ﺧﯩﺘﺎﻳﺪﯨﻜﻰ ﺋﻪﯓ ﭼﻮﯓ ﺋﯩﻜﻜﻰ ﻧﯧﻔﯩﺖ ﺳﺎﻧﺎﺋﻪﺕ ﮔﯘﺭﯗﻫﯩﻨﯩﯔ ﻗﺎﻧﯘﻧﺴﯩﺰ ﺑﺎﻧﻜﯩﺪﯨﻦ ﭘﯘﻝ ﺋﺎﻟﻐﺎﻧﻠﯩﻘﻰ ﺗﻪﻛﺸﯜﺭﯛﻟﻤﻪﻛﺘﻪ

ﺧﯩﺘﺎﻱ ﺋﺎﺧﺒﺎﺭﺍﺕ ﺗﺎﺭﻣﺎﻗﻠﯩﺮﻯ ﺩﯛﺷﻪﻧﺒﻪ ﻛﯜﻧﻰ ﺑﻪﺭﮔﻪﻥ ﺧﻪﯞﻩﺭﻟﻪﺭﮔﻪ ﺋﺎﺳﺎﺳﻼﻧﻐﺎﻧﺪﺍ، ﺧﯩﺘﺎﻳﺪﯨﻜﻰ ﺋﻪﯓ ﭼﻮﯓ ﺋﯩﻜﻜﻰ ﻧﯧﻔﯩﺖ ﺳﺎﻧﺎﺋﻪﺕ ﮔﯘﺭﯗﻫﻰ ﺋﯚﺯﻟﯩﺮﯨﻨﯩﯔ ﻗﺎﻧﯘﻧﺴﯩﺰ ﻳﻪﺭ ﺋﺎﺳﺘﻰ ﺑﺎﻧﻜﯩﺪﯨﻦ ﭘﯘﻝ ﺋﺎﻟﻐﺎﻧﻠﯩﻘﻰ ﻣﻪﺳﯩﻠﯩﺴﻰ ﺋﯜﺳﺘﯩﺪﻩ ﺗﻮﺧﺘﯩﻠﯩﺸﻨﻰ ﺧﺎﻟﯩﻤﯩﻐﺎﻥ.

ﺧﯩﺘﺎﻳﺪﯨﻜﻰ ﺟﯘﯕﮕﻮ ﻧﯧﻔﯩﺖ ﯞﻩ ﺗﻪﺑﯩﺌﯩﻲ ﮔﺎﺯ ﮔﯘﺭﯗﻫﻰ ﺷﯩﺮﻛﯩﺘﻰ (中国石油天然气集团公司) ﯞﻩ ﺟﯘﯕﮕﻮ ﻧﯧﻔﯩﺖ- ﺧﯩﻤﯩﻴﻪ ﺳﺎﻧﺎﺋﯩﺘﻰ ﻫﻪﺳﺴﯩﺪﺍﺭﻟﯩﻖ ﭼﻪﻛﻠﯩﻚ ﺷﯩﺮﻛﯩﺘﻰ ( 中国石油化工股份有限公 ( ﻧﯩﯔ ﺗﺎﺭﻣﺎﻕ ﺷﯩﺮﻛﻪﺗﻠﯩﺮﻯ ﺧﯩﺘﺎﻳﻨﯩﯔ ﺷﯧﻨﺠﯧﻦ ﺷﻪﻫﯩﺮﯨﮕﻪ ﺟﺎﻳﻼﺷﻘﺎﻥ ﺑﯩﺮ ﻳﻪﺭ ﺋﺎﺳﺘﻰ ﺑﺎﻧﻜﯩﻨﯩﯔ ﺧﯧﺮﯨﺪﺍﺭﻯ ﺩﻩﭖ ﮔﯘﻣﺎﻥ ﻗﯩﻠﯩﻨﯩﭗ، ﺑﯘ ﺩﯦﻠﻮ ﺑﯘ ﻳﯩﻞ ﻳﺎﺯﺩﯨﻦ ﺑﯘﻳﺎﻥ ﺗﻪﻛﺸﯜﺭﯛﯞﺍﺗﻘﺎﻥ ﺋﯩﺪﻯ.

