ﺋﺎﻣﯧﺮﯨﻜﺎ ﻣﯘﺩﺍﭘﯩﺌﻪ ﻣﯩﻨﺴﺘﯩﺮﻟﯩﻜﻰ، ﺋﺎﻓﻐﺎﻧﯩﺴﺘﺎﻧﻐﺎ 3200 ﻧﻪﭘﻪﺭ ﺋﺎﻣﯧﺮﯨﻜﺎ ﺩﯦﯖﯩﺰ ﺋﺎﺭﻣﯩﻴﯩﺴﯩﻨﯩﯔ ﻗﯘﺭﯗﻗﻠﯘﻗﺘﺎ ﺟﻪﯓ ﻗﯩﻠﻐﯘﭼﻰ ﻗﯩﺴﯩﻤﻠﯩﺮﯨﻨﻰ ﺋﻪﯞﻩﺗﯩﺪﯨﻐﺎﻧﻠﯩﻘﯩﻨﻰ ﺟﺎﻛﺎﺭﻟﯩﺪﻯ

• ﻣﯘﺧﺒﯩﺮﯨﻤﯩﺰ ﺋﯚﻣﻪﺭ ﻗﺎﻧﺎﺗﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺳﻪﻳﺸﻪﻧﺒﻪ ﻛﯜﻧﻰ، ﺋﺎﻣﯧﺮﯨﻜﺎ ﻣﯘﺩﺍﭘﯩﺌﻪ ﻣﯩﻨﺴﺘﯩﺮﻟﯩﻜﻰ، ﺋﺎﻓﻐﺎﻧﯩﺴﺘﺎﻧﻐﺎ 3200 ﻧﻪﭘﻪﺭ ﺋﺎﻣﯧﺮﯨﻜﺎ ﺩﯦﯖﯩﺰ ﺋﺎﺭﻣﯩﻴﯩﺴﯩﻨﯩﯔ ﻗﯘﺭﯗﻗﻠﯘﻗﺘﺎ ﺟﻪﯓ ﻗﯩﻠﻐﯘﭼﻰ ﻗﯩﺴﯩﻤﻠﯩﺮﯨﻨﻰ ﺋﻪﯞﻩﺗﯩﺪﯨﻐﺎﻧﻠﯩﻘﯩﻨﻰ ﺟﺎﻛﺎﺭﻟﯩﺪﻯ. ﺳﯩﻴﺎﺳﯩﻲ ﻣﯘﻻﻫﯩﺰﯨﭽﯩﻠﻪﺭﻧﯩﯔ ﺑﯩﻠﺪﯛﺭﯛﺷﯩﭽﻪ، ﺑﯘ ﻫﻪﺭﯨﻜﻪﺕ، ﺑﯩﺮ ﺗﻪﺭﻩﭘﺘﯩﻦ ﺗﺎﻟﯩﺒﺎﻧﻼﺭﻧﯩﯔ ﺋﺎﻓﻐﺎﻧﯩﺴﺘﺎﻧﺪﯨﻜﻰ ﭘﺎﺋﺎﻟﯩﻴﻪﺗﻠﯩﺮﯨﻨﻰ ﻛﯜﻧﺴﯧﺮﻯ ﻛﯜﭼﻪﻳﺘﯩﯟﺍﺗﻘﺎﻧﻠﯩﻘﯩﻨﻰ ﻛﯜﺭﺳﻪﺗﺴﻪ، ﻳﻪﻧﻪ ﺑﯩﺮ ﺗﻪﺭﻩﭘﺘﯩﻦ، ﺋﺎﻣﯧﺮﯨﻜﺎ ﻫﯚﻛﯜﻣﯩﺘﯩﻨﯩﯔ ﺗﯧﺮﺭﻭﺭﭼﯩﻠﯩﻘﻘﺎ ﻗﺎﺭﺷﻰ ﺋﯘﺭﯗﺷﺘﺎ ﺩﯨﻘﻘﻪﺕ ﻣﻪﺭﻛﯩﺰﯨﻨﻰ ﻗﺎﻳﺘﯩﺪﯨﻦ ﺟﻪﻧﯘﺑﯩﻲ ﺋﺎﺳﯩﻴﺎ ﺭﺍﻳﻮﻧﯩﻐﺎ ﻗﺎﺭﺍﺗﻘﺎﻧﻠﯩﻘﯩﻨﯩﯔ ﺋﯩﭙﺎﺩﯨﺴﻰ ﺋﯩﻜﻪﻥ.

