ﺩﺍﮔﯘﯕﺒﺎﯞ " ﺷﯩﻨﺠﺎﯓ ﻗﯘﺭﯗﻟﯘﺷﻰ" ﭘﺮﻭﮔﺮﺍﻣﻤﯩﺴﯩﻨﯩﯔ ﺧﯩﺘﺎﻳﻨﻰ ﺑﯩﺌﺎﺭﺍﻡ ﻗﯩﻠﻐﺎﻧﻠﯩﻘﯩﻨﻰ ﻳﺎﺯﺩﻯ

ﺧﻮﯕﻜﻮﯕﺪﯨﻜﻰ "ﺩﺍﮔﯘﯕﺒﺎﯞ" ﮔﯧﺰﯨﺘﻰ، ﺋﺎﻣﯧﺮﯨﻜﺎ ﺟﻮﻥ ﺧﻮﭘﻜﯩﻨﺲ ﺋﯘﻧﯩﯟﯦﺮﺳﯩﺘﯧﺘﻰ ﺗﻪﺭﯨﭙﯩﺪﯨﻦ ﺷﯩﻨﺠﺎﯓ ﻗﯘﺭﯗﻟﯘﺷﻰ، ﺩﯦﮕﻪﻥ ﭘﺮﻭﮔﺮﺍﻣﻤﯩﻐﺎ ﺋﺎﺳﺎﺳﻪﻥ ﻳﯧﺰﯨﻠﻐﺎﻥ " ﺧﯩﺘﺎﻳﻨﯩﯔ ﻣﯘﺳﯘﻟﻤﺎﻧﻼﺭ ﭼﯩﮕﺮﯨﺴﻰ - ﺷﯩﻨﺠﺎﯓ" ﺩﯦﮕﻪﻥ ﺋﻪﺳﻪﺭ، ﺋﯩﻠﻤﯩﻲ ﺳﺎﻫﻪﺩﯨﻜﻰ ﺑﯩﺮ ﺗﻪﺗﻘﯩﻘﺎﺕ ﺋﻪﺳﯩﺮﻯ ﺑﻮﻟﯘﺷﺘﯩﻦ، ﺋﻪﻣﺪﻯ ﺋﺎﻣﯧﺮﯨﻜﺎ ﺳﯩﻴﺎﺳﯩﻲ ﺳﻪﻫﻨﯩﺴﯩﺪﯨﻜﻰ ﺋﻪﺭﺑﺎﭘﻼﺭﻏﺎ ﺗﻪﺳﯩﺮ ﻛﯚﺭﺳﯩﺘﯩﺪﯨﻐﺎﻥ ﻗﻮﻟﻼﻧﻤﺎ ﺳﯜﭘﯩﺘﯩﺪﻩ ﺋﯜﻧﯜﻡ ﺑﯧﺮﯨﺸﻜﻪ ﺑﺎﺷﻠﯩﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺧﻪﯞﻩﺭﺩﻩ، ﭘﺮﯦﺰﯨﺪﯦﻨﺖ ﺑﯘﺷﻨﯩﯔ 5 - ﺋﯩﻴﯘﻥ ﻛﯜﻧﻰ ﭘﺮﺍﮔﺎﺩﺍ ﺋﯘﻳﻐﯘﺭ ﺭﻩﻫﺒﯩﺮﻯ ﺭﺍﺑﯩﻴﻪ ﻗﺎﺩﯨﺮ ﺑﯩﻠﻪﻥ ﻛﯚﺭﯛﺷﻜﻪﻧﻠﯩﻜﻰ ﺷﯩﻨﺠﺎﯓ ﻗﯘﺭﯗﻟﯘﺷﯩﻨﯩﯔ ﺋﺎﻣﯧﺮﯨﻜﺎ ﺳﯩﻴﺎﺳﯩﻲ ﺳﻪﻫﻨﯩﺴﯩﺪﯨﻜﻰ ﺋﻪﺭﺑﺎﭘﻼﺭﻏﺎ ﺳﯩﯖﯩﭗ ﻛﯩﺮﯨﯟﺍﺗﻘﺎﻧﻠﯩﻘﯩﻨﯩﯔ ﺑﯩﺸﺎﺭﯨﺘﻰ، ﺩﻩﭖ ﺗﻪﻛﯩﺘﻠﻪﻧﮕﻪﻥ.

