ﺗﺎﻟﯩﺒﺎﻧﻼﺭ، ﻫﺎﻣﯩﺪ ﻛﺎﺭﺯﺍﻱ ﻫﯚﻛﯜﻣﯩﺘﻰ ﺑﯩﻠﻪﻥ ﻫﻪﻣﻜﺎﺭﻟﯩﺸﯩﺪﯨﻐﺎﻧﻠﯩﻘﯩﻨﯩﯔ ﺑﯩﺸﺎﺭﯨﺘﯩﻨﻰ ﺑﻪﺭﻣﻪﻛﺘﻪ

ﺋﺎﻓﻐﺎﻧﯩﺴﺘﺎﻧﺪﯨﻜﻰ ﺗﺎﻟﯩﺒﺎﻧﻼﺭﻧﯩﯔ ﺭﻩﻫﺒﯩﺮﻯ ﻣﯘﻟﻼ ﺋﯚﻣﻪﺭﻧﯩﯔ ﻳﺎﺭﺩﻩﻣﭽﯩﺴﻰ، ﻣﯘﻟﻼ ﺑﯘﺭﺍﺩﻩﺭ ﺗﺎﻟﯩﺒﺎﻧﻼﺭ ﻫﻪﺭﯨﻜﯩﺘﯩﻨﯩﯔ ﻫﺎﻣﯩﺪ ﻛﺎﺭﺯﺍﻱ ﻫﯚﻛﯜﻣﯩﺘﻰ ﺑﯩﻠﻪﻥ ﻫﻪﻣﻜﺎﺭﻟﯩﺸﯩﺪﯨﻐﺎﻧﻠﯩﻘﯩﻨﯩﯔ ﺑﯩﺸﺎﺭﯨﺘﯩﻨﻰ ﺑﻪﺭﺩﻯ.

ﺭﻭﻳﺘﺮﯨﺲ ﺋﺎﮔﯧﻨﺘﻠﯩﻘﯩﻨﯩﯔ ﺧﻪﯞﻩﺭ ﻗﯩﻠﯩﺸﯩﭽﻪ، ﻣﯘﻟﻼ ﺑﯘﺭﺍﺩﻩﺭ ﺗﺎﻟﯩﺒﺎﻧﻼﺭﻧﯩﯔ ﺗﻮﺭ ﺑﯧﺘﯩﺪﻩ ﺋﯧﻼﻥ ﻗﯩﻠﯩﻨﻐﺎﻥ ﺑﯩﺮ ﺑﺎﻳﺎﻧﺎﺗﯩﺪﺍ، ﺋﺎﻓﻐﺎﻧﯩﺴﺘﺎﻧﺪﯨﻜﻰ ﭼﻪﺗﺌﻪﻝ ﻫﻪﺭﺑﯩﻲ ﻗﯩﺴﯩﻤﻠﯩﺮﯨﻐﺎ ﻗﺎﺭﺷﻰ، ﺋﯚﺯﯨﻨﻰ ﺋﯚﻟﺘﯜﺭﯛﯞﯦﻠﯩﺶ ﺧﺎﺭﺍﻛﺘﯧﺮﻟﯩﻚ ﻫﯘﺟﯘﻣﻼﺭﺩﯨﻦ ﺑﯩﺮ ﻗﻮﺭﺍﻝ ﺳﯜﭘﯩﺘﯩﺪﻩ ﺗﯧﺨﯩﻤﯘ ﻛﯚﭖ ﭘﺎﻳﺪﯨﻠﯩﻨﯩﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﻪﭖ، ﻟﯧﻜﯩﻦ ﺋﻪﮔﻪﺭ ﭼﻪﺗﺌﻪﻝ ﻫﻪﺭﺑﯩﻲ ﻗﯩﺴﯩﻤﻠﯩﺮﻯ ﺋﺎﻓﻐﺎﻧﯩﺴﺘﺎﻧﺪﯨﻦ ﭼﯩﻘﯩﭗ ﻛﻪﺗﺴﻪ، ﺗﺎﻟﯩﺒﺎﻧﻼﺭﻧﯩﯔ ﺋﺎﻓﻐﺎﻧﯩﺴﺘﺎﻥ ﻫﯚﻛﯜﻣﯩﺘﻰ ﺑﯩﻠﻪﻥ ﻫﻪﻣﻜﺎﺭﻟﯩﺸﯩﺸﻰ ﻣﯘﻣﻜﯩﻨﻠﯩﻜﯩﻨﻰ ﺑﯩﻠﺪﯛﺭﮔﻪﻥ.

ﺑﺎﻳﺎﻧﺎﺗﯩﺪﺍ، ﺋﺎﻓﻐﺎﻧﯩﺴﺘﺎﻧﺪﯨﻜﻰ ﻣﻪﺳﯩﻠﯩﻠﻪﺭﻧﯩﯔ ﺋﯘﺭﯗﺵ ﺋﺎﺭﻗﯩﻠﯩﻖ ﺋﻪﻣﻪﺱ، ﺳﯚﻫﺒﻪﺕ ﯞﻩ ﭼﯜﺷﯜﻧﯜﺵ ﺋﺎﺭﻗﯩﻠﯩﻖ ﺑﯩﺮ ﺗﻪﺭﻩﭖ ﻗﯩﻠﯩﻨﯩﺸﻰ ﻛﯧﺮﻩﻛﻠﯩﻜﯩﻨﻰ ﺗﻪﻛﯩﺘﻠﯩﮕﻪﻥ ﻣﯘﻟﻼ ﺑﯘﺭﺍﺩﻩﺭ، "ﺋﻪﮔﻪﺭ ﭼﻪﺗﺌﻪﻝ ﻫﻪﺭﺑﯩﻲ ﻛﯜﭼﻠﯩﺮﻯ ﺋﺎﻓﻐﺎﻧﯩﺴﺘﺎﻧﺪﯨﻦ ﭼﯩﻘﯩﭗ ﻛﻪﺗﺴﻪ، ﺗﺎﻟﯩﺒﺎﻧﻼﺭ ﻫﺎﻣﯩﺪ ﻛﺎﺭﺯﺍﻱ ﻫﯚﻛﯜﻣﯩﺘﯩﻨﻰ ﺋﺎﻏﺪﯗﺭﯗﺷﻘﺎ ﺗﯩﺮﯨﺸﻤﺎﻳﺪﯗ" ﺩﯦﮕﻪﻥ.

