ﺋﺎﻣﯧﺮﯨﻜﺎ ﺩﯙﻟﻪﺕ ﻣﻪﺟﻠﯩﺴﻰ ﺋﻪﺯﺍﺳﻰ، ﺋﺎﯞﺍﻡ ﭘﺎﻻﺗﺎﺳﻰ ﺗﺎﺷﻘﻰ ﺋﯩﺸﻼﺭ ﻛﻮﻣﯩﺘﯧﺘﯩﻨﯩﯔ ﺭﻩﺋﯩﺴﻰ ﺗﻮﻡ ﻻﻧﺘﻮﺱ ﺋﻪﭘﻪﻧﺪﻯ ﯞﺍﭘﺎﺕ ﺑﻮﻟﺪﻯ

ﺗﻮﻡ ﻻﻧﺘﻮﺱ ﺋﻪﭘﻪﻧﺪﻯ ﺋﺎﻣﯧﺮﯨﻜﺎ ﺩﯙﻟﻪﺕ ﻣﻪﺟﻠﯩﺴﻰ ﺋﺎﯞﺍﻡ ﭘﺎﻻﺗﺎﺳﯩﻨﯩﯔ ﺋﻪﯓ ﻏﻮﻟﻠﯘﻕ ﺋﻪﺯﺍﻟﯩﺮﯨﺪﯨﻦ ﺑﯩﺮﺳﻰ ﯞﻩ ﻛﯩﺸﯩﻠﯩﻚ ﻫﻮﻗﯘﻗﻨﻰ ﺋﻪﯓ ﻗﺎﺗﺘﯩﻖ ﻫﯩﻤﺎﻳﻪ ﻗﯩﻠﻐﯘﭼﯩﻼﺭﻧﯩﯔ ﺑﯧﺮﯨﺴﻰ ﺑﻮﻟﯘﺵ ﺳﯘﭘﯩﺘﻰ ﺑﯩﻠﻪﻥ ﺋﯘﻳﻐﯘﺭ ﻣﯩﻠﻠﯩﻲ ﺩﺍﯞﺍﺳﻰ ﯞﻩ ﻛﯩﺸﯩﻠﯩﻚ ﻫﻮﻗﯘﻕ ﻣﻪﺳﯩﻠﯩﺴﯩﮕﻪ ﺋﻪﯓ ﭼﻮﯕﻘﯘﺭ ﻛﯚﯕﯜﻝ ﺑﻮﻟﯘﭖ ﻛﯧﻠﯩﯟﺍﺗﻘﺎﻥ ﭘﺎﻻﺗﺎ ﺋﻪﺯﺍﺳﻰ.

ﺋﯘ ﺋﯩﻠﮕﯩﺮﻯ ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﻨﯩﯔ ﺧﯩﺘﺎﻱ ﺗﯜﺭﻣﯩﺴﯩﺪﯨﻦ ﺋﺎﺯﺍﺕ ﻗﯩﻠﯩﻨﯩﺸﯩﺪﺍ ﻛﯚﭖ ﻛﯘﭺ ﭼﯩﻘﺎﺭﻏﺎﻥ، ﺋﺎﻣﯧﺮﯨﻜﺎ ﺩﯙﻟﻪﺕ ﻣﻪﺟﻠﯩﺴﯩﺪﻩ ﺋﯘﻳﻐﯘﺭﻻﺭﻏﺎ ﺋﺎﺋﯩﺖ ﺋﯧﻠﯩﻨﻐﺎﻥ ﻫﻪﺭ ﺧﯩﻞ ﻗﺎﺭﺍﺭ ﻻﻳﯩﻬﯩﻠﯩﺮﯨﻨﻰ ﺋﯚﺯﻯ ﺑﺎﺵ ﺑﻮﻟﯘﭖ ﺗﻪﺷﻪﺑﺒﯘﺱ ﻗﯩﻠﻐﺎﻥ ﺯﺍﺕ ﺋﯩﺪﻯ.

