ﺋﺎﻣﯧﺮﯨﻜﺎ ﺩﯨﻨﯩﻲ ﺋﻪﺭﻛﯩﻨﻠﯩﻚ ﺗﻪﺷﻜﯩﻼﺗﻰ ﺩﻭﻛﻼﺕ ﺋﯧﻼﻥ ﻗﯩﻠﯩﭗ ﺧﯩﺘﺎﻳﻨﻰ ﺋﻪﻳﯩﺒﻠﯩﺪﻯ

ﺑﺎﺵ ﺋﻮﺭﮔﯩﻨﻰ ﺋﺎﻣﯧﺮﯨﻜﯩﺪﯨﻜﻰ ﺩﯨﻨﯩﻲ ﺋﻪﺭﻛﯩﻨﻠﯩﻚ ﺗﻪﺷﻜﯩﻼﺗﻰ ﺑﯩﻠﻪﻥ ﺧﯩﺘﺎﻳﻐﺎ ﻳﺎﺭﺩﻩﻡ ﺑﯧﺮﯨﺶ ﺟﻪﻣﺌﯩﻴﯩﺘﻰ ﺑﯩﺮﻟﯩﻜﺘﻪ 2007 ‏- ﻳﯩﻠﻠﯩﻖ ﺧﯩﺘﺎﻱ ﻳﻪﺭ ﺋﺎﺳﺘﻰ ﺧﺮﺳﺘﻴﺎﻥ ﺩﯨﻨﯩﻲ ﺗﻪﺷﻜﯩﻼﺗﻠﯩﺮﯨﻨﯩﯔ ﻫﯚﻛﯜﻣﻪﺗﻨﯩﯔ ﺯﯨﻴﺎﻧﻜﻪﺷﻠﯩﻜﯩﮕﻪ ﺋﯘﭼﺮﯨﻐﺎﻧﻠﯩﻘﻰ ﺗﻮﻏﺮﯨﺴﯩﺪﯨﻜﻰ ﻳﯩﻠﻠﯩﻖ ﺩﻭﻛﻼﺗﯩﻨﻰ ﺋﯧﻼﻥ ﻗﯩﻠﺪﻯ.

ﺩﻭﻛﻼﺗﺘﺎ ﺋﯧﻴﺘﯩﻠﯩﺸﯩﭽﻪ، 2007 ‏- ﻳﯩﻠﻰ ﺧﯩﺘﺎﻳﺪﺍ ﻳﻪﺭ ﺋﺎﺳﺘﻰ ﺧﺮﺳﺘﻴﺎﻥ ﺩﯨﻨﯩﻲ ﺗﻪﺷﻜﯩﻼﺗﻠﯩﺮﯨﻨﯩﯔ ﺯﯨﻴﺎﻧﻜﻪﺷﻠﯩﻜﻜﻪ ﺩﯗﭺ ﻛﯧﻠﯩﺶ ﺋﻪﻫﯟﺍﻟﻰ 60 ﻗﯧﺘﯩﻤﻐﺎ ﻳﻪﺗﻜﻪﻥ ﺑﻮﻟﯘﭖ، 2006 ‏- ﻳﯩﻠﺪﯨﻜﯩﺪﯨﻦ 30 % ﺋﺎﺷﻘﺎﻥ، ﺯﯨﻴﺎﻧﻜﻪﺷﻠﯩﻜﻜﻪ ﺋﯘﭼﺮﯨﻐﺎﻥ ﺋﯚﻟﻜﻪ ﯞﻩ ﺋﺎﭘﺘﻮﻧﻮﻡ ﺭﺍﻳﻮﻥ ﺳﺎﻧﻰ 18 ﮔﻪ ﻳﻪﺗﻜﻪﻥ.

