ﺋﺎﻣﯧﺮﯨﻜﺎ ﺋﻪﻟﭽﯩﺨﺎﻧﯩﺴﯩﻨﯩﯔ ﺑﺎﻳﺎﻧﺎﺗﭽﯩﺴﻰ ﺳﯘﺯﺍﻥ ﺳﺘﯧﯟﯦﻨﺴﻮﻧﻨﯩﯔ ﺋﻪﺳﻜﻪﺭﺗﯩﺸﯩﭽﻪ، ﺑﺎﺵ ﺋﻪﻟﭽﻰ ﻛﻼﺭﻙ ﺭﺍﻧﺪﺕ ﻳﯧﻘﯩﻨﺪﺍ ﺧﯩﺘﺎﻱ ﺗﺎﺷﻘﻰ ﺋﯩﺸﻼﺭﻣﯩﻨﯩﺴﺘﯩﺮﻟﯩﻘﻰ ﺋﻪﻣﻪﻟﺪﺍﺭﻟﯩﺮﻯ ﺑﯩﻠﻪﻥ ﺋﯚﺗﻜﯜﺯﮔﻪﻥ ﺳﯚﻫﺒﻪﺗﺘﻪ ﺑﯧﻴﺠﯩﯖﺪﯨﻜﻰ ﺑﯩﺮ ﻳﻪﺭ ﺋﺎﺳﺘﻰ ﭼﯧﺮﻛﺎﯞﯨﻨﯩﯔ ﭘﻮﭘﻰ ﺧﯘﺍ ﺧﯘﻳﭽﻰ ﯞﻩ ﺋﻪﻳﺪﯨﺰ ﺑﯩﻤﺎﺭﻟﯩﺮﯨﻨﯩﯔ ﻫﻮﻗﯘﻗﯩﻨﻰ ﻗﻮﻏﺪﯨﻐﯘﭼﻰ ﺯﺍﺕ ﺧﯘ ﺟﻴﺎﻧﯩﯔ ﺋﺎﻳﺎﻟﻰ ﺯﯦﯔ ﺟﯩﻨﻴﻪﻧﻨﯩﯔ ﺋﯩﺰ ﺩﯦﺮﻩﻛﺴﯩﺰ ﻳﻮﻗﺎﭖ ﻛﯧﺘﯩﺶ ﯞﻩﻗﻪﺳﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ. ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻠﯩﺮﯨﻨﯩﯔ ﺋﻪﺳﻜﻪﺭﺗﯩﺸﯩﭽﻪ، ﺯﯦﯔ ﺟﯩﻨﻴﻪﻥ 8 ‏ - ﺋﺎﯞﻏﯘﺳﺖ ﻛﯜﻧﻰ ﺑﯧﻴﺠﯩﯔ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﯩﻨﯩﯔ ﺋﯧﭽﯩﻠﯩﺶ ﻣﯘﺭﺍﺳﯩﻤﯩﺪﯨﻦ ﺑﯘﺭﯗﻥ ﺋﯩﺰ ﺩﯦﺮﻩﻛﺴﯩﺰ ﻳﻮﻗﺎﭖ ﻛﻪﺗﻜﻪﻥ.

ﺯﯦﯔ ﺟﯩﻨﻴﻪﻥ ﻳﻮﻗﺎﭖ ﻛﯧﺘﯩﭗ 3 ﻛﯜﻧﺪﯨﻦ ﻛﯧﻴﯩﻦ ﻣﻪﺧﭙﯩﻲ ﺳﺎﻗﭽﯩﻼﺭ ﺧﯘﺍ ﺧﯘﻳﭽﯩﻨﻰ ﭘﺮﯦﺰﯨﺪﯦﻨﺖ ﺑﯘﺷﻨﯩﯔ ﻳﻪﻛﺸﻪﻧﺒﯩﻠﯩﻚ ﺋﯩﺒﺎﺩﻩﺗﻜﻪ ﻗﺎﺗﻨﯩﺸﯩﺪﯨﻐﺎﻥ ﭼﯧﺮﻛﺎﯞﻏﺎ ﻛﯧﺘﯩﯟﺍﺗﻘﺎﻧﺪﺍ ﺗﯘﺗﯘﭖ ﻛﻪﺗﻜﻪﻥ. ﺑﺎﻳﺎﻧﺎﺗﭽﻰ ﺳﯘﺯﺍﻥ ﺳﺘﯧﯟﯦﻨﺴﻮﻥ " ﺑﯩﺰ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﻮﻟﯩﻤﭙﯩﻚ ﻣﻪﺯﮔﯩﻠﯩﺪﻩ ﻛﯩﺸﯩﻠﯩﻚ ﻫﻮﻗﯘﻗﻘﺎ ﺟﯜﻣﻠﯩﺪﯨﻦ ﭘﯩﻜﯩﺮ ﺋﻪﺭﻛﯩﻨﻠﯩﻜﻰ ﯞﻩ ﺩﯨﻨﯩﻲ ﺋﻪﺭﻛﯩﻨﻠﯩﻜﻜﻪ ﻫﯚﺭﻣﻪﺕ ﻗﯩﻠﯩﺶ ﺳﻪﻣﯩﻤﯩﻴﯩﺘﻰ ﻛﯚﺭﺳﯩﺘﯩﺸﻜﻪ ﭼﺎﻗﯩﺮﯨﻤﯩﺰ " ﺩﻩﭖ ﺗﻪﻛﯩﺘﻠﯩﮕﻪﻥ.

