D u q ning 6-nöwetlik wekiller qurultiyi myunxénda bashlandi

Ixtiyariy muxbirimiz ekrem
2017-11-10
Élxet
Pikir
Hembehr
Print
  • Print
  • Hembehr
  • Pikir
  • Élxet

10-Öktebir küni dunya uyghur qurultiyining 6-nöwetlik pewqul'adde wekiller qurultiyi gérmaniyening myunxén shehiride bashlandi.

D u q ning 6-nöwetlik pewqul'adde qurultiyi 11-ayning 10-künidin 12-künigiche 3 kün dawamlishidiken. Pewqul'adde qurultayning échilish murasimi bügün sa'et 10:00 da myunxén shehiridiki kristal méhmanxanisida sherqiy türkistanning istiqlal marshi bilen bashlandi. 

Dunyaning herqaysi elliridin kelgen wekiller orunliridin turushup, milliy marshqa hörmet bildürüshti. Arqidin gérmaniyening dölet marshi orunlandi. Échilish murasimigha dunya uyghur qurultiyining bash katipi dolqun eysa riyasetchilik qildi. 

Bu qétimqi qurultaygha asiya, amérika, yawropa elliridiki 20 din artuq dölettin wekillikke tallan'ghan 120 din artuq uyghur wekil qatnashti. Bularning ichide qazaqistanliq moysipitlardin riza semedi, qehriman ghojamberdi, qirghizistanliq moysipitlardin tursun islam, rozimuhemmed hajim, türkiyelik moysipitlardin hamutxan göktürk, gérmaniyelik moysipitlardin enwerjan qatarliq dewa ademlirimu bar idi. D u q ning herqaysi ellerdiki rehberliri asasiy jehettin toluq qatnashqan bolup, wekiller, méhmanlar, közetküchiler, sherep méhmanliri hemde mulazimet xadimlirini qoshqanda 150 din artuq adem bu qétimqi qurultaygha ishtirak qildi.

Yighin'gha yene 15 etrapida chet'ellik sherep méhmanliri teklip qilin'ghan bolup, bularning ichide gérmaniye parlaméntining ezasi margarita bawzi xanim, yawropa parlaméntining sabiq ezasi we pan-yawropa herikitining re'isi bérnd possélt, yawropa parlaméntining ezasi hélga trupél, en'gliyening sabiq ichki ishlar ministiri norman bakér, amérika démokratiyini ilgiri sürüsh fondining sabiq mu'awin re'isi lu'isa gréwa, wakaletsiz milletler teshkilatining bash katipi marino basduxén, sürgündiki tibet parlaméntining ezasi tubtén wangchén, amérika démokratiyini ilgiri sürüsh fondi asiya ishliri bölümining mes'uli lé'a larson, shiddetsiz radikal partiyining b d t diki wekili la'ura hars, tehdit astidiki milletlerni qoghdash teshkilatining xadimi hanno shidlér, shiwétsariyening kishilik hoquq mutexessisi patrik mayer, türk fédératsiyonining re'isi shentürk doghrayol qatarliqlar échilish murasimigha daxil boldi hemde nutuq sözlidi. 

Gérmaniye parlaméntining ezasi, sabiq yéshillar partiyisining bawariyediki re'isi, uyghurlarning qedinas dosti margaréta bawzi xanim sherep méhmanliri ichidin tunji bolup sözge teklip qilindi. U, dunya uyghur qurultiyining 6-nöwetlik wekiller qurultiyini qizghin tebrikleydighanliqini bildürdi. Shuning bilen birge u yene kishilik heq-hoquqliri yolida küresh qiliwatqan pidakar uyghurlargha hörmet bildüridighanliqini we öziningmu herqachan uyghur milliy dewasigha qolidin kélishiche yar-yölekte bolidighanliqini tekitlidi.

En'gliye, amérika, italiye, bélgiye, ispaniye, shwétsariye qatarliq ellerdin alayiten d u q ning 6-nöwetlik wekiller qurultiyigha qatnishish üchün kelgen sherep méhmanlirimu bir birlep söz qilip, uyghur milliy mujadilisini qollaydighanliqini we uyghurlarningmu dunyadiki bashqa hör, azad milletlerge oxshash erkin-azade yashishigha tilekdashliq bildüridighanliqini tilgha aldi. Ular sözliride xitay hakimiyitining nöwette uyghur diyarida yolgha qoyuwatqan qattiq basturush siyasetlirini eyipleshti.

Yighinning échilish murasimi ikki yérim sa'et dawamlashti. Yighin küntertipige bina'en, chüshtin kéyin sa'et 14:00 tin bashlap qurultayning ichki yépiq yighini bashlandi. Bu yighinda aldi bilen qurultay da'imiy komitétining d u q re'isi rabiye xanimni qurultayning aliy rehbiri dep tonuydighanliqi toghrisidiki qarari oqup ötüldi hemde rabiye xanimning muhajirettiki 12 yilliq hayatida körsetken töhpilirige baha bérildi. Uningdin kéyin d u q ning mu'awin re'isliri, bash katipi we herqaysi komitétlarning xizmet doklati teqdim qilindi. 

D u q rehberlirining bergen melumatlirigha asaslan'ghanda, bu qétimqi qurultayda teshkilat tüzülmisi islah qilinish bilen birge, yéngidin rehberlik hey'iti saylap chiqilidiken we qurultayning yéngi pilan-programmiliri otturigha qoyulidiken.

Dunyaning herqaysi jayliridin gérmaniyening myunxén shehirige jem bolghan wekiller bu qétimqi qurultaydin zor ümidlerni kütüwatqanliqini ipade qilishmaqta.

Toluq bet