Londun Uyghur ansambilining ottura asiya féstiwalidiki konsérti alqishqa érishti

Muxbirimiz méhriban
2016.10.07
london-uyghur-ansambil-senet.jpg London Uyghur ansambili ottura asiya medeniyet féstiwalida. 2016-Yili, 6-öktebir, en'gliye london.
Photo: RFA


6 - Öktebir en'giliyining london shehiride ötküzülgen ottura asiya medeniyet féstiwalida, london Uyghur ansambili orunlighan nomurlar tamashibinlarning yuqiri bahasi we alqishigha érishti.

Londun Uyghur ansambilidin radiyomiz ziyaritini qobul qilghan rehime xanim we eziz eysa ependilerning bildürüshiche, bir hepte dawamlishidighan féstiwalda, londun Uyghur ansambili échilish murasimida konsért körsitishke orunlashturulghan. Bu qétim ansambilning eslide bar bolghan ezalirigha yéngidin artislar qoshulup mezmun béyighanliqi üchün, ular orunlighan naxsha - usul programmiliri kulopning keypiyatini yenimu yuqiri kötergen. Londun Uyghur ansambilining bu qétimqi sen'et kéchiliki en'giliyige oxshash Uyghurlar nispeten az bolghan yawropa dölitide Uyghur medeniyiti we Uyghur weziyitini tonutushta yene bir qétim öz hessisini qoshqan.

Londun Uyghur ansambili qurulghandin buyan, özining nadir sen'et nomurliri arqiliq en'giliye qatarliq yawropa döletliride tonulghan xelqaraliq sen'et ömikige aylan'ghanliqi teriplinip kelmekte. Mezkur ansambil en'giliyining londun shehiride ötküzülüwatqan“Échiwétilgen ottura asiya xelq'ara medeniyet féstiwali”ning 6 - öktebirdiki échilish murasimida körsetken nadir sen'et programmiliri bilen yene bir qétim zor alqish we sherep qazandi.

Ansambil ezaliridin radiyomiz ziyaritini qobul qilghan eziz eysa ependi we rehime xanimlarning bildürüshiche, bu qétimqi medeniyet féstuwalini en'giliyide pa'aliyet élip bériwatqan arzu sen'et ömiki, london uniwérsitétining afriqa we sherrqshunasliq inistitoti, londun Uyghur ansambili, yipek yoli usul ömiki we en'giliye b b s agéntliqi qatarliq axbarat orunliri birliship uyushturghan. Türkiye we ottura asiyadiki özbékstan, qazaqstan, qirghizstan, türkmenstan, ezerbeyjan qatarliq türk tilliq dölet we rayonlardin kelgen sen'etkarlar, ottura asiya döletlirining en'giliyidiki elchixane xadimliri, ottura asiya medeniyitige qizziqidighan tetqiqatchilar we en'giliyide olturaqliship qalghan ottura asiyaliq tamashibinlar qatnashqan.

Eziz eysa ependi bayanida, bu qétimqi sen'et körükining alahidikliki heqqide toxtilip, köpligen orunlarning hemkarlishishi bilen ötküzülgen chong tiptiki xelq'araliq medeniyet féstiwaligha Uyghurlargha wakaliten qatnashqan londun Uyghur ansambilining en'giliyidek ottura asiya elliri xelqi nispeten az bolghan yawropa dölitide Uyghur medeniyitini tonutush, Uyghur weziyitini anglitishta yene bir qétim öz töhpisini qoshqanliqini bildürdi.

Londun Uyghur ansambilining özining yangraq we xush awazi bilen tonulghan naxshichisi rehime xanim ziyaritimizni qobul qilip, féstiwalning tunji künidiki sen'et nomurini körsitish sheripige érishken londun Uyghur ansambilining, bu qétimqi konsértining muweppeqiyetlik bolghanliqini, bolupmu ansambilgha pida'iy bolup yéngidin qatnashqan dilzat qatarliq yash artislar orunlighan sen'et nomurliri kéchilikning keypiyatini téximu yuqiri kötergenlikini bildürdi.

Rehime xanim yene, londun Uyghur ansambilining xaraktéri, meqsiti we kelgüsi pilanliri heqqidimu toxtilip, ansambil ezalirining pütünley pida'iylardin teshkillen'genlikini, ularning yillardin buyan héchqandaq heq telep qilmay , Uyghur sen'itini, medeniyitini we Uyghurlarning ehwalini en'giliye qatarliq yawropa elliride tonutush we anglitishni özining wezipisi qilip kelgenlikini, en'giliye qatarliq yawropa döletliridin özining sen'et talanti bar téximu köp Uyghurlarning mezkur ömekke qatnishishini qarshi alidighanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.