Ey ziyu: türkiyidiki jasusluq heriketlirimizge eng köp meblegh salduq

Ixtiyariy muxbirimiz qutluq
2013.08.16
sultanahmet-305.png Türkiyening istanbul shehridiki sultan ehmed meschiti
Public Domain


Sabiq xitay dölet bixeterlik ministirliqining shinjang ishliri ishxanisida xizmet qilghan ey ziyu texelusluq xitay jasusi özining Uyghurlargha a'it jasusluq heriketliri heqqidiki melumatigha asasen bergen “Türkiyidiki jasusluq heriketlirimizge eng köp meblegh salduq” namliq yazma doklatida,xitayning türkiyide jasusluq herikiti üchün réstoran échish jeryani we meqsiti toghrisida toxtalghan.

Ey ziyu doklatida türkiyidiki jasusluq réstoranining échilishi heqqide toxtilip mundaq dédi:

- Türkiyide biz 90 - yillarda bir réstoran achqan iduq. U réstoran xojayinining ayali Uyghur, özi xitay idi. Güli esli aptonom rayonluq charwichiliq nazaritide olturushluq,tolimu güzel, kélishken qiz idi. Biz uni mexsus terbiyilep, türkiyige yolgha sélish we u yerde mexsus jasusluq herikitimiz üchün baza qurush niyitide etirapliq pilan tüziduq. Qiz ana tiligha, xitay tiligha rawan idi. Xitay yigit bolsa Uyghur, qazaq tillirini merkizi milletler uniwérsitétida oqughan idi. Qiz dölet bixeterlik ministirliqining wezipisini ulugh dep bilgenliktin, bizning meslihetimiz boyiche xitay yigit bilen toy qildi. Biz ularni shundaq qilip deslepte ottura asiyagha yolgha salduq. Bu ikkisi ottura asiyada yeni almatada mezgil turghandin kéyin türkiyige bardi. Türkiyining sayahet rayonlirida deslepte kichikrek ashxana achti kéyin, ular qizning türkiyidiki tughqanlirining yardimi bilen türkiye puqraliqigha ötüp bolghandin kéyin, heshemetlik xitayche réstorandin birni achti. Shuning bilen bizning türkiyidin igileydighan axbaratimiz etirapliq boldi. Bu réstorant hazirmu bar.

Ey ziyu doklatida türkiyidiki Uyghur jasusliri heqqide tepsiliy toxtilip mundaq dédi:

- Türkiyidiki Uyghur jasuslar töwendikidek üch xilgha bölünidu. Birinchisi, xitay konsulxanisigha biwaste jasusluq qilidighan jasuslar bolup, bu xildiki jasuslar waqti - waqtida konsulxana bilen uchriship, uchur bérip turidu. Ikkinchi xildiki jasuslar Uyghur aptonom rayondiki bixeterlik tarmaqlirigha yeni wilayet we oblastlargha biwaste qaraydighan jasuslar bolup, ular intérnét we téléfon arqiliq uchur yollaydu. Üchinchi xildiki jasuslar béyjinggha biwaste qaraydighan jasuslardur.

Birinchi xildiki jasuslargha konsulxana biwaste heq béridu, ular élip kirgen pasportlargha tizdin wiza bérilidu. Ayliq qulaqliq heqqi adette ikki - üch yüz dollar bolup, héyt - ayem, bayram künlerde ularni konsulxana méhman qilip qoyidu we sogha béridu. Üch yilda bir qétim xitayni heqsiz ziyaret qilish sayahet pursitige érishidu. Ikkinchi xildiki jasuslar bolsa chégridin élip kirgen we élip kétilmekchi bolghan mallirigha baj kechurum qilinidu. Üchinchi xildikiler bolsa merkizi hökümet ulargha xitayning bankiliridin ösümsiz qerz bérish, xitay ichide shirket qurushigha masliship, shirket qurdurush, qurulghan bu shirketler weten ichi we sirtidin Uyghurlar heqqide uchur toplash qatarliq wezipilerde bolidu. Ürümchide 90 - yillardin kéyin ta hazirghiche qurulghan türkiye puqrasi Uyghurlarning shirketliri asasen jasusluq organliri teripidin hemkarliship qurulghan shirketler. Mesilen: ürümchidiki yéngi sheher tereqqiyat rayondiki xxxx hemkarliq shirkiti, xxx bürküt soda sariyi, xxx kéyim - kichek shirkiti, xxx béliq mehsulatliri shirkiti dégenler bizning shirketlirimizdur.

Ey ziyu béyjing olimpiktin ilgiri türkiyide élip bérilghan xitayning jasusluq herikiti toghrisida toxtilip mundaq dédi:

- Biz béyjingda ötküzülidighan olimpik yighinini aman - ésen ötküzüsh üchün türkiyidiki jasusluq herikitimizge köplep meblegh salduq. Türkiyidiki xeterlik dep qaralghan we béyjing olimpikige adem teshkillep, buzghunchiliq qilish éhtimali bar dep qaralghan tesiri küchlük shexislerning 24 sa'etlik herikitini közitish üchün, türkiye hökümitige we türkiyidiki barliq Uyghur jasuslirigha uqturush qilip, ular toghrisida igiligen barliq uchurlarni bizge waqtida yollashqa buyriduq. Uyghur aptonom rayonluq dölet bixeterliki organlirining xadimliri türkiyige xitayning shirket pasporti bilen wizisiz kirish shara'itidin paydilinip, sapakoydiki xx qulaqning öyide, zeytun burnudiki aka - uka qulaq xx lerning öyliride bimalal yétip qopup yürüp, etirapliq toplan'ghan uchurlarni merkezge yollap turdi. Bundin bashqa türkiyidiki nopuzluq Uyghur doxturliridin xx ependiler xitay konsulxanisida, özlirining doxturxanilirida we hetta öyliride bolsun, bizge kéreklik uchurlarni bérip turdi. Enqeredin bolsa birinchi qolluq etirapliq sistimiliq yézilghan xx xanimning we xx ependining yollighan uchurlirigha apirin oqumay turalmaymiz. Istanbulning yawropa bölikide olturidighan xx ependi we xx xanimlarmu elwette maxtashqa tégishlik türkiyidiki qulaqlirimiz dep qaraymen.

Ey ziyu doklatida türkiyidin yilda teshkillinip xitay we Uyghur aptonom rayonigha sayahetke baridighan türkiyidiki Uyghurlarning asasliqi xitay jasusluq organlirining qulaqliri ikenlikini bayan qilip mundaq dédi:

- Enqerediki bash elchixanimizge xitay jasusluq organlirining dölet ichidin yollighan tizimlikke asasen türkiyidiki qulaqlirimiz xitay we Uyghur aptonom rayonida sayahetke orunlashturulidu. Sayahet jeryanida ular bilen jasusluq organlirining xadimliri ayrim künlerde söhbette bolidu. Kechliki ulargha alahide ziyapet bérilip, haraq - sharap qoyulup, axiri ularning hojrisigha birdin xitay qizliri hemrahliqqa kirgüzülidu. Bu ömekning ichide hetta sherqiy türkistanning musteqiliqi üchün afghanistanda qoral tutqan xxx ependilermu bar.

Axirida ziyaritimizni qobul qilghan türkiyidiki dunya Uyghur qurultiyining mu'awin re'isi séyit tümtürk bu mesile heqqide toxtilip ötti.

Awaz ulinishidin tepsilatini anglang.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.