ﺋﯘﻳﻐﯘﺭ ﺋﯧﻠﯩﺪﻩ ﺋﺎﺳﭙﯧﺮﺍﻧﺘﻠﯩﻘﻘﺎ ﺋﯩﻠﺘﯩﻤﺎﺱ ﻗﯩﻠﻐﯘﭼﯩﻼﺭﻧﯩﯔ ﺋﻮﻣﯘﻣﻰ ﺳﺎﻧﻰ ﺋﺎﺯﺍﻳﺪﻯ، ﻟﯧﻜﯩﻦ ﻳﻪﺭﻟﯩﻚ ﺋﯩﻠﺘﯩﻤﺎﺳﭽﯩﻼﺭ ﻛﯚﭘﻪﻳﺪﻯ

ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﺪﺍ 2008 - ﻳﯩﻠﻠﯩﻖ ﺋﺎﺳﭙﯩﺮﺍﻧﺘﻠﯩﻖ ﺋﯩﻤﺘﯩﻬﺎﻧﯩﻐﺎ ﻗﺎﺗﻨﯩﺸﯩﺸﻨﻰ ﺋﯩﻠﺘﯩﻤﺎﺱ ﻗﯩﻠﻐﯘﭼﯩﻼﺭﻧﯩﯔ ﺋﻮﻣﯘﻣﻰ ﺳﺎﻧﻰ ﻳﯧﻘﯩﻨﻘﻰ 7 ﻳﯩﻠﺪﯨﻦ ﺑﯧﺮﻯ ﺗﯘﻧﺠﻰ ﻗﯧﺘﯩﻢ ﺋﺎﺯﺍﻳﻐﺎﻥ ﺑﻮﻟﺴﯩﻤﯘ، ﻟﯧﻜﯩﻦ ﻳﻪﺭﻟﯩﻚ ﻣﯩﻠﻠﻪﺗﻠﻪﺭﺩﻩ ﺋﺎﺳﭙﯧﺮﺍﻧﺘﻠﯩﻘﻘﺎ ﺋﯩﻠﺘﯩﻤﺎﺱ ﻗﯩﻠﻐﯘﭼﯩﻼﺭ ﻛﯚﭘﻪﻳﮕﻪﻥ.

ﺧﯩﺘﺎﻱ ﻣﻪﺗﺒﯘﺋﺎﺗﻠﯩﺮﯨﻨﯩﯔ ﺋﻪﺳﻜﻪﺭﺗﯩﺸﯩﭽﻪ، ﺑﯘ ﻳﯩﻞ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻰ ﺑﯘﻳﯩﭽﻪ 12480 ﻧﻪﭘﻪﺭ ﺋﺎﺩﻩﻡ ﺋﺎﺳﭙﯧﺮﺍﻧﺘﻠﯩﻘﻘﺎ ﺋﯩﻠﺘﯩﻤﺎﺱ ﻗﯩﻠﻐﺎﻥ ﺑﻮﻟﯘﭖ، ﺧﻪﯞﻩﺭﻟﻪﺭﺩﻩ ﺑﯘﻧﯩﯔ ﺋﯚﺗﻜﻪﻥ ﻳﯩﻠﻘﯩﺪﯨﻦ 133 ﺋﺎﺩﻩﻡ ﺋﺎﺯﺍﻳﻐﺎﻧﻠﯩﻘﯩﻨﻰ، ﻟﯧﻜﯩﻦ ﻳﻪﺭﻟﯩﻚ ﻣﯩﻠﻠﻪﺗﻠﻪﺭﺩﻩ ﺋﯩﻠﺘﯩﻤﺎﺱ ﻗﯩﻠﻐﯘﭼﯩﻼﺭﻧﯩﯔ ﺳﺎﻧﯩﺪﺍ ﻛﯚﭘﯩﻴﯩﺶ ﺑﻮﻟﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

