ﺋﯩﮕﯩﻠﯩﺸﯩﻤﯩﺰﮔﻪ ﻗﺎﺭﯨﻐﺎﻧﺪﺍ ﺳﺎﻗﭽﯩﻼﺭ ﺗﻪﺭﯨﭙﯩﺪﯨﻦ ﺗﯘﺗﯘﭖ ﻗﯧﻠﯩﻨﻐﺎﻥ ﺋﺎﺋﯩﻠﻪ ﺗﺎﯞﺍﺑﯩﺌﺎﺗﻠﯩﺮﯨﻨﯩﯔ ﺋﯩﭽﯩﺪﻩ ﻗﯩﺰﯨﻞ ﺑﻮﻳﻰ ﻳﯧﺰﯨﺴﯩﺪﯨﻜﻰ 2 ﺳﺎﻗﭽﯩﻨﯩﯔ ﺋﯚﻟﺘﯜﺭﯛﻟﮕﻪﻧﻠﯩﻚ ﯞﻩﻗﻪﺳﯩﮕﻪ ﻗﺎﺗﻨﺎﺷﻘﺎﻥ، ﺩﯦﮕﻪﻥ ﮔﯘﻣﺎﻥ ﺑﯩﻠﻪﻥ ﺋﯩﺰ ﺩﯦﺮﯨﻜﻰ ﻗﯩﻠﯩﻨﯩﯟﺍﺗﻘﺎﻥ 23 ﻳﺎﺷﻼﺭﺩﯨﻜﻰ ﺋﺎﻧﺎﺭﮔﯜﻝ ﺋﯩﺴﯩﻤﻠﯩﻚ ﻳﯧﺰﺍ ﻗﯩﺰﯨﻨﯩﯔ 8 ﻳﺎﺷﻼﺭﺩﯨﻜﻰ ﺋﻮﻏﻠﻰ ﯞﻩ ﺋﺎﻣﺎﻧﮕﯜﻝ ﺋﯩﺴﯩﻤﻠﯩﻚ ﺋﺎﻧﯩﺴﻰ ﺑﺎﺭ ﺋﯩﻜﻪﻥ. ﻧﯚﯞﻩﺗﺘﻪ ﺳﺎﻗﭽﯩﻼﺭ ﻗﯩﺰﯨﻞ ﺑﻮﻳﯩﺪﯨﻜﻰ ﯞﻩﻗﻪﮔﻪ ﻗﺎﺗﻨﺎﺷﻘﺎﻧﻠﯩﻘﻰ ﺋﯩﻠﮕﯩﺮﻯ ﺳﯜﺭﯛﻟﮕﻪﻥ ﺋﺎﺯ ﺩﯦﮕﻪﻧﺪﻩ 7 ﻧﻪﭘﻪﺭ ﺋﯘﻳﻐﯘﺭ ﻳﺎﺷﻨﯩﯔ ﺋﯩﺰ ﺩﯦﺮﯨﻜﯩﻨﻰ ﻗﯩﻠﻤﺎﻗﺘﺎ.

ﺑﯘ ﻳﺎﺷﻼﺭ ﻣﯩﺸﺎ ﻳﯧﺰﯨﺴﯩﻨﯩﯔ ﭘﯘﻗﺮﺍﻟﯩﺮﻯ ﺑﻮﻟﯘﭖ، ﺳﺎﻗﭽﯩﻼﺭ ﺋﯘﻻﺭﻧﯩﯔ ﺋﺎﺋﯩﻠﻪ ﺗﺎﯞﺍﺑﯩﺌﺎﺗﯩﺪﯨﻜﻰ ﻣﻪﻛﺘﻪﭖ ﻳﯧﺸﯩﺪﺍ ﺑﻮﻟﻤﯩﻐﺎﻥ ﺋﺎﺋﯩﻠﻪ ﺋﻪﺯﺍﻟﯩﺮﯨﻨﻰ ﺗﯘﺗﯘﭖ ﺗﯘﺭﻣﺎﻗﺘﺎ ﺋﯩﻜﻪﻥ. ﻟﯧﻜﯩﻦ ﮔﯚﺭﯛﮔﻪ ﺋﯧﻠﯩﺶ ﻗﺎﭼﻘﯘﻧﻼﺭﻧﯩﯔ ﺋﺎﺋﯩﻠﻪ ﺗﺎﯞﺍﺑﯩﺌﺎﺗﻰ ﺑﯩﻠﻪﻥ ﭼﻪﻛﻠﯩﻨﯩﺪﯨﻐﺎﻥ ﻳﺎﻛﻰ ﺧﯘﻟﯘﻡ - ﺧﻮﺷﻨﺎ، ﺗﻮﻧﯘﺵ ﺑﯩﻠﯩﺸﻠﻪﺭﻧﻰ ﺋﯚﺯ ﺋﯩﭽﯩﮕﻪ ﺋﺎﻟﯩﺪﯨﻐﺎﻥ - ﺋﺎﻟﻤﺎﻳﺪﯨﻐﺎﻧﻠﯩﻘﻰ ﻣﻪﻟﯘﻡ ﺋﻪﻣﻪﺱ. ﻗﯩﺰﯨﻞ ﺑﯘﻳﯩﺪﯨﻜﻰ ﯞﻩﻗﻪ ﭼﺎﺭﺷﻪﻧﺒﻪ ﻛﯜﻧﻰ ﻳﯜﺯ ﺑﻪﺭﮔﻪﻥ ﺋﯩﺪﻯ.

