦ ﺋﺎﺭﺗﯘﻕ ﭘﺎﺭﺗﻼﺗﻘﯘﭺ ﺩﻭﺭﯨﻨﻰ ﻗﻮﻟﻐﺎ ﭼﯜﺷﯜﺭﮔﻪﻧﻠﯩﻜﻰ ﺑﯩﻠﺪﯛﺭﯛﻟﮕﻪﻥ.

ﺑﯘ ﺋﺎﺭﯨﺪﺍ ﺭﻭﻳﯧﺘﺮﺱ ﺋﺎﮔﯧﻨﺘﻠﯩﻘﻰ، ﺷﺎﯕﺨﻪﻱ ﻫﻪﻣﻜﺎﺭﻟﯩﻖ ﺗﻪﺷﻜﯩﻼﺗﯩﻐﺎ ﺋﻪﺯﺍ ﺩﯙﻟﻪﺕ ﻣﻪﺳﺌﯘﻟﻠﯩﺮﯨﻨﯩﯔ ﻛﯧﻠﻪﺭ ﺋﺎﻱ ﺑﯩﺮ ﺋﺎﺭﯨﻐﺎ ﺟﻪﻡ ﺑﻮﻟﯘﭖ، ﺋﺎﺳﺎﺳﻠﯩﻖ ﺭﺍﺩﯨﻜﺎﻝ ﺩﯨﻨﯩﻲ ﻛﯜﭼﻠﻪﺭ، ﺑﯚﻟﮕﯜﻧﭽﯩﻠﻪﺭ ﯞﻩ ﺗﯧﺮﺭﻭﺭﭼﯩﻼﺭﻏﺎ ﻗﺎﻧﺪﺍﻕ ﺯﻩﺭﺑﻪ ﺑﯧﺮﯨﺶ ﻫﻪﻗﻘﯩﺪﻩ ﻣﯘﺯﺍﻛﯩﺮﻩ ﺋﯧﻠﯩﭗ ﺑﺎﺭﯨﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﯩﺪﻯ.

ﺧﻪﯞﻩﺭﻟﻪﺭﺩﯨﻦ ﻣﻪﻟﯘﻡ ﺑﻮﻟﯩﺸﯩﭽﻪ، ﺋﺎﭘﺘﻮﻧﯘﻡ ﺭﺍﻳﻮﻧﻠﯘﻕ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻚ ﻣﯩﻨﯩﺴﺘﯩﺮﻟﯩﻘﻰ ﻳﯧﻘﯩﻨﺪﺍ، ﺭﺍﻳﻮﻥ ﺑﻮﻳﯩﭽﻪ ﭘﺎﺭﺗﻼﺗﻘﯘﭺ ﺑﯘﻳﯘﻣﻼﺭﻏﺎ ﻗﺎﺭﯨﺘﺎ ﺑﯩﺨﻪﺗﻪﺭﻟﯩﻜﻨﻰ ﻛﯜﭼﻪﻳﺘﯩﺶ ﺗﯧﻠﯧﯟﯨﺰﯨﻴﻪ - ﺗﯧﻠﯧﻔﯘﻥ ﻳﯩﻐﯩﻨﻰ ﭼﺎﻗﯩﺮﻏﺎﻥ. ﻳﯩﻐﯩﻨﺪﺍ ﭼﯧﮕﺮﺍ ﺋﯩﭽﻰ - ﺳﯩﺮﺗﯩﺪﯨﻜﻰ ﺩﯛﺷﻤﻪﻥ ﻛﯜﭼﻠﻪﺭﻧﯩﯔ ﺗﻪﺑﯩﺌﻰ ﮔﺎﺯ ﺗﯘﺭﺑﯩﺴﻰ، ﺳﯘ ﺋﯧﻠﯧﻜﺘﯩﺮ، ﺗﺎﺵ ﻳﻮﻝ ﯞﻩ ﺗﯚﻣﯜﺭ ﻳﻮﻟﻼﺭﻧﻰ ﭘﺎﺭﺗﯩﻠﺘﯩﺸﺘﻪﻙ ﺗﯧﺮﺭﻭﺭﻟﯘﻕ ﻫﯘﺟﯘﻣﻰ ﺋﯧﻠﯩﭗ ﺑﯧﺮﯨﺸﻨﻰ ﻧﯩﺸﺎﻥ ﻗﯩﻠﯩﭗ ﻛﻪﻟﮕﻪﻧﻠﯩﻜﻰ، ﺑﺎﺭﻟﯩﻖ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻚ ﺋﻮﺭﮔﺎﻧﻠﯩﺮﯨﻨﯩﯔ ﺋﻮﺭﺗﺎﻕ ﺗﯩﺮﯨﺸﭽﺎﻧﻠﯩﻖ ﻛﯚﺭﺳﯩﺘﯩﺸﻰ ﻧﻪﺗﯩﺠﯩﺴﯩﺪﻩ ﭘﺎﺭﺗﯩﻠﺘﯩﺶ ﺩﯦﻠﻮﻟﯩﺮﯨﻨﯩﯔ ﺑﯩﺮ ﻗﻪﺩﻩﺭ ﺋﺎﺯﺍﻳﻐﺎﻧﻠﯩﻘﻰ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ.