ﻟﯧﻜﯩﻦ ﺋﺎﻣﯧﺮﯨﻜﺎ، ﺑﺎﺵ ﺋﻪﻟﭽﯩﺴﯩﻨﯩﯔ ﺧﯩﺘﺎﻱ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻟﯩﻘﯩﺪﯨﻜﻰ ﺋﻪﻣﻪﻟﺪﺍﺭﻻﺭ ﺑﯩﻠﻪﻥ ﺋﯚﺗﻜﯜﺯﮔﻪﻥ ﺳﯚﻫﺒﯩﺘﯩﻨﯩﯔ ﺗﻪﭘﺴﯩﻠﯩﻲ ﺩﯨﺘﺎﻟﻠﯩﺮﯨﻨﻰ ﺋﺎﺷﻜﺎﺭﯨﻼﺷﻨﻰ ﺭﻩﺕ ﻗﯩﻠﻐﺎﻥ. ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻠﯩﺮﯨﻨﯩﯔ ﺧﯩﺘﺎﻳﻨﻰ ﺋﻮﻟﯩﻤﭙﯩﻚ ﻣﻪﺯﮔﯩﻠﯩﺪﻩ ﻛﯩﺸﯩﻠﯩﻚ ﻫﻮﻗﯘﻗﻨﻰ، ﺋﺎﺧﺒﺎﺭﺍﺕ ﺋﻪﺭﻛﯩﻨﻠﯩﻜﯩﻨﻰ ﻳﺎﺧﺸﯩﻼﺵ ﺗﻮﻏﺮﯨﺴﯩﺪﺍ ﺑﻪﺭﮔﻪﻥ ﯞﻩﺩﯨﺴﯩﺪﻩ ﺗﯘﺭﻣﯩﺪﻯ، ﺩﻩﭖ ﺋﻪﻳﯩﺒﻠﻪﯞﺍﺗﻘﺎﻧﻠﯩﻘﻰ ﻛﯩﺸﯩﻠﻪﺭﮔﻪ ﺳﯩﺮ ﺋﻪﻣﻪﺱ. ﻟﯧﻜﯩﻦ ﺧﯩﺘﺎﻱ ﺑﯘ ﺗﯜﺭﺩﯨﻜﻰ ﺗﻪﻧﻘﯩﺪﻟﻪﺭﻧﻰ ﺭﻩﺕ ﻗﯩﻠﯩﭗ ﻛﻪﻟﻤﻪﻛﺘﻪ ﺋﯩﺪﻯ.

ﻳﯧﻘﯩﻨﺪﺍ ﺧﯩﺘﺎﻱ ﺝ ﺥ ﺩﺍﺋﯩﺮﯨﻠﯩﺮﯨﻨﯩﯔ ﺋﻮﻟﯩﻤﭙﯩﻚ ﻣﻪﺯﮔﯩﻠﯩﺪﻩ ﻧﺎﻣﺎﻳﯩﺶ ﻗﯩﻠﯩﺶ ﺭﺍﻳﻮﻧﻰ ﻗﯩﻠﯩﭗ ﺑﯧﻜﯩﺘﻜﻪﻥ ﺑﯧﻴﺠﯩﯖﺪﯨﻜﻰ ﺑﯩﺮ ﺑﺎﻏﭽﯩﺪﺍ ﻧﺎﻣﺎﻳﯩﺶ ﻗﯩﻠﯩﺶ ﺋﯩﻠﺘﯩﻤﺎﺳﻰ ﺳﯘﻧﻐﺎﻥ ﺑﯩﺮﻯ 74 ﻳﺎﺵ، ﻳﻪﻧﻪ ﺑﯩﺮ 77 ﻳﺎﺷﻼﺭﺩﯨﻜﻰ ﺋﯩﻜﻜﻰ ﻣﻮﻣﺎﻳﻐﺎ ﺋﻪﻣﮕﻪﻙ ﺑﯩﻠﻪﻥ ﺋﯚﺯﮔﻪﺭﺗﯩﺶ ﺟﺎﺯﺍﺳﻰ ﺑﻪﺭﮔﻪﻧﻠﯩﻜﻰ ﺩﯗﻧﻴﺎ ﻣﻪﺗﺒﯘﺋﺎﺗﻠﯩﺮﯨﺪﺍ ﻏﯘﻟﻐﯘﻻ ﻗﻮﺯﻏﯩﻐﺎﻥ ﺋﯩﺪﻯ.