Qeyseri wilayetlik diniy ishlar idarisi bashliqi sherqiy türkistan qur'an kursini ziyaret qildi

5 - Ayning 22 - küni qeyseri türkistan mehellisidiki Uyghurlar achqan qur'an kursigha yardem yighish üchün yimek yermenkisi ötküzüldi. Sherqiy türkistan medeniyet we hemkarliq teshkilatining baghchisida ötküzülgen yermenkide Uyghurlarning her xil tamaqlirini kishilerge sétip chüshken pul sherqiy türkistan qur'an kursigha bérildi.

Sherqiy türkistan qur'an kursi üchün ötküzülgen bu pa'aliyetke qeyseri wilayetlik diniy ishlar idarisi bashliqi ghalip qocher ependi, qojasinan rayonliq diniy ishlar idarisi bashliqi yahya chanqaya ependilermu qatnashti. Qeyseride pa'aliyet élip bériwatqan sherqiy türkistan medeniyet we hemkarliq jem'iyiti 8 yildin béri qeyseri diniy ishlar idarisining himaye qilishi bilen qur'an kursi échiwatqan bolup, bu kursqa tetilde Uyghur oqughuchilar, bashqa waqitlarda chonglar qatnashmaqta. 1987 - Yili qeyserige kélip olturaqlashqan bir Uyghur ayal bu kursqa qatnishish arqiliq nurghun diniy melumatqa ige bolghanliqini bayan qilip ötti.

Qeyseri diniy ishlar idarisi bashliqi ghalip qocher ependi ziyaret qilishtiki meqsiti toghrisida toxtilip mundaq dédi:

- Bu yerde qur'an kursi we türkistan jamisining hemkarlishishi bilen kermes ötküziliwatidu. Hemmeylen qilghan tamaqlirini élip kélip bu yerde tarqitiwatidu. Bizmu jüme namizidin kéyin bu yerge kelduq. Men Uyghurlarni yaxshi tonuymen. 7 - 8 Yildin béri qeyseride wezipe ötewatimen. Sherqiy türkistanliq Uyghurlarning bizning könglimizde alahide orni bar.

U, Uyghurlarning nahayiti yaxshi kishiler ikenlikini, özining Uyghurlarning islam dinini yaxshi öginishi üchün köp yardem qiliwatqanliqini bayan qilip mundaq dédi:

- Uyghurlar bilen nahayiti yaxshi munasiwitimiz bar. Hem musulman, hem türkiy millet bolghachqa, bashqiche yaxshi bolidiken. Héchqandaq mesilimiz yoq. 1965 - Yilidin tartip qeyseride Uyghurlar bar. Ötken yili malayshiya we tayland arqiliq 1000 etrapida Uyghur keldi. Ulargha meschit we mektep sélip berduq. Hazir nahayiti bextlik turmush köchüriwatidu.

Türkiyege kelgen Uyghurlar xitay hökümitining dinini chekligenlikini ilgiri süriwatidu, siz qandaq qaraysiz? dégen so'algha u mundaq jawab berdi:

- Xuda kishilerni erkin yaratti. Insanlar yashash, mal mülkke ige bolush we din'gha étiqad qilish erkinlikige ige. Buni dunyada héchqandaq ademning cheklimesliki kérek. Kim cheklise, u zalim bolidu. Allah bu zalimlarni kechürmeydu. Biz Uyghur qérindashlirimizgha du'a qilimiz. Allah Uyghur qérindashlirimizni baldurraq erkinlikke érishtursun.

8 Yildin béri, qeyseri Uyghur mehellisidiki qur'an kursida ders bériwatqan shen'gül xanim, qur'an kursi toghrisida melumat bérip mundaq dédi:

- Hazir bizning 30 kishidin terkip tapqan bir sinipimiz bar. Men birla oqutquchi ders bériwatimen. Ular qur'an we diniy melumatlarni ögendi. Bir heptidin kéyin kursni püttürüp diplomlirini alidu. 6 - Aydin bashlap oqughuchilargha kurs achimiz, 9 - ayda qayta chonglargha qur'an we diniy melumatlarni ögitimiz. Qish kursigha kelgen oqughuchilar 18 yashtin 75 yashqiche, bularning hemmisi hazir qur'an oqushni öginip boldi. Her kurs pütey dégende mushundaq kermes - yermenke échip, sétilghan yimeklerning pulini qur'an kursgha i'ane qilimiz.

Biz bu pa'aliyet heqqide téximu tepsiliy melumat élish üchün bu pa'aliyetke qatnashqan ayshem xan bilen söhbet élip barduq.