ﺋﺎﻓﻐﺎﻧﯩﺴﺘﺎﻧﻐﺎ ﻳﻪﻧﻪ 3200 ﻧﻪﭘﻪﺭ ﺋﺎﻣﯧﺮﯨﻜﺎ ﺩﯦﯖﯩﺰ ﺋﺎﺭﻣﯩﻴﯩﺴﯩﻨﯩﯔ ﻗﯘﺭﯗﻗﻠﯘﻗﺘﺎ ﺟﻪﯓ ﻗﯩﻠﻐﯘﭼﻰ ﻗﯩﺴﯩﻤﻠﯩﺮﯨﻨﯩﯔ ﺋﻪﯞﻩﺗﯩﻠﯩﺸﻰ ﺑﯩﻠﻪﻥ، ﺋﺎﻓﻐﺎﻧﯩﺴﺘﺎﻧﺪﯨﻜﻰ ﺋﺎﻣﯧﺮﯨﻜﺎ ﻫﻪﺭﺑﯩﻲ ﻗﯩﺴﯩﻤﻠﯩﺮﯨﻨﯩﯔ ﺳﺎﻧﻰ 30000 ﻛﯩﺸﯩﮕﻪ ﻳﯩﺘﯩﺪﯨﻜﻪﻥ. ﮔﻪﺭﭼﻪ، ﺋﺎﻓﻐﺎﻧﯩﺴﺘﺎﻧﺪﯨﻜﻰ ﺋﺎﻣﯧﺮﯨﻜﺎ ﻫﻪﺭﺑﯩﻲ ﻗﯩﺴﯩﻤﻠﯩﺮﯨﻨﯩﯔ ﺳﺎﻧﻰ، ﺋﺎﻣﯧﺮﯨﻜﯩﻨﯩﯔ ﺋﯩﺮﺍﻗﺘﻜﻰ ﻫﻪﺭﺑﯩﻲ ﻗﯩﺴﯩﻤﻠﯩﺮﯨﻐﺎ ﺳﯧﻠﯩﺸﺘﯘﺭﻏﺎﻧﺪﺍ ﻧﺎﻫﺎﻳﯩﺘﻰ ﺋﺎﺯ ﻛﯚﺭﯛﻧﺴﯩﻤﯘ، ﺋﻪﻣﻤﺎ ﺋﺎﻓﻐﺎﻧﯩﺴﺘﺎﻧﻐﺎ ﻗﻮﺷﯘﻣﭽﻪ ﺋﺎﻣﯧﺮﯨﻜﺎ ﻫﻪﺭﺑﯩﻲ ﻗﯩﺴﯩﻤﻠﯩﺮﯨﻨﯩﯔ ﺋﻪﯞﻩﺗﯩﻠﮕﻪﻧﻠﯩﻜﻰ، ﺋﺎﻓﻐﺎﻧﯩﺴﺘﺎﻧﺪﺍ ﻣﻪﯞﺟﯘﺕ ﺋﺎﻣﯧﺮﯨﻜﺎ ﯞﻩ ﺷﯩﻤﺎﻟﯩﻲ ﺋﺎﺗﻼﻧﺘﯩﻚ ﺋﻮﻛﻴﺎﻥ ﺋﻪﻫﺪﻯ ﺗﻪﺷﻜﯩﻼﺗﻰ ﻫﻪﺭﺑﯩﻲ ﻛﯜﭼﻠﯩﺮﯨﻨﯩﯔ، ﺗﺎﻟﯩﺒﺎﻥ ﻗﺎﻟﺪﯗﻗﻠﯩﺮﯨﻨﯩﯔ ﻗﺎﺭﺷﯩﻠﯩﻖ ﻫﻪﺭﯨﻜﻪﺗﻠﯩﺮﯨﻨﻰ ﺑﺎﺳﺘﯘﺭﺍﻟﻤﯩﻐﺎﻧﻠﯩﻘﯩﻨﯩﯔ ﺑﯩﺮ ﺋﯩﭙﺎﺩﯨﺴﻰ ﻫﯧﺴﺎﺑﻠﯩﻨﯩﺪﯨﻜﻪﻥ.

