ﭘﺎﻛﯩﺴﺘﺎﻧﺪﺍ ﺋﯚﺯﯨﻨﻰ ﺋﯚﻟﺘﯜﺭﯛﯞﯦﻠﯩﺶ ﻫﯘﺟﯘﻣﯩﺪﯨﻦ ﻳﻪﻧﻪ ﺑﯩﺮﻯ ﻳﯜﺯ ﺑﻪﺭﺩﻯ

ﺳﺎﺑﯩﻖ ﭘﺎﻛﯩﺴﺘﺎﻥ ﺑﺎﺵ ﻣﯩﻨﯩﺴﺘﯩﺮﻯ ﺑﻪﻧﻪﺯﯨﺮ ﺑﯘﺗﺘﻮ ﺳﯜﻳﯩﻘﻪﺳﺖ ﺑﯩﻠﻪﻥ ﺋﯚﻟﺘﯜﺭﯛﻟﮕﻪﻧﺪﯨﻦ ﻛﯧﻴﯩﻦ، ﭘﻪﻳﺸﻪﻧﺒﻪ ﻛﯜﻧﻰ ﭘﺎﻛﯩﺴﺘﺎﻥ ﺳﺎﻗﭽﻰ ﺩﺍﺋﯩﺮﯨﻠﯩﺮﻯ ﭘﺎﻛﯩﺴﺘﺎﻧﻨﯩﯔ ﺷﻪﺭﻗﯩﺪﯨﻜﻰ ﻻﻫﯘﺭ ﺷﻪﻫﯩﺮﯨﺪﻩ ﻳﻪﻧﻪ ﺑﯩﺮ ﻗﯧﺘﯩﻢ ﺋﯚﺯﯨﻨﻰ ﺋﯚﻟﺘﯜﺭﯛﯞﯦﻠﯩﺶ ﺧﺎﺭﺍﻛﺘﯧﺮﻟﯩﻚ ﭘﺎﺭﺗﻠﯩﺘﯩﺶ ﻫﯘﺟﯘﻣﻰ ﻳﯜﺯ ﺑﯧﺮﯨﭗ، ﺋﺎﺯ ﺩﯦﮕﻪﻧﺪﻩ 22 ﺋﺎﺩﻩﻣﻨﯩﯔ ﻗﺎﺯﺍ ﻗﯩﻠﻐﺎﻧﻠﯩﻘﯩﻨﻰ، 60 ﺩﯨﻦ ﺋﺎﺭﺗﯘﻕ ﺋﺎﺩﻩﻣﻨﯩﯔ ﻳﺎﺭﯨﻼﻧﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﭘﺎﺭﺗﻼﺵ ﯞﻩﻗﻪﺳﻰ ﻻﻫﯘﺭ ﺷﻪﻫﯩﺮﯨﺪﯨﻜﻰ ﺳﻮﺕ ﻣﻪﻫﻜﯩﻤﯩﺴﯩﻨﯩﯔ ﺋﯘﺩﯗﻟﯩﺪﯨﻜﻰ ﺋﺎﺩﻩﻡ ﻛﯚﭖ ﺗﻮﭘﻼﺷﻘﺎﻥ ﻣﻪﻳﺪﺍﻧﺪﺍ ﻳﯜﺯ ﺑﻪﺭﮔﻪﻥ ﺑﻮﻟﯘﭖ، ﻧﻪﭼﭽﻪ ﺋﻮﻧﻠﯩﻐﺎﻥ ﺳﺎﻗﭽﻰ ﻻﻫﯘﺭﺩﯨﻜﻰ ﺋﺎﺩﯞﻭﻛﺎﺗﻼﺭ ﺋﯧﻠﯩﭗ ﺑﺎﺭﻣﺎﻗﭽﻰ ﺑﻮﻟﻐﺎﻥ ﻧﺎﺭﺍﺯﯨﻠﯩﻖ ﭘﺎﺋﺎﻟﯩﻴﯩﺘﯩﻨﻰ ﻛﯚﺯﯨﺘﯩﺶ ﺋﯜﭼﯜﻥ ﻣﻪﺯﻛﯜﺭ ﻣﻪﻳﺪﺍﻧﻐﺎ ﻳﯩﻐﯩﻠﻐﺎﭼﻘﺎ ﻳﺎﺭﯨﻼﻧﻐﯘﭼﯩﻼﺭﻧﯩﯔ ﻛﯚﭘﯩﻨﭽﯩﺴﻰ ﺳﺎﻗﭽﯩﻼﺭ ﻫﯧﺴﺎﺑﻠﯩﻨﯩﺪﯨﻜﻪﻥ.

