ﺷﯩﻨﺠﺎﯓ ﺳﺎﻗﭽﻰ-ﺋﻪﺩﻟﯩﻴﻪ ﻣﻪﻛﺘﯩﭙﯩﺪﻩ ﺗﻮﻗﯘﻧﯘﺵ ﻳﯜﺯ ﺑﻪﺭﺩﻯ

"ﺷﯩﯖﺪﺍﯞ" ﮔﯧﺰﯨﺘﯩﻨﯩﯔ ﺧﻪﯞﻩﺭ ﻗﯩﻠﯩﺸﯩﭽﻪ، 20-ﺳﯧﻨﺘﻪﺑﯩﺮ ﻛﯜﻧﻰ ﺋﯜﺭﯛﻣﭽﻰ ﺷﻪﻫﯩﺮﯨﮕﻪ ﺟﺎﻳﻼﺷﻘﺎﻥ ﺷﯩﻨﺠﺎﯓ ﺋﻪﺩﻟﯩﻴﻪ ﺳﺎﻗﭽﻰ ﻣﻪﻛﺘﯩﭙﯩﺪﻩ ﺋﯘﻳﻐﯘﺭ ﺋﻮﻗﯘﻏﯘﭼﯩﻼﺭ ﺑﯩﻠﻪﻥ ﺧﯩﺘﺎﻱ ﺋﻮﻗﯘﻏﯘﭼﯩﻼﺭ ﺋﺎﺭﯨﺴﯩﺪﺍ 500 ﺩﯨﻦ ﺋﺎﺭﺗﯘﻕ ﺋﺎﺩﻩﻡ ﻗﺎﺗﻨﺎﺷﻘﺎﻥ ﺗﻮﻗﯘﻧﯘﺵ ﻳﯜﺯ ﺑﯧﺮﯨﭗ، ﺑﯩﺮ ﻗﺎﻧﭽﻪ ﺋﻮﻥ ﻛﯩﺸﻰ ﺋﯧﻐﯩﺮ ﻳﺎﺭﯨﻼﻧﻐﺎﻥ.

ﺧﻪﯞﻩﺭﺩﻩ ﺋﯧﻴﺘﯩﻠﯩﺸﯩﭽﻪ، ﺗﻮﻗﯘﻧﯘﺵ ﺗﯩﻨﭽﻼﻧﺪﯗﺭﯗﻟﻐﺎﻥ ﺑﻮﻟﯘﭖ، ﺗﻮﻗﯘﻧﯘﺵ ﺟﻪﺭﻳﺎﻧﯩﺪﺍ ﺋﯩﻜﻜﻰ ﺗﻪﺭﻩﭖ ﻛﺎﻟﺘﻪﻙ، ﺗﯚﻣﯜﺭ ﻗﺎﺗﺎﺭﻟﯩﻖ ﻫﻪﺭ ﺧﯩﻞ ﻧﻪﺭﺳﯩﻠﻪﺭﻧﻰ ﺋﯩﺸﻠﯩﺘﯩﭗ ﺋﯘﺭﯗﺷﻘﺎﻥ. ﯞﻩﻗﻪﻧﯩﯔ ﻛﯧﻠﯩﭗ ﭼﯩﻘﯩﺶ ﺳﻪﯞﻩﺑﻰ ﻫﺎﺯﯨﺮﭼﻪ ﺋﯧﻨﯩﻖ ﺋﻪﻣﻪﺱ، ﺑﯩﺮﺍﻕ ﺳﻪﯞﻩﺑﻨﯩﯔ ﺧﻪﻧﺰﯗ ﺋﻮﻗﯘﻏﯘﭼﯩﻼﺭﻧﯩﯔ ﺋﯘﻳﻐﯘﺭ ﺋﻮﻗﯘﻏﯘﭼﯩﻼﺭﻏﺎ ﻛﯚﺭﺳﯩﺘﯩﯟﺍﺗﻘﺎﻥ ﺑﯧﺴﯩﻤﯩﻨﯩﯔ ﺋﺎﺧﯩﺮﻯ ﭘﺎﺭﺗﻼﺵ ﺩﻩﺭﯨﺠﯩﺴﯩﮕﻪ ﻳﻪﺗﻜﻪﻧﻠﯩﻜﻰ ﺑﯩﻠﻪﻥ ﻣﯘﻧﺎﺳﯩﯟﻩﺗﻠﯩﻚ ﺋﯩﻜﻪﻧﻠﯩﻜﻰ ﭘﻪﺭﻩﺯ ﻗﯩﻠﯩﻨﻤﺎﻗﺘﺎ.