"ﺗﻪﯕﺮﯨﺘﺎﻍ ﺗﻮﺭﻯ" ﺩﺍ 2008 - ﻳﯩﻠﻠﯩﻖ ﺋﺎﺳﭙﯩﺮﺍﻧﺘﻠﯩﻖ ﺋﯩﻤﺘﯩﻬﺎﻧﯩﻐﺎ ﺋﯩﻠﺘﯩﻤﺎﺱ ﻗﯩﻠﻐﯘﭼﻰ ﻳﻪﺭﻟﯩﻚ ﻣﯩﻠﻠﻪﺗﻠﻪﺭﻧﯩﯔ ﺳﺎﻧﯩﻨﻰ 3243 ﻧﻪﭘﻪﺭ، ﺩﻩﭖ ﺋﯧﻼﻥ ﻗﯩﻠﻐﺎﻥ ﯞﻩ ﺑﯘ ﺳﺎﻥ ﺋﻮﻣﯘﻣﻰ ﺳﺎﻧﻨﯩﯔ%26 ﻧﻰ ﺋﯩﮕﯩﻠﻪﻳﺪﯨﻐﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ. ﺧﯩﺘﺎﻳﻼﺭ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻰ ﻧﻮﭘﯘﺳﯩﻨﯩﯔ%42 ﻧﻰ ﺋﯩﮕﯩﻠﯩﺸﯩﮕﻪ ﻗﺎﺭﯨﻤﺎﻱ، ﺋﺎﺳﭙﯧﺮﺍﻧﺘﻠﯩﻘﻘﺎ ﺋﯩﻤﺘﯩﻬﺎﻥ ﺑﯧﺮﯨﺸﻜﻪ ﺗﯩﺰﯨﻤﻼﺗﻘﺎﻧﻼﺭﻧﯩﯔ ﺗﻪﺧﻤﯩﻨﻪﻥ % 75 ﻧﻰ ﺷﯘﻻﺭ ﺋﯩﮕﯩﻠﯩﻤﻪﻛﺘﻪ. " ﺗﻪﯕﺮﯨﺘﺎﻍ ﺗﻮﺭﻯ" ﻧﯩﯔ ﺑﯘ ﻫﻪﻗﺘﯩﻜﻰ ﺑﯩﺮ ﺧﻪﯞﯨﺮﯨﺪﻩ، ﺑﯘ ﻳﯩﻞ ﺋﺎﺳﭙﯩﺮﺍﻧﺘﻠﯩﻖ ﺋﯩﻤﺘﯩﻬﺎﻧﯩﻐﺎ ﻳﻪﺭﻟﯩﻚ ﻣﯩﻠﻠﻪﺗﻠﻪﺭﺩﯨﻦ 317 ﺋﺎﺩﻩﻡ ﻛﯚﭖ ﺗﯩﺰﯨﻤﻼﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﻟﯧﻜﯩﻦ ﻛﯚﺯﻩﺗﻜﯜﭼﯩﻠﻪﺭﻧﯩﯔ ﺋﻪﺳﻜﻪﺭﺗﯩﺸﯩﭽﻪ، ﺑﯘ ﺋﯧﺸﯩﺸﻨﻰ ﺋﯘﻳﻐﯘﺭﻻﺭﻧﯩﯔ ﺭﺍﻳﻮﻧﺪﯨﻜﻰ ﻧﻮﭘﯘﺳﻰ ﯞﻩ ﺗﯩﺒﻪﺗﻠﻪﺭﮔﻪ ﺳﯧﻠﯩﺸﺘﯘﺭﻏﺎﻧﺪﺍ ﻛﯚﭖ ﺩﯦﮕﯩﻠﻰ ﺑﻮﻟﻤﺎﻳﺪﯗ.

ﺗﯩﺒﻪﺕ ﺋﺎﭘﺘﻮﻧﻮﻡ ﺭﺍﻳﻮﻧﯩﺪﺍ 2008 - ﻳﯩﻠﻠﯩﻖ ﺋﺎﺳﭙﯩﺮﺍﻧﺘﻠﯩﻖ ﺋﯩﻤﺘﯩﻬﺎﻧﯩﻐﺎ ﺗﯩﺰﯨﻤﻼﻧﻐﺎﻧﻼﺭﻧﯩﯔ ﺋﻮﻣﯘﻣﻰ ﺳﺎﻧﻰ 1965 ﻧﻪﭘﻪﺭ ﺑﻮﻟﯘﭖ، ﺑﯘ ﺳﺎﻥ ﺋﯘﻳﻐﯘﺭ ﺋﯧﻠﯩﺪﻩ ﺗﯩﺰﯨﻤﻼﻧﻐﺎﻥ ﻳﻪﺭﻟﯩﻚ ﻣﯩﻠﻠﻪﺗﻠﻪﺭﺩﯨﻦ ﻛﯚﭖ ﺑﻮﻟﻤﯩﺴﯩﻤﯘ، ﻟﯧﻜﯩﻦ ﺑﯘ ﻳﯩﻞ ﺗﯩﺒﻪﺗﻠﯩﻜﻠﻪﺭﻧﯩﯔ ﺋﺎﺳﭙﯧﺮﺍﻧﺘﻠﯩﻘﻘﺎ ﺋﯩﻠﺘﯩﻤﺎﺱ ﻗﯩﻠﯩﺶ ﻧﯩﺴﺒﯩﺘﻰ ﺋﯚﺗﻜﻪﻥ ﻳﯩﻠﻘﯩﺪﯨﻦ %87 ﺋﺎﺷﻘﺎﻥ. ﻛﯚﺯﻩﺗﻜﯜﭼﯩﻠﻪﺭ، ﺋﯘﻳﻐﯘﺭ ﺋﺎﺳﭙﯧﺮﺍﻧﺘﻼﺭﻧﯩﯔ ﻛﯚﭘﯩﻴﻪﻟﻤﻪﺳﻠﯩﻜﯩﮕﻪ ﺋﻮﻗﯘﺵ ﭘﯜﺗﺘﯜﺭﺳﻪ ﺧﯩﺰﻣﻪﺕ ﺗﯧﭙﯩﺸﻨﯩﯔ ﻗﯩﻴﯩﻨﻠﯩﻘﻰ ﺳﻪﯞﻩﺑﭽﻰ ﺑﻮﻟﯘﯞﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﻣﻪﻛﺘﻪ. (ﺋﻪﺭﻛﯩﻦ)