ﭘﺎﻛﯩﺴﺘﺎﻥ ﺳﺎﻗﭽﻰ ﺩﺍﺋﯩﺮﯨﻠﯩﺮﯨﻨﯩﯔ ﻣﻪﺗﺒﯘﺋﺎﺗﻼﺭﻏﺎ ﺋﺎﺷﻜﺎﺭﯨﻠﯩﺸﯩﭽﻪ، ﭘﺎﺭﺗﻠﯩﺘﯩﺶ ﻫﯘﺟﯘﻣﻰ ﺑﯩﺮ ﻳﺎﺵ ﺋﻪﺭ ﺗﻪﺭﯨﭙﯩﺪﯨﻦ ﺋﯧﻠﯩﭗ ﺑﯧﺮﯨﻠﻐﺎﻥ، ﺋﯘ ﻣﻮﺗﻮﺳﯩﻜﻠﯩﺖ ﺑﯩﻠﻪﻥ ﺳﺎﻗﭽﯩﻼﺭ ﺗﻮﭘﻼﺷﻘﺎﻥ ﺟﺎﻳﻐﺎ ﻛﻪﻟﮕﻪﻧﺪﻩ ﺋﯚﺯﯨﻨﻰ ﭘﺎﺭﺗﻼﺗﻘﺎﻥ. ﺑﯩﺮﺍﻕ ﺑﯘ ﻗﯧﺘﯩﻢ ﻳﯜﺯ ﺑﻪﺭﮔﻪﻥ ﭘﺎﺭﺗﻼﺵ ﯞﻩﻗﻪﺳﯩﻨﯩﯔ ﻛﯩﻢ ﺗﻪﺭﯨﭙﯩﺪﯨﻦ ﺋﯧﻠﯩﭗ ﺑﯧﺮﯨﻠﻐﺎﻧﻠﯩﻘﻰ ﺗﯧﺨﻰ ﺋﯧﻨﯩﻖ ﺋﻪﻣﻪﺱ ﺋﯩﻜﻪﻥ. ﻛﯩﺸﯩﻠﻪﺭ، ﺳﺎﻗﭽﯩﻼﺭﻧﻰ ﺋﯚﻟﺘﯜﺭﯛﺵ ﻧﯩﺸﺎﻥ ﻗﯩﻠﯩﻨﻐﺎﻥ ﺑﯘ ﭘﺎﺭﺗﻠﯩﺘﯩﺸﻨﯩﯔ ﺑﯘﺗﺘﻮ ﺧﺎﻧﯩﻤﻨﻰ ﻫﯩﻤﺎﻳﻪ ﻗﯩﻠﯩﺪﯨﻐﺎﻥ ﺗﻪﺭﻩﭘﺪﺍﺭﻻﺭ ﺗﻪﺭﯨﭙﯩﺪﯨﻦ ﺋﯧﻠﯩﭗ ﺑﯧﺮﯨﻠﻐﺎﻧﻠﯩﻘﯩﻨﻰ ﭘﻪﺭﻩﺯ ﻗﯩﻠﯩﺸﻤﺎﻗﺘﺎ.

ﭘﺎﻛﯩﺴﺘﺎﻧﻨﯩﯔ ﻧﯚﯞﻩﺗﺘﯩﻜﻰ ﯞﻩﺯﯨﻴﯩﺘﻰ ﺋﯩﻨﺘﺎﻳﯩﻦ ﺟﯩﺪﺩﯨﻲ ﻫﺎﻟﻪﺗﺘﻪ ﺑﻮﻟﯘﭖ، ﺋﻪﺳﻠﯩﺪﻩ ﻣﯘﺷﯘ ﺋﺎﻳﻨﯩﯔ ﺑﺎﺷﻠﯩﺮﻯ ﺋﯧﻠﯩﭗ ﺑﯧﺮﯨﻠﯩﺪﯨﻐﺎﻥ ﺳﺎﻳﻼﻡ 2 ‏- ﺋﺎﻳﻨﯩﯔ 18 ‏- ﻛﯜﻧﯩﮕﻪ ﻛﯧﭽﯩﻜﺘﯜﺭﯛﻟﺪﻯ.

ﭘﺎﻛﯩﺴﺘﺎﻥ ﺋﯩﭽﻜﻰ ﺋﯩﺸﻼﺭ ﻣﯩﻨﯩﺴﺘﯩﺮﻟﯩﻘﯩﻨﯩﯔ ﺳﺘﺎﺗﯩﺴﺘﯩﻜﯩﺴﯩﻐﺎ ﻗﺎﺭﯨﻐﺎﻧﺪﺍ، 2007 ‏- ﻳﯩﻠﻰ ﺑﯩﺮ ﻳﯩﻞ ﺋﯩﭽﯩﺪﻩ ﭘﺎﻛﯩﺴﺘﺎﻧﻨﯩﯔ ﻫﻪﺭﻗﺎﻳﺴﻰ ﺟﺎﻳﻠﯩﺮﯨﺪﺍ ﺋﯚﺯﯨﻨﻰ ﺋﯚﻟﺘﯜﺭﯛﯞﯦﻠﯩﺶ ﺧﺎﺭﺍﻛﺘﯧﺮﻟﯩﻚ ﻫﯘﺟﯘﻣﺪﯨﻦ 50 ﻗﯧﺘﯩﻢ ﻳﯜﺯ ﺑﯧﺮﯨﭗ، 3000 ﺩﯨﻦ ﺋﺎﺭﺗﯘﻕ ﺋﺎﺩﻩﻡ ﺋﯚﻟﮕﻪﻥ. (ﺋﻪﻗﯩﺪﻩ)