Washin'gton we etrapidiki Uyghurlarning kolliktip iptar pa'aliyiti bashlandi

Muxbirimiz eziz
2016.06.13
amerika-uyghur-ramizan-iftar-2016.jpg Washin'gton we etrapidiki Uyghurlarning kolliktip iptar pa'aliyiti
RFA


Amérikining paytexti washin'gton we uninggha qoshna rayonlardiki Uyghurlar amérika Uyghur birleshmisi uyushturghan ramizan éyidiki tunji qétimliq kolliktip iptar pa'aliyitide jem boldi. Dostluq we Uyghurluq muhebbitige toyun'ghan bu pa'aliyette Uyghurche ta'am we semimiy ramizanliq tilekler pa'aliyetke ishtirak qilghan hemmeylenni söyündürdi.

Yéqinqi yillardin buyan amérikigha her xil yollar bilen köchüp kéliwatqan Uyghurlar sanining éship bérishigha egiship, amérikining paytexti washin'gton we uninggha qoshna herqaysi sheherler Uyghur muhajirliri birqeder merkezlik orunlashqan rayonlarning birige aylandi. Éniq bolmighan sitatistikigha asaslan'ghanda washin'gtonni merkez qilghan wirjiniye we qoshna shitatlarda ikki minggha yéqin Uyghur jama'iti olturaqlashqan bolup, mezkur Uyghur topluqining jama'etchilik ishlirimu shuninggha mas halda muhim pa'aliyet küntertipliridin orun élishqa bashlidi. Bolupmu téxi yéqinda ötküzülgen amérika Uyghur birleshmisining 8 - qurultiyi we re'is saylimida jama'etchilik ishlirining muhimliqi alahide tekitlen'gen idi. Mana mushu jama'etchilik ishlirining tunji qedimi süpitide amérika Uyghur birleshmisi 11 - iyun küni washin'gton rayonidiki Uyghur a'ililirige ramizan éyidiki tunji qétimliq iptar ziyapiti uyushturdi.

Bu qétimliq iptar pa'aliyiti wirjiniye shitatining fayirfaks shehiridiki amérika - türk dostluq jem'iyitining zalida ötküzüldi. Pa'aliyetke a'ile boyiche ishtirak qilghan Uyghurlar we ularning perzentliri bir qétimliq jem bolush pa'aliyitining hozurini sürgech birlikte éghiz achti. Shuning bilen birge jama'et bolup sham namizini birlikte oqudi. Amérika Uyghur birleshmisining re'isi élshat hesen bu heqte toxtilip, mushundaq bir pa'aliyetning chet'ellerde hijret we wetensizlik iztirapida yüriwatqan Uyghur jama'iti üchün öz - ara birlik we ittipaqliqni téximu mukemmelleshtürüshte zor ehmiyetke ége dep qaraydighanliqini tekitlidi.

Iptar pa'aliyitide wirjiniye shitatidiki dangliq Uyghur ashpezliridin musa teyyarlighan Uyghur polusi we bir qisim a'ililer teyyarlap kelgen tamaqlar tartilghandin kéyin, amérika Uyghur birleshmisining hey'et ezasi jur'et obul söz qilip, birleshmining mushu ramizan éyida her shenbe kechte iptar pa'aliyiti uyushturghanliqini, waqti yar bergen Uyghur we bashqa qiziqquchi kishilerning kélip pa'aliyetke qatnishishi qizghin qarshi élinidighanliqini bildürdi.

Ariliqtiki dem élishta amérika Uyghur birleshmisining yéngidin saylan'ghan hey'et ezasi méhray memtili ziyaritimizni qobul qilip, bu pa'aliyetning washin'gton etrapidiki Uyghur a'ililiri üchün, bolupmu ayallar we xanim - qizlar üchünmu bir qétimliq ramizanliq jem bolush bolghanliqini, özining buningdin nahayiti söyün'genlikini bildürdi.

Jür'et obul bu heqte toxtilip, washin'gton we yéqin etraptiki Uyghur a'ililirining bu xildiki pa'aliyetlerge qatniship bérishining amérika Uyghur birleshmisining kelgüsidiki xizmetlirining téximu yaxshi ishlinishi üchün hesse qoshqanliq bolidighanliqini tilgha aldi.

Axirida, amérikidiki Uyghur jama'itige tonushluq Uyghur ziyaliyliridin roshen abbas wetendiki ramizanliq cheklimiler heqqide türlük xewerler melum boluwatqan nöwettiki ehwalda bu qétimqi yighilishning özi üchün xoshalliq bolghan bolsimu, wetendiki Uyghur qérindashlarning ramizanliq ehwali özining könglini yérim qilidighanliqini bildürdi.

Radiyomiz muxbirlirining Uyghurlar diyaridiki menbelerdin igiligen axbaratliri hemde dunya metbu'atlirining alaqidar uchurliridin melum bolushiche, Uyghurlar diyaridiki musulman ammisining ramizanliq pa'aliyetliri türlük cheklimiler ichide dawam qiliwatmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.