ﺗﻪﻧﻘﯩﺪﭼﯩﻠﻪﺭﻧﯩﯔ ﺑﯩﻠﺪﯛﺭﯛﺷﯩﭽﻪ، ﺧﯩﺘﺎﻳﺪﺍ ﻫﺎﻛﯩﻤﻴﻪﺕ ﻳﯜﺭﮔﯜﺯﯛﯞﺍﺗﻘﺎﻥ ﻛﻮﻣﻤﯘﻧﯩﺴﺘﯩﻚ ﭘﺎﺭﺗﯩﻴﻪ ﻫﯚﻛﯜﻣﯩﺘﻰ ﺗﺎﺭﯨﺨﺘﯩﻦ ﺑﯘﻳﺎﻥ ﺩﯨﻨﯩﻲ ﻛﯜﭼﻠﻪﺭﮔﻪ ﺩﯛﺷﻤﻪﻧﻠﯩﻚ ﺑﯩﻠﻪﻥ ﺯﯨﻴﺎﻧﻜﻪﺷﻠﯩﻚ ﻗﯩﻠﯩﭗ ﻛﻪﻟﻤﻪﻛﺘﻪ، ﺑﯩﺮﺍﻕ ﺋﯘﻻﺭ ﺋﯚﺯ ﻗﯩﻠﻤﯩﺸﻠﯩﺮﯨﻨﻰ ﻗﻪﺗﺌﯩﻲ ﺑﻮﻳﻨﯩﻐﺎ ﺋﺎﻟﻤﺎﻱ، ﺋﯚﺯﻟﯩﺮﯨﻨﯩﯔ ﺩﯨﻨﯩﻲ ﺋﯧﺘﯩﻘﺎﺩ ﺋﻪﺭﻛﯩﻨﻠﯩﻜﯩﻨﻰ ﻗﻮﻏﺪﺍﯞﺍﺗﻘﺎﻧﻠﯩﻘﯩﻨﻰ، ﭘﻪﻗﻪﺕ ﺩﯨﻨﯩﻲ ﻗﺎﻟﭙﺎﻕ ﻛﯩﻴﯩﯟﯨﻠﯩﭗ، ﻗﺎﻧﯘﻧﺴﯩﺰ ﭘﺎﺋﺎﻟﯩﻴﻪﺕ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺩﯨﻨﯩﻲ ﺗﻪﺷﻜﯩﻼﺭ ﯞﻩ ﺷﻪﺧﺴﻠﻪﺭﻧﻰ ﺑﺎﺳﺘﯘﺭﯗﯞﺍﺗﻘﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﻣﻪﻛﺘﻪ.

ﺧﯩﺘﺎﻳﺪﺍ ﺩﯨﻨﯩﻲ ﺑﯧﺴﯩﻤﻐﺎ ﺋﻪﯓ ﺋﯧﻐﯩﺮ ﺩﻩﺭﯨﺠﯩﺪﻩ ﺋﯘﭼﺮﺍﯞﺍﺗﻘﺎﻧﻼﺭ ﺋﯘﻳﻐﯘﺭﻻﺭ ﻫﯧﺴﺎﺑﻠﯩﻨﯩﺪﯗ، ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻨﯩﯔ ﺑﺎﻳﺎﻧﺎﺗﭽﯩﺴﻰ ﺩﯨﻠﺸﺎﺕ ﺭﯨﺸﯩﺘﻨﯩﯔ ﺑﯩﻠﺪﯛﺭﯛﺷﯩﭽﻪ، ﻫﻪﺗﺘﺎ ﺋﯚﻳﻠﯩﺮﯨﺪﻩ ﻗﯘﺭﺋﺎﻥ ﺳﺎﻗﻠﯩﻐﺎﻥ ﺋﯘﻳﻐﯘﺭﻻﺭ، ﻗﺎﻧﯘﻧﺴﯩﺰ ﺩﯨﻨﯩﻲ ﺋﯘﻧﺴﯘﺭ ﺩﻩﭖ ﻗﺎﺭﯨﻠﯩﻨﯩﭗ، ﺟﺎﺯﺍﻏﺎ ﺗﺎﺭﺗﯩﻠﻐﺎﻧﺪﯨﻦ ﺳﯩﺮﺕ، ﻫﯚﻛﯜﻣﻪﺕ ﺋﻮﺭﮔﺎﻧﻠﯩﺮﯨﺪﺍ ﺧﯩﺰﻣﻪﺕ ﻗﯩﻠﻐﯘﭼﯩﻼﺭ ﯞﻩ ﻣﻪﻛﺘﻪﭖ ﺋﻮﻗﯘﻏﯘﭼﯩﻠﯩﺮﯨﻨﯩﯔ ﻧﺎﻣﺎﺯ ﻗﯩﻠﯩﺶ ﺋﻪﺭﻛﯩﻨﻠﯩﻜﯩﻤﯘ ﻗﺎﺗﺘﯩﻖ ﭼﻪﻛﻠﻪﻧﮕﻪﻥ.