ﺧﻪﯞﻩﺭﺩﻩ ﻳﻪﻧﻪ، ﺷﯩﻨﺠﺎﯓ ﻗﯘﺭﯗﻟﯘﺷﻰ ﺋﺎﻣﯧﺮﯨﻜﺎ ﻫﯚﻛﯜﻣﯩﺘﯩﻨﯩﯔ ﻫﺎﯞﺍﻟﯩﺴﯩﺪﯨﻜﻰ ﺗﻪﺗﻘﯩﻘﺎﺕ ﺗﯧﻤﯩﺴﻰ ﺑﻮﻟﺴﯩﻤﯘ، ﻟﯧﻜﯩﻦ ﺧﯩﺘﺎﻳﻼﺭﻧﯩﯔ ﺑﯘ ﻗﯘﺭﯗﻟﯘﺵ ﺋﺎﻣﯧﺮﯨﻜﺎ ﺳﯩﻴﺎﺳﯩﻲ ﺳﺎﻫﻪﺳﯩﺪﯨﻜﻰ ﺋﻪﺭﺑﺎﭘﻼﺭﻏﺎ ﺷﯘﻧﺪﺍﻗﻼ ﺋﺎﻣﯧﺮﯨﻜﯩﻨﯩﯔ ﺷﯩﻨﺠﺎﯓ ﺳﯩﻴﺎﺳﯩﺘﯩﮕﻪ ﺗﻪﺳﯩﺮ ﻛﯚﺭﺳﯩﺘﯩﺸﻰ ﻣﯘﻣﻜﯩﻦ، ﺩﻩﭖ ﺑﯩﺌﺎﺭﺍﻡ ﺑﻮﻟﯘﯞﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. " ﺩﺍﮔﯘﯕﺒﺎﯞ" ﮔﯧﺰﯨﺘﯩﻨﯩﯔ ﺋﻪﺳﻜﻪﺭﺗﯩﺸﯩﭽﻪ، "ﺧﯩﺘﺎﻳﻨﯩﯔ ﻣﯘﺳﯘﻟﻤﺎﻧﻼﺭ ﭼﯩﮕﺮﯨﺴﻰ - ﺷﯩﻨﺠﺎﯓ،" ﺩﯦﮕﻪﻥ ﺑﯘ ﺋﻪﺳﻪﺭﺩﻩ، ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﻨﯩﯔ ﺗﺎﺭﯨﺨﻰ 1884 - ﻳﯩﻠﻰ ﺋﯚﻟﻜﻪ ﻗﯘﺭﯗﻟﯘﺷﺘﯩﻦ ﺑﯘﺭﯗﻧﻘﻰ ﯞﻩ ﻛﯧﻴﯩﻨﻜﻰ ﺋﯩﻜﻜﻰ ﺩﻩﯞﺭﮔﻪ ﺋﺎﻳﺮﯨﻠﻐﺎﻧﻠﯩﻘﻰ، ﺋﯚﻟﻜﻪ ﻗﯘﺭﯗﻟﯘﺷﺘﯩﻦ ﺑﯘﺭﯗﻥ ﺋﯘﻳﻐﯘﺭ ﺋﯧﻠﯩﻨﯩﯔ ﺋﻪﺯﻩﻟﺪﯨﻦ ﺗﺎﺭﺗﯩﭗ ﺧﯩﺘﺎﻱ ﺯﯦﻤﯩﻨﻰ ﺑﻮﻟﯘﭖ ﺑﺎﻗﻤﯩﻐﺎﻧﻠﯩﻘﻰ، 1884 - ﻳﯩﻠﺪﯨﻦ ﻛﯧﻴﯩﻨﻜﻰ ﺩﻩﯞﺭ ﺑﻮﻟﺴﺎ ﺧﯩﺘﺎﻳﻨﯩﯔ ﻣﯘﺳﺘﻪﻣﻠﯩﻜﯩﭽﯩﻠﯩﻚ ﺩﻩﯞﺭﻯ، ﺩﻩﭖ ﻗﺎﺭﺍﻟﻐﺎﻧﻠﯩﻘﻰ ﻳﯧﺰﯨﻠﻐﺎﻥ.

"ﺩﺍﮔﯘﯕﺒﺎﯞ" ﮔﯧﺰﯨﺘﻰ ﻳﻪﻧﻪ،" ﺷﯩﻨﺠﺎﯓ ﻗﯘﺭﯗﻟﯘﺷﯩﻨﯩﯔ ﻳﯧﺘﻪﻛﭽﻰ ﺋﯩﺪﯨﻴﯩﺴﯩﺪﻩ ﺟﯘﯕﮕﻮﻧﯩﯔ ﺷﯩﻨﺠﺎﯕﺪﯨﻜﻰ ﺋﯩﮕﯩﻠﯩﻚ ﻫﻮﻗﯘﻗﯩﺪﺍ ﺯﻭﺭ ﻗﺎﻧﯘﻧﯩﻲ ﻣﻪﺳﯩﻠﻪ ﻣﻪﯞﺟﯜﺕ، ﺩﻩﻳﺪﯨﻐﺎﻥ ﭘﯩﻜﯩﺮ ﺋﯩﻠﮕﯩﺮﻯ ﺳﯜﺭﯛﻟﮕﻪﻥ . ﺑﯘ ﻣﻪﺳﯩﻠﻪ ﺋﺎﻣﯧﺮﯨﻜﺎ ﺟﯘﯕﮕﻮﻧﯩﯔ ﺋﯩﭽﻜﻰ ﺋﯩﺸﻠﯩﺮﯨﻐﺎ ﺋﺎﺭﯨﻠﯩﺸﯩﺶ، ﯞﺍﻗﺘﻰ ﻛﻪﻟﮕﻪﻧﺪﻩ ﺟﯘﯕﮕﻮﻧﻰ ﭘﺎﺭﭼﯩﻼﺵ ﯞﻩ ﺷﯩﻨﺠﺎﯕﻨﻰ ﺟﯘﯕﮕﻮﺩﯨﻦ ﺋﺎﻳﺮﯨﭗ ﭼﯩﻘﯩﭗ ﻛﯧﺘﯩﺸﻜﻪ ﻧﻪﺯﻩﺭﯨﻴﯩﯟﯨﻲ ﺋﺎﺳﺎﺱ ﻳﺎﺭﯨﺘﯩﭗ ﺑﯧﺮﯨﺸﻰ ﻣﯘﻣﻜﯩﻦ" ﺩﻩﻳﺪﯗ. (ﺋﻪﺭﻛﯩﻦ)