ﺋﺎﻓﻐﺎﻧﯩﺴﺘﺎﻧﺪﯨﻜﻰ ﺗﺎﻟﯩﺒﺎﻥ ﻗﺎﻟﺪﯗﻗﻠﯩﺮﻯ، ﺩﻩﺳﻠﻪﭘﺘﻪ ﺋﺎﻓﻐﺎﻧﯩﺴﺘﺎﻧﻨﯩﯔ ﺟﻪﻧﯘﺑﯩﻲ ﺭﺍﻳﻮﻧﯩﺪﺍ ﺑﺎﺷﻼﺗﻘﺎﻥ ﻗﺎﺭﺷﯩﻠﯩﻖ ﻫﻪﺭﯨﻜﻪﺗﻠﯩﺮﯨﻨﻰ ﻧﯚﯞﻩﺗﺘﻪ ﺋﺎﻓﻐﺎﻧﯩﺴﺘﺎﻧﻨﯩﯔ ﭘﺎﻳﺘﻪﺧﺘﻰ ﻛﺎﺑﯘﻝ ﺷﻪﻫﯩﺮﯨﮕﻪ ﻛﯧﯖﻪﻳﺘﻜﻪﻥ ﺑﻮﻟﯘﭖ، ﭼﺎﺭﺷﻪﻧﺒﻪ ﻛﯜﻧﻰ ﻳﻪﻧﻰ ﺋﺎﻣﯧﺮﯨﻜﺎ ﻣﯘﺩﺍﭘﯩﺌﻪ ﻣﯩﻨﺴﯩﺘﯩﺮﻟﯩﻘﻰ ﺋﺎﻓﻐﺎﻧﯩﺴﺘﺎﻧﻐﺎ ﻳﻪﻧﻪ 3200 ﺋﻪﺳﻜﻪﺭ ﺋﻪﯞﻩﺗﯩﺪﯨﻐﺎﻧﻠﯩﻘﯩﻨﻰ ﺋﯧﻼﻥ ﻗﯩﻠﯩﭗ ﺑﯩﺮ ﻛﯜﻧﺪﯨﻦ ﻛﯧﻴﯩﻦ، ﻛﺎﺑﯘﻝ ﺷﻪﻫﯩﺮﯨﺪﯨﻜﻰ ﺋﻪﯓ ﭼﻮﯓ ﻣﯧﻬﻤﺎﻧﺨﺎﻧﯩﻼﺭﻧﯩﯔ ﺑﯩﺮﻯ ﻫﯧﺴﺎﺑﻼﻧﻐﺎﻥ ﯞﻩ ﺋﺎﺳﺎﺳﻪﻥ ﭼﻪﺗﺌﻪﻟﻠﯩﻜﻠﻪﺭ ﺗﯘﺭﯨﺪﯨﻐﺎﻥ، ﺳﻪﺭﯨﻨﺎ ﻣﯧﻬﻤﺎﻧﺨﺎﻧﯩﺴﯩﻐﺎ ﻗﺎﺭﯨﺘﺎ ﺋﯧﻠﯩﭗ ﺑﯧﺮﯨﻠﻐﺎﻥ ﺋﯚﺯﯨﻨﻰ ﺋﯚﻟﺘﯜﺭﯛﯞﯨﻠﯩﺶ ﺧﺎﺭﺍﻛﺘﯧﺮﻟﯩﻚ ﻫﯘﺟﯘﻣﺪﺍ، 8 ﻛﯩﺸﻰ ﺋﯚﻟﮕﻪﻥ.

