"térrorchining uyghurlar bolush éhtimali yuqiri" dégen bayanatqa uyghurlar naraziliq bildürdi

Ixtiyariy muxbirimiz erkin tarim
2017-01-05
Élxet
Pikir
Hembehr
Print
  • Print
  • Hembehr
  • Pikir
  • Élxet
Istanbuldiki réyno réstoranigha hujum qilghan térrorchi.
Istanbuldiki réyno réstoranigha hujum qilghan térrorchi.
Socila Media

Bügün türkiye mu'awin bash ministiri weysi qaynaq istanbuldiki réyno réstoranigha hujum qilghan térrorchining kimlikining aydingliship bolghanliqini, uyghur bolush éhtimalining yuqiri ikenlikini élan qildi. Mezkur bayanattin kéyinla qeyseride pa'aliyet élip bériwatqan sherqiy türkistan medeniyet we hemkarliq teshkilati re'isi bayanat élan qilip naraziliq bildürdi.

Mezkur térrorluq weqesi yéngi yil kéchisi yüz bergen bolup, weqede qolida aptomat kötürgen térrorchi kechlik kulubqa bésip kirip kulubtiki yéngi yilni qutluqlawatqanlarni qara-qoyuq oqqa tutqan. Yette minutche birqanche qétim oqdan almashturup, qirghinchiliq élip barghan térrorchi, kéyin qoralini tashlap we kiyimini almashturup, bir taksigha chiqip kulubtin qachqan. Weqede 12 si türk, qalghanliri chetellik bolup 39 kishi ölgen, 65 kishi yarilan'ghan. 5 Kündin béri türkiye saqchiliri mezkur térrorchini qolgha chüshürüsh üchün keng kölemlik opératsiye élip barmaqta. Xewerlerdin melum bolushiche, türk saqchiliri istanbulning zeytinburni, siliwre, sefaköy rayonlirida, izmir shehirining bornowa we qonaq rayonlirida köp sandiki uyghurning öyini axturghan bolup, bezi uyghurlar tutup kétilip soraqqa tartilghandin kéyin qoyup bérilgen bolsa, yene beziliri hazirghiche soraqqa tartilmaqta.

Weqe heqqidiki xewer we mulahizilerde térrorchining ottura asiya türkiy jumhuriyetliridin kelgen térrorluq teshkilati ezasi ikenliki tekitlinish bilen birlikte uning yaxshi terbiyelen'gen mergenliki, temkinliki we tejribiliklikimu xewerlerning merkizi bolmaqta. Hazirghiche bérilgen türkiye xewerliride térrorchining ottura asiyaliq ikenliki jezmleshtürülüsh bilen birlikte, uning qirghiz, özbék yaki uyghur bolup qélish éhtimalliqi ilgiri sürülmekte.

Biz bu heqte köz qarishini igilesh üchün türkiye istratégiyelik chüshenche instituti mutexessisi doktor erkin ekrem we sherqiy türkistan medeniyet we hemkarliq jemiyiti re'isi séyit tümtürk ependi, we istanbuldiki uyghur erbabliridin adil abdughopur ependiler bilen söhbet élip barduq.

Séyit tümtürk ependi bügün chüshte türkiye bash ministir mu'awini wéysi qaynaq ependining bayanatini anglighandin kéyinla ichki ishlar ministiri sulayman soylugha téléfon qilip naraziliq bildürgenlikini, arqidinla bayanat élan qilghanliqini we bayanatini türkiyediki "sözjü" gézitining torida élan qilin'ghanliqini bayan qildi.

Doktor erkin ekrem ependi térrorni bir millet, bir dölet we melum bir qowimning nami bilen atashning toghra emeslikini bayan qildi.

Séyit tümtürk ependi türkiyediki bezi axbarat wasitilirining weqe yüz bergen birinchi kündin étibaren, qesten "sherqiy türkistanliq uyghur qildi" dégen sözni tekitleshke tirishiwatqanliqini bayan qildi.

Doktor erkin ekrem ependi xitaydiki axbarat wasitiliridiki xewerlerde bu weqe yüzbergendin tartip uyghurlarning qilghanliqi ilgiri sürülüwatqanliqi, eger bu qétimqi térrorluq weqesini uyghur qilghan bolup chiqsa, türkiye-bilen xitay otturisidiki térrorluqqa qarshi hemkarliqning küchiyishi mumkinliki hem xitayning bu pursettin yaxshi paydilinidighanliqini bayan qildi.

Malayshiya we tayland arqiliq türkiyege kélip olturaqlashqan uyghur adil abdughopur ependi istanbuldiki uyghurlarning namizini oqup, tijaritini qilip normal hayatini dawamlashturuwatqanliqini bayan qildi.

"hürriyet" gézitining bu heqtiki bir xewiride bayan qilinishiche, türkiye saqchiliri térrorchining kim ikenlikini éniqlap bolghan, emma térrorchi téxi tutulmighan bolghachqa ashkarilashni toghra körmigen.

Toluq bet