ﺗﻮﻡ ﻻﻧﺘﻮﺱ ﺋﻪﭘﻪﻧﺪﻯ 2007- ﻳﯩﻠﻰ 17- ﺳﯧﻨﺘﻪﺑﺮ ﻛﯜﻧﻰ ﺋﺎﻣﯧﺮﯨﻜﺎ ﺩﯙﻟﻪﺕ ﻣﻪﺟﻠﯩﺴﯩﺪﻩ ﺋﯧﻠﯩﻨﻐﺎﻥ ﺋﯘﻳﻐﯘﺭﻻﺭ ﺋﯜﭼﯜﻥ ﺋﯩﻨﺘﺎﻳﯩﻦ ﻣﯘﻫﯩﻢ ﺑﻮﻟﻐﺎﻥ 497- ﻧﻮﻣﯘﺭﻟﯘﻕ ﻗﺎﺭﺍﺭﻧﯩﯔ ﺑﺎﺵ ﺗﻪﻳﻴﺎﺭﻟﯩﻐﯘﭼﯩﺴﻰ ﯞﻩ ﺋﻪﯓ ﻛﯜﭼﻠﯜﻙ ﺗﻪﺷﻪﺑﺒﯘﺳﭽﯩﺴﻰ ﺑﻮﻟﯘﭖ، ﻗﺎﺭﺍﺭ ﻻﻳﯩﻬﯩﺴﯩﺪﻩ، ﺧﯩﺘﺎﻱ ﻫﯚﻛﯜﻣﯩﺘﯩﺪﯨﻦ ﺋﯘﻳﻐﯘﺭﻻﺭ ﺋﯘﺳﺘﯩﺪﯨﻦ ﻳﯜﺭﮔﯜﺯﯛﯞﺍﺗﻘﺎﻥ ﺩﯨﻨﯩﻲ، ﻣﯩﻠﻠﻲ، ﺗﯩﻞ ﯞﻩ ﻣﻪﺩﻩﻧﯩﻴﻪﺕ ﺟﻪﻫﻪﺗﺘﯩﻜﻰ ﺑﺎﺳﺘﯘﺭﯗﺵ ﻫﻪﺭﯨﻜﯩﺘﯩﻨﻰ ﺩﻩﺭﻫﺎﻝ ﺗﻮﺧﺘﯩﺘﯩﺶ ﺗﻪﻟﻪﭖ ﻗﯩﻠﯩﻨﻐﺎﻥ.

ﺗﺎﻡ ﻻﻧﺘﻮﺱ ﺋﻪﭘﻪﻧﺪﯨﻨﯩﯔ ﺋﺎﻟﻪﻣﺪﯨﻦ ﻛﻪﺗﻜﯩﻨﯩﮕﻪ ﺋﯩﻨﺘﺎﻳﯩﻦ ﻗﺎﻳﻐﯘﺭﻏﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ: " ﺗﺎﻡ ﻻﻧﺘﻮﺱ ﺋﻪﭘﻪﻧﺪﯨﻨﯩﯔ ﺋﺎﻟﻪﻣﺪﯨﻦ ﻛﯧﺘﯩﺸﻰ ﭘﻪﻗﻪﺕ ﺋﯘﻳﻐﯘﺭﻻﺭ ﺋﯜﭼﯜﻥ ﺯﻭﺭ ﻳﻮﻗﯩﺘﯩﺶ ﺑﻮﻟﯘﭘﻼ ﻗﺎﻟﻤﺎﻱ، ﺑﻪﻟﻜﻰ ﭘﯜﺗﯜﻥ ﺩﯗﻧﻴﺎﺩﯨﻜﻰ ﺑﯩﺰﺩﻩﻙ ﺋﯧﺰﯨﻠﮕﻪﻥ ﻣﯩﻠﻠﻪﺗﻠﻪﺭ ﺋﯜﭼﯜﻧﻤﯘ ﺯﻭﺭ ﻳﻮﻗﯩﺘﯩﺶ" ﺩﯦﺪﻯ.

ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﻳﻪﻧﻪ، ﺗﻮﻡ ﻻﻧﺘﻮﺱ ﺋﻪﭘﻪﻧﺪﯨﻨﯩﯔ ﺋﯘﻳﻐﯘﺭﻻﺭﻧﯩﯔ ﺋﺎﯞﺍﺯﯨﻨﯩﯔ ﺋﺎﻣﯧﺮﯨﻜﺎ ﺩﯙﻟﻪﺕ ﻣﻪﺟﻠﯩﺴﯩﮕﻪ ﻳﯧﺘﯩﺸﯩﺪﻩ ﺋﻪﯓ ﻛﯚﭖ ﻛﯜﭺ ﭼﯩﻘﺎﺭﻏﺎﻥ، ﺋﯧﺰﯨﻠﮕﻪﻥ ﻣﯩﻠﻠﻪﺗﻠﻪﺭ ﺋﯜﭼﯜﻥ ﺋﻪﯓ ﻛﯚﭖ ﻳﯜﺭﻩﻙ ﻗﯧﻨﯩﻨﻰ ﺳﻪﺭﭖ ﻗﯩﻠﻐﺎﻥ ﺋﯘﻟﯘﻍ ﺋﺎﺩﻩﻡ ﺋﯩﻜﻪﻧﻠﯩﻜﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ.

ﺗﻮﻡ ﻻﻧﺘﻮﺱ ﺋﻪﭘﻪﻧﺪﯨﻨﯩﯔ ﯞﺍﭘﺎﺗﯩﻐﺎ ﺗﻪﺯﯨﻴﻪ ﺑﯩﻠﺪﯛﺭﮔﻪﻥ ﺋﺎﻣﯧﺮﯨﻜﺎ ﭘﺮﯦﺰﯨﺪﯦﻨﺘﻰ ﺟﻮﺭﺝ ﺑﯘﺵ: "ﺋﯘ ﻛﯩﺸﯩﻠﯩﻚ ﻫﻮﻗﯘﻕ ﭼﯧﻤﭙﯩﻴﻮﻧﻰ ﺋﯩﺪﻯ" ﺩﯦﺪﻯ.

ﻛﺎﻟﯩﻔﻮﺭﻧﯩﻴﻪ ﺷﯩﺘﺎﺗﻰ ﯞﻩﻛﯩﻠﻰ ﻻﻧﺘﻮﺱ ﺋﻪﭘﻪﻧﺪﻯ 1980- ﻳﯩﻠﯩﺪﯨﻦ ﺑﺎﺷﻼﭖ ﺋﺎﻣﯧﺮﯨﻜﺎ ﺋﺎﯞﺍﻡ ﭘﺎﻻﺗﺎ ﺋﻪﺯﺍﺳﻰ ﺑﻮﻟﯘﭖ ﺋﯩﺸﻠﯩﮕﻪﻥ ﺑﻮﻟﯘﭖ، ﻛﯩﻴﯩﻦ ﺋﺎﻣﯧﺮﯨﻜﺎ ﺋﺎﯞﺍﻡ ﭘﺎﻻﺗﺎﺳﻰ ﺗﺎﺷﻘﻰ ﺋﯩﺸﻼﺭ ﻛﻮﻣﯩﺘﯧﺘﯩﻨﯩﯔ ﺭﻩﺋﯩﺴﻠﯩﻜﯩﮕﻪ ﺳﺎﻳﻼﻧﻐﺎﻥ.

ﻳﯧﻘﯩﻨﺪﺍ ﻻﻧﺘﻮﺱ ﺋﻪﭘﻪﻧﺪﯨﻨﯩﯔ ﺭﺍﻙ ﻛﯧﺴﻪﻝ ﺋﯩﻜﻪﻧﻠﯩﻜﻰ ﺋﯩﺴﭙﺎﺗﻼﻧﻐﺎﻥ ﺑﻮﻟﯘﭖ، ﺋﯘ ﺑﯜﮔﯜﻥ ﺋﻪﺗﯩﮕﻪﻥ ﻳﻪﻧﻰ 11- ﻓﯧﯟﺭﺍﻝ ﺋﺎﻣﯧﺮﯨﻜﺎ ﭘﺎﻳﺘﻪﺧﺘﯩﮕﻪ ﻳﯧﻘﯩﻦ ﺟﺎﻳﺪﯨﻜﻰ ﻫﻪﺭﺑﯩﻲ ﺩﻭﺧﺘﯘﺭﺧﺎﻧﯩﺪﺍ 80 ﻳﯧﺸﯩﺪﺍ ﯞﺍﭘﺎﺕ ﺑﻮﻟﺪﻯ. (ﺟﯜﻣﻪ)