Türkiye bash ministiri Uyghurlarni qobul qildi, qizil'ay teshkilati Uyghur musapirlargha yardem qildi

Qizil'ay teshkilati qeyseri shehiride yashawatqan 350 a'ile musapir Uyghurgha yardem buyumlirini apirip berdi. 2017-Yili 9-iyun, qeyseri, turkiye.

Qizil'ay teshkilati qeyseri shehiride yashawatqan 350 a'ile musapir Uyghurgha yardem buyumlirini apirip berdi. 2017-Yili 9-iyun, qeyseri, turkiye.

Ramzan éyi munasiwiti bilen, ötken hepte türkiye bash ministiri binali yildirim ependi türkiyediki ammiwi teshkilatlarning mes'ullirigha bergen ziyapitige sherqiy türkistan ma'arip we hemkarliq jem'iyiti re'isi hidayetullah oghuzxan ependimu teklip boyiche qatnashti.

Hidayetulah oghuzxan ependi alahide teklip boyiche türkiye bash ministiri binali yildirim bergen iptar ziyapitige qatnashqanliqini we Uyghurlarning telipini öz ichige alghan yazmini özige bergenlikini bayan qildi. 

Türkiyening eng chong yardem teshkilatliridin biri bolghan qizil'ay teshkilatining qeyseri talash shöbisi türkiyening qeyseri shehiride yashawatqan 350 a'ile musapir Uyghurgha yagh, un, gürüch we taziliq buyumliridin terkib tapqan yardem buyumlirini apirip berdi. 3 Chong aptomobilgha liq qachilan'ghan mezkur buyumlarni qeyseride pa'aliyet élip bériwatqan sherqiy türkistan medeniyet we hemkarliq teshkilati mes'ulliri we Uyghur musapirlargha wakaliten emin qari qatarliq kishiler tapshurup élip, bir tutash halda 350 Uyghur a'ilisige üleshtürüp berdi. 

Ziyaritimizni qobul qilghan qizil'ay talas shöbisining mes'uli ünal yüksel ependi qeyerde yardemge mohtaj insanlar bolsa, shu yerde qizil'ay teshkilatining barliqini, türkiyede panahliq tiligen musapirlargha dawamliq yardem buyumliri tarqitip bériwatqanliqini, ramzan éyi munasiwiti bilen bu qétim qeyseridiki 350 musapir a'ilige yardem buyumliri tarqitip bergenlikini bayan qildi. 

6-Ayning 9-küni türk qizil'ay talas shöbisi élip kelgen bu yardem buyumlirini tapshurup élip, shu küni Uyghurlargha tarqitip bergen sherqiy türkistan medeniyet we hemkarliq jem'iyiti re'isi séyit tümtürk ependi, musapirlargha wakaliten yardem tarqitishqa qatnashqan emin qari we yardemni tapshurup alghan Uyghur musapirlar bilen téléfon söhbiti élip barduq. 

Qizil'ay teshkilati talas shöbisining mes'uli ünal yüksel ependi Uyghur musapirlargha her da'im yardem qilidighanliqini bayan qilip mundaq dédi: “Biz türk qizil'ayi bolush süpitimiz bilen qeyerde qiyinchiliqi bar kishiler bolsa uninggha yardem qiliwatimiz. Bu yilmu iraqtin kelgen türkmenlerge, süriyedin kelgen türkmenlerge we sherqiy türkistandin kelgen musapirlargha yardem qiliwatimiz. Qachan bir nersige éhtiyaji bolsa, bizge iltimas qilsa imkaniyitimiz yar bérishiche yardem qilishni dawam qilimiz.”

Uyghurlargha wakaliten yardem buyumlirini tapshurup élip Uyghur a'ililerge tarqitip bergen séyit tümtürk ependi, her yili bolghinidek, bu yilmu türkiyening konya wilayitidiki bezi ammiwi teshkilatlarning türkiyening yardem teshkilati qizil'ay arqiliq yardem buyumliri élip kélip bergenlikini bayan qildi. 

Yardemni tapshurup alghan Uyghur musapirlardin biri bolghan émin qari, un, yagh, gürüch we sopun qatarliq buyumlarning yétim-yésir, qéri, késelmen we tul ayallargha tarqitip bérilgenlikini bayan qildi. 

Qimmetlik radi'o anglighuchilar, 2014- 2015-yilliri malayshiya we tayland arqiliq türkiyege kelgen Uyghurlarning sani 7 ming etrapida bolup, bularning ichidin 2000 etrapida Uyghur türkiyening qeyseri shehiride dölet waqitliq bergen öylerde turmaqta. Bular 2 yildin béri bezi resmiyetliri toluq bolmighachqa ishliyelmey kelgen idi. Ötken yilning axiri ishlesh ruxsiti testiqlan'ghandin kéyin, hazir köp sanda Uyghur xizmet tépip özining turmushini özi qamdimaqta.Séyit tümtürk ependi bu heqte toxtaldi. Imin qari ependimu hazir qeyseride 150-160 etrapida Uyghurning xizmet tépip öz turmushini qamdawatqanliqini tekitlidi. 

Ten salametliki yar bermigechke bir yerde xizmet tépip ishliyelmeywatqan dilshat ependi yardem buyumliridin özigimu tarqitip bérilgenlikini, ikki yildin béri özlirige bundaq yardemni qiliwatqan türk ammiwi teshkilatlirigha we türk xelqige minnetdarliqini bildüridighanliqini bayan qildi. 

Türkiye dölitige qarashliq qizil'ay talas shöbisining bashliqi ünal yüksel ependi yéqinda Uyghur musapirlargha iptar ziyapiti béridighanliqini, ziyapet jeryanida ularning teleplirini anglap, némige éhtiyaji bolsa uni bérishke tirishidighanliqini bayan qilip mundaq dédi: “Biz yéqinda ulargha iptar ziyapiti bérimiz. Ularning qiyinchiliqliri toghrisida melumat igileymiz. Peqet ashliqla emes, néme lazim bolsa uni bérimiz. Késel Uyghurlar üchün kariwat telep qildi, derhal buni apirip bérimiz. Her da'im Uyghur musapirlargha yardem qolimizni uzitimiz.” 

Türkiyening konya wilayitidiki bezi ammiwi teshkilatlar türkiye qizil'ay teshkilati arqiliq ötken yilmu 7 tonna etrapida yardem buyumi ekélip bergen idi.