ﺑﯩﺮﻟﻪﺷﻤﻪ ﺋﺎﮔﯧﻨﺘﻠﯩﻘﯩﻨﯩﯔ "ﺋﯩﮕﯩﻠﯩﻚ ﻛﯚﺯﻩﺗﭽﯩﺴﻰ" ﮔﯧﺰﯨﺘﯩﺪﻩ ﺑﯘ ﻫﻪﻗﺘﻪ ﺑﯧﺮﯨﻠﮕﻪﻥ ﺧﻪﯞﻩﺭﻟﻪﺭﺩﯨﻦ ﻧﻪﻗﯩﻞ ﺋﯧﻠﯩﭗ ﻛﯚﺭﺳﯩﺘﯩﺸﯩﭽﻪ، ﺑﯘ ﻗﺎﻧﯘﻧﺴﯩﺰ ﺑﺎﻧﻜﺎ ﻣﻪﺯﻛﯘﺭ ﻧﯧﻔﯩﺖ ﺷﯩﺮﻛﻪﺗﻠﯩﺮﯨﻨﯩﯔ ﺧﻮﯕﻜﻮﯕﺪﺍ ﺋﯧﻠﯩﭗ ﺑﺎﺭﻏﺎﻥ ﻧﯧﻔﯩﺖ ﺳﻮﺩﯨﺴﯩﻨﯩﯔ ﺋﯧﻠﯩﻢ- ﺑﯧﺮﯨﻤﯩﻨﻰ ﺑﯩﺮ ﺗﻪﺭﻩﭖ ﻗﯩﻠﯩﭗ ﺑﯧﺮﯨﺪﯨﻜﻪﻥ.

ﺟﯘﯕﮕﻮ ﻧﯧﻔﯩﺖ- ﺧﯩﻤﯩﻴﻪ ﺳﺎﻧﺎﺋﯩﺘﻰ ﮔﯘﺭﯗﻫﻰ ﺷﯧﻨﺠﯧﻦ ﻧﯧﻔﯩﺖ ﺷﯩﺮﻛﯩﺘﯩﺪﯨﻜﻰ ﺟﺎﯓ ﻓﺎﻣﯩﻠﯩﻠﯩﻚ ﺑﯩﺮ ﺧﺎﺩﯨﻤﻨﯩﯔ ﺑﯩﻠﺪﯛﺭﯛﺷﯩﭽﻪ، ﻫﺎﺯﯨﺮ ﻫﯚﻛﯜﻣﻪﺗﻨﯩﯔ ﻣﯘﻧﺎﺳﯩﯟﻩﺗﻠﯩﻚ ﺗﺎﺭﻣﺎﻗﻠﯩﺮﻯ ﺑﯘ ﺩﯦﻠﻮﻧﻰ ﺗﻪﻛﺸﯜﺭﯛﯞﺍﺗﻘﺎﻥ ﺑﻮﻟﯘﭖ، ﺋﯘ " ﺷﯩﺮﻛﯩﺘﯩﻤﯩﺰ، ﺑﯘ ﻫﻪﻗﺘﻪ ﺑﺎﻳﺎﻧﺎﺕ ﺋﯧﻼﻥ ﻗﯩﻠﻤﺎﻳﺪﯗ" ﺩﯦﮕﻪﻥ ﺑﻮﻟﺴﺎ، ﻣﻪﺯﻛﯘﺭ ﺷﯩﺮﻛﻪﺗﻨﯩﯔ ﻳﻪﻧﻪ ﺑﯩﺮ ﻟﻴﯘ ﻓﺎﻣﯩﻠﯩﻠﯩﻚ ﺋﺎﻳﺎﻝ ﺧﺎﺩﯨﻤﻰ ﺷﯩﺮﻛﻪﺗﻨﯩﯔ ﺑﺎﺷﻘﺎ ﻣﯘﻧﺎﺳﯩﯟﻩﺗﻠﯩﻚ ﺭﻩﻫﺒﻪﺭﻟﯩﺮﯨﻨﯩﯔ ﺋﺎﻟﺪﯨﺮﺍﺵ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﮔﻪﻥ ﯞﻩ: "ﺑﯩﺰﮔﻪ ﺑﯘ ﻫﻪﻗﺘﻪ ﺗﻮﺧﺘﯩﻠﯩﺸﻘﺎ ﻫﻮﻗﯘﻕ ﺑﯧﺮﯨﻠﻤﯩﺪﻯ" ﺩﯦﮕﻪﻥ.