ﺳﯩﻴﺎﺳﯩﻲ ﺋﺎﻧﺎﻟﯩﺰﭼﻰ ﺟﯧﺴﻮﻥ ﻣﻮﺗﻼﻙ ﯞﻩ ﺟﯩﻢ ﻟﻮﺑﻨﯩﯔ ﺋﺎﺳﯩﻴﺎ ﯞﺍﻗﺘﻰ ﮔﯧﺰﯨﺘﯩﺪﻩ ﺋﯧﻼﻥ ﻗﯩﻠﻐﺎﻥ ﻣﺎﻗﺎﻟﯩﺴﯩﺪﻩ ﺑﯩﻠﺪﯛﺭﯛﺷﯩﭽﻪ، ﺋﺎﻣﯧﺮﯨﻜﺎ ﻫﯚﻛﯜﻣﯩﺘﻰ، ﺋﺎﻓﻐﺎﻧﯩﺴﺘﺎﻧﻐﺎ ﺋﻪﯞﻩﺗﯩﻠﯩﺪﯨﻐﺎﻥ 3200 ﻧﻪﭘﻪﺭ ﻗﻮﺷﯘﻣﭽﻪ ﺋﺎﻣﯧﺮﯨﻜﺎ ﻗﯩﺴﯩﻤﻠﯩﺮﯨﻨﯩﯔ ﺗﺎﻟﯩﺒﺎﻧﻼﺭ ﻫﻪﺭﯨﻜﯩﺘﯩﻨﯩﯔ ﺑﺎﺳﺘﯘﺭﯗﻟﯘﺷﯩﺪﺍ ﻣﯘﻫﯩﻢ ﺭﻭﻝ ﺋﻮﻳﻨﺎﻳﺪﯨﻐﺎﻧﻠﯩﻘﯩﻨﻰ ﺋﯜﻣﯩﺪ ﻗﯩﻠﻤﺎﻗﺘﺎ. ﺷﯘﻧﺪﺍﻗﻼ ﺷﯩﻤﺎﻟﯩﻲ ﺋﺎﺗﻼﻧﺘﯩﻚ ﺋﻮﻛﻴﺎﻥ ﺋﻪﻫﺪﻯ ﺗﻪﺷﻜﯩﻼﺗﯩﻐﺎ ﺋﻪﺯﺍ ﺩﯙﻟﻪﺗﻠﻪﺭﺩﯨﻦ ﺋﺎﻓﻐﺎﻧﯩﺴﺘﺎﻧﻐﺎ ﺗﯧﺨﯩﻤﯘ ﻛﯚﭖ ﻫﻪﺭﺑﯩﻲ ﻗﯩﺴﯩﻢ ﺋﻪﯞﻩﺗﯩﺸﯩﻨﻰ ﺗﻪﻟﻪﭖ ﻗﯩﻠﻤﺎﻗﺘﺎ.

ﻟﯧﻜﯩﻦ ﺧﻪﯞﻩﺭﻟﻪﺭﮔﻪ ﻗﺎﺭﯨﻐﺎﻧﺪﺍ، ﺋﺎﻓﻐﺎﻧﯩﺴﺘﺎﻧﺪﯨﻜﻰ ﺗﺎﻟﯩﺒﺎﻧﻼﺭ ﻫﻪﺭﯨﻜﯩﺘﯩﮕﻪ ﻗﺎﺭﺷﻰ ﻗﺎﻧﺪﺍﻕ ﺑﯩﺮ ﻫﻪﺭﺑﯩﻲ ﺋﯩﺴﺘﺮﺍﺗﯧﮕﯩﻴﻪ ﺋﯩﺸﻠﯩﺘﯩﺶ ﺗﻮﻏﺮﯨﺴﯩﺪﺍ، ﺋﺎﻣﯧﺮﯨﻜﺎ ﺑﯩﻠﻪﻥ ﺷﯩﻤﺎﻟﯩﻲ ﺋﺎﺗﻼﻧﺘﯩﻚ ﺋﻮﻛﻴﺎﻥ ﺋﻪﻫﺪﻯ ﺗﻪﺷﻜﯩﻼﺗﯩﺪﯨﻜﻰ ﺋﯩﺘﺘﯩﭙﺎﻗﺪﺍﺷﻠﯩﺮﻯ ﺋﺎﺭﯨﺴﯩﺪﺍ ﺋﯩﺨﺘﯩﻼﭖ ﻣﻪﯞﺟﯘﺕ ﺑﻮﻟﯘﭖ، ﺑﯘ ﺋﯩﺨﺘﯩﻼﭖ ﭼﺎﺭﺷﻪﻧﺒﻪ ﻛﯜﻧﻰ ﺋﺎﻣﯧﺮﯨﻜﯩﻨﯩﯔ ﺷﯩﻤﺎﻟﯩﻲ ﺋﺎﺗﻼﻧﺘﯩﻚ ﺋﻪﻫﺪﻯ ﺗﻪﺷﻜﯩﻼﺗﯩﻨﯩﯔ ﺑﻪﺯﻯ ﻗﯩﺴﯩﻤﻠﯩﺮﯨﻨﻰ ﭘﺎﺭﺗﯩﺰﺍﻧﻠﯩﻖ ﺋﯘﺭﯗﺷﯩﻐﺎ ﻗﺎﺭﺷﻰ ﺗﯘﺭﯗﺷﻨﻰ ﺑﯩﻠﻤﻪﻳﺪﯗ ﺩﻩﭖ ﺋﻪﻳﯩﺒﻠﯩﺸﻰ ﯞﻩ ﻣﻪﺯﻛﯘﺭ ﺗﻪﺷﻜﯩﻼﺗﻨﯩﯔ ﺋﺎﻣﯧﺮﯨﻜﯩﻨﯩﯔ ﺑﯘ ﺋﻪﻳﯩﺒﻠﯩﺸﯩﻨﻰ ﺭﻩﺕ ﻗﯩﻠﯩﺸﻰ ﺑﯩﻠﻪﻥ ﺋﺎﺷﻜﺎﺭﺍ ﺋﻮﺗﺘﯘﺭﯨﻐﺎ ﭼﯩﻘﺘﻰ.

ﺋﺎﻣﯧﺮﯨﻜﺎ ﻣﯘﺩﺍﭘﯩﺌﻪ ﻣﯩﻨﺴﺘﯩﺮﻯ، ﺭﻭﺑﻪﺭﺕ ﮔﯧﺘﺲ ﺋﺎﻣﯧﺮﯨﻜﯩﺪﺍ ﭼﯩﻘﯩﺪﯨﻐﺎﻥ ﻟﻮﺱ ﺋﺎﻧﺠﯩﻠﯩﺲ ﯞﺍﻗﺘﻰ ﮔﯧﺰﯨﺘﯩﮕﻪ ﺑﻪﺭﮔﻪﻥ ﺑﺎﻳﺎﻧﺎﺗﯩﺪﺍ، ﺷﯩﻤﺎﻟﯩﻲ ﺋﺎﺗﻼﻧﺘﯩﻚ ﺋﻮﻛﻴﺎﻥ ﺋﻪﻫﺪﻯ ﺗﻪﺷﻜﯩﻼﺗﯩﻨﯩﯔ ﺋﺎﻓﻐﺎﻧﯩﺴﺘﺎﻧﺪﯨﻜﻰ ﻫﻪﺭﺑﯩﻲ ﻫﻪﺭﯨﻜﻪﺗﻠﯩﺮﯨﻨﻰ ﺗﻪﻧﻘﯩﺪ ﻗﯩﻠﯩﭗ، ﺷﯩﻤﺎﻟﯩﻲ ﺋﺎﺗﻼﻧﺘﯩﻚ ﺋﻮﻛﻴﺎﻥ ﺋﻪﻫﺪﻯ ﺗﻪﺷﻜﯩﻼﺗﯩﻨﯩﯔ ﺑﻪﺯﻯ ﻗﯩﺴﯩﻤﻠﯩﺮﻯ ﯞﻩ ﻫﻪﺭﺑﯩﻲ ﻣﻪﺳﻠﯩﻬﻪﺗﭽﯩﻠﯩﺮﻯ ﻫﻪﺭﺑﯩﻲ ﺟﻪﻫﻪﺗﺘﯩﻦ ﺗﺎﻟﯩﺒﺎﻧﻼﺭﻏﺎ ﻗﺎﺭﺷﻰ ﺗﯘﺭﯗﺵ ﻗﺎﺑﯩﻠﯩﻴﻪﺕ ﯞﻩﺋﯩﻘﺘﯩﺪﺍﺭﯨﻐﺎ ﺋﯩﮕﻪ ﺑﻮﻟﻤﺎﺳﻠﯩﻘﻰ ﻣﯘﻣﻜﯩﻦ ﺩﻩﭖ، ﻛﯚﺭﺳﻪﺗﻜﻪﻥ.