ﺑﯘ ﻣﻪﻛﺘﻪﭘﺘﻪ ﻫﻪﺭ ﻣﯩﻠﻠﻪﺗﺘﯩﻦ ﺗﻪﺭﻛﯩﭗ ﺗﺎﭘﻘﺎﻥ ﻣﯩﯖﺪﯨﻦ ﺋﺎﺭﺗﯘﻕ ﺋﻮﻗﯘﻏﯘﭼﻰ ﺑﺎﺭﻟﯩﻘﻰ ﺑﯩﻠﺪﯛﺭﯛﻟﻤﻪﻛﺘﻪ، ﺷﯩﻨﺠﺎﯓ ﺋﻪﺩﻟﯩﻴﻪ ﺳﺎﻗﭽﻰ ﻣﻪﻛﺘﯩﭙﻰ ﺋﻪﺳﻠﯩﺪﯨﻜﻰ ﺷﯩﻨﺠﺎﯓ ﺋﻪﺩﻟﯩﻴﻪ ﻣﻪﻛﺘﯩﭙﻰ ﺑﯩﻠﻪﻥ ﺳﺎﻗﭽﻰ ﻣﻪﻛﺘﯩﭙﯩﻨﻰ ﺑﯩﺮﻟﻪﺷﺘﯜﺭﯛﺵ ﺋﺎﺳﺎﺳﯩﺪﺍ ﻗﯘﺭﯗﻟﻐﺎﻥ ﺑﻮﻟﯘﭖ، ﺑﯘ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﺪﯨﻜﻰ ﺳﺎﻗﭽﻰ ﺋﻮﻓﯩﺘﺴﯧﺮﻻﺭ ﯞﻩ ﺋﻪﺩﻟﯩﻴﻪ ﺧﺎﺩﯨﻤﻠﯩﺮﯨﻨﻰ ﺗﻪﺭﺑﯩﻴﯩﻠﻪﻳﺪﯨﻐﺎﻥ ﺑﯩﺮﺩﯨﻦ ﺑﯩﺮ ﺋﻮﺭﯗﻥ ﺑﻮﻟﯘﭖ ﻫﯧﺴﺎﺑﻠﯩﻨﯩﺪﯗ.

