Ғуламидин пахтаниң һаяти (22): явропадин америкиға сәпәр

Мухбиримиз қутлан
2017-10-03
Елхәт
Пикир
Һәмбәһр
Принт
  • Принт
  • Һәмбәһр
  • Пикир
  • Елхәт
Ғуламидин пахта америкада зиярәттә болуватқан мәрһум әйса йүсүп алиптикингә һәмраһ болуп америка авам палатасиниң рәиси билән көрүшкән. Сүрәт: оңдин биринчи киши ғуламидин пахта, иккинчи киши америка авам палата рәиси җон виллиам мәккормак(John William McCormack), үчинчи киши әйса әпәнди. 1970-Йили нйо-йорк.
Ғуламидин пахта америкада зиярәттә болуватқан мәрһум әйса йүсүп алиптикингә һәмраһ болуп америка авам палатасиниң рәиси билән көрүшкән. Сүрәт: оңдин биринчи киши ғуламидин пахта, иккинчи киши америка авам палата рәиси җон виллиам мәккормак(John William McCormack), үчинчи киши әйса әпәнди. 1970-Йили нйо-йорк.
RFA/Qutlan

«Азадлиқ радийоси» ниң уйғурчә аңлитиши рәсмий тәсис қилинғандин кейин, 1960-йилларниң ахиридин 1970-йилларниң башлириғичә болған җәрянда уйғур бөлүминиң адәм күчи тәдриҗий көпийиду вә радийо программилириму хиллишиду.

1966-Йилиниң яз айлирида, йәни йирақтики уйғурлар вәтинидә хитай компартийәсиниң рәһбири мав зедоң қозғиған «мәдәнийәт зор инқилаби» ниң қара пәрдиси йейилған бир мәзгилләрдә ғуламидин әпәнди тунҗи қетим американи зиярәт қилиш пурситигә еришиду. Шу йили язда баш штаби мюнхендики «азадлиқ радийоси» ғуламидин әпәндини бир айлиқ мөһләт билән американи зиярәт қилишқа әвәтиду.

Һалбуки, шу қетимлиқ америка сәпири ғуламидин әпәндиниң кейинки һаят йолиниң явропа қуруқлуқидин америка қитәсигә йөткилишигә йол ачиду. Америка зияритидин қайтқан ғуламидин әпәнди узун өтмәйла «азадлиқ радийоси» түркистан бөлүминиң нйо-йоркта турушлуқ мухбирлиқиға тәйинлиниду. Һаятидики әң зор өзгиришләргә толған бу мәзгилләрни әслигинидә ғуламидин әпәнди әйни йиллири «азадлиқ радийоси» ниң уйғурчә аңлитишида бирликтә хизмәт қилған сәпдашлирини һөрмәт вә сеғиниш илкидә тилға алиду.

Ғуламидин пахтаниң баян қилишичә, у шу мәзгилләрдә йәнә «азадлиқ радийоси» ниң ню-йорктики бирләшкән дөләтләр тәшкилатида турушлуқ алаһидә мухбирилиқ салаһийити билән мәзкур радийониң уйғурчә, өзбәкчә вә башқа түркий тиллардики аңлитиши үчүн қошумчә хәвәр йоллаш вәзиписиниму өз үстигә алиду.

Һаятиниң яшлиқ йиллирини яшаватқан ғуламидин пахта кәлгүсигә болған үмид, ишәнч вә йеңичә арзулар билән йеңи қуруқлуқтики мәркизий шәһәр нйо-йоркқа келиду. Бу қетим у аяли вә туғулғиниға әмдила бирқанчә йил болған оғлини елип пүтүн аилиси билән америкиға көчүп келиду.

1960-Йилларниң ахирқи мәзгиллиридики нйо-йорк йеңилиққа, учқандәк тәрәққиятқа вә тәвәккүлчиләрниң қараргаһиға айланған бир чоң шәһәр иди. Нйо-йоркниң һаяти ғәрб дунясиниң әң қайнақ, әң өркәшлик вә әң риқабәтлик бир сәһиписигә вәкиллик қилатти. Мана мушу шәһәрниң һаятиға кирип кәлгән ғуламидин пахта нйо-йоркта туруп мюнхендики «азадлиқ радийоси» ниң түркистан бөлүми үчүн һәптидә икки хәвәр ишләп әвәтиду.

Америкаға көчүп кәлгән ғуламидин пахта узун өтмәй әйни йиллири германийәдә оқуған електрон техника кәспигә мунасивәтлик иккинчи бир хизмәткә орунлишиду. У германийәдики «азадлиқ радийоси» үчүн һәптики икки хәвәр ишләп әвәткәндин башқа йәнә «пан-америка һава йоллири» ниң електроник контрол бөлүмидә техник хадим болуп ишләйду.

(Давами бар)

Пикирләр (0)
  • Принт
  • Һәмбәһр
  • Елхәт
Толуқ бәт