ﺷﯩﻤﺎﻟﯩﻲ ﺋﺎﺗﻼﻧﺘﯩﻚ ﺋﻮﻛﻴﺎﻥ ﺋﻪﻫﺪﻯ ﺗﻪﺷﻜﯩﻼﺗﯩﻨﯩﯔ ﺑﺎﺵ ﻛﺎﺗﯩﺒﻰ ﮔﯧﻨﯧﺮﺍﻝ ﺷﯧﻔﻪﺭ، ﺋﺎﻣﯧﺮﯨﻜﺎ ﻣﯘﺩﺍﭘﯩﺌﻪ ﻣﯩﻨﺴﺘﯩﺮﯨﻨﯩﯔ ﻣﻪﺯﻛﯘﺭ ﺗﻪﺷﻜﯩﻼﺗﻘﺎ ﻗﺎﺭﺍﺗﻘﺎﻥ ﺗﻪﻧﻘﯩﺪﻟﯩﺮﯨﻨﻰ ﺭﻩﺕ ﻗﯩﻠﯩﭗ، ﺷﯩﻤﺎﻟﯩﻲ ﺋﺎﺗﻼﻧﺘﯩﻚ ﺋﻮﻛﻴﺎﻥ ﻫﻪﺭﺑﯩﻲ ﻗﯩﺴﯩﻤﻠﯩﺮﯨﻨﯩﯔ ﯞﻩﺯﯨﭙﯩﺴﯩﻨﻰ ﺋﯩﺨﻼﺳﻤﻪﻧﻠﯩﻚ ﺑﯩﻠﻪﻥ ﺋﺎﺩﺍ ﻗﯩﻠﯩﯟﺍﺗﻘﺎﻧﻠﯩﻘﯩﻨﻰ ﺗﻪﻛﯩﺘﻠﯩﮕﻪﻥ.

ﻗﺎﻧﺪﺍﻕ ﺑﻮﻟﯘﺷﯩﺪﯨﻦ ﻗﻪﺗﺌﯩﻨﻪﺯﻩﺭ، ﺋﺎﻓﻐﺎﻧﯩﺴﺘﺎﻧﺪﯨﻜﻰ ﺗﺎﻟﯩﺒﺎﻥ ﻗﺎﻟﺪﯗﻗﻠﯩﺮﯨﻨﯩﯔ ﻗﺎﺭﺷﯩﻠﯩﻖ ﻫﻪﺭﯨﻜﻪﺗﻠﯩﺮﻯ 2002‏- ﻳﯩﻠﯩﺪﯨﻦ ﺑﯧﺮﻯ ﺑﻮﻟﯘﭘﻤﯘ، ﺋﺎﻣﯧﺮﯨﻜﺎ ﺋﺎﻓﻐﺎﻧﯩﺴﺘﺎﻧﺪﯨﻜﻰ ﻫﻪﺭﺑﯩﻲ ﻫﻪﺭﯨﻜﻪﺗﻠﻪﺭﻧﯩﯔ ﻣﻪﺳﺌﯘﻟﻠﯘﻗﯩﻨﻰ ﺷﯩﻤﺎﻟﯩﻲ ﺋﺎﺗﻼﻧﺘﯩﻚ ﺋﻮﻛﻴﺎﻥ ﺋﻪﻫﺪﻯ ﺗﻪﺷﻜﯩﻼﺗﯩﻐﺎ ﺋﯚﺗﻜﯜﺯﯛﭖ ﺑﻪﺭﮔﻪﻧﺪﯨﻦ ﺑﯧﺮﻯ ﺗﯧﺨﯩﻤﯘ ﻛﯜﭼﻪﻳﮕﻪﻥ.

