Misirda tutqun qilin'ghan oqughuchilarni qutquzush imza toplash herikiti bashlandi

Ixtiyariy muxbirimiz ihsan
2017.07.17
shiwetsiye-abbas-helil-ihsan.jpg Widiyoluq imza toplash pa'aliyiti teshkilligüchiliridin shiwétsiyedin abbas ependi, xelil ependi we ihsan ependi (soldin onggha). 2017-Yil, shiwétsiye.
RFA/Ihsan

Xitay da'irilirining telipi bilen, misirdiki Uyghur oqughuchilarni tutqun qilish herikiti 4-iyuldin bashlap keng kölemde élip bérilghandin kéyin, pütün dunyadiki Uyghurlar bu weqedin ijtima'iy uchur wasitiliri arqiliq xewer tépip, özlükidin teshkillinip jiddiy halda oqughuchilarni qutquzush herikitige qétildi.

Muhajirettiki Uyghurlar misirdin qaytidighan oqughuchilargha bélet élip bérish, ayrodromgha aldigha chiqip kütüwélish, yataqqa orunlashturush, bir éghiz öyini heqsiz ayrip bérish qatarliq jehetlerde pidakarliq qildi. Dunyaning her qaysi jayliridiki Uyghur teshkilatlarning teshkillishide iqtisad toplap, misirdiki oqughuchilarning éhtiyajliq ishlirigha serp qilishqa seperwer qilindi.

Bu weqeni xelq'ara axbaratlargha anglitishta, ijtima'iy uchur wasitiliride aktip xizmet qiliwatqan Uyghur yashlar axbarat wasitilirini yéngi uchurlar bilen teminlep hemde ularning neq meydan ziyaritini qobul qilip, misirdiki Uyghur oqughuchilarning tutqun qilinish ehwalini tepsiliy anglatti.

Shiwétsiyede pa'aliyet qiliwatqan aktip yashlardin abbas ependining teshkillishi bilen shiwétsiye, gollandiye, kanada, amérika, awstraliye qatarliq döletlerde yashawatqan Uyghur yashlar misirda tutqun qilin'ghan Uyghur oqughuchilarni qoyup bérish toghrisida 10-iyuldin bashlap widiyoluq imza toplash pa'aliyitini qanat yaydurup, ijtima'iy uchur wasitiliride tarqitishqa bashlighan.Bu widiyoda alte neper Uyghur yash rawan bolghan in'gliz tilida misir hökümitidin Uyghur oqughuchilarni qoyup bérishini, eger bular xitaygha qayturulsa bu Uyghurlarning hayati xewp ichide qalidighanliqini, pütün dunyadiki insanperwer kishilerningmu bu mesilige jiddiy qarishini muraji'et qilghan.

Bu heqte ziyaritimizni qobul qilghan shiwétsiyede yashawatqan musteqil pa'aliyetchi we bu qétimliq pa'aliyetni teshkilligüchi abbas ependi widiyoluq imza toplash pa'aliyiti heqqide toxtaldi.

Gollandiyede pa'aliyet qiliwatqan aktip pa'aliyetchi abdughéni sabit 6-iyul küni eljezire téléwiziyisi muxbirning ziyaritini qobul qilip, misirdiki tutqun qilin'ghan Uyghurlarning ehwalini anglatqan idi. Abdughéni sabit ziyaritimizni qobul qilip, ijtima'iy uchur wasitiliridin paydilinip jama'et pikri toplash arqiliq misirdiki Uyghur oqughuchilarning awazini anglitishning muhimliqini tekitlidi. 

Abbas ependi sözide yene, barliq Uyghur yashlarning özi turushluq döletlerdiki teshkilatlargha béqinipla qalmay, Uyghur mesilisini anglitishta öz imkaniyitidin paydilinip, belgilik hesse qoshushi kéreklikini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.