Вашингитондики уйғурлар “ 5 - фиврал”ни хатириләп намайиш өткүзди

Бүгүн америка уйғур бирләшмиси вә уйғур кишилик һоқуқ вә демокиратийә фонди җәмийити 5 - феврал ғулҗа вәқәсини хатириләп вашингтондики хитай әлчиханиси алдида намайиш өткүзди. Намайишта уйғур миллий һәрикити рәһбири рабийә қадир ханим, 5 - фиврал шеһитлири вә мәһбуслириниң иш - излирини әсләп өтти, уларға вә уларниң аилә - тавабиатлириға һөрмәт билдүрди шундақла хитайниң шу күнки дөләт зораванлиқини әйиблиди. Намайишта уйғур паалийәтчиләрдин алим сейитоп билән өмәр қанатму сөз қилип 5 - феврал вәқәсиниң йеқинқи заман уйғур миллий һәрикитидики әһмийити, җүмлидин уйғур мәсилисиниң хәлқараға тонулушида ойниған башлатқуч ролиға юқири баһа бәрди вә уйғур хәлқиниң бу вәқәдә төлигән бәдәллирини мәңгү унтумайдиғанлиқини әскәртти. Бу нутуқлар намайишчиларниң қизғин алқиш вә шуарлири билән дәстәкләнди.

Һөрмәтлик радийо аңлиғучилар, буниңдин 20 йиллар аввал ғулҗа шәһиридә уйғур яшлири арисида наркоманлиқ йәни хироинға адәтлиниш баш көтүрүп көплигән яш җанларға замин болған, көплигән аилиләрни вәйран қилған. Күндин - күнгә кеңийиватқан бу апәтниң алдини елиш вә уни тосушта хитай һөкүмити немә үчүндур пассип турувалған. Хитай сақчилири сиясий делоларда көрситидиған у сәзгүрлүк вә қаттиқ қоллуқини хироин әткәсчилирини тутуш вә җазалашта көрсәтмигән. Вәзийәтниң тәрәққияти вә ақивитини алдин көрәлигән бир түркүм яшлар бу чағда оттуриға чүшүп мәшрәп уюштуруш йоли билән, мәшрәптә яшларға диний тәрбийә бериш арқилиқ уйғур хәлқи дуч кәлгән бу апәткә тақабил турушта бәлгилик нәтиҗә яратқан. Көп санда яшлар бу хәтәрлик йолдин өзини тартқан, әмма мукапатлинишқа тегишлик бу актип паалийәт, хитайни әндишигә салған вә хитай тәрәп шу мәшрәпләрдә йетәкчилик рол ойниған диний затларни тутқун қилған. Уйғур яшлири әнә шу тутқунларниң қоюп берилишини тәләп қилип ғулҗа шәһиридә намайиш өткүзгән. Тенчлиқ шәклидә башланған бу намайиш қанлиқ бастурулған.

Бүгүн вашингитондики хитай әлчиханиси алдиға топланған намайишчилар, мана шу вәқәни хатирилимәктә.