ﺋﯘﻳﻐﯘﺭ ﺋﯩﻠﯩﺪﯨﻜﻰ ﺳﻪﻫﯩﻴﻪ ﺗﺎﺭﻣﺎﻗﻠﯩﺮﻯ ﺋﺎﺭﯨﺴﯩﺪﺍ ﭼﯧﺮﯨﻜﻠﯩﻚ ﺋﻪﯞﺝ ﺋﺎﻟﻤﺎﻗﺘﺎ

ﺧﯩﺘﺎﻱ ﺋﺎﺧﺒﺎﺭﺍﺕ ﯞﺍﺳﯩﺘﯩﻠﯩﺮﯨﻨﯩﯔ ﻣﻪﻟﯘﻣﺎﺗﯩﻐﺎ ﻗﺎﺭﯨﻐﺎﻧﺪﺍ، ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻠﯘﻕ ﺳﻪﻫﯩﻴﻪ ﻧﺎﺯﺍﺭﯨﺘﻰ ﻣﺎﻟﯩﻴﻪ ﭘﯩﻼﻧﻼﺵ ﺑﺎﺷﻘﺎﺭﻣﯩﺴﯩﻨﯩﯔ ﺳﺎﺑﯩﻖ ﺑﺎﺷﻠﯩﻘﻰ ﭼﯧﻦ ﺟﯩﻴﻪﻧﮕﻮ ﻳﻪﺗﺘﻪ ﻳﯩﻠﻐﺎ ﻳﻪﺗﻤﯩﮕﻪﻥ ﯞﺍﻗﯩﺖ ﺋﯩﭽﯩﺪﻩ 350 ﻣﯩﯔ ﻳﯜﻩﻥ ﺧﯩﺘﺎﻱ ﭘﯘﻟﻰ ﯞﻩ 5 ﻣﯩﯔ ﺋﺎﻣﯧﺮﯨﻜﺎ ﺩﻭﻟﻠﯩﺮﻯ ﭘﺎﺭﺍ ﺋﺎﻟﻐﺎﻥ.

ﺧﯩﺘﺎﻱ ﺭﺍﺩﯨﺌﻮ ﺋﯩﺴﺘﺎﻧﺴﯩﺴﯩﻨﯩﯔ ﺑﯘ ﻫﻪﻗﺘﯩﻜﻰ ﺧﻪﯞﯨﺮﯨﮕﻪ ﻗﺎﺭﯨﻐﺎﻧﺪﺍ، ﺋﯘ ﺧﯩﺰﻣﻪﺗﺘﯩﻜﻰ ﻗﯘﻻﻱ ﺷﺎﺭﺍﺋﯩﺘﯩﺪﯨﻦ ﭘﺎﻳﺪﯨﻠﯩﻨﯩﭗ، ﻛﯚﭖ ﻗﯧﺘﯩﻢ ﭘﺎﺭﺍ ﺋﺎﻟﻐﺎﻥ ﺑﻮﻟﯘﭖ، ﺋﯘ 1998- ﻳﯩﻠﻰ ﻗﯘﻣﯘﻝ ﯞﯨﻼﻳﻪﺗﻠﯩﻚ ﺳﻪﻫﯩﻴﻪ ﺋﯩﺪﺍﺭﯨﺴﯩﻨﯩﯔ ﺑﺎﺷﻠﯩﻘﻠﯩﻖ ﯞﻩﺯﯨﭙﯩﺴﯩﻨﻰ ﺋﯚﺗﯜﯞﺍﺗﻘﺎﻧﺪﺍ ﻗﯘﻣﯘﻟﺪﯨﻜﻰ ﺑﯩﺮ ﺩﻭﺭﺍ ﺷﯩﺮﻛﯩﺘﯩﻨﻰ ﺋﯜﺭﯛﻣﭽﯩﺪﯨﻜﻰ ﺑﯩﺮ ﺷﯩﺮﻛﻪﺗﻜﻪ ﺋﯚﺗﻜﯜﺯﯛﭖ ﺑﯧﺮﯨﺸﺘﻪ 50 ﻣﯩﯔ ﻳﯜﻩﻥ ﺋﺎﻟﻐﺎﻥ ﯞﻩ 2002- ﻳﯩﻠﻰ 9- ﺋﺎﻳﺪﺍ ﺋﯜﺭﯛﻣﭽﯩﺪﯨﻜﻰ ﻣﻪﻟﯘﻡ ﺑﯩﺮ ﺷﯩﺮﻛﻪﺗﻨﯩﯔ ﺷﺎﻳﺎﺭﺩﯨﻜﻰ ﺑﯩﺮ ﺩﻭﺧﺘﯘﺭﺧﺎﻧﯩﻐﺎ ﺋﯩﻠﻐﺎﺭ ﺗﯧﺨﻨﯩﻜﯩﻠﯩﻖ ﺗﻪﻛﺸﯜﺭﯛﺵ ﺋﺎﭘﭙﺎﺭﺍﺗﻰ ﺳﯧﺘﯩﯟﯦﻠﯩﺸﺘﯩﻜﻰ ﺭﯗﺧﺴﻪﺗﻨﺎﻣﯩﺴﯩﻨﻰ ﻗﻮﻟﻐﺎ ﻛﻪﻟﺘﯜﺭﯛﺷﻰ ﺋﯜﭼﯜﻥ ﻳﺎﺭﺩﻩﻡ ﻗﯩﻠﻐﺎﻧﻠﯩﻘﻰ ﺋﯜﭼﯜﻥ 50 ﻣﯩﯔ ﻳﯜﻩﻥ ﺋﺎﻟﻐﺎﻥ.