ﺗﺎﻟﯩﺒﺎﻧﻼﺭﻧﯩﯔ ﻗﺎﺭﺷﯩﻠﯩﻖ ﻫﻪﺭﯨﻜﻪﺗﻠﯩﺮﯨﻨﯩﯔ ﻛﯜﭼﯩﻴﯩﺸﯩﺪﻩ، ﻳﻪﺭﻟﯩﻚ ﺧﻪﻟﻘﻠﻪﺭﻧﯩﯔ ﺷﯩﻤﺎﻟﯩﻲ ﺋﺎﺗﻼﻧﺘﯩﻚ ﺋﻮﻛﻴﺎﻥ ﺋﻪﻫﺪﻯ ﺗﻪﺷﻜﯩﻼﺗﻰ ﻗﯩﺴﯩﻤﻠﯩﺮﯨﻨﯩﯔ ﻫﻪﺭﺑﯩﻲ ﻫﻪﺭﯨﻜﻪﺗﻠﯩﺮﯨﻐﺎ ﺑﻮﻟﻐﺎﻥ ﻧﺎﺭﺍﺯﯨﻠﯩﻘﻰ ﻣﯘﻫﯩﻢ ﺭﻭﻝ ﺋﻮﻳﻨﯩﻐﺎﻥ ﺑﻮﻟﯘﭖ، ﺷﯩﻤﺎﻟﯩﻲ ﺋﺎﺗﻼﻧﺘﯩﻚ ﺋﻮﻛﻴﺎﻥ ﺋﻪﻫﺪﻯ ﺗﻪﺷﻜﯩﻼﺗﻰ ﻫﻪﺭﺑﯩﻲ ﻗﯩﺴﯩﻤﻠﯩﺮﻯ ﺗﻪﺭﯨﭙﯩﺪﯨﻦ ﺋﺎﻓﻐﺎﻧﯩﺴﺘﺎﻧﻨﯩﯔ ﺟﻪﻧﯘﺑﯩﻲ ﺭﺍﻳﻮﻧﻠﯩﺮﯨﺪﺍ ﺋﯧﻠﯩﭗ ﺑﯧﺮﯨﻠﻐﺎﻥ ﻫﻪﺭﯨﻜﻪﺗﻠﻪﺭ ﺟﻪﺭﻳﺎﻧﯩﺪﺍ، ﻧﯘﺭﻏﯘﻧﻠﯩﻐﺎﻥ ﺑﯩﮕﯘﻧﺎﻫ ﭘﯘﻗﺮﺍﻻﺭﻧﯩﯔ ﺋﯚﻟﮕﻪﻧﻠﯩﻜﻰ، ﺧﻪﻟﻘﻨﻰ ﻏﻪﺯﻩﭘﻠﻪﻧﺪﯛﺭﮔﻪﻥ . ﺗﺎﻟﯩﺒﺎﻧﻼﺭ ﺑﻮﻟﺴﺎ، ﺧﻪﻟﻘﻨﯩﯔ ﺑﯘ ﻏﻪﺯﯨﭙﯩﺪﯨﻦ ﻧﺎﻫﺎﻳﯩﺘﻰ ﻳﺎﺧﺸﻰ ﭘﺎﻳﺪﯨﻼﻧﻐﺎﻥ.

ﻳﯘﻗﯩﺮﯨﺪﯨﻜﻰ ﺋﯘﻟﯩﻨﯩﺸﺘﯩﻦ، ﻣﯘﺧﺒﯩﺮﯨﻤﯩﺰ ﺋﯚﻣﻪﺭ ﻗﺎﻧﺎﺗﻨﯩﯔ ﺑﯘ ﻫﻪﻗﺘﯩﻜﻰ ﻣﻪﻟﯘﻣﺎﺗﯩﻨﻰ ﺋﺎﯕﻼﻳﺴﯩﺰ.