ﺧﯩﺘﺎﻳﺪﯨﻜﻰ ﺋﯚﺳﻤﯜﺭ ﺑﺎﻟﯩﻼﺭﻧﻰ ﺳﯧﺘﯩﺶ ﺟﯩﻨﺎﻳﯩﺘﻰ ﻳﻪﻧﻪ ﺑﯩﺮ ﻗﯧﺘﯩﻢ ﺋﺎﺷﻜﺎﺭﯨﻼﻧﺪﻯ

ﺧﻪﻟﻘﺌﺎﺭﺍ ﻣﻪﺗﺒﯘﺋﺎﺗﻼﺭﺩﺍ ﺧﯩﺘﺎﻳﻨﯩﯔ ﺋﯚﺳﻤﯜﺭ ﺑﺎﻟﯩﻼﺭﻧﻰ ﺳﯧﺘﯩﺸﻘﺎ ﺩﺍﺋﯩﺮ ﻗﯩﻠﻤﯩﺸﻠﯩﺮﻯ ﻛﯚﭘﻠﻪﭖ ﺋﺎﺷﻜﺎﺭﯨﻼﻧﻤﺎﻗﺘﺎ. ﺋﻪﻧﮕﯩﻠﯩﻴﻪ ﺗﯧﻠﯧﯟﯨﺰﯨﻴﯩﺴﻰ 4 ‏- ﻗﺎﻧﯩﻠﯩﻨﯩﯔ ﻛﯧﻠﻪﺭ ﺋﺎﻳﺪﯨﻦ ﺑﺎﺷﻼﭖ ﻗﻮﻳﻤﺎﻗﭽﻰ ﺑﻮﻟﻐﺎﻥ ﺧﯩﺘﺎﻳﺪﺍ ﻳﯜﺯ ﺑﯧﺮﯨﯟﺍﺗﻘﺎﻥ ﺑﺎﻟﯩﻼﺭﻧﻰ ﺳﯧﺘﯩﺸﻘﺎ ﺋﺎﺋﯩﺖ ﻫﯚﺟﺠﻪﺗﻠﯩﻚ ﻓﯩﻠﯩﻤﺪﻩ ﻫﻪﺭ ﻳﯩﻠﻰ ﺋﺎﺯ ﺩﯦﮕﻪﻧﺪﻩ 70 ﻣﯩﯔ ﺋﯚﺳﻤﯜﺭﻧﯩﯔ ﻗﺎﻧﯘﻧﺴﯩﺰ ﻳﻮﻟﻼﺭ ﺋﺎﺭﻗﯩﻠﯩﻖ ﺑﺎﺷﻘﺎ ﺟﺎﻳﻼﺭﻏﺎ ﺋﯧﻠﯩﭗ ﻛﯧﺘﯩﻠﯩﺪﯨﻐﺎﻧﻠﯩﻘﻰ ﺗﻪﺳﯟﯨﺮﻟﻪﻧﮕﻪﻥ.