ﺳﯩﻴﺎﺳﯩﻲ ﺋﺎﻧﺎﻟﯩﺰﭼﯩﻼﺭ، ﻣﯘﻟﻼ ﺑﺮﺍﺩﻩﺭﻧﯩﯔ ﺑﺎﻳﺎﻧﺎﺗﻰ، ﺗﺎﻟﯩﺒﺎﻧﻼﺭﻧﯩﯔ ﺳﯩﻴﺎﺳﯩﺘﯩﺪﻩ ﻣﯘﻫﯩﻢ ﺋﯚﺯﮔﯩﺮﯨﺸﻨﯩﯔ ﺑﯩﺸﺎﺭﯨﺘﻰ ﻫﯧﺴﺎﺑﻠﯩﻨﯩﺪﯗ. ﭼﯜﻧﻜﻰ ﺑﯘﺭﯗﻥ ﺋﯘﻻﺭ ﻫﺎﻣﯩﺖ ﻛﺎﺭﺯﺍﻱ ﻫﯚﻛﯜﻣﯩﺘﯩﻨﻰ ﺋﺎﻏﺪﯗﺭﯗﭖ، ﭼﻪﺗﺌﻪﻝ ﻫﻪﺭﺑﯩﻲ ﻗﯩﺴﯩﻤﻠﯩﺮﯨﻨﻰ ﺋﺎﻓﻐﺎﻧﯩﺴﺘﺎﻧﺪﯨﻦ ﭼﯩﻘﯩﺮﯨﺸﻨﻰ ﺋﯚﺯﻟﯩﺮﯨﻨﯩﯔ ﺋﻪﯓ ﺋﺎﺳﺎﺳﻠﯩﻖ ﻧﯩﺸﺎﻧﻰ ﺩﻩﭖ ﺋﯧﻼﻥ ﻗﯩﻠﻐﺎﻥ ﺋﯩﺪﻯ، ﺩﯦﻴﺸﻤﻪﻛﺘﻪ.

ﺷﯩﻤﺎﻟﯩﻲ ﺋﺎﺗﻼﻧﺘﯩﻚ ﺋﻪﻫﺪﻯ ﺗﻪﺷﻜﯩﻼﺗﻰ ﻫﻪﺭﺑﯩﻲ ﺧﺎﺩﯨﻤﻠﯩﺮﯨﻨﯩﯔ ﺋﯧﻴﺘﯩﺸﯩﭽﻪ، ﺗﺎﻟﯩﺒﺎﻥ ﺭﻩﻫﺒﻪﺭﻟﯩﺮﯨﻨﯩﯔ ﺋﯚﺯﯨﻨﻰ ﺋﯚﻟﺘﯜﺭﯛﯞﯦﻠﯩﺶ ﺧﺎﺭﺍﻛﺘﯧﺮﻟﯩﻚ ﻫﯘﺟﯘﻣﻼﺭﺩﯨﻦ ﺗﯧﺨﯩﻤﯘ ﻛﯚﭖ ﭘﺎﻳﺪﯨﻠﯩﻨﯩﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﯩﮕﻪﻧﻠﯩﻜﻰ، ﻳﯧﻘﯩﻨﻘﻰ ﻳﯩﻠﻼﺭﺩﺍ ﺗﺎﻟﯩﺒﺎﻧﻼﺭﻧﯩﯔ ﻫﻪﺭﺑﯩﻲ ﺟﻪﻫﻪﺗﺘﯩﻦ ﻗﺎﺗﺘﯩﻖ ﺯﻩﺭﺑﯩﻠﻪﺭﮔﻪ ﺋﯘﭼﺮﯨﻐﺎﻧﻠﯩﻘﯩﻨﻰ ﻫﻪﻣﺪﻩ ﺋﺎﻓﻐﺎﻧﯩﺴﺘﺎﻧﺪﯨﻜﻰ ﺋﯩﺘﺘﯩﭙﺎﻗﺪﺍﺵ ﺋﺎﺭﻣﯩﻴﯩﮕﻪ ﻗﺎﺭﺷﻰ ﻫﯘﺟﯘﻣﻼﺭ ﺋﯧﻠﯩﭗ ﺑﯧﺮﯨﺶ ﻗﺎﺑﯩﻠﯩﻴﻪﺕ ﯞﻩ ﺋﯩﻘﺘﯩﺪﺍﺭﯨﻨﻰ ﻳﻮﻗﺎﺗﻘﺎﻧﻠﯩﻘﯩﻨﻰ ﻛﯚﺭﺳﯩﺘﯩﺪﯨﻜﻪﻥ. (ﺋﯚﻣﻪﺭ ﻗﺎﻧﺎﺕ)