ﺩﻩﺭﯞﻩﻗﻪ ﻳﯧﻘﯩﻨﻘﻰ ﻳﯩﻠﻼﺭﺩﯨﻦ ﺋﯘﻳﻐﯘﺭ ﺋﯧﻠﯩﺪﻩ ﺳﻪﻫﯩﻴﻪ ﺗﺎﺭﻣﺎﻗﻠﯩﺮﯨﺪﺍ ﺧﯩﺰﻣﻪﺕ ﻗﯩﻠﯩﯟﺍﺗﻘﺎﻥ ﺧﺎﺩﯨﻤﻼﺭﺩﺍ ﭼﯩﺮﯨﻜﻠﯩﻚ ﺑﯩﺮﻗﻪﺩﻩﺭ ﻛﯚﭘﯩﻴﯩﯟﺍﺗﻘﺎﻥ ﺑﻮﻟﯘﭖ، ﺋﯜﺭﯛﻣﭽﯩﺪﻩ ﭼﯩﻘﯩﺪﯨﻐﺎﻥ ﺷﻪﻫﻪﺭ ﮔﯧﺰﯨﺘﯩﺪﻩ ﺧﻪﯞﻩﺭ ﻗﯩﻠﯩﻨﯩﺸﯩﭽﻪ، 2005- ﻳﯩﻠﯩﺪﺍ ﺷﯩﻨﺠﺎﯓ ﺗﯧﺒﺒﯩﻲ ﺋﯘﻧﯩﯟﯦﺮﺳﯩﺘﯧﺘﯩﺪﯨﻜﻰ 100 ﺩﯨﻦ ﺋﺎﺭﺗﯘﻕ ﺩﻭﺧﺘﯘﺭ ‏- ﺳﯧﺴﺘﺮﺍﻻﺭ 540 ﻣﯩﯔ ﻳﯜﻩﻥ ﭘﺎﺭﺍ ﺋﯧﻠﯩﭗ ﺷﻪﺧﺴﻰ ﺩﻭﺭﯨﮕﻪﺭﻟﻪﺭﻧﯩﯔ ﺩﻭﺭﺍ ﺳﯧﺘﯩﺸﯩﻐﺎ ﻳﺎﺭﺩﻩﻡ ﻗﯩﻠﻐﺎﻧﻠﯩﻘﻰ ﺋﯜﭼﯜﻥ ﺟﺎﺯﺍﻏﺎ ﺗﺎﺭﺗﯩﻠﻐﺎﻥ.

ﮔﻪﺭﭼﻪ ﭼﯧﻦ 10 ﻳﯩﻠﻠﯩﻖ ﻛﯧﺴﯩﻠﮕﻪﻥ ﺑﻮﻟﺴﯩﻤﯘ، ﺋﯘ ﺋﯘﻳﻐﯘﺭ ﺋﯧﻠﯩﺪﻩ ﭼﯩﺮﯨﻜﻠﯩﺸﯩﯟﺍﺗﻘﺎﻥ ﺧﯩﺘﺎﻱ ﻛﺎﺩﯨﺮﻟﯩﺮﻯ ﺋﯩﭽﯩﺪﻩ ﭘﻪﻗﻪﺗﻼ ﺋﺎﺷﻜﺎﺭﯨﻠﯩﻨﯩﭗ ﻗﺎﻟﻐﺎﻥ ﺑﯩﺮﻯ ﺑﻮﻟﯘﭖ ، ﺑﺎﺷﻘﯩﻼﺭﻏﺎ ﺋﯩﺒﺮﻩﺕ ﺑﻮﻻﻟﻤﺎﺳﻠﯩﻘﻰ ﻣﯘﻣﻜﯩﻦ. (ﺟﯜﻣﻪ)