ﺋﻪﻳﻨﻰ ﭼﺎﻏﺪﺍ ﻗﯩﺰﯨﻞ ﺑﻮﻳﻰ ﺳﺎﻗﭽﻰ ﭘﻮﻧﻜﯩﺘﯩﺪﯨﻜﻰ ﺳﺎﻗﭽﯩﻼﺭ ﻣﻪﺯﻛﯘﺭ ﻳﯧﺰﯨﺪﯨﻜﻰ ﺋﺎﻧﺎﺭﮔﯜﻟﻨﻰ ﺋﯩﺰﺩﻩﭖ ﻛﯧﻠﯩﭗ، ﻗﻮﻧﺎﻗﻠﯩﻘﺘﯩﻜﻰ ﻳﺎﺷﻼﺭ ﺑﯩﻠﻪﻥ ﺋﯘﭼﺮﯨﺸﯩﭗ ﻗﺎﻟﻐﺎﻥ. ﻳﺎﺷﻼﺭ ﺳﺎﻗﭽﯩﻼﺭﻧﯩﯔ 2 ﺳﯩﻨﻰ ﭘﯩﭽﺎﻕ ﺳﯧﻠﯩﭗ ﺋﯚﻟﺘﯜﺭﮔﻪﻥ، ﺋﺎﺯ ﺩﯦﮕﻪﻧﺪﻩ 4 ﺳﺎﻗﭽﯩﻨﻰ ﻳﺎﺭﯨﻼﻧﺪﯗﺭﻏﺎﻥ، ﺳﺎﻗﭽﯩﻼﺭﻧﯩﯔ ﺑﯩﺮﻯ ﻗﯧﭽﯩﭗ ﻛﻪﺗﻜﻪﻥ ﺋﯩﺪﻯ.

ﺑﯘ ﯞﻩﻗﻪ 8 - ﺋﺎﻱ ﻛﯩﺮﮔﻪﻧﺪﯨﻦ ﺑﯧﺮﻯ ﺋﯘﻳﻐﯘﺭ ﻗﺎﺭﺷﯩﻼﺷﻘﯘﭼﻰ ﻛﯜﭼﻠﯩﺮﯨﻨﯩﯔ ﺧﯩﺘﺎﻱ ﺑﯩﺨﻪﺗﻪﺭﻟﯩﻚ ﻛﯜﭼﻠﯩﺮﯨﮕﻪ ﻗﺎﺭﺷﻰ ﺋﯧﻠﯩﭗ ﺑﺎﺭﻏﺎﻥ 4 - ﻗﯧﺘﯩﻤﻠﯩﻖ ﻫﯘﺟﯘﻣﻰ ﺑﻮﻟﯘﭖ ﻫﯧﺴﺎﺑﻠﯩﻨﯩﺪﯗ. ﺋﯘﻧﯩﯔ ﺋﯜﺳﺘﯩﮕﻪ ﺑﯘ ﯞﻩﻗﻪ ﺧﯩﺘﺎﻱ ﺋﻮﻟﯩﻤﭙﯩﻚ ﻳﯩﻐﯩﻨﯩﺪﯨﻦ ﻛﯧﻴﯩﻦ ﺭﺍﻳﻮﻧﺪﺍ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﻛﯜﭼﻠﯩﺮﯨﮕﻪ ﻗﺎﺭﺷﻰ ﻛﻪﯓ - ﻛﯚﻟﻪﻣﻠﯩﻚ ﺗﺎﺯﯨﻼﺵ ﻫﻪﺭﯨﻜﯩﺘﻰ ﺑﺎﺷﻠﯩﻐﺎﻥ ﻣﻪﺯﮔﯩﻠﺪﻩ ﻳﯜﺯ ﺑﻪﺭﺩﻯ.