ﻣﻪﻟﯘﻡ ﺑﻮﻟﯘﺷﯩﭽﻪ، ﺷﻪﺧﺴﯩﻲ ﺋﯩﮕﯩﺪﺍﺭﭼﯩﻠﯩﻘﯩﺪﯨﻜﻰ ﻛﯩﭽﯩﻚ ﻛﺎﺭﺧﺎﻧﯩﻼﺭ ﻗﺎﻧﯘﻧﺴﯩﺰ ﻳﻪﺭ ﺋﺎﺳﺘﻰ ﺑﺎﻧﻜﯩﻼﺭ ﺑﯩﻠﻪﻥ ﭘﯘﻝ ﻣﯘﺋﺎﻣﯩﻠﯩﺴﻰ ﻗﯩﻠﯩﺪﯨﻐﺎﻥ ﺑﻮﻟﯘﭖ، ﺧﯩﺘﺎﻳﺪﯨﻜﻰ ﺩﯙﻟﻪﺕ ﺋﯩﮕﯩﺪﺍﺭﭼﯩﻠﯩﻘﯩﺪﯨﻜﻰ ﺷﯘﻧﺪﺍﻕ ﭼﻮﯓ ﺷﯩﺮﻛﻪﺗﻠﻪﺭﻧﯩﯔ ﻧﯧﻤﻪ ﺋﯜﭼﯜﻥ ﻗﺎﻧﯘﻧﺴﯩﺰ ﺑﺎﻧﻜﯩﻼﺭ ﺑﯩﻠﻪﻥ ﻫﻪﻣﻜﺎﺭﻻﺷﻘﺎﻧﻠﯩﻘﻰ ﺗﯧﺨﯩﭽﻪ ﻧﺎﻣﻪﻟﯘﻡ.

ﺧﯩﺘﺎﻳﻨﯩﯔ ﺋﺎﺧﺒﺎﺭﺍﺕ ﯞﺍﺳﯩﺘﯩﻠﯩﺮﻯ ﺑﻪﺭﮔﻪﻥ ﺧﻪﯞﻩﺭﻟﻪﺭﮔﻪ ﺋﺎﺳﺎﺳﻼﻧﻐﺎﻧﺪﺍ، ﺷﯧﻨﺠﯩﻨﺪﯨﻜﻰ ﺑﯘ ﻳﻪﺭ ﺋﺎﺳﺘﻰ ﺑﺎﻧﻜﺎ ﻳﻪﺗﺘﻪ ﻳﯩﻠﺪﯨﻦ ﺑﯘﻳﺎﻥ ﻣﻪﺯﻛﯘﺭ ﻧﯧﻔﯩﺖ ﺷﯩﺮﻛﻪﺗﻠﯩﺮﻯ ﺑﯩﻠﻪﻥ ﻣﯘﺋﺎﻣﯩﻠﻪ ﻗﯩﻠﯩﭗ ﻛﯧﻠﯩﯟﺍﺗﻘﺎﻥ ﺑﻮﻟﯘﭖ، ﻫﺎﺯﯨﺮﻏﺎ ﻛﻪﻟﮕﯩﭽﻪ، 4.3 ﻣﯩﻠﻴﺎﺭﺩ ﻳﯜﻩﻥ ﺧﯩﺘﺎﻱ ﭘﯘﻟﯩﻨﻰ ﺑﯩﺮ ﺗﻪﺭﻩﭖ ﻗﯩﻠﻐﺎﻥ.

ﺧﯩﺘﺎﻳﺪﯨﻜﻰ ﺑﯘ ﺋﯩﻜﻜﻰ ﭼﻮﯓ ﻧﯧﻔﯩﺖ ﮔﯘﺭﯗﻫﻰ ﻫﺎﺯﯨﺮﻏﯩﭽﻪ، ﺋﯘﻳﻐﯘﺭ ﺋﯩﻠﻰ ﻧﯧﻔﯩﺖ ﯞﻩ ﺗﻪﺑﯩﺌﯩﻲ ﮔﺎﺯﻟﯩﺮﯨﻨﻰ ﺋﯧﭽﯩﺸﻘﺎ ﯞﻩ ﭘﯩﺸﺸﯩﻘﻼﭖ ﺋﯩﺸﻠﻪﺷﻜﻪ ﺋﻪﯓ ﻛﯚﭖ ﻣﻪﺑﻠﻪﻍ ﺳﯧﻠﯩﯟﺍﺗﻘﺎﻥ ﯞﻩ ﺋﯘﻳﻐﯘﺭ ﺋﯧﻠﯩﺪﻩ ﻧﯧﻔﯩﺖ ﯞﻩ ﺗﻪﺑﯩﺌﯩﻲ ﮔﺎﺯ ﺯﺍﭘﯩﺴﯩﻨﻰ ﺗﯧﺨﯩﻤﯘ ﻛﯚﭖ ﺑﺎﻳﻘﺎﺷﻘﺎ ﺋﻪﯓ ﺋﺎﻟﺪﯨﺮﯨﯟﺍﺗﻘﺎﻥ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯩﮕﯩﺪﺍﺭﭼﯩﻠﯩﻘﯩﺪﯨﻜﻰ ﻧﯧﻔﯩﺖ ﺷﯩﺮﻛﻪﺗﻠﯩﺮﯨﺪﯗﺭ. (ﺟﯜﻣﻪ)