ﺧﯩﺘﺎﻳﻨﯩﯔ ﻟﻮﻧﺪﻭﻧﺪﺍ ﺗﯘﺭﯗﺷﻠﯘﻕ ﺑﺎﺵ ﺋﻪﻟﭽﯩﺨﺎﻧﯩﺴﻰ، ﺋﻪﻧﮕﯩﻠﯩﻴﻪ ﺗﯧﻠﯧﯟﯨﺰﯨﻴﯩﺴﻰ 4 ‏- ﻗﺎﻧﯩﻠﯩﻨﯩﯔ ﻣﻪﺯﻛﯜﺭ ﻫﯚﺟﺠﻪﺗﻠﯩﻚ ﻓﯩﻠﯩﻢ ﻫﻪﻗﻘﯩﺪﻩ ﺋﯚﺯﻟﯩﺮﯨﻨﻰ ﺋﺎﻟﺪﯨﻦ ﺧﻪﯞﻩﺭﻟﻪﻧﺪﯛﺭﻣﯩﮕﻪﻧﻠﯩﻜﯩﺪﯨﻦ ﻗﺎﺗﺘﯩﻖ ﻧﺎﺭﺍﺯﻯ ﺑﻮﻟﯘﭖ، ﻓﯩﻠﯩﻤﺪﯨﻜﻰ ﻣﻪﺯﻣﯘﻧﻼﺭﻧﯩﯔ ﺗﻮﻏﺮﺍ ﺋﻪﻣﻪﺳﻠﯩﻜﯩﻨﻰ، ﺑﻮﻟﯘﭘﻤﯘ ﻓﯩﻠﯩﻤﺪﻩ ﺋﻪﻛﺲ ﺋﻪﺗﺘﯜﺭﯛﻟﮕﻪﻥ ﺟﯘﯕﮕﻮﻧﯩﯔ ﺑﯩﺮ ﭘﻪﺭﺯﻩﻧﺘﻠﯩﻚ ﺳﯩﻴﺎﺳﯩﺘﯩﻨﯩﯔ ﺑﺎﻟﯩﻼﺭﻧﻰ ﺳﯧﺘﯩﺶ ﺟﯩﻨﺎﻳﯩﺘﻰ ﺑﯩﻠﻪﻥ ﻫﯧﭽﻘﺎﻧﺪﺍﻕ ﻣﯘﻧﺎﺳﯩﯟﯨﺘﻰ ﻳﻮﻗﻠﯘﻗﯩﻨﻰ ﺗﻪﻛﯩﺘﻠﯩﮕﻪﻥ ﻫﻪﻣﺪﻩ ﻣﻪﺯﻛﯜﺭ ﻓﯩﻠﯩﻤﻨﻰ ﺗﺎﺭﻗﺎﺗﻤﺎﺳﻠﯩﻖ ﺋﯜﭼﯜﻥ ﺗﯩﺮﯨﺸﻘﺎﻥ.

ﺋﻪﻧﮕﻠﯩﻴﯩﺪﻩ ﭼﯩﻘﯩﺪﯨﻐﺎﻥ " ﺗﺎﻳﻤﯩﺰ " ﮔﯧﺰﯨﺘﯩﻨﯩﯔ ﺧﻪﯞﯨﺮﯨﮕﻪ ﻗﺎﺭﯨﻐﺎﻧﺪﺍ، ﺧﯩﺘﺎﻱ ﺑﺎﺵ ﺋﻪﻟﭽﯩﺨﺎﻧﯩﺴﻰ ﻳﻪﻧﻪ ﺋﻪﻧﮕﯩﻠﯩﻴﯩﻨﯩﯔ ﺋﺎﺧﺒﺎﺭﺍﺕ ﺑﺎﺷﻘﯘﺭﯗﺵ ﺋﯩﺪﺍﺭﯨﺴﻰ ﺑﯩﻠﻪﻥ ﺋﺎﻻﻗﻪ ﻗﯩﻠﯩﭗ، 8 ‏- ﺋﯚﻛﺘﻪﺑﯩﺮ ﻛﯜﻧﻰ ﻗﻮﻳﯘﻟﻤﺎﻗﭽﻰ ﺑﻮﻟﻐﺎﻥ ﻫﯚﺟﺠﻪﺗﻠﯩﻚ ﻓﯩﻠﯩﻤﻨﻰ ﻗﻮﻳﻤﺎﺳﻠﯩﻘﻨﻰ ﺗﻪﻟﻪﭖ ﻗﯩﻠﻐﺎﻥ. ﺑﯘ ﺋﺎﺭﯨﺪﺍ ﺧﯩﺘﺎﻱ ﺋﻪﻟﭽﯩﺨﺎﻧﯩﺴﯩﻨﯩﯔ ﺋﺎﺧﺒﺎﺭﺍﺕ ﺑﺎﻳﺎﻧﺎﺗﭽﯩﺴﻰ، ﺟﯘﯕﮕﻮ ﺩﺍﺋﯩﺮﯨﻠﯩﺮﯨﻨﯩﯔ ﺑﺎﻟﯩﻼﺭﻧﻰ ﺳﯧﺘﯩﺶ ﻣﻪﺳﯩﻠﯩﯩﺴﻨﻰ ﺋﺎﺯﺍﻳﺘﯩﺶ ﺋﯜﭼﯜﻥ ﺯﻭﺭ ﺗﯩﺮﯨﺸﭽﺎﻧﻠﯩﻖ ﻛﯚﺭﺳﻪﺗﻜﻪﻧﻠﯩﻜﯩﻨﻰ، ﻫﺎﺯﯨﺮ ﺋﻪﻫﯟﺍﻟﺪﺍ ﻳﺎﺧﺸﯩﻠﯩﻨﯩﺶ ﻣﻪﻳﺪﺍﻧﻐﺎ ﻛﻪﻟﮕﻪﻧﻠﯩﻜﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ. ﺋﻪﻣﻤﺎ ﻓﯩﻠﯩﻢ ﻣﻪﺳﺌﯘﻟﻠﯩﺮﻯ ﺧﯩﺘﺎﻱ ﺋﻪﻟﭽﯩﺨﺎﻧﯩﺴﯩﻐﺎ ﺋﯚﺯﻟﯩﺮﯨﻨﯩﯔ ﻓﯩﻠﯩﻢ ﺋﯩﺸﻠﻪﺵ ﺟﻪﺭﻳﺎﻧﯩﺪﺍ ﻗﻮﻟﻐﺎ ﭼﯜﺷﯜﺭﮔﻪﻥ ﭘﺎﻛﯩﺘﻠﯩﻖ ﻣﺎﺗﯧﺮﯨﻴﺎﻟﻠﯩﺮﯨﻨﻰ ﻳﻮﻟﻠﯩﻐﺎﻥ.

ﺋﻪﻧﮕﯩﻠﯩﻴﻪ ﺗﯧﻠﯧﯟﯨﺰﯨﻴﯩﺴﻰ 4 ‏- ﻗﺎﻧﯩﻠﯩﻨﯩﯔ ﻓﯩﻠﯩﻢ ﺋﯩﺸﻠﻪﺵ ﺋﻪﺗﺮﯨﺘﻰ، ﺧﯩﺘﺎﻱ ﺋﯚﻟﻜﯩﻠﯩﺮﯨﺪﻩ ﺋﯚﺯ ﺑﺎﻟﯩﻠﯩﺮﯨﻨﻰ ﺳﺎﺗﻘﺎﻥ ﺋﺎﺗﺎ ‏- ﺋﺎﻧﯩﻼﺭ ﯞﻩ ﺋﺎﺩﻩﻡ ﺑﯩﺪﯨﻜﻠﯩﺮﯨﻨﯩﯔ ﺑﺎﻟﯩﻼﺭﻧﻰ ﺳﯧﺘﯩﺶ ﺟﻪﺭﻳﺎﻧﯩﺪﯨﻜﻰ ﻧﻪﻕ ﻣﻪﻳﺪﺍﻥ ﻛﯚﺭﯛﻧﯜﺷﻠﯩﺮﯨﻨﻰ ﺳﯩﻨﺌﺎﻟﻐﯘﻏﺎ ﭼﯜﺷﯜﺭﯛﯞﺍﻟﻐﺎﻥ ﺋﯩﻜﻪﻥ. ﻣﻪﺯﻛﯘﺭ ﻗﺎﻧﺎﻝ ﺋﯩﻠﮕﯩﺮﻯ ﺋﯘﻳﻐﯘﺭﻻﺭﻧﯩﯔ ﺋﺎﺗﻮﻡ ﺳﯩﻨﺎﻗﻠﯩﺮﯨﻨﯩﯔ ﺯﯨﻴﺎﻧﻜﻪﺷﻠﯩﻜﯩﮕﻪ ﺋﯘﭼﺮﯨﻐﺎﻧﻠﯩﻘﯩﻐﺎ ﺩﺍﺋﯩﺮ 2 ﻗﯩﺴﯩﻤﻠﯩﻖ ﻓﯩﻠﯩﻢ ﺋﯩﺸﻠﻪﭖ ﺗﺎﺭﻗﺎﺗﻘﺎﻥ ﺋﯩﺪﻯ. (ﺋﻪﻗﯩﺪﻩ)