7 ‏ - ﺋﺎﻳﻨﯩﯔ 4 ‏ - ﻛﯜﻧﻰ ﺋﺎﯞﺳﺘﯩﺮﺍﻟﯩﻴﻪ SBS ﺗﯧﻠﯧﯟﯨﺰﯨﻴﻪ ﻗﺎﻧﯩﻠﯩﻨﯩﯔ ﻧﻪﺯﻩﺭ ﭘﺮﻭﮔﺮﺍﻣﻤﯩﺴﯩﺪﺍ ﺑﯧﻴﺠﯩﯔ ﺋﻮﻟﯩﻤﭙﯩﻚ ﻳﯩﻐﯩﻨﻰ، ﻛﯩﺸﯩﻠﯩﻚ ﻫﻮﻗﯘﻕ ﯞﻩ ﻣﯘﻫﯩﺖ ﻣﻪﺳﯩﻠﯩﺴﻰ ﻗﺎﺗﺎﺭﻟﯩﻖ ﺗﯧﻤﯩﻼﺭﺩﺍ ﺳﯚﻫﺒﻪﺕ ﺋﯚﺗﻜﯜﺯﯛﻟﮕﻪﻥ ﺑﻮﻟﯘﭖ، ﺳﯚﻫﺒﻪﺗﻜﻪ ﻫﻪﺭ ﻗﺎﻳﺴﻰ ﺳﺎﻫﻪﻟﻪﺭﺩﯨﻜﻰ ﻛﻪﺳﭙﯩﻲ ﺧﺎﺩﯨﻤﻼﺭ، ﺳﯩﻴﺎﺳﯩﻴﻮﻧﻼﺭ، ﺟﺎﻣﺎﺋﻪﺕ ﺋﻪﺭﺑﺎﭘﻠﯩﺮﻯ، ﺗﻪﻧﻬﻪﺭﯨﻜﻪﺗﭽﯩﻠﻪﺭ، ﺗﯩﺒﻪﺗﻠﯩﻜﻠﻪﺭ ﯞﻩ ﺧﯩﺘﺎﻳﻼﺭ ﻗﺎﺗﻨﺎﺷﻘﺎﻥ ﺋﯩﺪﻯ.

ﺳﯚﻫﺒﻪﺗﻜﻪ ﻗﺎﺗﻨﺎﺷﻘﺎﻥ ﺋﺎﯞﺳﺘﯩﺮﺍﻟﯩﻴﻪ ABC ﺭﺍﺩﯨﺌﻮﺳﯩﻨﯩﯔ ﻣﯘﺧﺒﯩﺮﻯ ﺗﺮﺍﺳﯧﻲ ﺧﻮﻣﯧﺲ ﯞﻩ ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﯩﻨﯩﯔ ﺋﺎﯞﺳﺘﺮﺍﻟﯩﻴﯩﺪﯨﻜﻰ ﯞﻩﻛﯩﻠﻰ ﺳﻮﻓﯧﻲ ﭘﯧﺌﯧﺮ ﺧﺎﻧﯩﻤﻼﺭ ﺧﯩﺘﺎﻳﺪﺍ ﭘﻪﻗﻪﺕ ﺗﯩﺒﻪﺕ ﻣﻪﺳﯩﻠﯩﺴﯩﻼ ﺋﻪﻣﻪﺱ، ﺋﯘﻳﻐﯘﺭﻻﺭ ﻣﻪﺳﯩﻠﯩﺴﯩﻨﯩﯖﻤﯘ ﺑﺎﺭﻟﯩﻘﯩﻨﻰ، ﺋﯘﻻﺭﻧﯩﯔ ﺋﻪﻫﯟﺍﻟﻰ ﺗﯩﺒﻪﺗﻠﯩﻜﻠﻪﺭﮔﻪ ﺋﻮﺧﺸﺎﺵ ﺋﯩﻜﻪﻧﻠﯩﻜﯩﻨﻰ ﺗﻪﻛﯩﺘﻠﯩﮕﻪﻥ.

ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﯩﺪﯨﻜﻰ ﺳﻮﻓﯧﻲ ﭘﯧﺌﯧﺮ ﭘﺮﻭﮔﺮﺍﻣﻤﯩﺪﺍ ﺋﯘﻳﻐﯘﺭﻻﺭﻧﯩﯔ ﺋﻪﺗﻠﻪﺱ ﺷﺎﺭﭘﯩﺴﯩﻨﻰ ﺗﺎﻗﯩﯟﺍﻟﻐﺎﻥ ﺑﻮﻟﯘﭖ، ﺑﯘ ﺷﺎﺭﭘﺎ ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﻰ ﺭﻩﺋﯩﺴﻰ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﻨﯩﯔ ﺋﺎﯞﺳﺘﯩﺮﺍﻟﯩﻴﯩﻨﻰ ﺯﯨﻴﺎﺭﻩﺕ ﻗﯩﻠﻐﺎﻧﺪﺍ ﺋﯘﻧﯩﯖﻐﺎ ﺑﻪﺭﮔﻪﻥ ﺳﻮﯞﻏﯩﺴﻰ ﺋﯩﺪﻯ. ﺑﯘ ﺋﯩﻜﻜﻰ ﺧﺎﻧﯩﻢ ﻳﻪﻧﻪ، ﺋﯘﻳﻐﯘﺭﻻﺭﻧﯩﯔ ﻛﯩﺸﯩﻠﯩﻚ ﻫﻮﻗﯘﻗﻰ، ﺩﯨﻨﯩﻲ ﺋﻪﺭﻛﯩﻨﻠﯩﻜﻰ، ﺋﯩﻘﺘﯩﺴﺎﺩﻯ ﯞﻩ ﻣﻪﺩﻩﻧﯩﻴﯩﺘﻰ ﺩﻩﭘﺴﻪﻧﺪﯨﭽﯩﻠﯩﻜﻜﻪ ﺋﯘﭼﺮﺍﯞﺍﺗﻘﺎﻧﻠﯩﻘﯩﻨﻰ، ﺑﯘ ﺋﻪﻫﯟﺍﻟﺪﺍ ﺋﻮﻟﯩﻤﭙﯩﻚ ﻳﯩﻐﯩﻨﯩﻨﯩﯔ ﺧﯩﺘﺎﻳﺪﺍ ﺋﯚﺗﻜﯜﺯﯛﻟﯜﯞﺍﺗﻘﺎﻧﻠﯩﻘﯩﻐﺎ ﺋﻪﭘﺴﯘﺳﻠﯩﻨﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ.

ﻏﻪﺭﺑﺘﯩﻜﻰ ﻛﯩﺸﯩﻠﯩﻚ ﻫﻮﻗﯘﻗﻨﻰ ﻗﻮﻏﺪﯨﻐﯘﭼﻰ ﺗﻪﺷﻜﯩﻼﺗﻼﺭ، ﺷﻪﺧﺴﻠﻪﺭ ﯞﻩ ﻣﻪﺗﺒﯘﺋﺎﺗﻼﺭ ﺋﯩﭽﯩﺪﻩ ﺧﯩﺘﺎﻱ ﺩﺍﺋﯩﺮﯨﻠﯩﺮﯨﻨﯩﯔ ﺗﯧﺮﺭﻭﺭﭼﯩﻠﯩﻘﻘﺎ ﻗﺎﺭﺷﻰ ﺗﯘﺭﯗﺷﻨﻰ ﺑﺎﻫﺎﻧﻪ ﻗﯩﻠﯩﭗ، ﺋﯘﻳﻐﯘﺭﻻﺭﻧﻰ ﺑﺎﺳﺘﯘﺭﯗﯞﺍﺗﻘﺎﻧﻠﯩﻘﻰ، ﺋﯘﻳﻐﯘﺭ ﻣﻪﺩﻩﻧﯩﻴﯩﺘﻰ ﯞﻩ ﺗﯩﻠﯩﻨﯩﯔ ﺗﻪﻫﻠﯩﻜﻪ ﺋﺎﺳﺘﯩﺪﺍ ﻗﯧﻠﯩﯟﺍﺗﻘﺎﻧﻠﯩﻘﯩﻐﺎ ﺋﯩﺸﯩﻨﯩﺪﯨﻐﺎﻧﻼﺭ ﻛﯚﭘﻪﻳﻤﻪﻛﺘﻪ.