ﺧﻮﯕﻜﻮﯕﺪﯨﻜﻰ ﺟﯘﯕﮕﻮ ﻛﯩﺸﯩﻠﯩﻚ ﻫﻮﻗﯘﻕ ﯞﻩ ﺩﯦﻤﻮﻛﺮﺍﺗﯩﻚ ﻫﻪﺭﯨﻜﯩﺘﻰ ﺋﯘﭼﯘﺭ ﻣﻪﺭﻛﯩﺰﯨﻨﯩﯔ ﺋﺎﺷﻜﺎﺭﯨﻠﯩﺸﯩﭽﻪ، ﺟﯧﺪﻩﻝ ﺋﯩﻜﻜﻰ ﻗﯩﺰ ﺋﻮﻗﯘﻏﯘﭼﯩﻨﯩﯔ ﺋﺎﺷﺨﺎﻧﯩﺪﺍ ﺋﯘﺭﯗﺷﯘﭖ ﻗﯧﻠﯩﺸﯩﺪﯨﻦ ﭘﻪﻳﺪﺍ ﺑﻮﻟﻐﺎﻥ ﺑﻮﻟﯘﭖ، ﺳﺎﻗﭽﯩﻼﺭ ﺑﯘ ﺋﯩﻜﻜﻰ ﻗﯩﺰﻧﻰ ﯞﻩ ﺋﯘﻻﺭﻧﯩﯔ ﺩﻭﺳﺘﻠﯩﺮﯨﻨﻰ ﺗﯘﺗﯘﭖ ﻛﻪﺗﻜﻪﻥ ﺋﯩﻜﻪﻥ. ﺑﯘ ﺗﻮﻗﯘﻧﯘﺷﺘﺎ ﺋﺎﺩﻩﻡ ﺋﯚﻟﯜﺵ ﯞﻩﻗﻪﺳﻰ ﻛﯧﻠﯩﭗ ﭼﯩﻘﻘﺎﻧﻠﯩﻘﻰ ﺑﯩﻠﺪﯛﺭﯛﻟﻤﻪﻛﺘﻪ. ﻟﯧﻜﯩﻦ، ﻣﻪﻛﺘﻪﭖ ﺩﺍﺋﯩﺮﯨﻠﯩﺮﻯ ﺑﯘﻧﻰ ﺋﯩﻨﻜﺎﺭ ﻗﯩﻠﻐﺎﻥ، ﺋﻪﻣﻤﺎ ﭘﻪﻗﻪﺕ ﻳﺎﺭﯨﻼﻧﻐﺎﻧﻼﺭﻧﯩﯔ ﺩﻭﺧﺘﯘﺭﺧﺎﻧﯩﻐﺎ ﺋﯧﻠﯩﭗ ﻛﯧﺘﯩﻠﮕﻪﻧﻠﯩﻜﯩﻨﻰ ﺋﯧﺘﯩﺮﺍﭖ ﻗﯩﻠﻐﺎﻥ. ﺷﯘﻧﯩﯖﺪﻩﻙ ، ﺋﯘﻳﻐﯘﺭ ﺋﻮﻗﯘﻏﯘﭼﯩﻼﺭ ﺑﯩﻠﻪﻥ ﺧﻪﻧﺰﯗ ﺋﻮﻗﯘﻏﯘﭼﯩﻼﺭ ﺋﺎﺭﯨﺴﯩﺪﯨﻜﻰ ﺑﯘ ﺗﻮﻗﯘﻧﯘﺷﻨﯩﯔ ﺳﺎﻗﭽﻰ ﺋﯩﺸﻠﯩﺘﯩﭗ ﺑﺎﺳﺘﯘﺭﯗﺵ ﺩﻩﺭﯨﺠﯩﺴﯩﮕﻪ ﻳﻪﺗﻤﯩﮕﻪﻧﻠﯩﻜﯩﻨﻰ ﺑﯩﻠﺪﯛﺭﮔﻪﻥ.

ﻣﯘﺳﯘﻟﻤﺎﻧﻼﺭﻧﯩﯔ ﺭﺍﻣﯩﺰﺍﻥ ﺋﯧﻴﯩﺪﺍ ﺳﺎﻗﭽﻰ ﯞﻩ ﺋﻪﺩﻟﯩﻴﻪ ﻣﻪﻛﺘﯩﭙﯩﺪﻩ ﻳﯜﺯ ﺑﻪﺭﮔﻪﻥ ﺑﯘ ﺧﯩﻞ ﺗﻮﻗﯘﻧﯘﺵ ﯞﻩﻗﻪﺳﯩﻨﯩﯔ ﺗﻪﭘﺴﯩﻼﺗﻰ ﻫﯚﻛﯜﻣﻪﺕ ﺋﺎﺧﺒﺎﺭﺍﺕ ﯞﺍﺳﯩﺘﯩﻠﯩﺮﯨﺪﺍ ﺧﻪﯞﻩﺭ ﻗﯩﻠﯩﻨﻤﯩﻐﺎﻥ ﻫﻪﻣﺪﻩ ﺑﯘ ﻫﻪﻗﺘﯩﻜﻰ ﺋﯘﭼﯘﺭﻻﺭ ﻗﺎﻣﺎﻝ ﻗﯩﻠﯩﻨﻐﺎﻥ ﺑﻮﻟﺴﯩﻤﯘ، ﻟﯧﻜﯩﻦ ﺑﻪﺭﯨﺒﯩﺮ ﺑﯘ ﯞﻩﻗﻪ ﻫﻪﻗﻘﯩﺪﯨﻜﻰ ﺋﯘﭼﯘﺭﻻﺭ ﺳﯩﺮﺗﻘﺎ ﺗﺎﺭﻗﯩﻠﯩﭗ ﻛﻪﺗﻜﻪﻥ. (ﺋﯜﻣﯩﺪﯞﺍﺭ)