ﺋﺎﭘﺘﻮﻧﯘﻡ ﺭﺍﻳﻮﻧﻠﯘﻕ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻚ ﻣﯩﻨﯩﺴﺘﯩﺮﻟﯩﻘﻰ، ﺑﯘ ﻳﯩﻞ 7 ‏- ﺋﺎﻳﺪﯨﻦ ﺑﺎﺷﻼﭖ ﻗﺎﻧﯘﻧﺴﯩﺰ ﭘﺎﺭﺗﻼﺗﻘﯘﭺ ﺑﯘﻳﯘﻣﻠﯩﺮﯨﻨﻰ ﭘﺎﺵ ﻗﯩﻠﯩﺶ ﻫﻪﺭﻛﯩﺘﻰ ﺋﯧﻠﯩﭗ ﺑﯧﺮﯨﭗ، ﭘﺎﺭﺗﻼﺗﻘﯘﭺ ﺑﯘﻳﯘﻣﻠﯩﺮﻯ ﻳﺎﺳﺎﺷﻘﺎ ﺯﻩﺭﺑﻪ ﺑﯧﺮﯨﺶ ﻫﻪﺭﯨﻜﺘﯩﻨﻰ ﺟﯩﺪﺩﻯ ﻗﺎﻧﺎﺕ ﻳﺎﻳﺪﯗﺭﯗﺷﻘﺎ ﺑﺎﺷﻠﯩﻐﺎﻥ.

ﺟﻮﯕﮕﯘ ﺩﺍﺋﯩﺮﯨﻠﯩﺮﻯ ﻳﻪﻧﻪ، ﺷﺎﯕﺨﻪﻱ ﻫﻪﻣﻜﺎﺭﻟﯩﻖ ﺗﻪﺷﻜﯩﻼﺗﯩﻨﯩﯔ ﻛﯜﻧﻠﯜﻛﻰ ﺋﺎﺳﺘﯩﺪﺍ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺗﯧﺮﺭﻭﺭﭼﯩﻠﯩﺮﯨﻐﺎ ﻗﺎﺭﺍﺗﻘﺎﻥ ﺯﻩﺭﺑﯩﺴﯩﻨﻰ ﻛﯜﭼﻪﻳﺘﯩﺸﻨﻰ ﺋﻪﯓ ﻣﯘﻫﯩﻢ ﺧﯩﺰﻣﻪﺕ ﻧﯘﻗﺘﯩﺴﻰ ﻗﯩﻠﯩﭗ ﺑﯧﻜﯩﺘﻜﻪﻥ.

ﺋﺎﻣﻤﺎ، ﺋﯘﻳﻐﯘﺭﻻﺭﻧﯩﯔ ﻛﯩﺸﯩﻠﯩﻚ ﻫﻮﻗﯘﻗﻰ ﯞﻩ ﺋﻪﺭﻛﯩﻨﻠﯩﻜﯩﻨﻰ ﻗﻮﻟﻐﺎ ﻛﻪﻟﺘﯜﺭﯛﺵ ﻳﻮﻟﯩﺪﺍ ﭘﺎﺋﺎﻟﯩﻴﻪﺕ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺗﻪﺷﻜﯩﻼﺗﻼﺭ، ﺋﯘﻳﻐﯘﺭﻻﺭﻧﯩﯔ ﻫﯧﭽﻘﺎﭼﺎﻥ ﺗﯧﺮﺭﻭﺭﻟﯘﻕ ﻫﻪﺭﯨﻜﻪﺗﻠﯩﺮﻯ ﺑﯩﻠﻪﻥ ﺷﯘﻏﯘﻟﻼﻧﻤﯩﻐﺎﻧﻠﯩﻘﯩﻨﻰ ﺗﻪﻛﯩﺘﻠﯩﻤﻪﻛﺘﻪ. (ﺋﻪﻗﯩﺪﻩ)