«Гуәнтанамодики уйғурлар: бимәнилик тутқунлири» намлиқ филим тәйвәндики филим фестивалида көрситилди

Мухбиримиз ирадә
2017-09-22
Елхәт
Пикир
Һәмбәһр
Принт
  • Принт
  • Һәмбәһр
  • Пикир
  • Елхәт
Тәйбей шәһиридә өткүзүлгән «йайлақ мәдәнийити фестивали» дин бир көрүнүш. 2017-Йили 22-Сентәбир, тәйбей, тәйвән.
Тәйбей шәһиридә өткүзүлгән «йайлақ мәдәнийити фестивали» дин бир көрүнүш. 2017-Йили 22-Сентәбир, тәйбей, тәйвән.
RFA/Irade

22-Сентәбир, йәни җүмә күни тәйвәнниң тәйбей шәһиридә «йайлақ мәдәнийити фестивали» башланған болуп, фестивалниң башлиниш филими сүпитидә «гуәнтанамодики уйғурлар: бимәнилик тутқунлири» намлиқ һөҗҗәтлик филим көрситилгән. Игилинишичә, бу фестивалға қатнаштурулған 10 филимниң төти уйғурларға мунасивәтлик икән.

Канада вәтәндашлиқидики патришйо һенрикуез әпәндиниң режисорлуқ қилиши билән ишләнгән 90 минутлуқ һөҗҗәтлик филим «гуәнтанамодики уйғурлар: бимәнилик тутқунлири» тәйвәндики филим фестивалиниң башлиниш филими сүпитидә қойулуп, көрүрмәнләрниң зор қизиқишини қозғиди. Бу филимдә гуәнтанамодин албанийәгә йәрләштүрүлгән абабәкри қасим, бермудаға йәрләштүрүлгән хелил вә палавға йәрләштүрүлгән әхмәт қатарлиқ үч нәпәр уйғурниң әслимә вә байанлири арқилиқ гуәнтанамодики уйғур тутқунларниң һайати тәсвирләнгән. 

Филимдә йәнә гуәнтанамодики уйғур тутқунларниң делосиға биваситә арилашқан кишиләрму орун алған болуп, уларға узун йил тәрҗиманлиқ қилған рошән аббас ханим әнә шуларниң бири. У фестивални уйуштурғучи орун болған «тәйвән-Тибәт достлуқ җәмийити» ниң тәклипигә бинаән тәйвәнгә берип, фестивалниң ечилиш мурасимиға қатнашқан вә филимдин кейинки сөһбәт йиғинида соалларға җаваб бәргән. Рошән ханим зийаритимизни қобул қилип, филим қойулғандин кейин көрүрмәнләр арисида зор тәсир пәйда қилғанлиқини ейтти.

Бу филим фестивалиға тәклип билән қатнашқучиларниң бири йапонийә уйғур җәмийитиниң рәиси илһам мәхмут әпәнди болуп, у филим фестивалиниң вуҗудқа чиқиш җәрйани һәққидә тохталди. У, «уйғур, тибәт, моңғул қатарлиқ милләтләр мәсилисини тәйвән хәлқигә тонуштуруш вә хитай һакимийитиниң әпти-Бәширисини ечип бериш бу қетимқи фестивалниң асасий мәқсити», деди. 

Филим фестивалиға қатнашқан тәйвәнлик әдиб хоң хоң ечилиш мурасимида қилған сөзидә, гуәнтанамодики уйғурларға аит филимни көргәндин кейинки һессийатини мундақ байан қилди: «биз лйу шйавбониң, ли миңҗениң делолирини көргән. Әмма уйғурлар һәққидики бу ‹бимәнилик тутқунлири' филимини көргәндин кейин улар арисида зич бағлиниш барлиқини һес қилисиз. Бу филим пәқәт хитай чоң қуруқлуқини чүшиниш үчүнла әмәс бәлки бир аз санлиқ милләтниң қандақ қилип зораванлиқ йолини таллашқа мәҗбур болғанлиқини чүшиништиму муһим қиммәткә игә дәп ойлаймән.» 

Рошән аббас ханим мәзкур һөҗҗәтлик филимниң уйғурлар һазирқидәк террорлуқ билән қарилиниватқан бир шараитта тәйвәндә қойулушиниң уларниң уйғур мәсилисини йәниму чоңқурлиған һалда чүшиниши үчүн әһмийити барлиқини тәкитлиди. 

Мәлум болушичә, бу филим фестивалида йүзләрчә филим арисидин талланған 10 филим қойулған болуп, униң төти уйғурларға аит икән. Бу филимларниң һәммиси чәтәллик режисорлар тәрипидин ишләнгән вә уйғурларниң сийасий, иҗтимаий мәсилилири әтраплиқ йорутулған филимлар икән. 

Мәзкур филим фестивалиға қатнаштурулған филимлар тәйвәнниң тәйбей, тәйнән, тәйчоң қатарлиқ 3 шәһиридә көрситилидиған болуп, фестивал тәйвәндә хели зор қоллашқа еришкән. Гуәнтанамодики уйғурлар һәққидә ишләнгән бу филим һазирға қәдәр канада, әнглийә, голландийә, түркийә, чехийә қатарлиқ дөләтләрдики филим фестиваллирида қойулуп йуқири баһаға еришкән.

Пикирләр (0)
  • Принт
  • Һәмбәһр
  • Елхәт
Толуқ бәт